Ang Bibliya Makabag-o sa Kinabuhi

UNSAY nakaaghat sa usa ka batan-ong babaye sa pagbalik sa relihiyon nga iyang gibiyaan? Basaha ang iyang asoy.

‘Duna Nay Katuyoan ang Akong Kinabuhi.’—LISA ANDRÉ

NATAWO: 1986

NASOD: LUXEMBOURG

KANIADTO: BULUYAGONG ANAK

KAAGI: Nagdako ko sa Bertrange, usa ka hinlo, luwas, ug mauswagong gamay nga lungsod duol sa siyudad sa Luxembourg. Ako ang kinamanghoran sa lima ka anak. Ang akong ginikanan mga Saksi ni Jehova, ug sila naningkamot nga matisok kanamong managsoon ang Kristohanong mga prinsipyo.

Sayo sa akong pagkatin-edyer, nagsugod ko pagduhaduha sa pagtulon-an sa mga Saksi ni Jehova. Sa primero, gibalewala nako kini, apan sa ngadtongadto nag-anam kahuyang ang akong pagtuo. Gihimo sa akong ginikanan ang tanan aron magiyahan ko sa hustong dalan, apan gisalikway ko kana. Wala silay kalibotan nga nakigbarkada ko sa mga batan-ong walay respeto sa awtoridad. Buot nako ang kagawasan nga daw ilang natagamtam. Magsige mig parti, makigsekso kang bisan kinsa, ug magdroga ug maghuboghubog. Sa sinugdan, ganahan kong makig-uban nila kay daw malipayon kaayo sila.

Apan sa tinuoray, wala gyod ko magmalipayon. Wala gyoy kahulogan ang akong kinabuhi uban nila; sila way pagpakabana. Sa kasukwahi, nabalaka ko sa mga butang sama sa kaylap nga inhustisya. Sa kadugayan, misamot kog kaguol.

GIBAG-O SA BIBLIYA ANG AKONG KINABUHI: Usa ka adlaw niana sa dihang nag-edad kog 17, ako nagmagul-anon kaayo. Kay nakita ni Mama nga dili ko malipayon, giawhag ko niyang magtuon pag-usab sa Bibliya. Gidasig ko niya sa pagsusi sa pagtulon-an niini ug dayon modesisyon kon buot nakong magkinabuhi uyon niana o dili. Ang maong prangkang panaghisgot nakapabag-o nako. Miuyon ko nga magtuon sa Bibliya uban sa akong magulang nga si Caroline ug sa iyang bana nga si Akif. Dako na si Akif sa dihang nahimong Saksi ni Jehova. Tungod sa iyang kagahapon, akong gibati nga mas gawasnon kong makig-estorya kaniya, nga importante alang nako.

Nahibalo ko nga ang akong pagkinabuhi dili angay sa usa ka Saksi, apan sa sinugdan, akong gibati nga ako ray maapektohan sa akong gibuhat. Apan sa akong pagtuon sa Bibliya,  naamgohan nako nga ang akong panggawi makaapektar kang Jehova. (Salmo 78:40, 41; Proverbio 27:11) Nasabtan usab nako nga makaapektar pod kini sa uban.

Sa dihang gisusi pa nako ang Bibliya, akong nakaplagan nga dunay makataronganon ug lig-ong mga rason sa pagtuo nga kini maoy Pulong sa Diyos. Pananglitan, akong nakat-onan ang daghang tagna sa Bibliya nga tukma kaayong natuman. Tungod niana nawala ang akong pagduhaduha.

Mga usa ka tuig human ko magsugod pagtuon sa Bibliya, kami sa akong ginikanan miduaw sa akong magulang nga lalaki nga usa ka boluntaryo sa sangang buhatan sa mga Saksi ni Jehova sa Germany. Sa dihang nakita nako ang kamalipayon sa akong igsoon, natandog kaayo ko. Kana nga kalipay ang akong gipangita! Nakadayeg sab ko sa ubang Saksi nga nagboluntaryo didto. Lahi ra kaayo sila sa akong kanhing mga higala nga dili-matinud-anon ug mahiligon sa kahilayan. Wala madugay human niana, kinasingkasing kong miampo kang Jehova, nga misaad nga moalagad kaniya sa tibuok nakong kinabuhi. Pagka-19 nako, akong gidedikar ang akong kinabuhi kang Jehova ug nagpabawtismo.

MGA KAAYOHAN NGA AKONG NABATONAN: Karon duna nay tinuod nga katuyoan ang akong kinabuhi. Malipay kong motudlog Bibliya sa uban, nga motabang kanila sa pagkat-on bahin kang Jehova ug sa iyang mga saad sa umaabot. Nakabenepisyo usab ang among pamilya kay wala na sila mabalaka nako.

Nasayod ko sa akong kanhing mga sala, apan naningkamot ko nga dili magsigeg hunahuna niana. Hinunoa, kanunay nakong gihunahuna ang pagkamapasayloon ni Jehova ug ang iyang gugma kanako. Ako mouyon gayod sa Proverbio 10:22 nga nag-ingon: “Ang panalangin ni Jehova—mao kana ang makapadato, ug dili niya kana dugangan ug kasakit.”

[Blurb sa panid 12]

“Magsige mig parti, makigsekso kang bisan kinsa, ug magdroga ug maghuboghubog”

[Blurb sa panid 13]

“Nasayod ko sa akong kanhing mga sala, apan naningkamot ko nga dili magsigeg hunahuna niana”