Kinsay Makahubad ug Tagna?

Ang Gordian knot gikaingon nga maoy kinalisorang badbaron nga baligtos sa mga adlaw ni Alejandrong Bantogan. Maalamon ug magmadaogon ang tawo nga makabadbad niana. * Sumala sa kasugiran, nahimo kini ni Alejandro pinaagi sa pagtigbas niana sa iyang espada.

LATAS sa katuigan, ang maalamong mga tawo naningkamot dili lang sa pagbadbad ug komplikadong mga baligtos kondili sa pagsulbad usab ug mga tigmo, paghubad ug mga tagna, ug bisan pagtagna sa umaabot.

Apan kasagaran, nalisdan sila niana. Pananglitan, ang maalamong mga tawo sa Babilonya wala makabadbad sa milagrosong sinulat sa kamot nga nakita sa bungbong sa palasyo ni Haring Belsazar atol sa usa ka mapatuyangong kombira. Si Daniel lang—ang tigulang nang propeta ni Jehova nga Diyos, nga nailhan sa “pagsulbad sa mga gumonhap”—ang nakabadbad niana nga matagnaong mensahe. (Daniel 5:12) Kana nga tagna bahin sa pagkapukan sa Imperyo sa Babilonya natuman niadtong gabhiona mismo!—Daniel 5:1, 4-8, 25-30.

Unsa ang Tagna?

Ang tagna maoy pagpadayag sa umaabot, mga panghitabo nga girekord una pa mahitabo. Ang tinuod nga tagna maoy inspiradong mensahe, sinulat o gisulti, usa ka pagpadayag sa kabubut-on ug katuyoan sa Diyos. Sa Bibliya, makaplagan ang mga tagna bahin sa pag-abot ug sa ilhanan sa Mesiyas ug “sa kataposan sa sistema sa mga butang,” ingon man ang mga mensahe sa paghukom sa Diyos.—Mateo 24:3; Daniel 9:25.

Ang “maalamong mga tawo” karon—mga eksperto sa siyensiya, ekonomiya, panglawas, politika, kalikopan, ug sa uban pang natad—misulay pagtagna sa umaabot. Bisag daghan nianang mga panagnaa ang gipakaylap sa media—ug gidawat dayon sa publiko—sa tinuod, kana maoy mga panaghap nga gibase lang sa ilang nahibaloan sa usa ka situwasyon ug sa personal nga opinyon. Dugang pa, sa matag opinyon, daghan usab ang mga kontra-argumento. Peligroso gayod ang pagtagna sa umaabot.

Ang Tinubdan sa Tinuod nga Tagna

Nan, diin maggikan ang tinuod nga mga tagna, ug kinsay makabadbad niana? Si apostol Pedro misulat: “Walay panagna sa Kasulatan nga nagagikan sa kaugalingong interpretasyon.” (2 Pedro 1:20) Ang Gregong pulong alang sa “interpretasyon” nagkahulogag “solusyon, pagpadayag,” ug dunay ideya nga “kon unsay gipadayag o gibadbad, gitago kaniadto.” Busa, ang The Amplified New Testament naghubad sa mga pulong ni Pedro: “Walay tagna sa Kasulatan nga gibase sa personal nga . . . pagbadbad.”

Handurawa ang usa ka marinero nga naghimog komplikadong baligtos. Sa dihang nahuman kana, ang tawo nga walay hibangkaagan niana makakita sa pisi nga gibaligtos, apan dili siya segurado kon unsaon kana pagbadbad. Sa susama, makita sa mga tawo ang panghitabo nga motultol sa komplikadong mga problema, apan dili sila segurado kon unsa gayoy mahitabo sa umaabot.

 Ang inspiradong mga propeta sa karaang panahon, sama kang Daniel, wala mag-analisar sa mga panghitabo sa ilang panahon ug dayon mosulay pagtagna sa mahitabo sa umaabot. Kon ingon niana ang ilang himoon, ang maong pagpanagna maggikan sa ilang kaugalingong hunahuna. Kana mahimong panagna lang sa tawo, nga dili hingpit ang pasukaranan. Hinunoa, si Pedro misaysay: “Walay panagna bisan kanus-a nga midangat pinaagi sa kabubut-on sa tawo, hinunoa ang mga tawo nagsulti gikan sa Diyos samtang sila giagak sa balaang espiritu.”—2 Pedro 1:21.

‘Ang mga Paghubad Iya sa Diyos’

Mga 3,700 ka tuig kanhi, duha ka lalaki ang nabilanggo sa Ehipto. Sila parehong may makalibog nga damgo. Kay wala man silay kapangutan-an nga maalamong mga tawo, ila kanang gisugid sa ilang isigkapiniriso nga si Jose, nga nag-ingon: “Kami nagdamgo ug usa ka damgo, ug walay tighubad kanamo.” Busa gidasig sila ni Jose nga isulti kana kaniya, nga miingon: “Dili ba ang mga paghubad iya man sa Diyos?” (Genesis 40:8) Si Jehova nga Diyos lang ang makabadbad ug mga tagna, sama sa usa ka batid nga marinero nga makabadbad ug komplikadong mga baligtos. Kon buot hunahunaon, ang Diyos maoy tinubdan sa maong mga tagna. Busa makataronganong modangop ta niya alang sa kahulogan niana. Oo, husto ang giingon ni Jose.

Nan, unsay buot ipasabot sa giingong ‘ang mga paghubad iya sa Diyos’? Dunay daghang ebidensiya nga tinuod kana. Ang pipila ka tagna sa Bibliya girekord uban ang katumanan niana. Kini daling mabadbad, sama sa pipila ka baligtos nga isulti nang daan sa marinero kon unsaon pagbadbad.—Genesis 18:14; 21:2.

Ang ubang tagna mahimong mapatin-aw ug mabadbad pinaagi sa pagsusi sa konteksto. Si propetang Daniel may matagnaong panan-awon bahin sa ‘laking karnero nga may duha ka sungay’ nga mihampak sa “balhiboong laking kanding” nga may ‘dakong sungay taliwala sa iyang mga mata.’ Gipakita sa konteksto nga ang laking karnero nga may duha ka sungay naghawas sa “mga hari sa Media ug sa Persia” ug ang kanding, “sa hari sa Gresya.” (Daniel 8:3-8, 20-22) Kapig 200 ka tuig sa ulahi, ang “dakong sungay”—si Alejandrong Bantogan—misugod pagsakop sa Persia. Giasoy sa Hudiyong historyano nga si Josephus nga sa pagsakop ni Alejandro sa palibot sa Jerusalem, siya gipakitaan niining tagnaa ug nagtuo nga nagtumong kana kaniya.

‘Ang mga paghubad iya sa Diyos’ sa lain pang diwa. Giniyahan sa balaang espiritu, si Jose nga matinumanong alagad ni Jehova nga Diyos, nakasabot sa kahulogan sa makapalibog nga mga damgo nga gisugid sa iyang mga isigkapiniriso. (Genesis 41:38) Sa dihang ang mga alagad sa Diyos karon dili segurado sa kahulogan sa usa ka tagna, sila mag-ampo alang sa espiritu sa Diyos ug dayon makugihong magtuon ug manukiduki sa Pulong sa Diyos nga inspirado sa espiritu. Pinaagi sa giya sa Diyos, ilang makita ang mga teksto nga magsaysay sa kahulogan sa pipila ka tagna. Ang paghubad dili milagrosong maggikan ni bisan kinsang tawo. Kini maggikan sa Diyos tungod kay pinaagi sa iyang espiritu ug sa iyang Pulong nga ang kahulogan mahimong tin-aw. Ang paghubad dili maggikan sa tawhanong mga mananagna nga wala hisgoti sa Bibliya.—Buhat 15:12-21.

‘Ang mga paghubad iya usab sa Diyos’ kay siya ang magtino kon kanus-a masabtan sa iyang matinumanong mga alagad sa yuta ang usa ka tagna. Ang kahulogan sa usa ka tagna mahimong masabtan una pa, panahon sa, o human sa katumanan niana. Sanglit ang Diyos man ang tinubdan sa mga tagna, iya kanang badbaron sa hustong panahon—sa iyang panahon.

Sa asoy bahin kang Jose ug sa duha ka piniriso, gihubad niya ang mga damgo tulo ka adlaw una kana mahitabo. (Genesis 40:13, 19) Sa ulahi, sa dihang si Jose gipaatubang sa gamhanang si Paraon aron ipatin-aw ang mga damgo niini, hapit nang mosugod ang pito ka tuig sa kadagaya. Sa tabang sa espiritu sa Diyos, gibadbad  ni Jose ang kahulogan sa mga damgo ni Paraon aron makahimog kahikayan alang sa pagtigom sa gitagnang dagaya nga ani.—Genesis 41:29, 39, 40.

Ang ubang tagna bug-os nga masabtan sa mga alagad sa Diyos human lang sa katumanan niana. Daghang hitabo sa kinabuhi ni Jesus ang gitagna kasiglohan sa wala pa siya matawo, apan bug-os lang kining nasabtan sa iyang mga tinun-an human sa iyang pagkabanhaw. (Salmo 22:18; 34:20; Juan 19:24, 36) Sa kataposan, sumala sa Daniel 12:4, ang pipila ka tagna ‘timbrehan’ una “hangtod sa panahon sa kataposan” sa dihang, matod ni Daniel, “ang matuod nga kahibalo modagaya.” Kita nagkinabuhi na sa panahon nga kining mga tagnaa nagakatuman. *

Ikaw ug ang mga Tagna sa Bibliya

Si Jose ug Daniel miatubang sa mga hari sa ilang adlaw ug nagpahayag ug matagnaong mensahe nga nag-apektar sa mga nasod ug gingharian. Ang mga Kristohanon sa unang siglo miatubang sa mga tawo sa ilang adlaw ingong mga tigpamaba ni Jehova, ang Diyos sa tagna, ug nagdalag dakong kaayohan niadtong misanong sa ilang mensahe.

Karon, ang mga Saksi ni Jehova sa tibuok kalibotan nagmantala ug matagnaong mensahe—ang maayong balita sa Gingharian sa Diyos—ug nagsulti sa mga tawo nga ang tagna ni Jesus bahin sa “kataposan sa sistema sa mga butang” nagakatuman. (Mateo 24:3, 14) Nahibalo ka ba kon unsa kanang tagnaa ug kon sa unsang paagi kana makaapektar nimo? Ang mga Saksi ni Jehova andam sa pagtabang nimo nga masabtan ang kinadak-ang tagna sa Bibliya ug makabenepisyo niana.

[Mga footnote]

[Mga hulagway sa panid 12, 13]

Giila ni Jose ug Daniel nga iya sa Diyos ang paghubad sa tagna