Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Nganong giorganisar sa Diyos ang mga Israelitas?

Giorganisar sa Diyos ang kaliwat ni Abraham sa usa ka nasod ug gihatagan silag mga balaod. Gitawag niya kinig Israel ug gihatagan silag responsabilidad sa pagpanalipod sa matuod nga pagsimba ug sa iyang Pulong, ang Balaang Kasulatan. (Salmo 147:​19, 20) Busa, ang katawhan sa tanang kanasoran nakabenepisyo niini.​—⁠Basaha ang Genesis 22:⁠18.

Gipili sa Diyos ang mga Israelitas nga mahimo niyang mga saksi. Sa dihang sila nagmasinugtanon, sila nakabenepisyo sa iyang mga balaod. (Deuteronomio 4:⁠6) Pinaagi sa pagtuon sa kasaysayan sa mga Israelitas, mas mailhan nato ang matuod nga Diyos.​—⁠Basaha ang Isaias 43:​10, 12.

2. Nganong giorganisar ang matuod nga mga Kristohanon?

Sa ulahi, ang Israel nawad-ag pabor sa Diyos, ug gipulihan kana ni Jehova sa Kristohanong kongregasyon. (Mateo 21:43; 23:​37, 38) Kaniadto, ang mga Israelitas maoy mga saksi sa Diyos. Karon, ang matuod nga mga Kristohanon maoy mga saksi ni Jehova.​—⁠Basaha ang Buhat 15:​14, 17.

Giorganisar ni Jesus ang iyang mga sumusunod aron mosaksi bahin kang Jehova ug maghimog mga tinun-an sa tanang nasod. (Mateo 10:​7, 11; 24:14; 28:​19, 20) Kining buluhatona anaa na sa kinapungkayan niini. Sa unang higayon, gihiusa ni Jehova sa matuod nga pagsimba ang minilyon gikan sa tanang kanasoran. (Pinadayag 7:​9, 10) Ang matuod nga mga Kristohanon giorganisar usab aron magdinasigay ug magtinabangay. Sa tibuok kalibotan, ilang nabatonan ang samang programa sa pagtudlog Bibliya diha sa ilang mga tigom.​—⁠Basaha ang Hebreohanon 10:​24, 25.

  3. Unsay sinugdanan sa mga Saksi ni Jehova sa modernong panahon?

Ang modernong-adlaw nga organisasyon sa mga Saksi ni Jehova nagsugod sa katuigan sa 1870. Usa ka gamayng grupo sa mga estudyante sa Bibliya ang nakakaplag pag-usab sa kamatuoran sa Bibliya nga dugay nang nawala. Sila nahibalo nga giorganisar ni Jesus ang Kristohanong kongregasyon aron mosangyaw. Busa, ilang gihimo ang pagsangyaw sa Gingharian sa tibuok kalibotan. Sa 1931 ilang gisagop ang ngalang mga Saksi ni Jehova.​—⁠Basaha ang Buhat 1:8; 2:​1, 4; 5:⁠42.

4. Sa unsang paagi giorganisar karon ang mga Saksi ni Jehova?

Sa unang siglo, ang Kristohanong kongregasyon sa daghang dapit nakabenepisyo gikan sa usa ka nagamandong lawas nga nag-ila kang Jesus ingong Ulo sa kongregasyon. (Buhat 16:​4, 5) Sa susama, giila sa mga Saksi ni Jehova karon si Jesus ingong ilang Pangulo. (Mateo 23:​9, 10) Sila nakabenepisyo usab gikan sa giya sa usa ka Nagamandong Lawas sa eksperyensiyadong mga ansiyano nga naghatag ug pagdasig ug direksiyon gikan sa Kasulatan alang sa kapig 100,000 ka kongregasyon. Sa matag kongregasyon, ang kuwalipikadong mga lalaki nag-alagad ingong ansiyano, o magtatan-aw. Sila mahigugmaong nag-atiman sa panon sa Diyos.​—⁠Basaha ang 1 Pedro 5:​2, 3.

Ang mga Saksi ni Jehova giorganisar aron magsangyaw sa maayong balita ug maghimog mga tinun-an. Aron matabangan ang mga tawo sa tanang dapit, ilang gihubad, gipatik, ug giapod-apod ang binase-sa-Bibliyang mga basahon sa kapig 500 ka pinulongan. Sama sa mga apostoles, sila nagsangyaw sa balay ug balay. (Buhat 20:20) Sila nagtanyag ug pagtuon sa Bibliya niadtong sinserong nahigugma sa kamatuoran. Sanglit nasentro ang pagtagad sa katawhan ni Jehova diha sa pagpahimuot kaniya ug sa pagtabang sa uban, sila maoy organisasyon sa malipayong katawhan.​—⁠Basaha ang Salmo 33:12; Buhat 20:⁠35.

Alang sa dugang impormasyon, tan-awa ang kapitulo 19 niini nga basahon, Unsay Tinuod nga Gitudlo sa Bibliya?,  nga gipatik sa mga Saksi ni Jehova.