Ika-131 nga Graduwasyon sa Gilead

‘Pahimut-i si Jehova’

ANG pamilya, mga higala, ug bisita nagtigom niadtong Septiyembre 10, 2011, aron sa pagtambong sa graduwasyon sa ika-131 nga klase sa Watchtower Bible School of Gilead. Sa sinugdan pa lang, sagol kulba ug kahinam ang gibati sa mga mamumulong ug estudyante. Apan pagkahuman sa programa, ang 9,063 nga nanambong mapahiyomon ug nadasig sa mga pakigpulong, demonstrasyon, ug mga interbiyo.

Si Stephen Lett, nga membro sa Nagamandong Lawas sa mga Saksi ni Jehova ug tsirman sa programa, maoy unang nagpakigpulong. Iyang gisaysay ang mga teksto sa Bibliya nga naghisgot kang Jehova ingong dunay mahulagwayong lawas ug gisentro ang pagtagad sa kon giunsa paggamit ni Jehova ang iyang mahulagwayong mga mata, dalunggan, kamot, ug bukton.

Una, gibasa sa mamumulong ang 2 Cronicas 16:​9, nga nag-ingong ang “mga mata [ni Jehova] nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” Ang mga estudyante gidasig sa paghupot ug kasingkasing nga bug-os napahinungod kang Jehova. Giingnan sila nga masundog nila ang Diyos pinaagi sa pagtan-aw sa maayong hiyas sa mga tawo. Sunod, gihisgotan ni Brader Lett ang 1 Pedro 3:​12, nga nag-ingong ang igdulungog ni Jehova gikiling sa pangamuyo sa mga matarong. Iyang giawhag ang mga estudyante sa pag-ampo kanunay, nga hinumdomang buot gayod ni Jehova nga dunggon ang ilang pag-ampo.

Gisaysay usab sa mamumulong ang Isaias 41:​13, diin si Jehova misaad: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’” Sa kamainiton, si Brader Lett miingon: “Matikdi kining makapatandog kaayong pahayag ni Jehova. Iyang gituy-od ang iyang kamot aron hawiran ang atong kamot.” Dayon, iyang giingnan ang mga estudyante nga kanunayng tugotan si Jehova sa pagtabang kanila ug dili gayod kana isalikway. Siya miingon usab nga masundog sa mga estudyante si Jehova pinaagi sa pagtuy-od sa ilang kamot aron tabangan ang uban.

Sa kataposan, gibasa ni Brader Lett ang Isaias 40:11. Iyang giawhag ang mamiminaw sa paghanduraw sa malumong pagbati nga gipakita nianang tekstoha. “Kita gitigom ni Jehova pinaagi sa iyang mga bukton,” miingon si Brader Lett. “Kita iyang gikugos.” Sa unsang paagi kita mosanong? Ang mga estudyante gitambagan nga magmalumo sama sa usa ka gamayng karnero aron ganahan si Jehova nga mokugos nila.

‘Nabatonan Nato Kini nga Bahandi Diha sa mga Sudlanang Kulonon’

Si David Splane sa Nagamandong Lawas naghisgot niining Kasulatanhong tema. (2 Corinto 4:⁠7) Unsa man ang bahandi? Kini ba kahibalo o kaalam? “Dili,” matod sa mamumulong. “Ang bahandi nga gihisgotan ni Pablo dinhi mao ang ‘ministeryo’ sa ‘pagpadayag sa kamatuoran.’” (2 Corinto 4:​1, 2, 5) Gipahinumdoman ni Brader Splane ang mga estudyante nga ang lima ka bulan nga ilang gigugol sa pagtuon maoy pagpangandam alang sa linaing asaynment sa ministeryo. Kana maoy angay nilang pabilhan pag-ayo.

Gipatin-aw sa mamumulong nga ang “sudlanan nga kulonon” nagtumong sa atong lawas. Iyang gitandi ang sudlanang kulonon nianang gama sa bulawan. Ang mga sudlanang bulawan dili pirmeng gamiton. Sa laing bahin, ang mga sudlanang kulonon kanunayng gamiton. Kon kita magbutang ug bahandi sa sudlanang bulawan, mas mahatagan natog pagtagad ang sudlanan inay ang bahandi nga gisulod niini. “Dili ninyo buot nga kamo ang hatagag pagtagad sa mga tawo,” giingnan ni Brader Splane ang mga estudyante. “Ingong mga misyonaryo, buot ninyong  danihon ang mga tawo ngadto kang Jehova. Kamo maoy mapainubsanong mga sudlanang kulonon.”

Sa pagpadayon sa pagtandi, ang mamumulong miingon nga sa kapanahonan sa Bibliya ang pipila ka sudlanang kulonon dili daling masunog, ug ang uban gisapawag baga nga pangpasinaw aron dili daling matipak. Unsay gipakita niini? Sa unang mga bulan sa ilang asaynment, ang mga misyonaryo sa walay duhaduha makasinatig kalisdanan nga makatabang nila sa paglahutay. Sila dili daling maapektohan sa kritisismo, dili daling mahiubos. “Inyong makita nga kamo mas lig-on kay sa inyong gihunahuna,” miingon si Brader Splane. Si Jehova nagpiyal niini nga bahandi sa ministeryo, dili sa mga manulonda, kondili sa mga sudlanang kulonon. “Nagpakita kana nga si Jehova may pagsalig kaninyo,” matod sa mamumulong.

“Uban sa mga Magbabaktas Ikaw Midagan . . . Unsaon man Nimo Pagpakiglumba sa mga Kabayo?”

“Unsa ka layo ug unsa ka paspas ang inyong pagdagan?” nangutana si Samuel Herd nga membro sa Nagamandong Lawas. Nganong gipangutana man niya niana ang mga estudyante? Iyang gitandi ang kasinatian sa mga estudyante nianang kang propetang Jeremias. Kini nga matinumanong tawo nalisdan sa pagsagubang sa kalisdanan nga iyang giatubang. Apan mas dagko ang pagsulay nga anaa sa unahan. Busa gipangutana siya ni Jehova: “Kay uban sa mga magbabaktas ikaw midagan, ug sila nagpakapoy kanimo, nan, unsaon man nimo pagpakiglumba sa mga kabayo?”​—⁠Jeremias 12:⁠5.

Sa pagpadapat niining puntoha sa mga estudyante, si Brader Herd miingon: “Tingali mibati mo nga nakiglumba mo sa mga kabayo tungod sa inyong mga eksamin. Apan sa pagkatinuod nagadagan kamo uban sa mga magbabaktas, dili sa mga kabayo. Sa inyong mga asaynment kamo makiglumba na sa mga kabayo, o mag-atubang ug mas dagkong kalisdanan kay sa inyong gihunahuna karon. Unsa may inyong dangatan? Ang Gilead nag-andam kaninyo sa pagpakiglumba sa mga kabayo nga dili mo kapoyon.” Iyang gidasig ang mga estudyante nga bansayon kanunay ang ilang kaugalingon sa espirituwal, nga padayong maghupot ug maayong rutina sa pagtuon sa Bibliya ug sa pag-ampo.

Giila ni Brader Herd nga sa umaabot ang pipila niadtong ipadala ingong mga misyonaryo mahimong maluya o dili tagdon sa ilang gisangyawan. Ang uban masakit o mobating dili takos. Apan iyang gipasaligan ang mga estudyante nga sila may tuboran sa kalig-on nga motabang nila sa pagbuntog sa bisan unsang dili maayong kahimtang. “Kamo man nagadagan uban sa mga magbabaktas o nakiglumba sa mga kabayo,” matod sa mamumulong, “makasalig kamo nga ang gamhanang kamot sa Diyos makatabang kaninyo nga makaabot sa dag-anan. Kamo mahimong malamposong mga misyonaryo alang sa kadungganan ug kadayeganan ni Jehova.”

Uban Pang Bahin sa Programa

“Ayaw Limitehi ang Imong Kaugalingon sa Pipila Lamang.” Si John Ekrann, nga membro sa Branch Committee sa United States, naghisgot sa asoy bahin kang propetang Eliseo ug sa babayeng balo kansang mga anak kuhaon na unta kaniya ug ibaligya ingong mga ulipon. (2 Hari 4:​1-7) Kini nga balo diha lamay gamayng tibod sa lana. Gisugo siya ni Eliseo nga manghulam ug sudlanan sa iyang mga silingan, nga nag-ingon: “Ayaw limitehi ang imong kaugalingon sa pipila lamang.” Pinaagi kang Eliseo, milagrosong gipuno ni Jehova ug lana ang tanang sudlanan nga nahulam sa balo. Dayon gibaligya sa balo ang lana ug igo-igo gyod ang halin niana nga ikabayad sa iyang mga utang ug ikasustento sa iyang pamilya sa dugay-dugayng panahon.

Unsay makat-onan sa umaabot nga mga misyonaryo niining asoya? Sa dihang nanghulam ang balo ug mga sudlanan, tingali wala gyod siya mamili. “Lagmit iyang gihulam ang bisan unsa nga kasudlag lana,” matod sa mamumulong, “ug tingali ang mas dagko pa.” Dayon, giawhag ni Brader Ekrann ang mga estudyante nga dawaton ang bisan unsang asaynment, gamay man o dako. “Ayawg pamili,” siya miingon. Gipahinumdoman usab niya ang mga estudyante nga ang gidak-on sa panalangin nga nadawat sa balo  nagdepende sa iyang pagpaminaw sa mga instruksiyon ni Eliseo. Unsay makat-onan niini sa mga estudyante? Ang gidak-on sa panalangin nga atong madawat nagdepende sa atong kasibot ug sa kadako sa atong pagtuo. “Himoa ang inyong maarangan,” matod sa mamumulong.

“Sila Maoy Tinapay Alang Kanato.” Si William Samuelson, tagdumala sa Theocratic Schools Department, nagpahayag niini nga tema, nga gikuha sa Numeros 14:⁠9. Iyang gipasiugda ang maayong ehemplo ni Josue ug Caleb. Ang pulong nga “tinapay” niining tekstoha nagpasabot nga ang mga molupyo sa Canaan dali rang mapildi ug nga ang maong kasinatian makapalig-on sa Israel. Unsay makat-onan niini sa mga estudyante? “Sa inyong umaabot nga buluhaton sa ministeryo,” matod sa mamumulong, “isipa nga ang mga hagit makapalig-on kaninyo.”

“Ang Ila Bang Pagtuo Samag Sakayan nga Lig-on ang Pagkaangkla nga Dili Mapadpad sa Bagyo?” Si Sam Roberson, usa sa mga instruktor, naghisgot sa pasidaan ni Pablo nga ang pipila “nakasinatig pagkalunod labot sa ilang pagtuo.” (1 Timoteo 1:19) Iyang giawhag ang mga estudyante sa pag-ugmad diha sa uban ug pagtuo nga lig-on ang pagkaangkla kang Jehova nga Diyos. “Ang inyong buluhaton,” matod niya, “ikatandi nianang sa mananalsal.” Sa unsang paagi? Weldingon sa mananalsal ang mga kutay sa kadena nga lig-ong makaangkla sa usa ka sakayan. Sa susama, tabangan sa mga misyonaryo ang ilang ginatun-an sa Bibliya sa pag-ugmad ug espirituwal nga mga hiyas nga gikinahanglan aron maluwas.

Gipakasama sa mamumulong ang mga kutay sa kadena sa walo ka hiyas nga gihisgotan sa 2 Pedro 1:​5-8. Si Brader Roberson miingon nga kon tabangan sa misyonaryo ang ilang ginatun-an nga masabtan kon giunsa pagpakita ni Jehova kana nga mga hiyas, lagmit maugmad sa mga estudyante ang lig-ong relasyon kang Jehova. Sila makalahutay sa bisan unsang bagyo sa kalisdanan nga mosulay sa ilang pagtuo.

Mga Eksperyensiya ug Interbiyo

Si Michael Burnett, nga lain pang instruktor, nag-awhag sa mga estudyante sa Gilead sa pag-asoy ug pagpasundayag sa pipila nila ka eksperyensiya sa pagsangyaw. Ang mga mamiminaw nalipay nga ang mga estudyante nakasangyaw sa shopping mall, erport, sa balaybalay, ug bisan gani sa usa ka tawo nga nasayop pagdayal sa telepono.

Dayon, si Michael Hansen sa Pamilyang Bethel sa United States nag-interbiyo ug tulo ka brader nga tag-as ug kasinatian ingong misyonaryo​—⁠si Stephen McDowell sa Panama, Mark Noumair sa Kenya, ug William Yasovsky sa Paraguay. Ang ilang gipahayag nagpasiugda sa tema sa pakigpulong nga “Nagakalipay sa Pagbuhat sa Kabubut-on ni Jehova.” (Salmo 40:⁠8) Pananglitan, gihisgotan ni Mark Noumair ang espesipikong mga hinungdan sa kalipay nga gibati nila sa iyang asawa samtang sila nag-alagad sa ilang asaynment. Nakahatag ug dakong kalipay sa magtiayon ang ilang pakighigalaay sa mga Saksi didto. Nakapalipay usab nila nga ang mga igsoon misunod sa mga instruksiyon, naghimog dagkong kabag-ohan sa ilang kinabuhi, ug nga gipanalanginan ni Jehova ang ilang paningkamot. Iyang gipasaligan ang mga estudyante nga ilang bation ang mas dako pang kalipay sa umaabot.

Human basaha sa usa ka estudyante sa ika-131 nga klase ang usa ka sulat nga nagpahayag sa ilang apresasyon, gitapos ni Brader Lett ang programa pinaagi sa pagdasig sa mga graduwado sa paglihok nga maalamon. Kon buhaton nila kana, matod niya, ilang “mapahimut-an si Jehova.” Segurado nga kini nga mga misyonaryo makapahimuot kang Jehova samtang sila matinumanong mag-alagad kaniya didto sa ilang mga asaynment.​—⁠Isaias 65:⁠19.

 [Chart/Mapa sa panid 31]

ESTADISTIKA SA KLASE

10 ka nasod nga girepresentahan

34.7 aberids nga edad

19.0 aberids nga tuig sukad sa bawtismo

13.5 aberids nga tuig sa bug-os-panahong pag-alagad

[Mapa]

(Alang sa aktuwal nga pagkahan-ay, tan-awa ang publikasyon)

Ang mga estudyante giasayn sa mga nasod nga gipakita sa ubos

MGA NASOD NGA GIPADALHAN

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Hulagway sa panid 30]

Gipasundayag sa mga estudyante ang usa sa ilang mga eksperyensiya sa pagsangyaw

[Hulagway sa panid 31]

Ika-131 nga Klase nga Migraduwar sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.