Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Sa unsang paagi angayng handomon ang kamatayon ni Jesus?

Giingnan ni Jesus ang iyang mga sumusunod nga handomon ang iyang kamatayon pinaagig mahulagwayong panihapon, gamit ang tinapay ug bino. Ang tinapay nagsimbolo sa lawas ni Jesus, ug ang bino sa iyang dugo.—Basaha ang Lucas 22:19, 20.

Ang tinapay nga gigamit ni Jesus walay lebadura, o igpapatubo. Sa Bibliya, ang igpapatubo sagad gigamit sa pagrepresentar sa sala. Busa ang tinapay maoy haom nga simbolo sa hingpit nga lawas ni Jesus. Iyang gihalad ang iyang lawas, nga maoy nagtapos sa mga halad nga mananap ilalom sa Moisesnong Balaod. (Hebreohanon 10:5, 9, 10) Ang bino nagsimbolo sa bililhong dugo ni Jesus nga giula ingong halad sa atong mga sala.—Basaha ang 1 Pedro 1:19; 2:24; 3:18.

2. Kanus-a nato handomon ang kamatayon ni Jesus?

Si Jesus namatay sa Paskuwa, Nisan 14. Ang Hudiyohanong adlaw magsugod inigsalop sa adlaw. Sa gabii una siya mamatay, si Jesus mikaon sa panihapon sa Paskuwa uban sa iyang mga apostoles ug dayon gisugdan ang bag-ong memoryal nga panihapon aron sa paghandom sa iyang kamatayon.—Basaha ang Lucas 22:14, 15.

Karon, ang katawhan sa Diyos naghandom sa Iyang gitagana pinaagi kang Jesus aron ipahigawas ang tibuok kalibotan sa sala ug kamatayon. (Exodo 12:5-7, 13, 17) Maingon nga ang Paskuwa gisaulog kas-a sa usa ka tuig, ang Memoryal sa kamatayon ni Jesus ginahimo kas-a sa usa ka tuig human sa pagsalop sa adlaw sa Nisan 14 sumala sa lunar nga kalendaryo sa Bibliya.—Basaha ang Juan 1:29.

 3. Kinsa ang angayng makig-ambit sa tinapay ug bino?

Sa dihang gihatag ni Jesus ang bino sa iyang mga sumusunod, siya miingon: “Kini nga kopa nagkahulogan sa bag-ong pakigsaad.” (1 Corinto 11:25) Gipulihan sa bag-ong pakigsaad ang pakigsaad sa Moisesnong Balaod, diin gisaaran sa Diyos ang mga Israelitas nga kon sila bug-os nga mosunod kaniya, sila mahimong iyang katawhan. (Exodo 19:5, 6) Apan, ang Israel wala magmasinugtanon sa Diyos. Busa si Jehova naghimog bag-ong pakigsaad.—Basaha ang Jeremias 31:31.

Pinaagi sa bag-ong pakigsaad, gipadangat ni Jehova ang mga panalangin ngadto sa daghan pinaagi sa pipila. Kadtong bahin sa pakigsaad pipila lang—144,000 lamang. Pinaagi kanila, milyonmilyon gikan sa tanang kanasoran ang panalanginan ug kinabuhing walay kataposan sa paraisong yuta. Ang pipila nga bahin sa bag-ong pakigsaad nag-alagad kang Jehova karon sa yuta. Sila lamang ang angayng makig-ambit sa tinapay ug bino tungod kay ang kopa “nagkahulogan sa bag-ong pakigsaad.”—Basaha ang Lucas 12:32; Pinadayag 14:1, 3.

4. Sa unsang paagi kita makabenepisyo sa Memoryal?

Ang tinuig nga Memoryal sa kamatayon ni Jesus makapalalom sa atong apresasyon sa talagsaong gugma ni Jehova. Iyang gipadala ang iyang Anak aron mamatay alang sa atong mga sala. Busa, sa dihang motambong kita sa Memoryal, angay natong palandongon kon unsay kahulogan sa kamatayon ni Jesus alang kanato. Angay natong hunahunaon kon sa unsang paagi kita makapakitag apresasyon sa gihimo ni Jehova ug Jesus alang kanato.—Basaha ang Juan 3:16; 2 Corinto 5:14, 15.

Alang sa dugang impormasyon, tan-awa ang panid 206-208 niini nga basahon, Unsay Tinuod nga Gitudlo sa Bibliya?, nga gipatik sa mga Saksi ni Jehova.