Atong Pangutan-on si Jesus

Daghang sinserong magtutuo ang mibati nga ang relihiyon angayng malangkit sa politika. Sila nagtuo nga ang relihiyon dakog mahimo sa pagsulbad sa problema sa katawhan. Apan, ang uban naghunahuna nga dili angayng magsagol ang relihiyon ug politika. Sa imong hunahuna, unsay papel sa relihiyon diha sa politika? Kinahanglan bang magtinabangay kining duha?

SI Jesu-Kristo gihubit ingong “ang labing impluwensiyal nga persona sa kasaysayan sa relihiyon.” Busa, handurawa nga makapangutana ta niya, Angay bang malangkit ang relihiyon sa politika? Unsa kahay iyang tubag? Samtang dinhi sa yuta, gitubag niya kana pinaagi sa pulong ug buhat. Pananglitan, sa iyang gibantog nga Wali sa Bukid, si Jesus naghatag ug giya nga makatabang sa iyang mga sumusunod sa pag-ila kon unsay ilang papel diha sa ilang komunidad. Atong hisgotan ang pipila ka punto niana nga wali.

 Angayng Makaapektar sa Kinabuhi sa Uban

Gihubit ni Jesus ang tinamdan nga angayng ipakita sa iyang mga tinun-an ngadto sa kalibotan. Siya miingon: “Kamo ang asin sa yuta; apan kon ang asin mawad-an sa lami niini, unsaon man pagpasig-uli sa kaparat niini? Dili na kini magamit alang sa bisan unsa kondili igasalibay sa gawas nga pagayatakan sa mga tawo. Kamo ang kahayag sa kalibotan. . . . Palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.” (Mateo 5:13-16) Nganong gitandi man ni Jesus ang iyang mga sumusunod sa asin ug kahayag?

Ang mga pulong ni Jesus nagpasabot nga ang iyang mga sumusunod samag asin, dili lang alang sa usa ka gamayng grupo, kondili sa tanang katawhan. Sila samag kahayag, dili sa limitado lang nga gidaghanon sa tawo, kondili sa tanan nga sinserong nangita sa Diyos. Pinaagi sa paggamit niana nga mga ilustrasyon, tin-awng gipakita ni Jesus nga dili niya buot nga ang iyang mga sumusunod magpalain gikan sa katilingban. Nganong dili man?

Matikdi ang mosunod: Ang asin dili makapreserbar kon kini dili isagol sa pagkaon. Ang lampara dili makadan-ag sa usa ka ngitngit nga lawak kon kini wala diha sa lawak. Dili ikatingalang wala gayod magsugo si Jesus sa iyang mga tinun-an nga moadtog hilit nga dapit aron magtukod ug komunidad sa mga magtutuo. Ni nag-awhag siya kanila nga likayan ang mga tawong dili nila samag relihiyon. Hinunoa, maingon nga ang asin kinahanglang isagol sa pagkaon ug ang kahayag makadan-ag sa ngitngit nga lugar, ang mga Kristohanon usab angayng makaapektar sa kinabuhi sa uban.

“Dili Bahin sa Kalibotan”

Apan, ang sugo ni Jesus nga ang iyang mga sumusunod kinahanglang makiglabot sa ilang isigkatawo mopatunghag hinungdanong pangutana bahin sa tinamdan sa usa ka Kristohanon labot sa politika. Ngano man? Sa hapit na siyang mamatay, si Jesus miampo sa Diyos alang sa iyang mga sumusunod: “Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan. Sila dili bahin sa kalibotan, ingon nga ako dili bahin sa kalibotan.” (Juan 17:15, 16) Busa, posible ba nga ang mga Kristohanon dili mahimong bahin sa kalibotan, apan sa samang higayon malangkit sa ilang komunidad? Aron atong masayran, tagdon nato ang tulo pa ka pangutana:

• Giunsa paglantaw ni Jesus ang politika?

• Unsay angayng buhaton sa mga Kristohanon karon?

• Sa unsang paagi ang Kristohanong pagtulon-an makaapektar sa komunidad?

[Blurb sa panid 4]

Tin-awng gipakita ni Jesus nga dili niya buot nga ang iyang mga sumusunod magpalain gikan sa katilingban