▪ Ang usa ka sinserong tawo makapangutana tingali niana, sanglit walay balaod sa Bibliya labot sa tabako. Nagpasabot ba kana nga lisod mahibaloan ang hunahuna sa Diyos bahin niana? Wala gayod.

Ang Bibliya nag-ingong “ang tibuok Kasulatan inspirado sa Diyos.” (2 Timoteo 3:16) Ang Kasulatan may tin-awng mga prinsipyo ug pamulong nga nagpadayag kon sa unsang paagi gusto sa Diyos nga atimanon nato ang atong panglawas. Una, atong susihon kon unsay nadiskobrehan sa mga tigdukiduki bahin sa epekto sa tabako sa panglawas sa tawo. Dayon atong tagdon kon sa unsang paagi nalangkit niana ang mga prinsipyo sa Bibliya.

Ang tabako makadaot sa panglawas sa naggamit niana ug maoy pangunang hinungdan sa malikayan-untang kamatayon. Sa Amerika, ang pagpanabako maoy hinungdan sa 1 sa matag 5 ka kamatayon. Nianang nasora, mas daghan ang mamatay niini matag tuig kay sa mamatay tungod sa “alkohol, pag-abuso sa droga, pagpatay, paghikog, aksidente sa sakyanan, ug AIDS,” matod sa report sa National Institute on Drug Abuse.

Ang nanabako makadaot sa uban. Peligroso gihapon bisag diyutay ra ang imong mahanggab nga aso sa sigarilyo. Ang mga dili manabako nga makahanggab ug secondhand smoke o aso nga gibuga sa uban, 30 porsiyentong mas mameligrong makabatog kanser sa baga ug sakit sa kasingkasing. Ning bag-o pang katuigan, nadiskobrehan sa mga doktor ang lain pang kapeligrohan nga ilang gitawag ug “third-hand smoke.” Kini nagtumong sa mga kemikal sa tabako nga magpabilin sa sinina, karpet, ug ubang butang bisag wala nay aso. Ang maong makahilo nga mga kemikal ilabinang makadaot sa panglawas sa mga bata ug makaapektar sa ilang katakos sa pagkat-on.

Ang tabako makaadik. Kini makapaulipon sa usa niining makadaot nga bisyo. Gani, nagtuo ang mga tigdukiduki nga ang pagkaadik sa nikotina, ang pangunang kemikal sa tabako, maoy usa sa kinalisorang buntogon nga adiksiyon.

Sa unsang paagi nalangkit niini ang mga prinsipyo sa Bibliya? Tagda ang mosunod:

Buot sa Diyos nga pabilhan nato ang kinabuhi. Sa balaod nga gihatag sa Diyos sa Israel, iyang gipakita nga kadtong nagtinguha sa pagpahimuot kaniya kinahanglang magpabili sa kinabuhi. (Deuteronomio 5:17) Ang mga Israelitas kinahanglang magbutang ug barandilya palibot sa atop sa ilang mga balay. Ngano? Ang ilang atop patag ug pirmeng gamiton. Ang barandilya magsilbing proteksiyon sa pamilya ug sa uban aron dili mahulog ug masamdan o mamatay. (Deuteronomio 22:8) Dugang pa, kinahanglang seguroon sa mga Israelitas nga ang ilang mga hayop dili makapahinabog kadaot sa uban. (Exodo 21:28, 29) Ang usa nga manabako naglapas sa prinsipyo niana nga mga balaod. Gituyo niya pagdaot ang iyang panglawas. Gidaot sab niya ang panglawas sa uban.

Gidahom sa Diyos nga higugmaon nato siya ug ang atong silingan. Si Jesu-Kristo nag-ingon nga ang iyang mga sumusunod angayng motuman sa duha ka kinadak-ang sugo. Kinahanglang higugmaon nila ang Diyos sa tibuok nilang kasingkasing, kalag, kaisipan, ug kusog ug higugmaon ang ilang silingan sama sa ilang kaugalingon. (Marcos 12:28-31) Sanglit ang kinabuhi maoy gasa sa Diyos, ang usa nga manabako walay pagtahod niana nga gasa ug busa wala mahigugma sa Diyos. (Buhat 17:26-28) Kana nga bisyo makadaot sa uban, busa iyang gipanghimakak ang iyang pangangkon nga nahigugma siya sa iyang silingan.

Ang Diyos nagsugo nga atong likayan ang hugawng mga bisyo. Ang Bibliya nagsugo sa mga Kristohanon nga hinloan ang ilang kaugalingon sa “tanang kahugawan sa unod ug espiritu.” (2 Corinto 7:1) Ang pagpanabako dayag nga makahugaw sa usa ka tawo. Kadtong buot mohunong niana nga bisyo aron pahimut-an ang Diyos nag-atubang ug malisod nga hagit. Apan sa tabang sa Diyos, mahimo silang makabiya niining makahugawng bisyo.