MAMATIKDAN ba ni Jehova ang mga paningkamot sa iyang mga magsisimba sa pagpahimuot kaniya? Oo! Apan dili kay ang ila rang diyosnong mga buhat ug pagdayeg ang iyang mamatikdan. Mahibalo pa gani siya sa dihang sila mapabilhong maghunahuna bahin kaniya. Labaw pa niana, dili gayod siya malimot sa iyang katawhan ug sa ilang nahimo. Nganong makaseguro ta niana? Ang tubag makita diha sa gisulat ni propetang Malaquias.—Basaha ang Malaquias 3:16.

Sa ikalimang siglo B.C.E., sa dihang nanagna si Malaquias, ngil-ad kaayo ang moral ug relihiyosong kahimtang sa Israel. Ang mga saserdote nagpabaya sa ilang obligasyon, ug ang mga tawo naghimog mga buhat nga nagpasipala sa Diyos, sama sa pamarang, panapaw, ug panikas. (Malaquias 2:8; 3:5) Bisan pa niana, dihay grupo sa mga Israelitas nga nagpabiling maunongon. Unsay ilang gihimo?

“Kadtong mga nahadlok kang Jehova nagsultihanay sa usag usa,” miingon si Malaquias. Ang pagkahadlok sa Diyos maoy positibong hiyas. Gihubit dinhi ni Malaquias ang mga Israelitas nga dunay halalom nga pagtahod sa Diyos ug may maayong matang sa kahadlok nga basig dili siya mapahimut-an. Matikdi nga ang maong mahinadlokon sa Diyos nga mga indibiduwal “nagsultihanay sa usag usa.” Dayag nga nagkatigom sila sa pagdayeg kang Jehova ug pagdasig sa usag usa aron dili sila maluya ug maimpluwensiyahan sa pagkadaotan sa ilang palibot.

Ang matinumanong mga Israelitas nagpakita sa ilang pagtahod kang Jehova sa laing hinungdanong paagi: Sila “nagapalandong sa iyang ngalan,” o sa laing hubad, “nagtahod sa Iyang ngalan.” Ang maong mga mahinadlokon sa Diyos nagpasidungog kang Jehova bisan sa ilang hunahuna. Sa ilang kasingkasing, sila mapabilhong naghunahuna, o namalandong, bahin kang Jehova ug sa iyang bantogang ngalan. Namatikdan ba kana ni Jehova?

Si Malaquias miingon: “Si Jehova nagpadayon sa pagtagad ug sa pagpamati.” Gikan sa iyang halangdong puloy-anan sa langit, si Jehova namati pag-ayo ug nakadungog sa matag pulong sa pagdayeg nga gisulti sa iyang mga magsisimba sa usag usa. Siya nagtagad usab sa tanan nilang gihunahuna. (Salmo 94:11) Apan mihimo siyag labaw pa kay sa pagpakitag pagtagad sa ilang maayong mga pulong ug hunahuna.

Ang “usa ka basahon sa handomanan gisulat sa iyang atubangan,” matod ni Malaquias. Narekord sa maong basahon ang tanan nga matinumanong nag-alagad kang Jehova. Matikdi nga gitawag kanag “basahon sa handomanan.” * Gipakita niana nga si Jehova dili gayod malimot sa iyang matinumanong mga magsisimba ug sa tanan nilang gihimo sa pagdayeg kaniya—ang matag maayong buhat, pulong, ug hunahuna. Apan dunay rason kon nganong hinumdoman sila sa Diyos. Siya nagsaad nga gantihag kinabuhing dayon kadtong kansang mga ngalan permanenteng narekord sa iyang basahon sa handomanan. *—Salmo 37:29.

Makapahupay gayong mahibaloan nga pabilhan ni Jehova ang tanan natong ginahimo sa pagsimba kaniya sa dalawatong paagi! Ang giingon sa Malaquias 3:16 angayng magtukmod nato sa pagpamalandong. Maayong pangutan-on nato ang kaugalingon, ‘Ang ako bang ngalan anaa sa “basahon sa handomanan” sa Diyos?’ Maanaa kini kon buhaton nato ang atong maarangan sa paglihok, pagsulti, ug paghunahuna matag adlaw sa paagi nga buot hinumdoman ni Jehova.