Ang Diyos walay literal nga asawa diin siya nakabatog mga anak. Siya ang Maglalalang sa tanang kinabuhi. Ang mga tawo gilalang uban sa katakos nga masundog ang mga hiyas sa Diyos. Mao nga ang unang tawo nga gilalang sa Diyos, si Adan, gitawag ug “anak sa Diyos.” Sa susama, si Jesus gitawag ug “Anak sa Diyos” kay siya gilalang nga may hiyas nga sama sa iyang Amahan.​—Basaha ang Lucas 3:38; Juan 1:14, 49.

Ang Diyos naglalang kang Jesus una pa lalanga si Adan. Sa pagkatinuod, gilalang sa Diyos si Jesus ug dayon gigamit siya sa paghimo sa tanang ubang butang, lakip ang mga anghel. Kanay hinungdan nga ang Bibliya nagtawag kang Jesus nga “panganay sa tanang kalalangan.”​—Basaha ang Colosas 1:15, 16.

Sa wala pa siya matawo sa Betlehem, si Jesus nagkinabuhi sa langit ingong espirituhanong linalang. Dayon miabot ang panahon nga gibalhin sa Diyos ang kinabuhi ni Jesus ngadto sa tagoangkan ni Maria aron mahimugso ingong tawo.​—Basaha ang Lucas 1:30-32; Juan 6:38; 8:23.

Nganong gipahinabo sa Diyos nga mahimugso si Jesus sa yuta ingong tawo? Unsang linaing papel ang gituman ni Jesus? Imong makaplagan ang mga tubag niana diha sa Bibliya, ug makapauswag gayod kini sa imong pagsabot ug apresasyon sa gibuhat sa Diyos ug ni Jesus alang kanimo.