Ang korapsiyon sa gobyerno maoy pag-abuso sa gahom para sa personal nga kaayohan. Dugay na kaayo kining problemaha. Pananglitan, may balaod sa Bibliya nga nagdili sa pagpanghiphip sa hukmanan, nga nagpakitang komon na kining buhata kapig 3,500 ka tuig kanhi. (Exodo 23:8) Siyempre, ang korapsiyon dili lang kay pagdawat ug hiphip. Usahay ang korap nga mga opisyales magpahimulos sa serbisyo ug mga suplay nga dili para nila o direkta pa ganing mangawat ug pondo. Gamiton sab nila ang ilang posisyon aron paboran ang ilang mga higala ug paryente.

Kon duna may korapsiyon sa bisan unsang organisasyon, morag ang korapsiyon sa gobyerno ang kinagrabehan. Matod sa 2013 Global Corruption Barometer, nga gi-publish sa Transparency International, giisip sa mga tawo sa tibuok kalibotan nga ang lima ka labing korap nga institusyon mao ang mga partido sa politika, kapolisan, opisyales sa gobyerno, magbabalaod, ug ang hukmanan. Tagda kining pipila ka report.

• AFRICA: Sa 2013, mga 22,000 ka opisyales sa South Africa ang gikasohan kay nangurakot.

• SOUTH AMERICA: Sa 2012 sa Brazil, 25 ang napriso kay nangawat ug pondo sa gobyerno aron paliton ang suporta sa mga tawo. Apil nila ang ikaduha sa labing gamhanang tawo sa nasod, ang chief of staff sa kanhing presidente.

• ASIA: Sa 1995 sa Seoul, South Korea, 502 ka tawo ang namatay sa nahugno nga mall. Base sa imbestigasyon, gihiphipan ang mga opisyal sa siyudad aron ang mga kontraktor makagamit ug materyales nga menos ang kalidad ug dili sundon ang mga lagda sa kahilwas (safety rules).

• EUROPE: “Makapakurat ang kagrabehon sa problema [korapsiyon sa Europe],” matod ni Cecilia Malmström, komisyoner sa European Commission Home Affairs. Siya midugang nga “morag wala maningkamot ang gobyerno nga masumpo ang korapsiyon.”

Nakagamot na pag-ayo ang korapsiyon sa gobyerno. Si Propesor Susan Rose-Ackerman, eksperto bahin sa pagkontra sa korapsiyon, misulat nga ang pagreporma nagkinahanglag “dagkong kausaban sa mga palakaw sa gobyerno.” Bisag ang kahimtang daw walay solusyon, gipakita sa Bibliya nga dili lang posible ang dagkong kausaban kondili segurado usab kining mahitabo.