Ang Bibliya nagpahibalo kanato nga sa kataposan dunay kalaglagan: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon . . . Sa pagkatinuod, gawas kon kanang mga adlawa pamub-on, walay unod nga maluwas.” (Mateo 24:21, 22) Pero gisaaran ta sa Diyos nga daghay maluwas: “Ang kalibotan nagakahanaw . . . , apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:17.

Kon gusto kang maluwas sa pagkahanaw niining kalibotana ug ‘magpabilin hangtod sa hangtod,’ unsay imong buhaton? Kinahanglan bang magpondo kag mga suplay o maghimog uban pang pagpangandam? Dili. Gipasiugda pag-ayo sa Bibliya nga magtakda tag lahi nga mga tumong. Atong mabasa: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova.” (2 Pedro 3:10-12) Gipakita sa konteksto nga lakip sa ‘tanang butang’ nga pagatunawon mao ang mga magmamando niining daotang kalibotan ug ang tanan nga mipili niana nga pagmando imbes sa Diyos. Tin-aw nga kon magtigom tag materyal nga mga butang, kana dili makaluwas nato gikan sa maong kalaglagan.

Sa pagkatinuod, maluwas ta kon moalagad ta kang Jehova nga Diyos ug mogawi ug mobuhat sa paaging makapalipay niya. (Sofonias 2:3) Inay mosundog sa kadaghanan karon ug magbalewala sa tin-awng mga ilhanan nga kita nagkinabuhi na sa maong hinungdanong panahon, kinahanglan natong ‘ibutang kanunay sa hunahuna ang presensiya sa adlaw ni Jehova.’ Ang mga Saksi ni Jehova makapakita kanimo diha sa Bibliya kon sa unsang paagi ka maluwas panahon sa kataposan.