Nakapangutana ka ba kon ang kinabuhi taman lang gyod sa pagdula, pagtrabaho, pagminyo, pag-atiman ug pamilya, ug pagkatigulang? (Job 14:1, 2) Gipakita sa Bibliya nga bisan ang labing maalamong mga tawo nakapangutana niini.—Basaha ang Ecclesiastes 2:11.

Duna bay kahulogan ang kinabuhi? Una, angay tang mangutana, Sa unsang paagi nagsugod ang kinabuhi? Human masusi ang atong utok ug ang uban pang bahin sa atong lawas nga nindot kaayong pagkadisenyo, daghay nakaingon nga dunay maalamong Maglalalang. (Basaha ang Salmo 139:14.) Nan, may rason gyod kon nganong iya tang gihimo! Kon sayron nato kana nga rason, mahimong mas makahuloganon ang atong kinabuhi.

Gipanalanginan sa Diyos ang unang tawhanong magtiayon ug gihatagan sila ug nindot nga buluhaton. Iyang katuyoan nga pun-on nila ang yuta, himoon kining paraiso, ug mabuhi sa walay kataposan.—Basaha ang Genesis 1:28, 31.

Wala dayon matuman ang katuyoan sa Diyos dihang mirebelde ang tawo. Pero wala ta niya isalikway, ug wala niya usba ang iyang katuyoan para sa tawo ug sa yuta. Gipasaligan ta sa Bibliya nga ang Diyos dunay gihimo aron maluwas ang matinumanong katawhan ug matuman ang iyang katuyoan sa yuta! Busa buot sa Diyos nga matagamtam nimo ang kinabuhi nga gusto niya para nimo. (Basaha ang Salmo 37:29.) Susiha diha sa Bibliya kon sa unsang paagi ka makabenepisyo sa katuyoan sa Diyos.