Ang mga Saksi ni Jehova nagahimog importanteng buluhaton diha sa kapig 200 ka kayutaan. Pero mga 35 lang niana ang makaarang sa pag-atiman sa ilang mga galastohan gamit ang lokal nga mga donasyon. Busa giunsa pag-atiman sa mga nasod nga kulang ug pondo ang ilang mga galastohan?

 Gianalisar sa Nagamandong Lawas sa mga Saksi ni Jehova ang espirituwal nga panginahanglan ug kalihokan sa mga Saksi sa tibuok kalibotan. Ang mga donasyon maampingong gibadyet ug gigamit sa hustong paagi. Kon ang sangang buhatan sa usa ka nasod makadawat ug sobrang donasyon kay sa ilang gikinahanglan, ang sobra gamiton diha sa mga nasod nga walay igong pondo. Gisunod niini nga kahikayan ang panig-ingnan sa mga Kristohanon sa unang siglo, kinsa nagtinabangay “pinaagi sa pag-angay-angay.” (2 Corinto 8:14) Gigamit nila ang ilang sobra aron mahulipan ang panginahanglan sa ubang Kristohanon.

 Unsay gibati sa atong mga igsoon nga nakadawat ug dugang pondo gikan sa ubang sangang buhatan? Pananglitan, sa Tanzania, diin kapig katunga sa populasyon ang mokita rag walay ₱100 ang adlaw, ang maong mga pondo gigamit sa pag-renovate sa Kingdom Hall nga gigamit sa Mafinga Congregation. Ang kongregasyon misulat: “Sukad nga gi-renovate ang Kingdom Hall, mas daghan na ang manambong sa tigom! Mapasalamaton kaayo mi sa organisasyon ni Jehova ug sa pagkamahinatagon sa mga igsoon sa tibuok kalibotan, kay tungod niana nindot na ang among tigomanan.”

 Ang ubang igsoon sa Sri Lanka wala nay igong makaon tungod sa COVID-19 nga pandemic. Apil niana si Imara Fernando ug ang iyang anak nga si Enosh. Pero tungod sa mga donasyon nga gikan sa ubang nasod, natagan-an ang ilang panginahanglan. Naghimo silag kard, ug kini ang ilang gisulat: “Nagpasalamat mi sa mga igsoon nga nagpakita sa ilang gugma niining lisod nga panahon. Lipay kaayo mi nga apil mi niini nga pamilya, ug padayon ming nag-ampo kang Jehova nga tabangan niya ang mga igsoon niining kataposang mga adlaw.”

 Bisag asa pa nagpuyo ang atong mga igsoon, gusto gyod nilang motabang. Pananglitan, si Enosh naghimog gamayng alkansiya aron maka-donate sab siya para sa mga pamilya nga nanginahanglan. Si Guadalupe Álvarez nagpakita pod ug pagkamahinatagon. Nagpuyo siya sa usa ka lugar sa Mexico diin ang kadaghanan gamay rag suweldo o walay regular nga income. Pero moamot gyod siya kutob sa iyang maarangan. Siya misulat: “Mapasalamaton kaayo ko kang Jehova tungod sa iyang pagkamaayo ug maunongong gugma. Nahibalo ko nga ang akong mga donasyon madugang sa mga donasyon sa uban ug makatabang sa mga igsoon nga nanginahanglan.”

 Ang mga sangang buhatan nalipay sab sa pagpadalag kuwarta sa mga lugar nga nanginahanglan. “Sulod sa daghang katuigan, ang buluhaton sa among nasod nagkinahanglan ug pinansiyal nga tabang gikan sa ubang nasod,” miingon si Anthony Carvalho, membro sa Komite sa Sangang Buhatan sa Brazil. “Tungod sa maong tabang, dako ang pag-uswag dinhi sa among nasod. Karon nga arang-arang na ang among pinansiyal nga kahimtang, kami na pod ang nakapribilehiyo nga motabang sa uban. Ang mga igsoon dinhi naghunahuna sa pagpauswag sa buluhatong pagsangyaw sa tibuok kalibotan, ug gusto gyod nilang motabang kutob sa ilang mahimo.”

 Unsa ang kinamaayohang paagi nga masuportahan sa mga Saksi ni Jehova ang ilang mga igsoon nga nanginahanglan? Dili pinaagi sa direktang pagpadala ug kuwarta sa sangang buhatan sa laing nasod, kondili sa pag-donate sa worldwide work. Mahimo kini pinaagi sa paghulog ug donasyon sa contribution box sa kongregasyon nga gimarkahan ug “Worldwide Work” o pinaagi sa donate.dan124.com. Ang maong mga donasyon gipabilhan pag-ayo.