•   “Gireport sa China ang ‘kinagrabehang’ heatwave ug ang ikatulong kinaughang ting-init sukad masukad.”—The Guardian, Septiyembre 7, 2022.

•   “Ang hulaw sa Greater Horn of Africa magpadayon sa ikalima nang tuig niini.”—UN News, Agosto 26, 2022.

•   “Kapin sa katunga sa Europe ang nameligro nga makaeksperyensiyag hulaw, ug lagmit kini ang kinagrabehang hulaw sulod sa 500 ka tuig.”—BBC News, Agosto 23, 2022.

 Daghang eksperto ang mihimog prediksiyon nga ang maong mga hulaw magpadayon ug mograbe pa gani. Naa pa bay paglaom para sa mas maayong kaugmaon? Unsay giingon sa Bibliya?

 Ang Bibliya nagtagna bahin sa atong panahon:

•   “Duna unyay . . . mga kanihit sa pagkaon . . . sa lainlaing dapit.”—Lucas 21:11.

 Ang mga hulaw sagad moresultag kanihit sa pagkaon. Ang maong kanihit sa pagkaon, ug ang pag-antos ug kamatayon nga resulta niini, maoy katumanan sa tagna sa Bibliya.—Pinadayag 6:6, 8.

 Gipakita sa Bibliya ang pangunang rason kon nganong nagkagrabe ang mga hulaw. Kini nag-ingon:

•   “Dili iya sa tawong naglakaw bisan ang pagtultol sa iyang lakang.”—Jeremias 10:23.

 Nagpasabot ni nga ang mga tawo dili molampos sa “pagtultol sa [ilang] lakang,” o sa pagmando sa ilang kaugalingon. Ang ilang dili maayong mga desisyon sagad miresultag mga hulaw ug kanihit sa tubig.

•   Kadaghanang siyentista miingon nga ang kalihokan sa mga tawo miresultag global warming, ug tungod ana, midaghan ang mga lugar sa tibuok kalibotan nga nakaeksperyensiyag hulaw.

•   Ang kahakog ug mga polisiya nga gihimo nga walay pagpakabana sa kaugmaon miresultag pagkaupaw sa lasang, polusyon, ug sayop nga paggamit sa natural resources, nga nakapameligro sa mga tinubdan sa tubig.

 Pero ang Bibliya naghatag ug paglaom.

 Ang Bibliya nagsaad nga sulbaron sa Diyos ang krisis sa tubig karon. Sa unsang paagi?

1.  1. Ang Diyos ‘maglaglag sa mga nagalaglag sa yuta.’ (Pinadayag 11:18) Iyang wad-on ang usa sa mga hinungdan sa kanihit sa tubig—ang daotan ug hakog nga mga tawo nga ang binuhatan nagdaot sa kinaiyahan.—2 Timoteo 3:1, 2.

2.  2. “Ang yuta nga napagba sa kainit mahimong linaw nga punog tangbo.” (Isaias 35:1, 6, 7) Wad-on sa Diyos ang kadaot nga resulta sa hulaw ug kini nga planeta himoon niyang paraiso nga abundag tubig.

3.  3. “Giatiman nimo ang yuta, nga gihimo kining mabungahon kaayo ug tabunok kaayo.” (Salmo 65:9) Sa panalangin sa Diyos, ang yuta duna unyay abunda nga sustansiyadong pagkaon ug hinlong tubig para sa tanan.