Niadtong Mayo 24, 2022, nahitabo ang grabe kaayong trahedya sa gamayng lungsod sa Uvalde, Texas, U.S.A. Sumala sa The New York Times, “usa ka lalaki ang namusil ug nakapatayg 19 ka bata ug duha ka maestra . . . sa Robb Elementary School.”

 Makapaguol kay komon kaayo ni nga mga hitabo. Ang USA Today mireport nga sa United States pa lang, “249 ka pagpamusil ang nahitabo diha sa mga eskuwelahan sa miaging tuig—mas daghan kay sa bisan unsang tuig sukad sa 1970.”

 Nganong nahitabo man ni nga mga trahedya? Sa unsang paagi ta makasagubang niining daotan kaayo nga mga hitabo? Matapos pa kaha ang kapintasan? Ang tubag naa sa Bibliya.

•    Ang atong panahon karon gitawag sa Bibliya ug “kataposang mga adlaw,” diin daghan ang “walay pagmahal sa isigkatawo” ug “bayolente,” maong mohimo silag ngilngig ug pintas kaayo nga mga buhat. Kini nga mga tawo “mosamot pa ka daotan.” (2 Timoteo 3:1-5, 13) Aron mahibalog dugang, basaha ang artikulo nga “Gitagna ba sa Bibliya ang Panghunahuna ug Binuhatan sa mga Tawo Karon?”

 Daghan ang naglibog, ‘Nganong gitugotan man sa Diyos nga mahitabo ang ngilngig nga mga trahedya sama sa pagpamusil diha sa eskuwelahan?’ Aron mahibalo sa tubag sa Bibliya, basaha ang artikulo nga “Nag-antos ang Maayong mga Tawo—Ngano?”

•    “Ang tanang gisulat kaniadto gisulat aron tudloan ta, aron nga . . . pinaagi sa paghupay gikan sa Balaang Kasulatan kita makabatog paglaom.”—Roma 15:4.

 Ang mga prinsipyo sa Bibliya makatabang nimo nga masagubang kining pintas kaayo nga kalibotan. Para sa dugang impormasyon, basaha ang Pagmata! nga magasin nga nag-ulohang “Matapos Kaha ang Kapintasan?”

 Para sa mga sugyot kon unsaon pagtabang sa ginikanan ang ilang mga anak dihang makakita o makadungog ug ngilngig nga balita, basaha ang artikulo nga “Ang Imong mga Anak Apektado ba sa Makahadlok nga mga Balita?”

•    “Luwason niya sila gikan sa pagdaogdaog ug kapintasan.”—Salmo 72:14.

•    “Ilang salsalon ang ilang mga espada ug himoong mga punta sa daro ug ang ilang mga bangkaw himoong mga galab. Ang nasod dili mobakyaw ug espada batok sa laing nasod, ug sila dili na magkat-on sa pagpakiggubat.”—Miqueas 4:3.

 Himoon sa Diyos kon unsay dili kayang himoon sa tawo. Wagtangon sa iyang langitnong Gingharian, o gobyerno, ang tanang hinagiban ug taposon ang tanang kapintasan. Aron mahibalog dugang kon unsay himoon sa Gingharian sa Diyos, basaha ang artikulo nga “Sa Pagmando sa Gingharian sa Diyos Adunay ‘Kadagaya sa Pakigdait.’”