Ang mga Saksi ni Jehova nagtahod sa mga gobyerno ug sa mga simbolo nga nagrepresentar niini. Gitahod pod namo ang desisyon sa uban nga manumpa nga magmaunongon sa nasod, mosaludar sa bandera, o mokanta ug nasodnong awit.

 Pero ang mga Saksi ni Jehova dili moapil sa maong mga seremonyas kay nagtuo mi nga supak ni sa mga gitudlo sa Bibliya. Maapresyar namo kon tahoron sa uban ang among tinuohan, sama sa pagtahod namo sa ilang tinuohan.

Niining artikuloha

•  Unsay gitudlo sa Bibliya bahin niini?

•  Unsaon man kon gisugo sa balaod ang pag-apil sa maong mga seremonyas?

•  May gidapigan ba ang mga Saksi ni Jehova kon bahin sa politika o mga isyu sa katilingban?

 Kini ang duha ka importanteng pagtulon-an sa Bibliya nga among gisunod:

•   Ang Diyos lang ang angay namong simbahon. Ang Bibliya nag-ingon: “Si Jehova nga imong Diyos ang angay nimong simbahon, ug siya lamang ang angay nimong hatagag sagradong pag-alagad.” (Lucas 4:8) Ang mga panumpa nga magmaunongon sa nasod ug nasodnong mga awit sagad naay panaad nga suportahan o unahon sa usa ka tawo ang iyang nasod kay sa bisan sa unsang butang. Busa para sa mga Saksi ni Jehova, sayop ang pag-apil sa maong mga seremonyas.

   Ingon ana pod ang panglantaw sa mga Saksi ni Jehova sa pagsaludar sa bandera. Kini maoy buhat sa pagsimba, o idolatriya, nga gidili sa Bibliya. (1 Corinto 10:14) Giila sa pipila ka historyano nga ang mga bandera sa nasod maoy mga simbolo sa pagsimba. “Ang nasyonalismo samag relihiyon nga ang pangunang simbolo ug gigamit sa pagsimba mao ang bandera,” sumala sa historyano nga si Carlton J. H. Hayes. a Bahin sa mga Kristohanon sa una, ang awtor nga si Daniel P. Mannix nag-ingon: “Ang mga Kristohanon midumili sa . . . paghalad ngadto sa espiritu nga nagbantay sa [Romanong] emperador. Halos katumbas ni karon sa pagdumili sa pagsaludar sa bandera.” b

  Bisan pag ang mga Saksi ni Jehova dili mosaludar sa bandera, dili namo ni daoton, sunogon, o buhatan ug bisan unsa nga nagpakita nga wala mi pagtahod niini o sa ubang simbolo sa nasod.

•   Sa panan-aw sa Diyos, ang tanang tawo managsama ra. (Buhat 10:34, 35) Ang Bibliya nag-ingon nga “gikan sa usa ka tawo, [gihimo sa Diyos] ang tanang nasod sa katawhan.” (Buhat 17:26) Tungod niini, nagtuo ang mga Saksi ni Jehova nga sayop ang pag-isip nga ang usa ka tribo o nasod mas labaw kay sa uban. Tahoron namo ang tanang tawo, bisan unsa may ilang kagikan o bisan asa man sila nagpuyo.—1 Pedro 2:17.

 Dili supak sa gobyerno ang mga Saksi ni Jehova. Nagtuo mi nga ang mga gobyerno apil sa “kahikayan sa Diyos” nga gitugotan niya sa pagmando. (Roma 13:1-7) Nagtuo sab mi nga ang mga Kristohanon kinahanglang mosunod sa sekular nga mga awtoridad.—Lucas 20:25.

 Pero unsaon man kon ang gisugo sa balaod sa gobyerno supak sa balaod sa Diyos? Sa ubang kahimtang, puwedeng mo-submit ug legal request sa gobyerno aron i-adjust ang balaod. c Kon dili ni posibleng i-adjust, pilion sa mga Saksi ni Jehova nga “sugton ang Diyos ingong magmamando imbes ang mga tawo.”—Buhat 5:29.

 Wala. Ang mga Saksi ni Jehova walay gidapigan kon bahin sa politika o mga isyu sa katilingban. Dihang dili mi manumpa nga magmaunongon sa nasod, mosaludar sa bandera, o mokanta sa nasodnong awit, wala na magpasabot nga mga aktibista mi. Ginasunod lang namo ang among mga tinuohan nga gibase sa Bibliya bahin sa maong mga seremonyas.