Kuwarenta ka tuig kanhi, sa Pebrero 2, 1973, gimontar ang bag-ong mga printing press sa Wallkill, New York, U.S.A., aron sa pagpatik sa magasing Bantayanang Torre ug Pagmata!

Niadtong 1963, ang mga Saksi ni Jehova mipalit ug propidad didto nga himoong umahan aron sa pagtaganag pagkaon sa mga boluntaryo sa ilang hedkuwarter sa Brooklyn, New York. Apan karon, kini nga propidad gamiton usab sa pagpatunghag laing matang sa pagkaon—espirituwal nga pagkaon.—Mateo 24:45-47.

Si Philip Wilcox, ang pressroom overseer niadtong panahona, nahinumdom sa unang adlaw nga gipaandar ang mga makina sa Wallkill: “Mga usa ka bulan gyod namong giasembol ang high-speed rotary web nga mga makina. Dihang andam na kini, amo kining gitestingan. Nakaimprenta dayon mig pipila ka libo ka magasin. Dayon amo ning gihatod sa among printery sa Brooklyn, nga maoy magpadala niini sa mga kongregasyon nga nag-order. Dili namo gustong mausik ang bisag usa lang ka magasin.”

Dako nag printery ang mga Saksi ni Jehova sa Brooklyn, ug nagtukod pa sila niining bag-ong printery. Ngano? Kay sa sayong bahin sa 1970’s, nagkadaghan ang order sa literatura sa Bibliya ug kinahanglang dunay magtrabaho magabii sa printery sa Brooklyn aron lang maapas ang tanang order.

Dihang nahuman ang unang printery sa Wallkill, duna kiniy upat ka printing press, usa ka shipping facility, ug usa ka Kingdom Hall. Apan bisag wala pa kini bug-os magamit, gitukod na pod ang ikaduha ug mas dako nga bilding nga sumpay ra sa unang bilding. Daghan na kaayo ang order sa literatura sa Bibliya maong unom pa ka printing press ang gibutang sa ikaduhang bilding, bisag wala pa kini mahumag tukod.

Paglabay sa katuigan, nagkamoderno ang teknolohiya sa pag-imprenta ug nagkadako sab ang panginahanglan sa literatura sa Bibliya. Tungod niini, kadaghan namong giusab ug gipadak-an ang printery sa Wallkill. Ang karaang mga letterpress nga gigamit niadto pang 1980’s gipulihag paspas kaayong mga offset press.

Sa 2004, gihunong na ang pag-imprenta didto sa Brooklyn, ug sa unang higayon, ang mga libro didto na giimprenta sa Wallkill. Sa 2010, ang pag-imprentag magasin gibalhin didto sa sangang buhatan sa mga Saksi ni Jehova sa Canada. Ang bag-ong mga makina didto makaimprentag 200,000 ka magasin kada oras.

Karon, moderno na kaayo ang printery sa Wallkill, nga may 281 ka boluntaryong lalaki ug babaye. Sa miaging tuig, kapin sa 17 ka milyong libro ug Bibliya ang naimprenta didto. Gawas sa mga printery sa Wallkill ug Canada, ang mga Saksi ni Jehova duna pay 13 ka printery—sa Africa, Asia, Australia, Europe, ug South America—nga nagtagbaw sa espirituwal nga panginahanglan sa minilyong tawo.—Mateo 5:3.