Si Artur, usa ka tigdumala sa sirkito sa Armenia, mibisita sa usa ka kongregasyon sa mga Saksi ni Jehova. Iyang nahibaloan nga ang kongregasyon wala pa makasulay pagsangyaw gamit ang cart. Aron ipasiugda kini nga klase sa pagsangyaw, si Artur ug ang iyang asawa nga si Anna, ug kauban ang usa ka brader nga si Jirayr, nagplastar ug cart nga may literatura diha sa gamayng lungsod. Mipili silag lugar nga daghang tawo ang moagi.

 Ang mga tawong nangagi nagpakita dayon ug interes ug mikuhag mga literatura. Pero wala madugay, kining bag-ong paagi sa pagsangyaw namatikdan sab sa mga magsusupak. Duha ka pari ang miduol sa cart, ug usa kanila ang mipatid sa cart. Dayon iyang gisagpa si Artur, maong nalagpot ang iyang antiyohos. Si Artur, Anna, ug Jirayr misulay sa pagpakalma sa mga pari pero wala kini mosaler. Gitamaktamakan sa mga pari ang cart ug gipangkatag ang mga literatura. Ilang gibalikas ang mga Saksi ug gibaharan, dayon milakaw.

 Si Artur, Anna, ug Jirayr miadto sa presinto sa polis aron ireport ang insidente. Gisulti nila ang nahitabo, ug ilang gisangyawan kadiyot ang mga polis ug ang ubang nagtrabaho sa presinto. Dayon gidala sila sa opisina sa hepe. Sa sinugdan, gusto ra untang masayran sa hepe kon unsay nahitabo. Apan dihang iyang nahibaloan nga si Artur, nga dakong tawo, wala mosukol dihang gisagpa, ang hepe mihunong sa pagpangutana bahin sa kaso ug nangutana bahin sa gituohan sa mga Saksi. Kini miresulta sa upat ka oras nga panaghisgot! Ang hepe nahingangha sa iyang nadunggan ug miingon: “Pagkanindot sa inyong relihiyon! Gusto kong magpamembro anâ!”

 Pagkaugma, dihang si Artur mibalik sa publikong pagsangyaw, giduol siyag edarang lalaki nga nakakita sa nahitabo sa miaging adlaw. Iyang gidayeg si Artur kay nagpabilin siyang kalmado ug wala makig-away. Miingon sab siya nga nawad-an siyag pagtahod sa mga pari tungod sa iyang nakita.

 Pagkagabii, ang hepe mitawag kang Artur aron pabalikon siya sa estasyon sa polis. Pero imbes hisgotan ang kaso, nangutana siyag dugang bahin sa Bibliya. Laing duha ka polis ang miapil sa panaghisgot.

 Pagkasunod adlaw, si Artur mibisita pagbalik sa hepe sa presinto aron ipakita ang pipila sa atong binase sa Bibliya nga mga video. Gipatawag sa hepe ang ubang polis aron makatan-aw sab sa maong mga video.

 Tungod sa dili maayong panggawi sa mga pari, daghang polis ang nasangyawan sa unang higayon. Kini miresulta sa ilang maayong impresyon sa mga Saksi ni Jehova.