Si Desicar, usa ka nag-inusarang inahan, gustong magpalapad sa iyang ministeryo pinaagi sa pagregular payunir. Nagpuyo siya sa nasod nga lisod kaayo ang ekonomiya—sa Venezuela. Bisan pa niana, determinado siya nga magpayunir. Ug nalipay siya nga nahimo na niya, pero nagsugod ang COVID-19 nga pandemic.

 Pagsugod sa pandemic, nalisdan si Desicar sa iyang ministeryo tungod sa bag-ong mga paagi sa pagsangyaw. Para niya, lisod ang pag-letter writing. Dili pod siya makasangyaw gamit ang videoconferencing kay mahal kaayo ang Internet sa ilang lugar. Siya miingon: “Naluya gyod ko. Kalit lang nga dili na nako mahimo ang akong naandan nga paagi sa pagsangyaw. Naghunahuna ko nga dili ko epektibo nga payunir.”

 Pagka-Enero 2021, giaprobahan sa sangang buhatan sa mga Saksi ni Jehova sa Venezuela nga maghimog espesyal nga kampanya sa pagsangyaw. Naay gihimo nga kahikayan nga sa matag hinapos sa semana nianang bulana, i-broadcast ang napili nga mga pakigpulong publiko sa mga 60 ka estasyon sa radyo ug 7 ka channel sa TV. Gidasig ang mga igsoon nga imbitahon ang interesadong mga tawo nga motan-aw ug maminaw sa programa. Sa matag pakigpulong, ang sangang buhatan nagtagana pod ug mga pangutana ug teksto nga puwedeng gamiton sa atong mga igsoon sa pagsangyaw pinaagig sulat o tawag. Dugang pa, ang sangang buhatan nagdasig sa mga igsoon sa pagsangyaw pinaagig text—usa ka bag-ong paagi sa pagsangyaw sa mga Saksi ni Jehova sa Venezuela.

 Eksayted si Desicar nga makigbahin sa kampanya. Bisag wala pa siya nakasangyaw pinaagig text, gusto niya ning sulayan. Pero nagkinahanglan siyag tabang. “Dili kaayo ko anad mogamit ug gadyet,” miingon si Desicar. Busa mihangyo siya sa iyang anak nga tudloan siya, ug dihang nakakat-on na si Desicar, andam na siya nga makigbahin sa kampanya.

 Pinaagig text, giimbitar ni Desicar ang iyang mga kaila nga maminaw sa prerecorded nga mga pakigpulong. Nahingangha siya sa mga resulta. Daghan sa iyang giimbitar ang naminaw sa mga pakigpulong ug naay mga pangutana. Ang uban nga wala makatan-aw o makapaminaw mangutana kang Desicar kon unsay gihisgotan sa mga pakigpulong. Si Desicar miingon: “Magnota ko ug ako ning i-share nila. Wala pa gyod ko kasulay nga milapas ug lima ang akong balikduaw sa usa ka bulan, pero sa kataposan sa kampanya, nakahimo kog 112 ka balikduaw!” a

 Giimbitar pod ni Desicar ang iyang dili saksi nga igsoong babaye—nga silingan niya—aron maminaw sa mga pakigpulong diha sa radyo. “Nakurat ko kay misugot akong igsoon,” miingon si Desicar. “Kada Dominggo sa alas otso sa buntag, moadto ko sa iyang apartment ug dungan mi nga maminaw. Daghan siyag pangutana, panahon ug human sa programa.” Mitambong pod ang iyang igsoon sa Memoryal sa kamatayon ni Jesus pinaagig videoconferencing, ug aron makasangyaw si Desicar gipagamit niya ang iyang Internet.

 “Mapasalamaton kaayo ko kang Jehova,” miingon si Desicar. “Mapasalamaton pod ko sa mga ansiyano nga nagdasig nako. Gitabangan ko nila nga ma-enjoy nako pag-usab ang ministeryo.” (Jeremias 15:16) Padayong nagpayunir si Desicar ug iyang gitudloan ang interesadong mga tawo pinaagig text.