Si Ed ug ang iyang asawa, si Jennie, unang nakasulay ug phone witnessing niadtong 2010. a “Wa gyod ko ganahi adto,” si Jennie miingon. “Giingnan nako ang akong bana, ‘Di na gyod ko mohimo adto pag-usab!’” Mao pod nay gibati ni Ed. Siya miingon, “Di ko ganahang motubag sa tawag sa mga tawo nga mamaligya, maong di nako ma-imagine ang akong kaugalingon nga mag-phone witnessing.”

 Dayon nahitabo ang COVID-19 nga pandemic, ug nahunong ang pagpamalaybalay sa mga Saksi ni Jehova. Pero agig pagsunod sa sugo ni Jesus nga isangyaw ang maayong balita, padayon silang nakigbahin sa ministeryo, sagad pinaagig letter writing ug telephone witnessing. (Mateo 24:14; 28:19, 20) Sa samang higayon, ang Kristohanong mga tigom, apil ang mga tigom alang sa pagsangyaw, ginahimo pinaagig videoconference. Sa usa sa mga tigom alang sa pagsangyaw, gisulayan pag-usab ni Ed ang phone witnessing bisag lisod to para niya. Unsay iyang gibati dihang himoon na niya ang iyang unang tawag? “Gikulbaan kog maayo maong miampo ko alang sa tabang!” siya miingon. “Dayon nanawag ko. Ug mao tong higayona nga naestorya nako si Tyrone.” b

 Si Tyrone ug ang iyang asawa, si Edith, nagpuyo sa layong bahin sa Kentucky, U.S.A. Si Tyrone 83 anyos na ug di na kaayo makakita. Bisan pa niana, misugot siya nga magtuon ug Bibliya uban ni Ed. Ginabasa niya ang ilang gitun-an pinaagig magnifying glass ug regular na siyang nagtuon sa Bibliya uban ni Ed pinaagig telepono.

 Mga usa ka bulan sa ulahi, si Tyrone ug Edith nagtambongan na sa mga tigom sa lokal nga kongregasyon. Pero kay wala silay Internet, nagtambongan sila pinaagig telepono. Unsay nakapainteres kang Edith sa kamatuoran?

 Dihang magtuon uban kang Tyrone, madunggan ni Ed ug Jennie ang tingog ni Edith nga nagtabang kang Tyrone sa iyang mga tubag ug sa pagpangitag teksto diha sa Bibliya. Pero wala siya maghisgot nga interesado siyang magtuon. “Magul-anon kaayo ang iyang tingog,” miingon si Jennie, “pero wala mi kabalo ni Ed kon ngano.”

 Usa ka adlaw, nakahunahuna si Jennie nga estoryahon si Edith. Busa naghulat siya ug hustong panahon, dayon iyang gihulam kang Ed ang telepono. “Tyrone,” siya miingon, “madunggan nako ang tingog sa imong asawa. Gusto unta nako siyang hangyoon nga mobasag teksto o mokomento.”

 Wala dayon mitingog si Edith. Dayon sa lumo nga tingog, siya miingon, “Dugay na ko gustong makig-estorya nimo.” Ug siya mipadayon: “Saksi ni Jehova man ko. Kuwarenta ka tuig na kong dili aktibo.”

 Nakurat si Jennie. “Igsoon ti ka!” siya miingon, ug naghinilakay sila.

 Wa madugay, gihatagan ni Ed si Edith ug brosyur nga Balik Kang Jehova. Sa misunod nga mga semana, namatikdan ni Ed ug Jennie nga naay kausaban kang Edith. “Sa una, magul-anon kaayo ang iyang tingog,” miingon si Ed. “Karon, malipayon na ang iyang tingog.” Si Edith miuswag sa espirituwal, ug karon nag-alagad na siya pag-usab ingong malipayong magmamantala sa maayong balita. Ang iyang bana nabawtismohan ingong Saksi ni Jehova niadtong Hulyo 2022.

 Dihang mamalandong si Ed sa iyang pagbati sa una bahin sa phone witnessing, mahinumdoman pod niya ang ilang panag-estoryahay ni Tyrone. Human basaha ni Ed ang Juan 6:44 ug iyang gihisgotan nga si Jehova magkabig sa mga tawo ngadto sa kamatuoran, si Tyrone miuyon ug miingon: “Dugay na kong naghulat sa inyong tawag.” Si Jennie nalipay pod nga gisulayan niya ug sa iyang bana pag-usab ang phone witnessing bisan pag gikulbaan sila sa paghimo niini. “Panalanginan ta ni Jehova kon maningkamot ta,” siya miingon.