1-3. Ni enki ecatukomire twena, kandi shi ni bata oku Yehova arije kutukomorora?

TEKATEKA bakutire omu kihome ahabw’enshobe eyi otarakozire. Toyine amasiko ag’okukurekura. Nohurira oyehebire, kandi tihine eki ori kubasa kukora ngu orugemu. Konka omuri oko kweheba, ku waza kureba wabona hija omuntu oyine obushoborozi bw’okukukomorora kandi yakuraganisa kukuyamba! Okayehurira ota?

² Twena orufu rukatukoma. N’obu twakukora ki, titukabasa kuruhunga. Konka Yehova ayine amani g’okutwiha omu mikono y’orufu. Kandi akaturaganisa ku ‘omuzigu orihereruka kwihwaho ari orufu.’—1 Abakorinso 15:26.

³ Tekateka oku orihurira washemererwa ku oriba otakitina kufa! Konka Yehova taryayihaho orufu kusha. Nayija n’okugarura abantu abafire. Tekateka oku eco kirikushemeza munonga! Naraganisa ku ‘abafire’ barije kuba abahurire. (Isaaya 26:19) Eco ni co Bibuli erikweta okuzoka.

4. (a) Ni enki ekiri kubasa kutuhumuriza twafisa omunyabuzare ninga omunywani witu? (b) Abanywani bamwe ba Yesu bakaba bari baha?

⁴ Omunyabuzare ninga omunywani witu ku ari kufa nitugira obusasi bwingi. Nituhurira tutine buyambi bwona. Tihariho eki turi kubasa kukora  ngu tumugarure. Konka Bibuli netuhumuriza. (Shoma Omu 2 Bakorinso 1:3, 4.) Reka turebe ecokureberaho kimwe ekiri kwereka oku Yehova na Yesu bari kwenda kugarura abakundwa bitu abafire. Obu Yesu yabire ari omu nsi, akaba nakunda kutayayira Laazaaro na banyanyazi beye, ari bo Mariza na Maria. Bona oku ari bashatu bakaba bari banywani ba Yesu. Bibuli negira ngu: ‘Yesu akaba nakunda Mariza n’omurumuna na Laazaaro.’ Bwanyima Laazaaro akafa.—Yohaana 11:3-5.

5, 6. (a) Ni enki eki Yesu yakozire ku yarebire banyanyazi ba Laazaaro na banywani beye bari kurira? (b) Ahabw’enki kumanya ku Yesu ari kushasha nk’itwe kiri kuhumuriza?

⁵ Yesu akaza kuhumuriza Mariza na Maria. Mariza ku yahurire ngu Yesu ari kwija, akaza aheru y’etawuni kumubugana. Akashemererwa, yagambira Yesu ngu: ‘Kuri obire ori aha, [mwenetata] takufire.’ Mariza akaba natekateka ku Yesu yabire acererirwe kwija. Bwanyima Yesu akareba murumuna weye Maria, ari kurira. Ku yarebire bari kurira, kikamushasha na we yarira. (Yohaana 11:21, 33, 35) Akehurira nk’oku turi kwehurira twafisa omuntu witu.

⁶ Kumanya ku Yesu na we ari kushasha nk’itwe nikituhumuriza. Kandi Yesu ari nk’Ishe. (Yohaana 14:9) Yehova ayine amani g’okwihiraho kimwe rufu, kandi nayija kukikora juba aha.

7, 8. Ahabw’enki Mariza yabire atari kwenda ngu bihe ibare aha kituro ca Laazaaro, kandi shi ni enki eki Yesu yakozire?

⁷ Yesu ku yahikire aha kituro ecabire kirimu omutumbi gwa Laazaaro, aha muryango hakaba hariho  ibare rihango. Yesu akagira ngu: ‘Mwiheho ibare.’ Konka Mariza akenda kwanga. Laazaaro akaba amazire ebiro bina omu kituro. (Yohaana 11:39) Akaba atari kumanya eki Yesu yabire yaza kukorera mwenenyina.

⁸ Yesu akagambira Laazaaro ngu: ‘Shohora oyije!’ Ecabireho bwanyima kikatangaza Mariza na Maria. ‘Nyakufa akashohora azingazingirwe omu myenda emikono, engaro n’amaguru.’ (Yohaana 11:43, 44) Laazaaro akaba yashuba kubaho! Akagaruka kuba n’abanyabuzare na banywani beye. Bakija bamuramusya, bamukwataho kandi bagamba na we. Ku cabire kiri ecokutangaza c’amani! Yesu akaba yazora Laazaaro.

9, 10. (a) Ni oha owahire Yesu amani g’okuzora abantu? (b) Ahabw’enki enkuru z’abazokire zitwinire omugasho?

⁹ Mbehi Yesu akakoresa amani geye omu kuzora abantu? Ingaha. Mbere y’okuzora Laazaaro, Yesu akashaba Yehova, rero Yehova yamuha amani g’okuzora Laazaaro. (Shoma omuri Yohaana 11:41, 42.) Laazaaro ti we wenka owazwirwe. Bibuli netugambira omuhara w’emyaka 12 owabire arwire, na we wazokire. Ishe, Yairo, akaba ayehebire munonga, yashaba Yesu ngu amukize. Ni we mwana wenka owu yabire ayine. Ku yabire acagamba na Yesu, abashija bakija bamugambira ngu: ‘Muhara wawe yakaba; noruhiza ki omwegesa?’ Konka Yesu akagambira Yairo ati: ‘Otatina, ikiriza konka, nayija kukira.’ Bwanyima akaza omu ka ya Yairo, ari hamwe na we. Ku bahikire hihi n’eka ya Yairo, Yesu akashanga bari kurira. Yesu  akabagira ngu: ‘Mutarira, ahabw’okuba tafire, agwejegire.’ Ishe na nyina nibabasa kuba bayeburize eki Yesu yabire ari kwenda kumanyisa. Yesu akagambira abandi bona ngu bashohore, yatwara ishe na nyina b’omwana omu kishenge eki yabire anyamimu. Yesu akamukwata aha mukono, yamugambira ngu: ‘Mwishiki we, imuka!’ Tekereza oku abazire bashemerirwe bareba omwana wabo yayimuka akatandika kugenda! Yesu akaba yazora omuhara wabo. (Mako 5:22-24, 35-42; Luka 8:49-56) Okwiha obwe, ku babire bari kureba omuhara wabo, bakaba baragume kwijuka eki Yehova yabakorire akoresize Yesu. *

¹⁰ Abu Yesu yazorire bakashuba bafa. Konka ku turi kushoma enkuru zabo nizituma twagira amasiko gahamire. Yehova nayenda kuzora abafire kandi aryakikora.

11. Omu Mubuurizi 9:5 nihatwegesa ki aha mbera ezi Laazaaro yabire arimu?

¹¹ Bibuli neshoborora ge ku ‘abafire batagira eki bamanya,’ kandi ni ko Laazaaro yabire ari. (Omubuurizi 9:5) Nk’oku Yesu yakigambire Laazaaro akaba ari nk’ogwejegire. (Yohaana 11:11) Obu Laazaaro yabire ari omu kituro, tihine eki yabire ari kumanya.

12. Nitumanya tuta ngu buzima Laazaaro akazoka?

¹² Obu Yesu yazora Laazaaro abantu bingi bakaba  bari kubireba. Nangwa n’abangi ba Yesu bakamanya eco cokutangaza. Laazaaro akagaruka kubaho, kandi eki kikahamya ku okuzoka kuribaho mazima. (Yohaana 11:47) Nambwenu, abantu bingi bakatayayira Laazaaro, kandi kikatuma abantu batandika kwikiriza ku Yesu yatumirwe Ruhanga. Konka eco kikashasha abazigu ba Yesu, ni ko kutandika kukora enama y’okwita bombi, Yesu na Laazaaro.—Yohaana 11:53; 12:9-11.

13. Ahabw’enki turi kwesiga ku Yehova arije kuzora abafire?

¹³ Yesu akagamba ku ‘bona abari omu bituro’ barizoka. (Yohaana 5:28) Eco nikimanyisa ngu bona abu Yehova ari kwijuka nibija kushuba babeho. Konka kugira ngu Yehova azore omuntu, ashemerire kuba namanya buri kantu kona ahari ogo muntu. Konka shi akakibasa? Tekateka: Hariho enyonyozi omu iguru ezi tutari kubasa kubara. Kandi Bibuli netugambira ku Yehova ari kumanya izina rya buri nyonyozi. (Shoma omuri Isaaya 40:26.) Mbwenu shi ku arabe namanya buri nyonyozi, tari kubasa kumanya buri kantu kona ahari abo abu ari kwenda kuzora? Ekiri kukira byona, Yehova ni we owahangire ebintu byona; ni yo nshonga turi kwesiga ku ayine amani g’okuzora abafire.

14, 15. Ebigambo bya Yobu nibitwegesa ki aha kuzoka?

¹⁴ Omushija w’omwesigwa, Yobu, akaba nayesiga ku haribaho okuzoka. Akabuza ngu: “Omuntu ku afa, agaruka abaho?” Bwanyima akagambira Yehova ngu: ‘Ku wakunyeta, nkakwetaba. Kandi n’iwe okayetenga kureba eki emikono yawe ekozire.’ Mazima Yobu  akaba namanya ku Yehova ayine ekihika c’okuzora abantu abafire.—Yobu 14:13-15.

¹⁵ Amasiko g’okuzoka nigatuma wayehurira ota? Nobasa kuba noyebuza ngu: ‘Mbehi abanyabuzare n’abanywani bange abafire na bo baryazoka?’ Mazima nikituhumuriza kumanya ku Yehova ari kwenda kuzora abafire. Reka turebe eki Bibuli eri kugamba ahari abo abarizoka n’ahu baryatura.

16. Embera ziryaba ziri zita ahari abo abarizocera kutura omu nsi?

¹⁶ Omu bwire bwa kare, abantu abazokire bakashuba babugana n’abanyabuzare hamwe n’abanywani babo hanu omu nsi. Eki kiryabaho n’omu biro eby’omu misho, konka co kiryatushemeza kukizaho. Ahabw’enki? Ahabw’okuba abarizocera kutura omu nsi baryabaho ebiro byona kandi tibarishuba kufa. Kandi baryatura omu nsi etari kushusha n’egi eyi turimu hatiya. Tiharibayo endwano, obwitani n’oburwire.

17. Ni baha abarizoka?

¹⁷ Ni baha abarizoka? Yesu akagira ngu ‘bona abari omu bituro baryahurira iraka ryeye barugemu.’ (Yohaana 5:28, 29) Omu Kushuuruurwa 20:13 na ho nihagira ngu: ‘Enyanja yagarura abafu ababire bagirimu, na rufu n’okuzimu byagarura abafu ababire bariyo.’ Ni amazima, abantu abari kuhika omuri za miriyoni nyingi baryazoka. Entumwa Paulo na we akagamba ku ‘haribaho okuzoka kw’abahikirire n’abatahikirire.’ (Shoma omu Byakozirwe 24:15.) Eco nikimanyisa ki?

18. ‘Abahikirire’ abarizoka ni baha?

 ¹⁸ ‘Abahikirire’ barimu abahereza ba Yehova ababireho Yesu atakizire omu nsi. Abantu nka Noa, Abrahamu, Saara, Musa, Ruusi, na Esiteeri nibija kuzocera kutura hanuya omu nsi. Nobasa kushoma enkuru zabo omu Baheburaayo ekicweka ca 11. Kandi shi abahereza ba Yehova abari kwesigwa abari kufa omuri  obu bwire? Na bo nibabarirwa omu ‘bahikirire,’ kandi baryazoka.

19. ‘Abatahikirire’ ni baha? Ni guha mugisha ogu Yehova aribaha?

¹⁹ ‘Abatahikirire’ harimu abantu bingi abafire batakatungire omugisha g’okumanya Yehova. N’obu bafire, Yehova tarabebirwe. Aryabazora, batunge omugisha g’okwega ebiri kumukwataho kandi bamuhereze.

20. Ahabw’enki Yehova atarizora abantu bona?

²⁰ Mbwenu shi eco nikimanyisa ngu abantu bona abafire baryazoka? Ingaha. Yesu akagamba ngu abantu abamwe tibarizoka. (Luka 12:5) Ni oha oritorana yaba omuntu arazoke ninga shi yaba atarazoke? Yehova ni we Muramuzi mukuru, konka akaha Yesu obushoborozi bw’‘okucwera emanja abahurire n’abafire.’ (Ebyakozirwe 10:42) Omuntu mubi otarikwenda kuhinduka tarizoka.—Reba Enyongezo ya 19.

21, 22. (a) Kuzocera kuza omu iguru nikimanyisa ki? (b) Ni oha ow’okubanza owazokire kuza kutura omu iguru?

²¹ Nambwenu, Bibuli netugambira ku hariho abaritura omu iguru. Abarizocera kutura omu iguru tibarishuba kugira omubiri gw’abantu. Nibazocera kuza omu iguru bari omwika.

²² Yesu ni we ow’okubanza owazokire ari omwika. (Yohaana 3:13) Ku hahwire ebiro bishatu Yesu afire, Yehova akamuzora. (Zaaburi 16:10; Ebyakozirwe 13:34, 35) Yesu tarazokire ayine omubiri g’omuntu. Entumwa Petero akashoborora ku Yesu ‘yisirwe omu mubiri konka akahindurwa ohurire’ omu mwika. (1 Petero 3:18) Yesu akazorwa ari ecahangirwe c’omwika kine  amani! (1 Abakorinso 15:3-6) Konka Bibuli negamba ku atari we wenka owazokire.

23, 24. ‘Obusyo buce’ obu Yesu yagambire ni baha, kandi shi nibija kuhika ahari bangahe?

²³ Mbere kake Yesu atakafire, akagambira abegi beye abari kwesigwa ngu: ‘Naza kubashemereza omwanya.’ (Yohaana 14:2) Eki nikimanyisa ngu abamwe omu begi ba Yesu bakaba nibija kuzocera kutura hamwe na we omu iguru. Konka shi ni bangahe? Yesu akagamba ku ari bace, yabeta ‘obusyo buce.’ (Luka 12:32) Entumwa Yohaana we akagamba omubaro gwabo obu yabwine Yesu ‘ayemerire aha rushozi Saayuni, hamwe n’abantu akasirira n’obukumi buna n’enkumi ina [144,000].’—Okushuuruurwa 14:1.

²⁴ Mbwenu shi Abakristo 144,000 bakaba barije kuzoka ryari? Bibuli netugambira ku babire barije kutandika kuzoka bwanyima Yesu yatandika kutegeka omu iguru. (1 Abakorinso 15:23) Hati twahikire omuri obwo bwire, kandi abingi omu 144,000 bakamara kuzoka baza omu iguru. Abacari omu nsi, ku bari kufa nibahika bari kuzoka, baza omu iguru. Konka, abantu bingi nibija kuzocera okutura omu nsi erije kuhinduka Paradiso.

25. Ni enki eki turije kwega omu kicweka ekiri kukurataho?

²⁵ Juba aha, Yehova nayija kwihiraho abantu bona okufa, kandi orufu ruryaba rutakiriho! (Shoma omuri Isaaya 25:8.) Konka shi abarizocera kuza omu iguru baryaza kukorayo enki? Bibuli negamba ku bariza kutegeka hamwe na Yesu omu Bukama bwa Ruhanga. Nitwija kwega ebiri kugamba aha Bukama bwa Ruhanga omu kicweka ekiri kukurataho.