1. Ni eha eshara ruranganwa eyi twaza kushwijuma?

ABANTU bingi nibamanya eshara ruranganwa eri kwetwa ‘Tata itwe, ninga Tata ori omu iguru.’ Yesu akakoresa eyo shara ari kwegesa abegi beye oku bashemerire kushaba. Ni enki eki yashabire omuri eyo shara? Kandi shi ahabw’enki egi shara eri ey’omugasho ahari itwe omuri obu bwire?

2. Ni biha bintu bishatu bikuru ebi Yesu yatwegesize kushaba?

² Yesu akagira ngu: ‘Mushabe muti: “Tata itwe ow’omu iguru, izina ryawe ryezibwe, Obukama bwawe bwije; ebi okunda bikorwe omu nsi nk’oku bikorwa omu iguru.”’ (Shoma omuri Matayo 6:9-13.) Ahabw’enki Yesu yatwegesize kushaba ebyo bintu bishatu?—Reba Enyongezo ya 20.

3. Ni enki eki twaza kwega aha Bukama bwa Ruhanga?

³ Tukega ku izina rya Ruhanga ari Yehova. Kandi tukareba ekigendererwa eki Ruhanga ayinire abantu hamwe n’ensi. Konka shi ni enki eki Yesu yabire nayenda kumanyisa obu yagira ngu: “Obukama bwawe bwije?” Twaza kwega eki Obukama bwa Ruhanga buri kumanyisa, eki burije kukora n’oku burije kutuma izina rya Ruhanga ryayezibwa.

4. Obukama bwa Ruhanga ni enki, kandi Omutegeki wabwo ni oha?

⁴ Yehova akataho obutegeki bw’omu iguru kandi yatorana Yesu ngu abe Omutegeki wabwo. Obwo butegeki, Bibuli nebweta Obukama bwa Ruhanga. Yesu ni ‘Omugabe w’abagabe, Omukama w’abakama.’ (1 Timoseo  6:15) Yesu nabasa kukora ebirungi byingi kukiza omutegeki w’omuntu wena owarabireho, kandi ayine amani kukira abandi bategeki b’abantu, bona beterine.

5. Obutegeki bwa Ruhanga nibutegecera nkahe? Ni enki eki burije kutegeka?

⁵ Ku hahwire ebiro makumi ana Yesu aherize kuzoka, akaza omu iguru. Bwanyima, Yehova akamutaho ngu abe Omugabe w’Obukama bweye. (Ebyakozirwe 2:33) Obutegeki bwa Ruhanga buryategeka ensi yona, buri kutegecera omu iguru. (Okushuuruurwa 11:15) Ni yo nshonga Bibuli eri kweta Obukama bwa Ruhanga ‘Obukama bw’omu iguru.’—2 Timoseo 4:18.

6, 7. Ni enki ekiri kutuma Yesu yaba Omugabe murungi ori kukira abandi?

⁶ Bibuli negamba ku Yesu ari kukira abagabe bona b’abantu ahabw’okuba ‘ni we wenka oyine okutafa.’ (1 Timoseo 6:16) Abategeki b’abantu nibakura, bafa; konka Yesu we tarifa. Ebirungi byona ebi Yesu arije kutukorera biryagumaho ebiro byona.

⁷ Obuhanuzi bwa Bibuli nibugamba ku Yesu ariba Omugabe murungi kandi omunyambabazi. Negira ngu Omwika ‘gwa Mukama guryaguma ahari we, agire’ omwika ‘g’obwenge n’okwetegereza,’ omwika ‘g’okuhanura n’obushoborozi,’ omwika ‘g’okumanya n’okutina Mukama. Omu kutina Mukama ni mwo arishemerererwa; taricwa rubanja rw’amisho, n’obu rwakuba orw’okugambirwa, kureka aryacwera aboro emanja omu kuhikirira.’ (Isaaya 11:2-4) Mbwenu shi noyenda kutegekwa n’omutegeki nk’ogwe?

8. Nitumanya tuta ku Yesu atarije kutegeka wenka?

⁸ Ruhanga akatorana abandi bantu abarije kutegeka na Yesu omu butegeki bw’omu iguru. Ecokureberaho: Entumwa Paulo akagambira Timoseo ngu: ‘Ku turigumisiriza,  turyategeka na we.’ (2 Timoseo 2:12) Ni abantu bangahe abaritegeka na Yesu?

9. Ni abantu bangahe abaritegeka na Yesu? Ruhanga akatandika kubatorana ryari?

⁹ Nk’oku twabyegire omu kicweka ca 7, entumwa Yohaana akworekwa Yesu ari Omugabe omu iguru ari n’abandi bagabe 144,000. Abo bantu 144,000 ni baha? Yohaana akashoborora ku ‘bine izina rya [Yesu] n’izina rya Ishe gahandikirwe aha buso bwabo.’ Akongeraho ati: ‘Abo ni bo bakuratira Omwana gw’entama [Yesu] eyi aza yona. Abo bakacungurwa omu bantu.’ (Shoma omu Kushuuruurwa 14:1, 4.) Abo bantu 144,000 ni Abakristo abari kwesigwa abu Ruhanga yatorine ngu bije ‘kutegeka ensi’ bari hamwe na Yesu. Ku bari kufa nibazoka baza omu iguru. (Okushuuruurwa 5:10) Kuruga omu bwire bw’entumwa, Yehova akagumizamu kutorana Abakristo abari kwesigwa kugira ngu babe bamwe omuri abo bagabe 144,000.

10. Ahabw’enki kuba Yehova yayikirize ngu Yesu n’abantu 144,000 bategeke abantu, kiri kwereka rukundo?

¹⁰ Yehova natukunda munonga, okuhisya n’aha kutorana abantu buntu ngu baze kutegeka na Yesu. Yesu ni omutegeki murungi ahabw’okuba natumanya ge. Namanya eki kuba omuntu n’okubonabona biri kumanyisa. Paulo akashoborora oku Yesu ari kwehurira yareba turi kubonabona, yagamba ku ‘nashasha n’itwe omu bweremwa bwitu’, kandi ‘akohibwa omu miringo yona nk’itwe.’ (Abaheburaayo 4:15; 5:8) Abantu 144,000 na bo nibamanya eki kuba omuntu kiri kumanyisa. Kandi na bo bakabonabona ahabw’okutahikirira n’okurwara. Ni ahabw’eco tushemerire kwesiga ku Yesu n’abantu 144,000 bariba bari kumanya ge enyehurira n’okubonabona byitu.

11. Ahabw’enki Yesu yayegesize abegi beye kushaba ngu ebi Ruhanga akunda bikorwe omu nsi nk’oku bikorwa omu iguru?

¹¹ Yesu akegesa abegi be kushaba ngu ebi Ruhanga ari kukunda bikorwe omu nsi nk’oku bikorwa omu iguru. Konka hine obwire obu ebi Ruhanga ari kwenda byabire bitari kukorwa omu iguru. Ahabw’enki? Omu Kicweka ca 3 tukabona ku Sitaane yayegomekire ahari Yehova. Sitaane ku yamazire kugomera Ruhanga, Yehova akamwikiriza na ba marayika beye, ninga shi ba dayimoni, kuguma omu iguru akire kace. Ni ahabw’eco ebi Ruhanga ari kwenda tibirabire biri kukorwa omu iguru omu bwijwire. Omu Kicweka ca 10, turyayega bingi ahari Sitaane na ba dayimoni.

12. Ni biha bintu bibiri bikuru ebiri kugambwa omu Kushuuruurwa 12:10?

¹² Bibuli netugambira ku bwanyima ya Yesu kuba Omugabe w’Obukama bwa Ruhanga, yabire arije kurwanisa Sitaane. (Shoma omu Kushuuruurwa 12:7-10.) Orunyiriri rwa 10 nirushoborora ebintu bibiri by’omugasho. Obukama bwa Ruhanga bukatandika kutegeka bwine Omugabe Yesu Kristo, kandi Sitaane akamara kwihwa omu iguru yanagwa omu nsi. Nk’oku turije kubyega ebyo byona bikahikirira.

13. Ni enki ecabireho omu iguru, Sitaane ku yabingirweyo?

¹³ Bibuli neshoborora oku ba marayika abesigwa bagizire okushemererwa obu Sitaane na ba dayimoni beye babingirwe omu iguru. Negira ngu: ‘Iwe iguru n’imwe abarituramu, mushemererwe!’ (Okushuuruurwa 12:12) Hatiya omu iguru hariyo obusinge n’obumwe ahabw’okuba abariyo bona nibakora ebi Ruhanga ari kukunda.

14. Ni enki ecabireho omu nsi, Sitaane ku yanagirwemu?

¹⁴ Konka embera z’omu nsi zo tizibonire. Ebintu bibi  nibihika aha bantu ‘ahabw’okuba omuregi akija n’ekiniga kingi,’ kandi ‘namanya ku ayine omwanya muce.’ (Okushuuruurwa 12:12) Sitaane ayine ekiniga kingi. Akabingwa omu iguru, kandi namanya ku nayija kucwecerezibwa juba aha. Nakora eki ari kubasa cona ngu areteho akabi, obusasi n’okubonabona omu nsi yona.

15. Ni kiha kigenderewa eki Ruhanga ayinire ensi?

¹⁵ Konka ekigendererwa eki Ruhanga ayinire ensi tikirahindukire. Na hati nayenda ngu abantu abahikirire bature omuri paradiso omu nsi ebiro byona. (Zaaburi 37:29) Mbwenu shi ni bata oku Obukama bwa Ruhanga burije kukihikiriza?

16, 17. Ni enki eki omuri Danieli 2:44 hari kutugambira aha Bukama bwa Ruhanga?

¹⁶ Obuhanuzi bw’omuri Danieli 2:44 nibugira ngu: ‘Kandi omu businge bw’abo bagabe Ruhanga w’omu iguru aryataho obundi bugabe, obutaricwecerezibwa ebiro byona, kandi obutegeki bwabwo tiburihungurwa rindi ihanga; kureka buryayatagura obwo bugabe bwona, bubumareho, kandi bwo buryagumaho.’ Obu buhanuzi nibutwegesa ki aha Bukama bwa Ruhanga?

¹⁷ Ec’okubanza: Nibutugambira ku Obukama bwa Ruhanga bwabire burije kutandika kutegeka omu ‘businge bw’abo bagabe.’ Eco nikimanyisa ngu obwo Bukama bukaba burije kutandika kutegeka, gavumenti z’abantu zicariho omu nsi. Eca kabiri: Nibutugambira ku Obukama bwa Ruhanga bwabire burije kugumaho ebiro byona kandi ku hatariho obundi butegeki obwabire burabwiheho. Eca kashatu: Hakaba harije kubaho orutaro ahagati y’Obukama bwa Ruhanga na gavumenti z’egi nsi. Obukama bwa Ruhanga ni bwo obwabire burasinge kandi ni bwo obwabire burije kutegeka ensi yona. Bwanyima abantu bakaba barije kutunga obutegeki burungi kusinga obwabireho bwona.

18. Orugamba rw’aha muheru oruriba ahagati y’Obukama bwa Ruhanga na gavumenti z’egi nsi nirwetwa ngu enki?

 ¹⁸ Ni bata oku Obukama bwa Ruhanga burije kwegarurira ensi yona? Mbere y’orutaro rw’aha muheru, oruri kwetwa Haramagedoni, ba dayimoni baryahabisa ‘abagabe b’ensi zona, okubateranira hamwe kuza omu rugamba rw’ekiro kikuru ca Ruhanga Owobushoborozi bwona.’ Ni amazima, gavumenti z’abantu nizija kurwanisa Obukama bwa Ruhanga.—Okushuuruurwa 16:14, 16; reba Enyongezo ya 10.

19, 20. Ahabw’enki nitwenda ngu Obukama bwa Ruhanga bube ni bwo bwategeka ensi?

¹⁹ Ahabw’enki nitwetenga Obukama bwa Ruhanga? Hariho enshonga nk’ishatu. Ey’okubanza: Turi abasisi; ni ahabw’eco niturwara kandi tufa. Konka Bibuli negamba ngu Obukama bwa Ruhanga ku buratandike kutegeka ensi, nitwija kubaho ebiro byona. Kandi omuri Yohaana 3:16 nihagira ngu: ‘Ruhanga akakunda ensi, yahayo Omwana weye omwe nyamunegere, ngu omuntu wena ori kumwikiriza areke kuhwerekerera, kureka atunge amagara agatahwaho.’

²⁰ Enshonga ya kabiri eri kutuma twayetenga Obukama bwa Ruhanga ni ahabw’okuba tutwire ahagati y’abantu babi. Abingi nibabiha, biba kandi bashambana. Itwe tituri kubasa kubihaho, konka Ruhanga we nabasa. Abantu abari kugumizamu kukora ebibi nibija kucwecerezibwa ahari Haramagedoni. (Shoma omuri Zaaburi ya 37:10.) Enshonga ya kashatu eri kutuma twayenda Obukama bwa Ruhanga, ni ahabw’okuba abategeki b’abantu tibine mani, ni ensharizi kandi tibine buringaniza. Tibari kwenda kuyamba abantu ngu borobere Ruhanga. Bibuli negamba ku ‘omuntu [yagumire] nayekuririza ahari mugenzi we ari kumukora kubi.’—Omubuurizi 8:9.

21. Ni bata oku Obukama bwa Ruhanga burije kutuma ebi Ruhanga akunda byakorwa omu nsi?

 ²¹ Bwanyima ya Haramagedoni, Obukama bwa Ruhanga nibwija kutuma ebi Ruhanga ari kukunda byakorwa omu nsi. Ecokureberaho: Nibwija kwihaho Sitaane na ba dayimoni. (Okushuuruurwa 20:1-3) Bwanyima tihariho origaruka kurwara n’okufa. Ahabw’ekitambo, abantu bona abari kwesigwa nibija kubaho ebiro byona omuri paradiso. (Okushuuruurwa 22:1-3) Obukama buryayeza izina rya Ruhanga. Eco nikimanyisa ki? Nikimanyisa ngu Obukama bwa Ruhanga ku buratandike kutegeka ensi abantu bona baryaha ekitinisa izina rya Yehova Ruhanga.—Reba Enyongezo ya 21.

22. Nitumanya tuta ngu Yesu tarabire Omugabe acari omu nsi ninga shi yamara kuhika omu iguru?

²² Yesu akegesa abegi beye kushaba ngu: “Obukama bwawe bwije.” Nikirebeka ge ku Obutegeki bwa Ruhanga bwabire burije kwija omu biro by’omu misho. Yehova akaba araze kubanza yataho obutegeki kandi ataho Omugabe wabwo Yesu. Mbwenu shi Yesu ku yamazire kugaruka omu iguru akahika naba omugabe? Ingaha, akaba ashemerire kutegereza. Ku hahwire obwire Yesu amazire  kuzoka, Petero na Paulo bombi bakashoborora ku obuhanuzi obw’omuri Zaaburi 110:1 bwabire nibugamba ahari Yesu. Omuri obwo buhanuzi Yehova akagira ati: ‘Shutama aha rubaju rwange rwa buryo okuhisya obu abazigu bawe barihinduka akatebe k’ebigere byawe.’ (Ebyakozirwe 2:32-35; Abaheburaayo 10:12, 13) Mbwenu shi Yesu akaba arije kutegereza obwire buri kwingana ki ngu Yehova amugire Omugabe?

23. (a) Yesu akatandika kutegeka ryari ari Omugabe w’Obukama bwa Ruhanga? (b) Ni enki eki turije kwega omu kicweka ekiri kukurataho?

²³ Emyaka myingi mbere ya 1914, Abakristo abari kwesigwa bakashoborocerwa ku ogo mwaka gwabire guri mukuru omu buhanuzi bwa Bibuli. Ebyabireho omu nsi yona kwiha omu mwaka gwa 1914 bikereka ku bagambire amazima. Yesu akatandika kutegeka ari Omugabe omuri ogo mwaka. (Zaaburi 110:2) Bwanyima, Sitaane akanagwa omu nsi, kandi hati asigize ‘omwanya muce.’ (Okushuuruurwa 12:12) Omu kicweka ekiri kukurataho, turyareba obuhamya obundi oburi kwereka ku turi omuri obwo bwire. Kandi nitwija kwega ku juba aha, Obukama bwa Ruhanga buryatuma ebi Ruhanga ari kukunda byakorwa omu nsi.—Reba Enyongezo ya 22..