ISHOMO RYA 07

Ruhanga nashusha ki?

ZAANA

Ku ori kutekateka ahari Yehova Ruhanga ni enki ekiri kuhika nikikwija omu bitekateko? Mbehi notekateka ku ari omuntu oyine amani mingi munonga, konka ori hare yawe nk’enyonyozi eziri hare munonga? Ninga notekateka ku atari omuntu wenyine, ahobwe ku ni ekintu ekine amani nk’enkuba? Mbwenu shi Yehova nashusha ki? Yehova akakoresa Ekigambo ceye Bibuli yatwereka emitwarize yeye, kandi yayereka ku ari kukufaho.

1. Ahabw’enki tutari kubasa kureba Ruhanga?

‘Ruhanga ni [omwika].’ (Yohaana 4:24) Yehova tayine omubiri nk’ogw’abantu. Ni omwika kandi natuura omu iguru ahu tutari kubasa kureba.

2. Ni eha mitwarize emwe ya Yehova?

N’obu tutari kubasa kureba Yehova, ni omuntu wenyine, oyine emitwarize eri kutuma abantu bayenda ngu babe banywani beye. Bibuli negira eti: ‘Yehova akunda eby’oburyo tarisigaho abari kwera beye.’ (Zaaburi 37:28) Ayine “embabazi nyingi n’okusaasira,” kandi na munonga nabyereka abantu abari kubonabona. (Yakobo 5:11) ‘Yehova naba hihi ab’emitima ehendekire; najuna ab’omutima ogwetisize kimwe.’ (Zaaburi 34:18) Kandi shi waba nomanya ku Yehova ari kushemererwa ninga akehurira kubi ahabw’ebi turi kukora? Omuntu ori kukora ebintu bibi naba yahemukira Yehova kandi natuma yayehurira kubi. (Zaaburi 78:40, 41) Konka omuntu ori kukora ebintu birungi nashemeza omutima gwa Yehova.—Shoma omu Nfumu 27:11.

3. Ni bata oku Yehova ari kwereka ku natukunda?

Omutwarize mukuru gwa Yehova ni rukundo. Mazima, ‘Ruhanga ni rukundo.’ (1 Yohaana 4:8) Yehova nayereka ku natukunda birabire omuri Bibuli n’aha bi yahangire. (Shoma omu Byakozirwe 14:17.) Tekateka aha ku yatuhangire. Akatuhanga twine obushoborozi bw’okureba amabara marungi, kuhurikiza omuziki n’okuhurira obunuzi bw’eby’okurya ebinuzire. Nayenda ngu tubeho tushemerirwe.

YEGA BYINGI

Manya eki Yehova ari kukoresa kugira ngu akore ebintu ebiri kutangaza. Rero orebe oku Yehova ari kwereka emitwarize yeye eri kushemeza.

4. Omwika oguri kwera ni amani ga Ruhanga

Nk’oku turi kukoresa emikono omu kukora emirimo, Yehova na we nakoresa omwika gweye oguri kwera. Bibuli neyereka ku omwika oguri kwera gutari muntu, ahobwe ku ni amani agu Ruhanga ari kukoresa omu kuhikiriza ebi ari kwenda. Shoma omuri Luka 11:13 na Ebyakozirwe 2:17, rero muganire ahari ebi bibuzo:

Ruhanga nayija ‘kushuka’ omwika gweye oguri kwera aha bantu bona abari kugumushaba. Mbwenu shi notekateka ngu omwika oguri kwera ni omuntu ninga ni amani ga Ruhanga? Ahabw’enki wagamba basyoya?

Yehova nakoresa omwika gweye oguri kwera omu kukora ebintu ebiri kutangaza. Shoma omuri Zaaburi ya 104:30 na 2 Petero 1:20, 21, rero muganire ahari eki kibuzo:

Ni buha buryo obumwe obu Yehova yakoresizemu omwika oguri kwera?

5. Yehova ayine emitwarize eri kushemeza

Musa akaba ari omuhereza wa Ruhanga w’omwesigwa, konka akaba ari kwenda ngu amanye ge Omuhangi. Obwe rero, Musa akabuza Ruhanga ati: ‘Onyereke enama zawe nkumanye.’ (Okuruga 33:13) Yehova akagarukamu Musa ari kumugambira emwe omu mitwarize yeye. Shoma omu Kuruga 34:4-6, rero muganire ahari ebi bibuzo:

Ni eha mitwarize ya Yehova eyi yagambiire Musa?
Ni eha mitwarize ya Yehova eri kukushemeza?

6. Yehova nafa aha bantu

Abahereza ba Ruhanga, ni okugamba Abaheburaayo, bakaba abagaragwa omuri Misiri. Ni bata oku Yehova yayehurire obu babire bari kubonabona? Zana AMARAKA ninga shi oshome omu Kuruga 3:1-10. Bwanyima muganire ahari ebi bibuzo.

AMARAKA: Yehova akareba okubonabona kwabo (2:45)

Tukuratize eyi nkuru, Yehova nayehurira ata abantu baba bari kubonabona?—Reba orunyiriri rwa 7 na 8.
Mbehi notekateka ngu Yehova naba ari kwenda kukwasa abantu? Ahabw’enki?