ISHOMO RYA 24
Tumanye ba marayika
Yehova nayenda ngu tumanye eka yeye y’omu iguru. Omuri eyo ka harimu ba marayika abu Bibuli eri kweta ‘abana ba Ruhanga.’ (Yobu 38:7) Ni enki eki Bibuli eri kugamba ahari ba marayika? Mbehi nibabasa kukwasa abantu? Mbehi ba marayika bona bari omu ka ya Ruhanga?
1. Ba marayika ni baha?
Yehova akahanga ba marayika atakahangire ensi. Nk’oku Yehova atari kurebwa, ba marayika na bo ni ebyahangire by’omwika ebitari kurebwa ebitwire omu iguru. (Abaheburaayo 1:14) Hariho ba marayika bingi kandi buri omwe ni ow’omutano. (Okushuuruurwa 5:11) Nibakora ‘ebi [Yehova] yaragire, kandi nibahurira iraka ry’ekigambo ceye.’ (Zaaburi 103:20) Omu bwire bwa kare, obumwe Yehova akaba nayohereza ba marayika beye ngu batware obutumwa aha bahereza beye kandi babarokore. Omuri obu bwire, nibakwasa Abakristo kuhika aha bantu abari kwenda kwega ebiri kukwata ahari Ruhanga.
2. Sitaane na ba dayimoni beye ni baha?
Ba marayika abamwe tibaragumizemu korobera Yehova. Marayika ow’okubanza owagomire nayetwa ‘Omuregi kandi Sitaane, ori kugobeza ensi yona.’ (Okushuuruurwa 12:9) Sitaane akaba nayenda kutegeka abandi; obwe rero akabehabeha abantu b’okubanza, kandi bwanyima na ba marayika abandi bakekwatanisa na we omuri oko kugoma. Abo ba marayika abagomire nibetwa ba dayimoni. Yehova akababinga omu iguru yabanaga omu nsi, kandi juba aha nibija kucwecerezibwa.—Shoma omu Kushuuruurwa 12:9, 12.
3. Ni bata oku Sitaane na ba dayimoni bari kugezaho kutuhabisa?
Sitaane na ba dayimoni nibahabisa abantu bingi bari kukoresa emyika mibi. Ecokureberaho: abantu abamwe nibaza kureba abafumu, abari kuragura ebiribaho, ninga shi abarogi. Abandi nibaronda obujanjabi oburi kuba burimu eby’obufumu. Abandi nibabihwabihwa ngu nibabasa kugamba n’abafire. Konka Yehova akaturabura ati: ‘Mutarimurira aha bari kubandwa emizimu n’obu bakuba abarogi.’ (Abaleevi 19:31) Natuha oko kurabura kugira ngu aturinde Sitaane na ba dayimoni. Ni abangi ba Ruhanga kandi nibenda kutukora kubi.
YEGA BYINGI
Manya ebirungi ebi ba marayika bari kutukorera, oku emyika mibi eri ey’akabi, n’oku turi kubasa kwerinda Sitaane na ba dayimoni.
4. Ba marayika nibakwasa abantu kwega ebiri kukwata ahari Yehova
Ba marayika tibari kuburira abantu amisho aha gandi. Ahobwe, nibahisya abahereza ba Ruhanga aha bantu abari kwenda kwega ebiri kumukwataho. Shoma omu Kushuuruurwa 14:6, 7, rero muganire ahari ebi bibuzo:
-
Ahabw’enki turi kwetenga obuyambi bwa ba marayika omu murimo g’okuburira?
-
Mbehi ticakugaruramu amani kumanya ku ba marayika bari kubasa kukuhisya aha bantu abari kwenda kwega Bibuli? Ahabw’enki?
5. Yetantare ebikorwa bya ba dayimoni
Sitaane na ba dayimoni ni abangi ba Yehova. Kandi n’itwe nibatwanga. Shoma omuri Luka 9:38-42, rero muganire ahari eki kibuzo:
-
Ni bata oku ba dayimoni bari kutwariza abantu?
Titushemerire kwikiriza ba dayimoni omu kubaho kwitu. Shoma omu Ky’Ebiragiro 18:10-12, rero muganire ahari ebi bibuzo:
-
Ni bata oku ba dayimoni bari kugezaho kugambana n’itwe? Ni biha bikorwa bya ba dayimoni ebiri omu kacweka aku otwiremu?
-
Mbehi kuba Yehova ari kuzibira ebikorwa bya ba dayimoni noreba kiri ec’obwenge? Ahabw’enki?
Zana Vidiyo, rero muganire ahari ebi bibuzo.
-
Mbehi notekateka ngu akagoyi aku muhara wa Palesa yabire ajwire ni ak’akabi? Ahabw’enki?
-
Ni enki eki Palesa yabire ashemerire kukora kugira ngu ayerinde ba dayimoni?
Abakristo ab’amazima nibatura bari kurwanisa ba dayimoni. Shoma omu Byakozirwe 19:19 n’omu 1 Bakorinso 10:21, rero muganire ahari eki kibuzo:
-
Ahabw’enki kiri ec’omugasho kweyihaho ekintu cona ekine akakwate na ba dayimoni?
6. Rwanisa Sitaane na ba dayimoni obasingure
Sitaane ni we ori kwebembera ba dayimoni. Konka ba marayika abari kwesigwa bebembirwe na Mikayeri marayika omukuru, ari we Yesu. Mbehi Mikayeri ayine amani agari kwingana ki? Shoma omu Kushuuruurwa 12:7-9, rero muganire ahari ebi bibuzo:
-
Ni baha abine amani mingi? Ni Mikayeri na ba marayika beye ninga ni Sitaane na ba dayimoni beye?
-
Mbehi abakurasi ba Yesu bashemerire kutina Sitaane na ba dayimoni beye?
Nobasa kurwanisa Sitaane na ba dayimoni kandi obasingure. Reba omuri Yakobo 4:7, rero muganire ahari eki kibuzo:
-
Ni bata oku turi kubasa kwerinda Sitaane na ba dayimoni?
ABANTU ABAMWE NIBAGAMBA NGU: “Kureba za filimu n’okuzana emizano erimu ebikorwa bya ba dayimoni tibyine nshonga. Ni okweshemeza kusha.”
-
Ahabw’enki eyo mitekatecere eri ey’akabi munonga?
EMPINYE
Ba marayika b’abesigwa nibatukwasa. Sitaane na ba dayimoni beye ni abangi ba Yehova kandi nibakoresa ebikorwa by’obufumu ngu bahabise abantu.
Wayega ki
-
Ni bata oku ba marayika bari kukwasa abantu kwega ebiri kukwata ahari Yehova?
-
Sitaane na ba dayimoni beye ni baha?
-
Ahabw’enki tushemerire kwerinda ebikorwa bya ba dayimoni?
CONDOZA
Reba ebihamya ebiri kwereka ku Yesu ari we Mikayeri omukuru.
“Mikayeri marayika omukuru ni oha?” (Enkuru y’ahari intaneti)
Reba ebihamya ebiri kwereka ku Omuregi atari ekintu kibi ekiri omu mutima gwitu.
Reba ecakwasize omukazi kucweka ahari ba dayimoni.
“Akamanya ekigendererwa c’amagara” (Omunara g’Omurinzi, 1 Okwamushanju, 1993)
Reba oku Sitaane ari kukoresa ebikorwa by’obufumu ngu ahabise abantu.
