MUGUME NIMUREBA!
Amadini n’entambara y’omuri Ukraine—Ni enki eki Bibuli eri kubigambaho?
Tecereza ahari ebi bintu ebi abebembezi b’amadini bagambire aha bikwatirine n’entambara y’omuri Ukraine:
“Omwebembezi wa kereziya y’Aborutodokisi b’omuri Burusiya ori kwetwa Padiri Kirill, tihine eki yagambire aha ntambara eyi Burusiya eri kurwana omuri Ukraine. . . . Ahobwe edini yeye ekagumizamu kujanjaza ebishuba ebiri kugamba kubi ahari Ukraine, kandi ebyo bishuba ni byo Putin yagendireho ari kushoborora ecatumire yatandikisa eyo ntambara.”—Bikagambwa na EUobserver, 7 Okwakashatu, 2022.
“Padiri Kirill . . . akereka ku Burusiya yabire ehikire kutandikisa entambara omuri Ukraine. Akeshoborora ari kugamba ku eyo ntambara eri eyo kurwanisa ebicumuro.—Bikagambwa na AP News, 8 Okwakashatu, 2022.
“Aha Rwokubanza, omwebembezi wa kereziya y’Aborutodokisi omu tawuni ya Kyiv omuri Ukraine, akaha omugisha abakurasi beye ngu baze ‘kurwanisa Abarusiya’ . . . Nambwenu akabagambira ku okwita abasirikare b’Abarusiya kitari ekicumuro.”—Bikagambwa na Jerusalem Post, 16 Okwakashatu, 2022.
“Itwe [Akakiko kakuru akari kubuganisa za kereziya n’ebitongore by’amadini omuri Ukraine (UCCRO)] nitushagika abasirikare bona ba Ukraine n’abandi bona abari kutwegitaho, kandi nitugumizamu kubashabira omugisha ahabw’okuba bari kushagika Ukraine omu rutaro rwayo.”—Bikagambwa na UCCRO *, 24 Okwakabiri, 2022.
Iwe nokihurira ota? Mbehi amadini agari kugamba ngu nigakuratira Yesu Kristo, gashemerire kuhiga abakurasi bago kuza omu ntaro? Bibuli nekigambo enki?
Amateka g’amadini n’entambara
Ebyabireho nibyereka ku emirundi myingi amadini gagenzire gari kugamba ku okwekwatanisa omu ntambara kitine nshonga, ku kiri kirungi, kandi ku kiri kuba kiri kwetengesa omu kuretaho obusinge. Abahamya ba Yehova bamazire emyaka myingi bari kwereka ku okwekwatanisa omuri ebyo bikorwa biri oburyarya. Reba ebyokureberaho bimwe ebyagambirwe omu bitabo byitu.
Ekicweka ekiri kugira ngu “Entambara z’abanyamisharaba—Ni enkuru eri kushasha,” nicereka ku kereziya y’Abakatoriki yayekwatanisize omu bwitani eri kugamba ku guri omurimo g’okukorera Ruhanga na Kristo.
Ekicweka ekiri kugira ngu “Kereziya y’Abakatoriki omuri Afurika,” nicereka ku amadini garemirwe kwemereza entambara ahagati y’abaturage na genosayidi.
Ekicweka ekiri kugira ngu “Mbehi bishemerire kubuzibwa amadini?,” ekiri kugira ngu “Omukono gw’amadini omu ntaro,” n’ekiri kugira ngu “Abapadiri bakekwatanisa omu ntambara,” nibishoborora oku Abapadiri b’Abakatoriki, Abapadiri b’Aborutodokisi, n’Abapasita bayekwatanisize omu ntaro nyingi.
Mbehi amadini gashemerire kushagika entambara?
Ni enki eki Yesu yayegesize: “Oshemerire kukunda mutahi wawe nk’oku oyekunda.” (Matayo 22:39) “Mugumizemu kukunda abangi banyu.”—Matayo 5:44-47.
Tecereza: Mbehi amadini nigabasa kubiha ku nigakuratiza ebiragiro bya Yesu kandi gari kuhiga abakurasi bago kwitana aha rugamba? Kugira ngu otunge ecokugarukamu, shoma ekicweka ekiri kugira ngu “Abakristo ab’amazima n’entambara,” n’ekiri kugira ngu: “Mbehi kukunda abangi bawe nikibasika?”
Eki Yesu yagambire: “Obugabe bwange ti bw’ensi egi. Kuri obugabe bwange bwaba buri obw’ensi egi, engabo zange zikarwanire, ndeka kuhebwayo.” (Yohana 18:36) “Bona abatwara rurara, baryitwa rurara.”—Matayo 26:47-52.
Tecereza: Mbwenu shi yaba Abakristo babire batashemerire kurwanirira Yesu, obwe bashemerire kurwana ahabw’endijo nshonga eyi ari yo yona? Waba ori kwenda kumanya oku Abakristo b’omu kinyigana c’okubanza bakuratize omu bwesigwa enyegesa za Yesu n’ecokureberaho ceye, shoma ekicweka ekiri kugira ngu “Mbehi Abakristo bashemerire kwekwatanisa omu ntaro?”
Ni enki ekirije kuhika aha madini agari kushagika entambara?
Bibuli negamba ku Ruhanga atari kwikiriza amadini gona agari kubiha ngu nigakuratira Yesu, konka gakanga korobera enyegesa zeye.—Matayo 7:21-23; Tito 1:16.
Ekitabo c’Okushururwa nicereka ku Ruhanga yatire aha b’ebembezi b’amadini orubanja rw’eshagama rw’abantu “bona abisirwe omu nsi.” (Okushururwa 18:21, 24) Waba ori kwenda kumanya enshonga ahabw’enki Ruhanga yabatireho orubanja, shoma ekicweka ekiri kugira ngu: “Babuloni orurembo orukuru ni enki?”
Yesu akagamba ku amadini gona agu Ruhanga atari kwikiriza garije kucwerezibwa ahabw’ebikorwa byago bibi, nk’oku ekiti kibi ekiri kwana ebyana bibi “kiri kutemwa, kikanagwa omu muriro.” (Matayo 7:15-20) Waba ori kwenda kumanya oku Ruhanga arije kugacwecereza, shoma ekicweka ekiri kugira ngu: “Omuheru gw’amadini g’ebishuba guri hihi!”
Ahu ebishushani byarugire, kuruga bumosho ori kuza buryo: Ekishushani kikaterwa na Sefa Karacan/Anadolu Agency/Getty Images; Maxym Marusenko/NurPhoto via Getty Images
^ Akakiko kakuru akari kubuganisa za kereziya n’ebitongore by’amadini omuri Ukraine (UCCRO), karimu amakanisa 15 agegamire ah’Aborutodokisi, Abakatoriki b’Abaroma n’ab’Abagurika, Abaporoso n’agandi madini agabegamireho, Abayudaya n’Abasilamu.
