EKICWEKA C’OKWEGA 4
‘[Omwika] ni go guri kutuhamiza’
‘[Omwika] ogo ni go guri kuhamya ku turi abana ba Ruhanga.’—ROM 8:16.
ECESHONGORO CA 25 Abantu b’Omuhendo
EMPINYE *
![Harebeka endimi z’omuriro’ zaza aha mutwe gwa buri mwegi 120, bona ‘bayijura [omwika] oguri kwera.’](https://assetsnffrgf-a.akamaihd.net/assets/m/2020245/univ/wpub/2020245_univ_cnt_1_xs.jpg)
Yehova akakora ecokutangaza yashuka omwika gweye oguri kwera aha Bakristo 120 ahari Pentekoote (Reba paragurafu ya 1-2)
1-2. Ni kiha cokutangaza ecabireho ah’izoba rya Pentekoote y’omu mwaka gwa 33 B.Y.?
HATI turi aha Sande omu kasheshe omuri Yerusaalemu. Turi ahari Pentekoote y’omu mwaka gwa 33. Abegi 120 bateranire hamwe omu kishenge c’ah’iguru. (Byak 1:13-15; 2:1) Ebiro bice Yesu atakafire, akaba yabagambire ngu bagume omuri Yerusaalemu kugira ngu abahe ekiconco c’omutano. (Byak 1:4, 5) Ni enki ecaza kukurataho?
2 ‘Ahonaho okuhorera kwaruga omu iguru, nk’omuyaga oku guhorera n’amani.’ Oko kuhorera kwijuriza kimwe enju eyi babire bashutamimu. Bwanyima, ‘harebeka endimi z’omuriro’ zaza aha mutwe gwa buri mwegi, bona ‘bayijura [omwika] oguri kwera.’ (Byak 2:2-4) Yehova yakora ecokutangaza, yashuka omwika gweye oguri kwera ahari abo begi ba Yesu. (Byak 1:8) Abo ni bo b’okubanza abashukwaho omwika oguri kwera * kandi bagira amasiko g’okwija kutegeka na Yesu omu iguru.
NI ENKI EKIRI KUBAHO OMUNTU YASHUKWAHO OMWIKA?
3. Ahabw’enki ababire bari omuri Yerusaalemu ahari Pentekoote babire batari kubanganisa ku bashukwaho omwika oguri kwera?
3 Kuri n’iwe wabire ori omuri abo begi ababire bateranire omu kishenge c’ah’iguru, okaba otarije kubyebwa. N’iwe endimi ziri nk’ez’omuriro zikaba ziraze aha mutwe gwawe, kandi n’iwe otandika kugamba omu ndimi nyingi! (Byak 2:5-12) Okaba otari kubasa kubanganisa ku n’iwe washukwaho omwika oguri kwera. Konka shi, abantu bona abari kushukwaho omwika oguri kwera nibareba eco cokutangaza kandi omu bwire bumwe? Ingaha. Eco nitukimanya tuta?
4. Mbehi abantu bona abashukirweho omwika omu kinyigana c’okubanza, baketwa omu bwire bumwe? Shoborora.
4 Reka tutandike turi kureba obwire. Abo Bakristo 120 ti bo bonka abashukirweho omwika oguri kwera ahari Pentekoote y’omu mwaka gwa 33. Ahari eryo izoba, abandi abari kuhika aha 3,000 na bo bakashukwaho omwika oguri kwera. Bakagutunga bamara kubatizibwa. (Byak 2:37, 38, 41) Konka omu myaka eyakuratireho, Abakristo bona tibarashukirweho omwika aha bwire bw’okubatizibwa. Aba Samaria bo bakashukwaho omwika bwanyima y’okubatizibwa. (Byak 8:14-17) Kandi ekiri kutana n’ebindi byona, ni ecabire ahari Koruneelio n’ab’omu ka yeye abashukirweho omwika oguri kwera batakabire n’okubatizibwa.—Byak 10:44-48.
5. Tukuratize ebiri omu 2 Bakorinso 1:21, 22, ni enki ekiri kubaho omuntu yashukwaho omwika oguri kwera?
5 Reka turebe ekiri kubaho omuntu yashukwaho omwika oguri kwera. Abamwe ku bari kushukwaho omwika, omu kubanza nikibagumira kwikiriza ngu Yehova abatorine. Nibabasa kwebuza ngu: ‘Ahabw’enki ari inye owu Ruhanga yatorana?’ Hine n’abatari kusiba nibacebuza. Oku cakuba kiri kona, entumwa Pawulo akashoborora oku omuntu ari kutoranwa. Akagira ati: ‘Mukikiriza Yesu, mwahamibwa omuri we n’akamanyiso * k’[omwika oguri kwera] ogwaraganisibwe; ni go mukwato gw’obuhunguzi bwitu, okuhisya obu tuributunga, ekitinisa ce kikasimwa.’ (Efe 1:13, 14) Yehova nakoresa omwika gweye oguri kwera atuma abo Bakristo bahamya batari kubanganisa ku yabatorine. Omu buryo nk’obwe, omwika oguri kwera niguba guri nk’“omukwato [ninga endagano]” eri kubereka ku barije kutura omu iguru ebiro byona; hatari omu nsi.—Shoma omu 2 Bakorinso 1:21, 22.
6. Ni enki eki Omukristo oshukirweho omwika ashemerire kukora kugira ngu ahebwe ekiconco ceye c’okutura omu iguru?
6 Mbwenu shi Omukristo yashukwaho omwika, nikimanyisa ngu ni iteka kuza omu iguru? Ingaha. Ni amazima naba atorinwe kwija kutura omu iguru. Konka ashemerire kwijuka ebi bigambo: ‘[Benetata], mwongere kwezirika kuhamya okwetwa kwanyu n’okutoranwa kwanyu; aha kuba ku muratwaze mutyo, timurigwa biro byona.’ (2 Pet 1:10) Obwe rero ec’okugira ngu oyesirwe ngu oze kutura omu iguru, notunga eco kiconco wagumizamu ori omwesigwa ahari Yehova.—Fil 3:12-14; Heb 3:1; Kush 2:10.
NI BATA OKU OMUNTU ARI KUMANYA YABA ASHUKIRWEHO OMWIKA?
7. Ni bata oku owashukirweho omwika ari kumanya ku yayetirwe kuza omu iguru?
7 Konka shi ni bata oku omuntu ari kumanya yaba yayetirwe kuza omu iguru? Ecokugarukamu kiri omu bigambo ebi Paulo yahandikire Abarooma ‘abayetirwe kuba abari kwera.’ Akabagambira ngu: ‘Aha kuba timurahirwe [omwika] g’obuhuku kugaruka kutina, kureka mukahebwa [omwika] ogwabahindwire abana ba Ruhanga, otugambisa tukagira tuti: “Abba, Tata!” [Omwika] ogo ni go guhamya n’[emyika] yitu ku turi abana ba Ruhanga.’ (Rom 1:7; 8:15, 16) Obwe rero Ruhanga nakoresa omwika gweye oguri kwera ahamiza abo Bakristo ku bayetirwe kuza omu iguru.—1 Tes 2:12.
8. Ni bata oku omuri 1 Yohaana 2:20, 27 hari kwereka ku Abakristo abatorinwe batari kwetenga ow’okubahamiza ku bashukirweho omwika?
8 Yehova natuma omuntu owashukirweho omwika atagira okubanganisa omu bwenge bweye n’omu mutima gweye ku yayetirwe kuza omu iguru. (Shoma omuri 1 Yohaana 2:20, 27.) Ni amazima Abakristo abashukirweho omwika na bo Yehova nabegesa akoresize ekibina, nk’abandi bona. Konka tibari kwetenga omuntu ow’okubahamiza ku bashukirweho omwika. Yehova akakoresa amani geye, ni okugamba omwika gweye oguri kwera, kugira ngu abahamize ku bashukirweho omwika!
NIBAZARWA ‘OBWA KABIRI’
9. Omuntu ku ari kushukwaho omwika, ni ziha mpindahinduka eziri kumubaho, nk’oku kiri kugambwa omu Baefeso 1:18?
9 Abingi omu bahereza ba Yehova b’omuri obu bwire nikibasa kubagumira kumanya ekiri kubaho omuntu yashukwaho omwika. Eco nikihuririnkana aha kuba bo nibaba batashukirweho omwika. Ruhanga akahanga abantu ngu bature omu nsi ebiro byona; ti omu iguru. (Kut 1:28; Zab 37:29) Konka Yehova akatorana abamwe ngu bije kutura omu iguru. Obwe rero ku ari kubashukaho omwika nahindurira kimwe amasiko gabo n’emitekatekere yabo, kituma batandika kutekateka kuza kutura omu iguru.—Shoma omu Baefeso 1:18.
10. ‘Kuzarwa obwa kabiri’ nikimanyisa ki? (Reba n’obugambo obw’aha nsi.)
10 Abakristo ku bari kushukwaho omwika oguri kwera, nibazarwa ‘obwa kabiri.’ * Yesu na we akagamba ku kitari kubasika kushobororera omuntu otarashukirweho omwika oku omuntu ‘owazirwe obwa kabiri’ ari kwehurira.—Yoh 3:3-8.
11. Shoborora oku omuntu owashukwaho omwika ari kuhinduka omu mitekatekere.
11 Ni ziha mpindahinduka eziri kubaho aha mitekatekere y’Abakristo abashukirweho omwika? Yehova atakashukire omwika ahari abo Bakristo, bakaba nibashemerererwa amasiko g’okubaho ebiro byona omu nsi. Bakaba bategerize n’ekihika obwire obu Yehova arije kwihaho ebibi byona kandi akahindura eyi nsi paradiso. Nangwa bakaba nibatekateka bari kwakira abakundwa babo n’abanyabuzare babo abarizoka. Konka ku bamazire kushukwaho omwika, emitekatekere yabo ekahika nehinduka. Ahabw’enki? Ti ahabw’okugira ngu tibari kushemerererwa amasiko g’okubaho omu nsi. Tibarahindwire emitekatekere yabo ahabw’okubonabona. Tibaratekatekire ngu kubaho ebiro byona omu nsi nikija kutuma baruha. Ahobwe, Yehova akakoresa omwika gweye oguri kwera yahindura oku bari kutekateka n’amasiko gabo.
12. Tukuratize ebiri omuri 1 Petero 1:3, 4, ni bata oku Abakristo abashukirweho omwika bari kwehurira batekateka aha masiko gabo?
12 Omuntu oshukirweho omwika nabasa kuhurira atashemerire kuhebwa ogo mugisha. Konka tari kubanganisa na kace ku Yehova yamutorine. Ku ari kutekateka ahari ago masiko g’ebiro by’omu misho, omutima gweye nigushemererwa.—Shoma omuri 1 Petero 1:3, 4.
13. Ni bata oku abashukirweho omwika bari kureba amagara g’omuri eyi nsi?
13 Mbwenu shi eco nikimanyisa ngu abashukirweho omwika nibaba bari kwenda kwefira? Entumwa Paulo akagarukamu eco kibuzo. Akageranisa omubiri g’omuntu n’ihema, yagira ati: ‘Aha kuba itwe abakiri omu nju egi ey’orusisira [ihema] nitusinda turemirwe, ti ahabw’okwenda kujurwa, kureka okongera kujwekwa, ngu ec’okufa kimirwe amagara.’ (2 Kor 5:4) Abo Bakristo tibaratamirwe aga magara, ngu bahurire bayenda ngu gahweho juba. Ahobwe nibakundira kimwe amagara, kandi benda ngu burizoba bakorese amani gabo omu kukorera Yehova bari na banywani babo. Konka eki bari kukora cona, nibagumizamu kwijuka amasiko g’omuhendo agu bine g’okutura omu iguru.—1 Kor 15:53; 2 Pet 1:4; 1 Yoh 3:2, 3; Kush 20:6.
MBEHI YEHOVA AKAKUSHUKAHO OMWIKA?
14. Ni enki eki okushukwaho omwika oguri kwera kitari kumanyisa?
14 Nobasa kuba ori kwebuza yaba Ruhanga yakushukireho omwika oguri kwera. Caba kiri kisyoya, tekateka ahari ebi bibuzo: Mbehi oyine omuhimbo g’okukora ebi Yehova ari kukunda? Mbehi nohurira oyine amani omu murimo g’okuburira? Mbehi ori omwegi murungi w’Ekigambo ca Ruhanga kandi oyenda kumanya ‘ebitari kumanywa bya Ruhanga?’ (1 Kor 2:10) Mbehi noreba Yehova yakuhire emigisha myingi omu murimo g’okuburira? Mbehi nohurira oyine ecetengo c’okuyamba abandi omu by’omwika? Mbehi okerebera omukono gwa Yehova omu kubaho kwawe? Mbwenu shi ku orashange wagarukamu ebyo bibuzo byona ngu “Yego” otari kubanganisa, eco nikihamya ngu oketerwa kuza omu iguru? Ingaha. Ahabw’enki? Ahabw’okuba abahereza ba Yehova bona nibabasa kwehurira basyoya; yaba abashukirweho omwika ninga shi abataragushukirweho. Yehova nabasa kukoresa omwika gweye, aha amani buri muhereza weye atari kwihirira aha masiko geye. Ahobwe yaba ocari kubanganisa yaba Ruhanga yakushukireho omwika gweye oguri kwera, omanye ngu ako ni akamanyiso akari koreka ku otarashukirweho omwika. Abu Yehova yatorine tibari kwebuza yaba bashukirweho omwika ninga yaba bataragushukirweho! Nibamanya ecababireho!
Yehova akakoresa omwika gweye oguri kwera yaha Abrahamu, Sara, Daudi na Yohaana amani g’okukora ebyokutangaza, konka tarakoresize ogo mwika ngu abatorane kuza kutura omu iguru (Reba paragurafu ya 15-16) *
15. Nitumanya tuta ku bona abatungire omwika oguri kwera bataratorinwe kuza kutura omu iguru?
15 Omuri Bibuli, harimu ebyokureberaho by’abantu abatungire omwika oguri kwera; konka nabwo tibine amasiko g’okwija kutura omu iguru. Daudi akaba nayebemberwa omwika oguri kwera. (1 Sam 16:13) Omwika oguri kwera gukamukwasa kushoborocerwa ebintu byingi ebiri kukwata ahari Yehova kandi gwamukwasa kuhandika ebicweka bimwe bya Bibuli. (Mak 12:36) N’obu kiri kisyoya, entumwa Petero akagamba ku Daudi ‘ataratembire omu iguru.’ (Byak 2:34) Yohaana Omubatizi na we ‘akijura [omwika] oguri kwera.’ (Luk 1:13-16) Yesu akagamba ku hatine muntu ori kukira Yohaana, konka akaba atari omu barije kutura omu iguru. (Mat 11:10, 11) Yehova akakoresa omwika oguri kwera yaha abo bantu amani g’okukora ebyokutangaza, konka tarakoresize ogo mwika ngu abatorane kuza kutura omu iguru. Mbwenu shi eco nikimanyisa ngu bakaba batine okwikiriza kugumire nk’abo abatorinwe kuza kutegekera omu iguru? Ingaha. Na bo Yehova nayija kubazora bature omuri Paradiso omu nsi.—Yoh 5:28, 29; Byak 24:15.
16. Ni gaha masiko agu abahereza ba Ruhanga abingi bine?
16 Abahereza ba Yehova bingi tibine masiko g’okutura omu iguru. Abandi bantu bingi abari kugambwa omuri Bibuli, nka Abrahamu, Sara, Daudi, Yohaana Omubatizi, na bo nibija kutura omu nsi obu Obukama bwa Ruhanga buritandika kutegeka.—Heb 11:10.
17. Ni biha bibuzo ebi turishwijuma omu kicweka ekiri kukurataho?
17 Ahabw’okugira ngu n’erizoba hacariho abashukirweho omwika, nitubasa kwebuza ebibuzo byingi. (Kush 12:17) Ecokureberaho: Ni bata oku abashukirweho omwika bashemerire kwereba? Omuntu w’omu kibina canyu yatandika kurya aha bigeraniso, oshemerire kumureba ota? Kandi shi wareba omubaro gw’abashukirweho omwika guri kugumizamu kweyongera? Mbehi kishemerire kukwemereza omutima? Ebyo bibuzo nitwija kubigarukamu omu kicweka ekiri kukurataho.
^ par. 5 Kwiha ahari pentekoote y’omu mwaka gwa 33 B.Y., Yehova akagumizamu kuha Abakristo amasiko agari kushemeza, ag’okwija kutegeka n’Omwana weye omu iguru. Konka shi, ni bata oku abo Bakristo bari kumanya ku batunga ogo mugisha? Ni enki ekiri kubaho omuntu yatunga ogo mugisha? Eki kicweka kirimu ebyashohwire omu Munara g’Omurinzi g’omu Kwokubanza 2016. Caza kugarukamu ebyo bibuzo birungi.
^ par. 2 EBIGAMBO EBISHOBORWIRWE: Kushukwaho omwika oguri kwera: Yehova nakoresa omwika gweye oguri kwera ari kutorana omuntu kugira ngu ayije kutegeka na Yesu omu iguru. Ruhanga nakoresa omwika gweye, aha ogo muntu amasiko g’omu biro by’omu misho, ninga shi ‘omukwato g’obuhunguzi.’ (Efe 1:13, 14) Abo Bakristo nibabasa kugamba ku omwika oguri kwera ‘guri kubahamiza,’ ninga shi kubagambira ku barije kutunga ekiconco c’okutura omu iguru.—Rom 8:16.
^ par. 5 EBIGAMBO EBISHOBORWIRWE: Akamanyiso. Omuntu omwesigwa natebwaho akamanyiso ari hihi kufa ninga okubonabona kwingi kuri hihi kuhika.—Efe 4:30; Kush 7:2-4; reba “Ebibuzo by’abashomi” omu Munara g’Omurinzi og’Okwakana 2016.
^ par. 10 Kugira ngu oshoborocerwe eki ‘kuzarwa obwa kabiri’ kiri kumanyisa, reba Omunara g’Omurinzi, 1 Okwakana 2009, p. 3-12.
ECESHONGORO CA 27 Abaana ba Ruhanga kworekwa
^ par. 57 EKISHUSHANI: N’obu twakuba turi omu kihome ahabw’okwikiriza kwitu ninga shi twine obusinge bw’okuburira n’okwegesa abantu amazima, twena nitwija kutura omu nsi ensya omu bwire obu Obukama bwa Ruhanga buratandike kutegeka.
