1. Omu Mubuurizi 3:1, 7 nihatwegesa ki?

BAMWE omuri itwe nitukunda kugamba munonga. Abandi nibakunda kuhunama. Nk’oku eki kicweka kiri kugamba, hariho obwire bw’okugamba n’obwire bw’okuhunama. (Shoma omu Mubuurizi 3:1, 7.) Konka hine obu turi kuba nitwenda ngu benetata na banyanyazi bagambe bugamba, obundi twenda ngu bagambe bice.

2. Ni oha oshemerire kutugambira obwire obu tushemerire kugamba n’oku tushemerire kugamba?

² Okugamba ni ekiconco eki Yehova yatuhire. (Kur 4:10, 11; Kush 4:11) Natwereka omu Kigambo ceye oku turi kubasa kukoresa ge eco kiconco. Omuri eki kicweka, twaza kushwijuma ebyokureberaho by’omuri Bibuli ebirije kutukwasa kumanya obwire bw’okugamba n’obwire bw’okuhunama. Twaza n’okureba oku Yehova ari kwehurira aha bi turi kugambira abandi. Ec’okubanza, reka turebe obwire burungi bw’okugamba.

3. Tukuratize ebiri kugambwa omu Barooma 10:14, ni ryari obu tushemerire kugamba?

³ Nituba tushemerire kuba twetegwire kugamba ebiri kukwata ahari Yehova n’Obukama bweye. (Mat 24:14; shoma omu Barooma 10:14.) Twakora basyoya, nituba twatoreza Yesu. Enshonga nkuru eyatumire Yesu yayija omu nsi ni okugambira abandi amazima agari kukwata ahari Ishe. (Yoh 18:37) Konka tushemerire kwijuka ngu oku turi kugamba na co ni kikuru. Obwe rero, twaba turi kugambira abandi ebiri kukwata ahari Yehova tushemerire kugamba ‘n’obucurezi’ kandi turi kubaha ekitinisa, kandi tushemerire kufa aha nyehurira z’abandi n’enyikiriza zabo. (1 Pet 3:15) Eco nikituma  tutagamba n’omuntu kusha, ahobwe nitumwegesa kandi tumuhika aha mutima.

4. Nk’oku kiri kugambwa omu Nfumu 9:9, ni bata oku okugamba kuri kubasa kukwasa abandi?

⁴ Abazehe bashemerire kugira eki bagamba bareba mwenetata ninga munyanyazi ari kwetenga obuhabuzi. Konka bashemerire kuronda obwire burungi bw’okugamba kugira ngu batamukora kubi. Nibaba bashemerire kuganira na we bareba hatariho ondijo muntu. Abazehe nibatamu amani kugira ngu bagambe omu buryo oburi kuhisa abandi ekitinisa. Konka nabwe, tibakareka kubereka emisinge y’omuri Bibuli eri kubasa kubakwasa kutwaza ge. (Shoma omu Nfumu 9:9.) Ahabw’enki kiri ec’omugasho kugira obumanzi bw’okugamba caba kiri kwetengesa? Reba ebyokureberaho bibiri bitari kushushana: Omu cokureberaho kimwe omushija nayenda kuhabura abana beye, kandi omu kindi, omukazi nayenda kuganira n’omugabe.

5. Ni ryari obu Omutambi Mukuru Eli yaremirwe kugira eki yagamba?

⁵ Omutambi Mukuru Eli akaba ayine abana babiri abu yabire ari kukunda munonga. Konka abo bana bakaba batari kuha Yehova ekitinisa. Bakaba bine omwanya mukuru g’okuhereza omu ihema. Konka bakakoresa kubi obushoborozi bwabo, tibayereka ku nibaha ekitinisa ebitambo bya Yehova, kandi bakora butunu ekibi c’obushambani. (1 Sam 2:12-17, 22) Nk’oku ebiragiro bya Musa byabire biri kugamba, batabani ba Eli bakaba bashemerire kufa; konka Eli tarabifireho kandi akabikiriza kuguma bari kuhereza omu ihema ry’okubuganiramu. (Bir 21:18-21) Yehova akatekateka ki aha bi Eli yakozire? Akagambira Eli ati: ‘Ahabw’enki wahire batabani bawe ekitinisa okunkira?’ Rero bwanyima Yehova akasharamu kwita abo bashija babiri babi.—1 Sam 2:29, 34.

6. Ni enki eki turi kwegera aha cokureberaho ca Eli?

⁶ Ecokureberaho ca Eli nikitwegesa ishomo ryine omugasho. Twamanya ku munywani witu ninga shi omunyabuzare witu akozire enshobe y’amani, nituba tushemerire kumugambira, tumwijusya ebiragiro bya Yehova. Bwanyima, nitukuratira kugira ngu tumanye yaba yatungire obuyambi bw’abu Yehova yatireho ngu barinde abahereza beye. (Yak 5:14) Tituri kwenda kuba nka Eli, ngu tuhe banywani bitu ninga shi  abanyabuzare ekitinisa kukira eki turi kuha Yehova. Kuhabura omuntu oshobize nicetenga obumanzi, konka twatamu amani niharugamu ebirungi. Reba entanisa eri ahagati ya Eli n’Omuisraelikazi, Abigaili.

7. Ahabw’enki Abigaili yagambine na Daudi?

⁷ Abigaili akaba ari omukazi w’omushija w’omugiga ori kweta Nabali. Obu Daudi n’abashija beye babire bari kuhunga Omugabe Saulo, bakatura n’abarisa b’entama za Nabali, kandi bazirinda ngu abashuma bataziba. Mbwenu shi Nabali akabasima ahabw’ebi bamukorire? Ingaha. Daudi ku yashabire Nabali ngu ahe abashija beye ebyokurya n’amizi, akagira ekiniga kandi yabajuma. (1 Sam 25:5-8, 10-12, 14) Eco kikatuma Daudi yamaririra kwita abashija bona b’omu ka ya Nabali. (1 Sam 25:13, 22) Mbwenu shi ni enki ecakozirwe kugira ngu ako kabi katabaho? Abigaili akahika ari kureba ku ni obwire buhikire bw’okugamba, kandi akagira obumanzi, yaza kubugana abasirikare 400 ababire bine enjara bine n’ekiniga kingi, yagamba na Daudi.

8. Ni enki eki turi kwegera aha cokureberaho ca Abigaili?

⁸ Abigaili ku yabugine Daudi akagamba ayine obumanzi, kandi yamuha ekitinisa. N’obu Abigaili atari we owabire oshobize, akashaba Daudi embabazi. Akagamba ku yabire ari kumanya ku Daudi ari omuntu murungi kandi akesiga ku Yehova yabire aramukwase. (1 Sam 25:24, 26, 28, 33,34) Nk’oku Abigaili yakikozire, twareba hine omuntu owatandika kutora omuhanda mubi, tushemerire kugira obumanzi tukagamba. (Zab 141:5) Tushemerire kumugambira turi kumwereka ekitinisa konka twine obumanzi. Twahabura omuntu omuri rukundo nituba twayereka ku turi abanywani ab’amazima.—Enf 27:17.

9-10. Ni enki eki abazehe bashemerire kwijuka baba bari kuha abandi obuhabuzi?

 ⁹ Abazehe ni bo b’okubanza abashemerire kuhabura omuntu wena w’omu kibina owatandika kuhaba. (Gal 6:1) Abazehe na bo nibamanya ku batahikire, kandi ku hine obu bari kuba bari kwetenga obuhabuzi. Konka nabwe, eco tikiri kutuma bareka kuhana abantu abari kwetenga ekihano. (2 Tim 4:2; Tito 1:9) Baba bari kuhabura omuntu, nibagezaho kukoresa ekiconco cabo c’okugamba bine obwenge n’okwehangana. Nibakunda benetata kandi eyo rukundo netuma bagira eki bakora. (Enf 13:24) Konka eki bari kutaho omutima munonga ni okweza izina rya Yehova, okushagika emisinge yeye, n’okurinda ekibina ebiri kubasa kukishisha.—Byak 20:28.

¹⁰ Twamara kureba obwire obu turi kuba tushemerire kugamba. Konka hine obwire obu turi kuba tutashemerire kugamba. Ni biha bizibu ebi turi kubasa kubugana omuri ezo mbera?

11. Ni kiha cokureberaho eki Yakobo yakoresize, kandi nikikwata kita aha kugamba?

¹¹ Kuhunama nikibasa kutugumira. Omuhandiki wa Bibuli, Yakobo, akakoresa ecokureberaho yatwereka ku kitorobi. Akagira ati: ‘Omuntu wena otashobya omu kugamba, ogo ni omuntu ohikire, nabasa kutegeka n’omubiri gona. Nimumanya ngu, ku tuta ebyoma omu kanwa k’embaraasi ngu zitworobere, tuhindura emibiri yazo yona.’ (Yak 3:2, 3) Omwebembezi w’embarasi nabasa kukoresa ecoma kiriho emigoyi, ahabura embarasi, ninga shi ayemereza. Omwebembezi yaremwa kukwata eyo migoyi, embarasi nebasa kuhaba, rero habaho butandu. Ni co kimwe, n’itwe twaremwa kurinda orurimi rwitu, nitubasa kushisha byingi. Reka turebe ahantu hamwe ahu tushemerire kurinda orurimi rwitu, tukahunama.

12. Ni ryari obu tushemerire kurinda orurimi rwitu, tukahunama?

 ¹² Okayehurira ota hagira mwenetata ninga munyanyazi owagamba ebintu ebi abandi batashemerire n’okumanya? Ecokureberaho: Wabugana omuntu ori kutura omu ihanga ahu omurimo gwitu gwayemerezibwe, mbehi okamubuza oku omurimo g’okuburira guri kukorwa omuri eryo ihanga? Ni amazima nobasa kubuza otine ekigendererwa kibi. Nitukunda benetata kandi nituba turi kwenda kumanya ebiri kubahikaho. Kandi nituba turi kwenda ngu tubagambe omu shara zitu. Konka, obwo nibuba buri obwire bw’okurinda orurimi rwitu, tukahunama. Twagema omuntu ngu atugambire ebintu ebi tutashemerire kumanya, nituba tutayereka rukundo ogo muntu hamwe na benetata na banyanyazi abari kwesiga ku aragumizemu kubabikira ibanga. Tihine ori kwenda kongerera enaku benetata na banyanyazi abari omu ihanga eri omurimo gwitu gwayemerezibwe. Ni co kimwe, tihine mwenetata ninga munyanyazi ori kuhereza omu ihanga nk’eryo ori kwenda kugamba amakuru g’Abahamya bagenzi beye.

13. Nk’oku biri kugambwa omu Nfumu 11:13, ni enki eki abazehe bashemerire kukora, kandi ahabw’enki?

¹³ Abazehe bona bashemerire kukuratiza omusinge oguri omu Nfumu 11:13, bamanya kubika ibanga. (Hashome.) Eki nikibasa kuguma omuzehe yaba ayine omukazi. Abatasine baba bari kuganira, bakagambirana ebitekateko by’omu mutima, enyehurira zabo n’ebiri kubemereza omutima nibakizaho kukundana. Konka omuzehe namanya ku atashemerire kwata ibanga ery’entama zamugambire. Yakikora, nibamwihaho obwesige kandi naba yashisha izina ryeye. Abine emirimo omu kibina tibashemerire ‘kugambira habiri’ ninga ngu babe endyarya. (1 Tim 3:8.) Eco nikimanyisa ku batashemerire kubeherera abandi ninga shi ngu batware orugambo. Omuzehe yaba ari kukunda omukazi weye, tari kumurusya ari kumugambira ebintu ebi atashemerire kumanya.

14. Ni bata oku omukazi w’omuzehe ari kumukwasa kuguma ayine izina rirungi?

¹⁴ Omukazi w’omuzehe namukwasa kuguma ayine izina rirungi, ari kwerinda kumugema ngu amugambire ebintu by’ibanga. Omukazi yakikora basyoya, naba yashagika omushija weye kandi atuma n’ab’omu kibina bakizaho kwesiga iba. Kandi ekiri kukira ebindi, nashemeza Yehova ahabw’okuba naba yarinda obusinge n’obumwe by’ekibina.—Rom 14:19.

15. Ni bata oku Yehova yayehurire ahabw’ebi banywani ba Yobu bakozire kandi ahabw’enki?

¹⁵ Ekitabo ca Yobu nikitwegesa byingi aha bikwatirine n’oku tushemerire kugamba n’obwire obu tushemerire kugamba. Yobu ku yamazire kushasha munonga ahabw’ebigezo ebi yabugine, abashija bana bakija ngu bamuhumurize kandi bamuhe obuhabuzi. Abo bashija bakamara obwire bahunami. Konka ebi abashija bashatu, Elifaazi, Biludaadi, na Zofari bagambire bwanyima, nibyereka ku babire bahunami konka batari kutekateka oku barayambe Yobu. Ahobwe, bakaba bari kutekateka oku baramuhe ebihamya ebiri kwereka ku hine ekibi eki yakozire. Hine eby’amazima ebi bagambire, konka ebyingi ebi bagambire ahari Yobu na Yehova bikaba biri ebishuba kandi bitari kuhumuriza. Bakacwera Yobu omushango, bagamba ku ari omuntu mubi. (Yob 32:1-3) Ni enki eki Yehova yakozire? Akabagirira ekiniga kingi. Akagamba ku ni abashema kandi yatuma bashaba Yobu ngu abashabire.—Yob 42:7-9.

16. Ni enki eki turi kwegera aha cokureberaho kibi ca Elifaazi, Biludaadi na Zofari?

 ¹⁶ Ecokureberaho kibi ca Elifaazi, Biludaadi, na Zofari nitukegeraho byingi. Ec’okubanza: Titushemerire kucwera abandi orubanja. (Mat 7:1-5) Tushemerire kubatega amatu twetonzire tutakagizire eki twabagarukamu. Eco nikituma twamanya embera zabo. (1 Pet 3:8) Eca kabiri: Twagira eki twagamba, tushemerire kugamba twine embabazi kandi ebi twagamba biba bihikire. (Efe 4:25) Eca kashatu: Yehova nafa munonga aha bi turi kugambira abandi.

17. Ni enki eki turi kwegera aha cokureberaho ca Elihu?

¹⁷ Omushija wa kana owatayayire Yobu ni Elihu, omunyabuzare wa Abrahamu. Akahurikiza Yobu hamwe na ba bashija bashatu. Nikirebeka ku yahurikize ge ebi babire bari kugamba, ahabw’okuba bwanyima akabasa kuhabura Yobu omu bucurezi kandi tiyamuryarya, rero catuma Yobu yahindura emitekatekere yeye. (Yob 33:1, 6, 17) Ecabire kiri kikuru ahari Elihu ni okuhimbisa Yehova, omu mwanya g’okwehimbisa ninga kuhimbisa ondijo muntu. (Yob 32:21, 22; 37:23, 24) Ecokureberaho ca Elihu nikitwegesa ku hariho obwire bw’okuhunama, tukahurikiza ge. (Yak 1:19) Nambwenu nikitwegesa ngu twaza kuha omuntu obuhabuzi, entego yitu eshemerire kuba ey’okuha Yehova ekitinisa, omu mwanya g’okwehisa ekitinisa.

18. Ni bata oku turi kubasa kwereka ku nitusima Yehova ahabw’ekiconco c’okugamba eki yatuhire?

¹⁸ Nitwereka ku nitusima Yehova ahabw’ekiconco c’okugamba, turi kukuratiza obuhabuzi bwa Bibuli aha bikwatirine n’obwire bw’okugamba n’oburyo bw’okugamba. Omunyabwenge Sulemaani akahandika ati: ‘Ekigambo kihikire ekigambirwe omu bunaku bwaco, ni nk’amapera g’ezabu agari omu kibo c’efeza.’ (Enf 25:11) Twabanza kuhurikiza ge ebi abandi bari kutugambira, ebigambo byitu nibyija kuba nk’amapera g’ezabu, bigire omugasho kandi bigaruremu abandi amani. Obwe rero, yaba turi kugamba byingi ninga bike, ebigambo byitu nibyija kombeka abandi kandi bitume Yehova yashemererwa. (Enf 23:15; Efe 4:29) Obu ku ni oburyo burungi obu turi kubasa kwerekamu ku nitusima ahabw’ekiconco c’okugamba eki Ruhanga yatuhire!