1. Ni enki eki turi kwijuka ku turi kutekateka ahari byona ebi Yehova yahangire?

KU TURI kutekateka aha bintu byona ebi Yehova yahangire, nitubasa kwehurira nka Dawudi omuhandiki wa zaaburi owaburize ati: ‘Ku ntekateka aha iguru ryawe eri wahangire n’engaro zawe, okwezi n’enyonyozi ebi watireho, omuntu ni kintu ki iwe kumwijuka? ninga shi omwana w’omuntu iwe kumutayayira?’ (Zab 8:3, 4) Nka Dawudi, n’itwe nitubasa kutekateka aha ku turi bace twayegeranisa n’enyonyozi, rero tuhika turi kumanya ku Yehova ari kutwijuka. Konka twaza kureba oku Yehova yafire aha bantu b’okubanza ari bo Adamu na Eva kandi akabata omu ka yeye.

2. Ni guha murimo ogu Yehova yahire abana beye b’okubanza b’omu nsi?

² Adamu na Eva bakaba bari abana b’okubanza ba Yehova b’omu nsi kandi akaba ari Ishe wabo w’omu iguru ori kubakunda. Akabaha omurimo g’okukora. Akabagambira ati: ‘Muzare, mukanye, mwijure ensi, ebe eyanyu.’ (Kut 1:28) Ruhanga akaba nayenda ngu bazare abana kandi bareberere ge eka yabo omu nsi. Kuri Adamu na Eva bayorobire Yehova kandi bakakora ebi yabashabire bo n’abana babo, bakaba barije kuguma omu ka yeye ebiro byona.

3. Ahabw’enki turi kubasa kugamba ku Yehova yahire Adamu na Eva omwanya gw’ekitinisa omu ka yeye?

³ Adamu na Eva bakaba bine omwanya gw’ekitinisa omu ka ya Yehova. Nk’oku biri kugambwa omu Baheburaayo 2:7, Bibuli negamba oku Yehova yahangire omuntu eri kugira eti: ‘Omu mwanya muce wamugarura ahaasi okukira ba marayika, wamujweka ekirunga c’ekitinisa n’okuhimbisibwa.’  Mazima, Yehova tarahangire abantu bine amani, obwenge n’obushoborozi nk’obwa ba marayika. (Zab 103:20) Konka abantu ni ab’‘ahaasi’ kukira ebyo bihangirwe by’omwika ebyine amani. Ku nikitangaza! Yehova akahanga abazire bitu ab’okubanza bine amagara agari kutangaza.

4. Ni enki ecabireho Adamu na Eva ku bagomire Yehova kandi ni enki eki twaza kushwijuma omuri eki kicweka?

 ⁴ Ekiri kushasha ni oku Adamu na Eva baferirwe omwanya gwabo omu ka ya Yehova. Eco kikaretera ebizibu ababakomokireho nk’oku twaza kukireba omuri eki kicweka. Konka ekigendererwa ca Yehova tikirahindukire. Nayenda ngu abantu abari kumworobera babe abana beye ebiro byona. Reka tubanze tushwijume oku Yehova ari kutureba nk’ab’omugasho. Bwanyima, nitwija kureba eki tushemerire kukora hati kugira ngu twereke ku nitwenda kuba omu ka ya Ruhanga. Aha muheru, nitwija kushwijuma emigisha eyi abana ba Yehova b’omu nsi barije kushemerererwa ebiro byona.

5. Ni bata oku turi kubasa kwereka ku nitusima Ruhanga ahabw’okutuhanga omu kishushani ceye?

⁵ Yehova akereka ku turi ab’omugasho ari kutuhanga omu kishushani ceye. (Kut 1:26, 27) Ahakuba twahangirwe omu kishushani ca Ruhanga, nitubasa kwereka emitwarize yeye mirungi nka rukundo, okusaasira, embabazi n’okuhikirira. (Zab 86:15; 145:17) Ku turi kugira eyo mitwarize nituhimbisa Yehova kandi twereka ku nitumusima. (1 Pet 1:14-16) Ku turi kukora ebi Tata w’omu iguru ari kukunda nituhurira tumazirwe. Kandi ahakuba twine emitwarize nk’eya Yehova nitubasa kuba omu ka yeye.

6. Ni bata oku Yehova yayerekire ku nareba abantu nk’ab’omugasho?

⁶ Yehova akatutegurira eka y’omutano. Yehova atakahangire omuntu w’okubanza, akabanza yamutegurira ensi ngu agituremu. (Yob 38:4-6; Yer 10:12) Ahakuba Yehova ari efura akatuha ebintu byingi by’okushemerererwa. (Zab 104:14, 15, 24) Akatekateka ahari byona ebi yahangire ‘yareba biri birungi.’ (Kut 1:10, 12, 31) Akereka ku abantu bari ab’omugasho ari kubaha byona ebi yahangire omu nsi ngu babitegeke. (Zab 8:6) Ruhanga nayenda ngu abantu abahikirire bareberere ebi yahangire ebiro byona. Mbehi burijo nosima Yehova ahabw’eco kiraganiso c’omutano?

7. Ni bata oku omuri Yoshua 24:15 hari kwereka ku omuntu ayine ekiconco c’okweshariramu?

⁷ Yehova akatuha ekiconco c’okweshariramu. Ni itwe turi kusharamu oku turikoresa amagara gitu. (Shoma omuri Yoshua 24:15.) Ruhanga witu ori kutukunda nashemererwa ku turi kusharamu kumuhereza. (Zab 84:11; Enf 27:11) Nitubasa kukoresa ge ekiconco c’okweshariramu omu buryo bwingi. Reba ecokureberaho c’oku Yesu yakoresize ge ekiconco c’okweshariramu.

8. Ni buha buryo bumwe obu Yesu yakoresimu ge ekiconco c’okweshariramu?

⁸ Nitubasa kutoreza Yesu turi kusharamu kuta eby’abandi omu mwanya g’okubanza. Izoba rimwe obu Yesu n’entumwa zeye babire baruhire, bakaza omu mwanya oguturize ngu baruhuke. Konka eco kikaba kitarabasike. Abantu bingi bakabashanga ahu babire bari bari kwenda ngu Yesu abegese. Konka eco tikiratumire Yesu yayehurira kubi. Omu mwanya gw’eco, akabitirwa esaasi. Mbwenu shi eco kikatuma Yesu  yakora ki? ‘Akatandika kubegesa ebintu byingi.’ (Mak 6:30-34) Ku turi kutoreza Yesu turi kukoresa obwire bwitu n’amani gitu turi kukwasa abandi, nituhimbisa Tata witu w’omu iguru Yehova. (Mat 5:14-16) Nambwenu nituba turi kwenda kuba omu ka ya Yehova.

9. Ni kiha kiconco c’omutano eki Yehova yahire abazire?

⁹ Yehova akaha abantu omurimo g’okuzara abana, n’og’okubegesa kumukunda n’okumuhereza. Mbehi waba ori omuzire, noyereka ku nosima ahabw’eco kiconco c’omutano? N’obu Yehova yahire ba marayika emirimo myingi, konka tarabahire omurimo g’okuzara abana. Obwe rero, waba ori omuzire guma noyereka ku nosima ahabw’eco kiconco eki watungire c’okurera abana. Yehova akesiga abazire yabaha omurimo g’okurera abana ‘nibabategeka ge kandi nibabegeseza omuri [Yehova].’ (Efe 6:4; Bir 6:5-7; Zab 127:3) Ekitongore kikakwasa abazire kiri kubaha ebikoreso ebyegamire ahari Bibuli, harimu ebitabo, za vidiyo, emiziki n’ebiri ahari intaneti. Mazima, Tata witu w’omu iguru n’Omwana weye nibakunda abana bitu. (Luk 18:15-17) Abazire ku bari kwesiga Yehova bakakora cona eki bari kubasa ngu barere abana babo b’omuhendo, nikimushemeza. Nambwenu abazire nibakwasa abana babo kugira amasiko g’okwija kuba omu ka ya Yehova ebiro byona!

10-11. Ahakuba Yehova yatuhire ekitambo, ni gaha masiko agu twine?

¹⁰ Yehova akahayo Omwana weye owu ari kukunda munonga kugira ngu twije kugaruka kuba ab’omu ka yeye. Nk’oku twakirebire omuri  paragurafu ya kana, Adamu na Eva bakaferwa omwanya gwabo omu ka ya Yehova, kandi bagufereza n’abana babo. (Rom 5:12) Adamu na Eva bakasharamu kugomera Ruhanga, obwe rero bakaba bashemerire kuruga omu ka yeye. Kandi shi abana babo? Ahakuba Yehova ari kukunda abantu, akateraho abo bana oburyo bw’okwija kuba ab’omu ka yeye. Eco akakikora ari kuhayo amagara g’Omwana weye omwe nyamunegere, Yesu Kristo. (Yoh 3:16; Rom 5:19) Eco kitambo ca Yesu, kikatuma abantu 144,000 bayetwa abana ba Ruhanga.—Rom 8:15-17; Kush 14:1.

¹¹ Nambwenu abantu bingi abatari kubarwa nibakora ebi Yehova ari kukunda. Nibija kuza omu ka ya Ruhanga omu bwijwire bwanyima y’ekigezo c’aha muheru aha muheru gw’emyaka rukumi. (Zab 25:14; Rom 8:20, 21) Ahakuba bine ago masiko, Omuhangi wabo Yehova nibamweta ‘Tata.’ (Mat 6:9) Abarizoka na bo nibija kutunga omugisha g’okwega ebiri kukwata ahari Yehova n’ebi ari kwenda. Abarije kusharamu kumworobera na bo nibija kuba ab’omu ka yeye.

12. Ni kiha kibuzo eki twaza kugarukamu?

¹² Nk’oku twakireba Yehova akakora ebintu byingi kugira ngu ayereke ku abantu bari ab’omugasho. Akahindura abashukirweho omwika abana beye kandi yaha ab’omu mutwe muhango omugisha g’okwija kuba abana beye omu nsi ensya. (Kush 7:9) Ni enki eki turi kubasa kukora hati kugira ngu twereke Yehova ku turi kwenda kuba ab’omu ka yeye ebiro byona?

13. Ni enki eki turi kubasa kukora kugira ngu tube omu ka ya Ruhanga? (Mak 12:30)

¹³ Yereka ku nokunda Yehova ori kumukorera n’omutima gwawe gona. (Shoma omuri Mako 12:30.) Omu biconco byona ebi Ruhanga yatuhire, ekiri kukira ebindi byona ni okumuramya. Nitwereka Yehova  ku nitumukunda turi ‘korobera ebiragiro byeye.’ (1 Yoh 5:3) Omuri ebyo biragiro byeye harimu eki Yesu yatuhire c’okuhindura abantu abegi turi kubabatiza. (Mat 28:19) Nambwenu Yehova akaturagira kukundana. (Yoh 13:35) Yehova nayija kwakira abari kumworobera omu ka yeye.—Zab 15:1, 2.

14. Ni bata oku turi kubasa kwereka ku nitukunda abandi? (Matayo 9:36-38; Abarooma 12:10)

¹⁴ Yereka ku nokunda abandi. Rukundo ni go mutwarize gwa Yehova oguri kukira endijo. (1 Yoh 4:8) Yehova akereka ku natukunda n’okumumanya tutakamumanyire. (1 Yoh 4:9, 10) Nitumutoreza turi kwereka abandi rukundo. (Efe 5:1) Oburyo bumwe obu turi kubasa kwerekamu abandi rukundo, ni okubakwasa kwega ebiri kukwata ahari Yehova obwire butakahwireyo. (Shoma omuri Matayo 9:36-38.) Ku turakikore tusyoya, nituba twabakwasa kumanya eki bashemerire kukora ngu babe omu ka ya Ruhanga. Omuntu ku ari kubatizibwa nabwe tushemerire kugumizamu kumukunda n’okumuha ekitinisa. (1 Yoh 4:20, 21) Ni bata oku turi kubasa kukikora? Oburyo bumwe obu turi kukikoramu ni okumwesiga. Ecokureberaho: Yakora ekintu titushemerire kutekateka ngu yakikora ahabw’okwekunda. Omu mwanya gw’eco, tushemerire kwereka ku nitumuha ekitinisa kandi tukamureba nk’ori kutukira.—Shoma omu Barooma 12:10; Fil 2:3.

15. Ni baha abu tushemerire kwereka embabazi kandi tukatwariza ge?

¹⁵ Yereka embabazi abantu bona kandi obatwarize ge. Twaba turi kwenda kuba ab’omu ka ya Yehova ebiro byona, tushemerire kukuratiza Ekigambo ca Ruhanga omu kubaho kwitu. Ecokureberaho: Yesu akegesa ku tushemerire kwereka embabazi abantu bona n’okubatwariza ge harimu n’abangi bitu. (Luk 6:32-36) Konka eco hine obu kiri kutugumira. Caba kiri kutugumira, tushemerire kwega kutekateka nka Yesu kandi tukatwaza nkawe. Twakora cona eki turi kubasa ngu tworobere Yehova kandi tutoreze Yesu, nituba turi kwereka Tata witu w’omu iguru ku turi kwenda kuba omu ka yeye ebiro byona.

16. Ni bata oku turi kubasa kurinda izina ry’ab’omu ka ya Yehova?

¹⁶ Rinda izina ry’ab’omu ka ya Yehova. Omu ka, omwojo muto nakunda kutoreza ebi mukuru weye ari kukora. Omwojo mukuru ku ari kuta emisinge ya Bibuli omu mwanya g’okubanza omu kubaho kweye, nateraho murumuna weye ecokureberaho kirungi. Konka ku ari kukora ebintu bibi, omuto na we ni ko okwe. Eka ya Yehova na yo ni ko eri. Omukristo w’omwesigwa ku ari kuba omuhakani ninga akakora ebindi bintu bibi, abandi nibabasa kumutoreza. Abari kukikora nibashisha izina ry’ab’omu ka ya Yehova. (1 Tes 4:3-8) Tushemerire kwerinda kutoreza ecokureberaho kibi tukerinda ekintu cona ekiri kubasa kushisha obunywani bwitu na Tata witu w’omu iguru ori kutukunda.

17. Ni eha mitekatecere eyi tushemerire kwerinda kandi ahabw’enki?

¹⁷ Yesige Yehova omu mwanya g’obutungi. Yehova naraganisa ku arije kutuha ebyokurya, eby’okujwara n’ah’okutura ku turibanza kusherura Obukama bweye kandi tukorobera ebiragiro byeye. (Zab 55:22; Mat 6:33) Eco kiraganiso nikija kutuma tutatekateka ku obutungi bw’omuri egi nsi burije kuturinda kandi bukaturetera okushemererwa. Nitumanya ku ekintu kimwe conka ekiri kubasa kutuma twatunga obusinge bw’omu mutima ari okukora ebi Yehova ari kukunda. (Fil 4:6, 7) N’obu  twakuba turi kubasa kugura ebintu byingi, tushemerire kureba yaba twine amani n’obwire bw’okufa ahari ebyo bintu. Mbenu shi iwe kiri kita? Tushemerire kwijuka ku Ruhanga yatuhire omurimo g’okukora. Ni yo nshonga tutashemeririre kwikiriza ekintu cona ngu kituhuzye. Tituri kwenda kuba nk’omushija owayangire omugisha g’okukorera Yehova n’og’okwetwa omwana weye, ahabw’obutungi obu yabire ayine omu nsi!—Mak 10:17-22.

18. Ni eha migisha eyi abana ba Ruhanga barije kushemerererwa ebiro byona?

¹⁸ Abana ba Yehova nibija kushemerererwa omugisha oguri kukira endijo yona, ni okugamba kumukunda n’okumuramya ebiro byona! Nambwenu abine amasiko g’okwija kuba omu nsi ebiro byona, bine omugisha g’okwija kureberera egi nsi eyi Yehova yahangire ngu ebe eka yabo. Juba aha, Obukama bwa Ruhanga nibwija kuboneza egi nsi n’ebigirimu byona. Yesu naza kwihaho ebizibu byona ebi Adamu na Eva baturetire ahabw’okugoma. Yehova nayija kuzora abantu bingi kandi abahe ekiconco c’amagara agatahwaho omu nsi erije kuba yahindukire paradiso. (Luk 23:42, 43) Abantu bona abari kukorera Yehova ku bariba abahikirire nibija ‘kujwekwa ekirunga c’ekitinisa n’okuhimbisibwa’ nk’oku kiri kugambwa omuri Bibuli.—Heb 2:7.

19. Ni enki eki tushemerire kuguma turi kwijuka?

¹⁹ Yaba ori ow’omu mutwe muhango, oyine amasiko g’omutano. Ruhanga nakukunda kandi nayenda ngu obe ow’omu ka yeye. Obwe rero, kora cona eki ori kubasa ngu omushemeze. Buri izoba guma oyijuke ebiraganiso byeye. Guma oyereke ku nosima ahabw’omugisha ogu oyine g’okuramya Tata witu w’omu iguru kandi omugisha ogu oyine g’okumuhimbisa ebiro byona guma ogurebe nk’og’omugasho!