Yehova nayenda ngu abatasine babeho bashemerirwe kandi bagirane obunywani ebiro byona. (Mat 19:4-6) Mbehi waba ori kwenda ow’okutasana na we ni bata oku ori kubasa kumuronda? Ahakuba Yehova ari Omuhangi witu namanya oburyo burungi obu turi kubasa kurondamu abu turitasana na bo. Obwe rero, ku orakuratize emisinge eyi yatuhire noyija kushemererwa. Reba emwe omuri eyo misinge.

Og’okubanza: Twena tushemerire kushoborocerwa ku ‘omutima guri engobya okukira ebintu byona, [kandi] gwine endwara etarikutambwa.’ (Yer 17:9) Abantu babiri babugana bakatandika kusigurana, nibagirirana enyehurira nyingi kandi kituma kukora ensharamu ndungi cabagumira. Abantu ku bari kukora ensharamu y’okutasya bagendire aha nyehurira zabo bwanyima nikibashasha. (Enf 28:26) Ni yo nshonga abantu babiri batashemerire kuhika niberekana enyehurira nyingi bamazire obwire buce bari kusigurana ninga shi kugira ebi baraganisana mbere y’okumanyana ge.

Omu Nfumu 22:3 nihagira ngu: ‘Omwerinzi ku areba akabi kija, ayeshereka; Konka otine bwenge akegema, kamwita.’ Ni kaha kabi akari omu kukoresa embuga zo kusiguraniraho? Ekiri kushasha, abantu bamwe bakabugana abandi aha mbuga z’okusiguraniraho, batandika kusigurana, rero bwanyima bashanga abo bantu bababihire. Nambwenu abantu abatari kwesigwa nibakora za akawunti z’ebishuba kugira ngu bibe esente aha bantu abatine eki bari kumanya. Obumwe noshanga abantu abari kukora ebyo bari kweyeta Abahamya.

Reba ekindi kizibu. Ezo mbuga zimwe nizikoresa puroguramu ezakozirwe n’abantu ngu zibashariremu abu baritasana na bo. Konka, tihariho ebihamya ebiri kwereka ku ebyo biri kukora. Tikiri ec’obwenge kukoresa puroguramu za kompiyuta ezakozirwe n’abantu kugira ngu zikushariremu owu muritasana? Titushemerire kwesiga puroguramu za kompiyuta, ahobwe tushemerire kwesiga emisinge ya Bibuli?—Enf 1:7; 3:5-7.

Omusinge oguri omu Nfumu 14:15 nigugira ngu: ‘Otine bwenge ayikiririza eryo, konka omwerinzi ayetegereza ahu arikuraba.’ Mbere y’okusharamu owu oritasana na we, noba oshemerire kubanza wamumanya  ge. Konka tori kubasa kumumanya ge mwabuganira aha mbuga z’okusiguraniraho. Mbehi obwe kumara obwire ori kureba ebiri kumukwataho n’okumara obwire muri kuhandikirana, nikimanyisa ngu nomumanya ge? Bamwe ababire nibatekateka ku babwine omuntu murungi, bakashusha nk’abaterwa n’enkuba ku babugine amisho aha gandi.

Omuhandiki wa zaburi akagamba ngu: ‘Tinshutama na bantu batine mugasho, Kandi tinkwatanisa n’endyarya.’ (Zab 26:4) Abantu bingi nibareba kubiha ebiri kubakwataho aha mbuga z’okusiguraniraho nk’ebishangirwe. Nibagezaho kushereka emicwe yabo mibi ninga shi eremwa kurebeka ge baba bari kuhandikirana. Ni ec’omugasho kubanza watekateka ahari ebi bibuzo: N’obu abamwe bari kubasa kugamba ngu ni Abahamya ba Yehova, mbehi ni Abakristo ababatizibwe? Mbehi bakuzire omu by’omwika? Mbehi bine obunywani burungi na Yehova? Mbehi ab’omu kibina eki barimu nibabaha ekitinisa? Mbehi ni ecokureberaho kibi ninga ‘abanywani babi’? (1 Kor 15:33; 2 Tim 2:20, 21) Mbehi emisinge y’omuri Bibuli nebikiriza kutasya? Noba oshemerire kushwijuma ebyokugarukamu by’ebyo bibuzo, konka kigumire kubimanya waba otaburize abandi Bahamya abari kubamanya ge. (Enf 15:22) Nambwenu Omuhamya wa Yehova w’omwesigwa tari kubasa kutekateka ‘kukwatanisa n’otari kwikiriza.’—2 Kor 6:14; 1 Kor 7:39.

Ahabw’okuba embuga z’okusiguraniraho ziri ez’akabi, hariho oburyo burungi bw’okuronda owu muritasana kandi mukagira eka eshemerirwe. Ni nkahe ahu ori kubasa kubonera owu oritasana na we murungi? Twaba tutari kubasa kubuganira hamwe, nitubasa kumanyana birabire omu nterane, ebiterane, n’ebindi bikorwa ebiri kubuganisa abantu bingi.

Twaba tutari kubasa kubuganira hamwe nk’omuri bwire bw’endwara ya COVID-19, nitubasa kubuganira omu nterane tukoresize ebyoma by’obwenge, ahu turi kubasa kutunga omugisha g’okumanyana n’abacari bonka. Nobasa kureba oku bari kwekwatanisa omu nterane n’oku bari kwereka okwikiria kwabo bari kuhayo ebitekateko. (1 Tim 6:11, 12) Nimubasa n’okuganirira omu kishenge c’ahari zoom bwanyima y’enterane. Birabire omu bikorwa ebiri kubuganisa Abahamya, nobasa kureba omuntu owu okunzire oku ari kutwariza abandi kituma wamanya emitwarize yeye yenyine. (1 Pet 3:4) Bwanyima y’obwire ku ori kumara kumanya ge ogo muntu, noreba yaba mwine entego eziri kushushana kandi yaba muri kubasa kutasana.

Abatakatasine ku bari kukoresa emisinge ya Bibuli omu kuronda abu baritasana na bo nibija kugira eka erimu okushemererwa nk’oku omu Nfumu hari kukigamba hati: ‘Obwine omukazi w’okushwera, aba abwine ekintu kirungi; kandi aba atungire omugisha ogurugire ahari Yehova.’—Enf 18:22.