ABAKAZI babiri bakaba bari kutambura hamwe omu tawuni ya Baguio y’omuri Filipini. Bakareba akagari kariho ebitabo, konka tibakahikaho ngu barebe ebiriho. Munyanyazi Helen, owabire ayemerire aha rubaju rw’ako kagari, akabamwenyera. Abo bakazi bakagumizamu, konka baguma nibijuka oku Helen yabamwenyera.

Bwanyima, abo bakazi ku babire bari kutaaha bakoresize basi, bakareba ecapa kihango kiri aha Nju y’Obukama. Bakahika bari kwijuka ku kiriho ebigambo ebi babire barebire aha kagari. Bona bakaruga omuri basi, bareba obwire bw’enterane obwabire buhandikire aha marembo g’Enju y’Obukama.

Abo bakazi bakekwatanisa omu nterane ezakuratireho. Mbwenu shi ni oha owu barebire ku batahire omu Nju y’Obukama? Ni Helen! Bakahika bari kumwijukira aha kamwenyo. Helen akagamba ati: “Ku bampikire hihi bari kwenda kungambisa obwoba bukanyita. Nkatekateka ngu shana hine enshobe eyi nabakorire.” Konka abo bakazi bakashobororera Helen ecabireho.

Bakashemerererwa enterane kandi bahurira baturize bari hamwe na benetata na banyanyazi. Ku barebire abandi bari kuyamba omu kuboneza omu Nju y’Obukama bwanyima y’enterane, bakabuza yaba na bo bari kubasa kuyamba. Omukazi omwe akafurukira omu rindi ihanga kandi ondijo akatandika kwija omu nterane n’okwega Bibuli. Byona bikabaho ahabw’akamwenyo!