EKICWEKA C’OKWEGA 7
Manya obwebembezi bw’omu kibina
‘Kristo ni omutwe gw’[ekibina], omubiri gwaco, kandi ni we mujuni waco.’—EFE 5:23.
ECESHONGORO CA 137 Abakazi Abeesigwa, Banyaanyazi-itwe Abakristaayo
EMPINYE *
1. Ahabw’enki eka ya Yehova erimu obumwe?
TWENA tushemerirwe ahabw’okuba turi ab’omu ka ya Yehova. Ahabw’enki eka yitu erimu obusinge n’obumwe? Ni ahabw’okuba turi kuha ekitinisa obwebembezi obu Yehova yatireho. Oku turi kukizaho kumanya obwebembezi obu Yehova yatireho ni ko turi kukizaho kugira obumwe.
2. Ni biha bibuzo ebi twaza kugarukamu omuri eki kicweka?
2 Omuri eki kicweka, twaza kureba abine obwebembezi omu kibina. Nambwenu, twaza kugarukamu ebi bibuzo ebiri kugira ngu: Ni guha murimo ogu abanyanyazi bine? Mbehi buri mwenetata ni omwebembezi wa buri munyanyazi? Mbehi abazehe bine obushoborozi ahari benetata na banyanyazi, nk’obu abebembezi b’eka bine aha b’omu maka gabo? Reka tubanze tushwijume oku tushemerire kureba abanyanyazi.
NI BATA OKU TUSHEMERIRE KUREBA ABANYANYAZI?
3. Ni bata oku turi kubasa kukizaho kwereka ku nitusima abanyanyazi ahabw’ebi bari kukora?
3 Nitusima munonga abanyanyazi abari kukora munonga omu kureberera ab’omu maka gabo, kuburira obutumwa burungi, n’okushagika ekibina. Nitubasa kukizaho kubereka ku nitubasima turi kubareba nk’oku Yehova na Yesu bari kubareba. Nambwenu, nitugasirwa twatekateka aha ku entumwa Pawulo yabire ari kutwariza abakazi.
4. Bibuli neyereka ku Yehova ari kureba ata abakazi n’abashija bona?
4 Bibuli neyereka ku Yehova ari kureba abakazi nk’oku ari kureba abashija. Ecokureberaho: Neyereka ku omu kinyigana c’okubanza yashukire omwika oguri kwera aha bashija n’abakazi kandi bona bakakora eby’okutangaza, nk’okugamba endimi nyingi. (Byak 2:1-4, 15-18) Bona bakashukwaho omwika oguri kwera kugira ngu bije kutegeka na Kristo. (Gal 3:26-29) Abashija n’abakazi bona baryatunga ekiconco c’okuhebwa amagara agatahwaho omu nsi. (Kush 7:9, 10, 13-15) Kandi bona bakahebwa omurimo g’okuburira n’okwegesa obutumwa burungi. (Mat 28:19, 20) Ekitabo c’Ebyakozirwe nikigamba ahari munyanyazi Purisikila owayekwatanisize n’omushija weye omu kushobororera amazima g’omuri Bibuli Apolo, omushija owabire ashomire munonga.—Byak 18:24-26.
5. Ebiri kugambwa omuri Luka 10:38, 39, 42 nibyereka bita oku Yesu yabire natwariza abakazi?
5 Yesu akaba naha abakazi ekitinisa. Taratorize Abafarisaayo ababire bari kureba abakazi nk’ab’ahaasi, batari kubasa kugamba na bo omu misho ga bona, kandi batari kubasa kuganira na bo aha Byahandikirwe. Ahobwe, akaba nabikiririza ngu bekwatanise n’ezindi ntumwa omu biganiro ebi yabire nagira na zo. * (Shoma omuri Luka 10:38, 39, 42.) Nambwenu akikiririza abakazi kugenda na we omu murimo g’okuburira. (Luk 8:1-3) Kandi Yesu akabaha omurimo g’okumanyisa entumwa ku yazokire omu bafire.—Yoh 20:16-18.
6. Ni bata oku entumwa Pawulo yayerekire ku naha abakazi ekitinisa?
6 Entumwa Pawulo akijusa Timoteyo kuha abakazi ekitinisa. Pawulo akamugambira ngu ‘atwarize abakazi bakuru’ nka banyina, n’‘abahara’ nka banyanyazi beye. (1 Tim 5:1, 2) Pawulo akakora kihango omu kukwasa Timoteyo kuba Omukristo okuzire omu by’omwika, konka akaba namanya ku nyina wa Timoteyo na nyinenkuru weye ari bo bamwegesize ‘Ebyahandikirwe ebiri kwera’ aha murundi g’okubanza. (2 Tim 1:5; 3:14, 15) Pawulo akaramusya abanyanyazi ari kubagamba omu mazina omu baruha eyi yahandikire Abarooma. Akaba atari kureba emirimo eyi abanyanyazi babire bari kukora kusha, ahobwe akaba nabasima ahabw’ebi babire nibakora.—Rom 16:1-4, 6, 12; Fil 4:3.
7. Ni biha bibuzo ebi twaza kushwijuma?
7 Nk’oku twakireba, tihine ahu Ebyahandikirwe biri kugamba ku benetata bari kukira abanyanyazi. Abanyanyazi bitu abine rukundo kandi bari efura bine omugasho muhango kandi nibakwasa abazehe omu kuretaho obusinge n’obumwe omu kibina. Konka na bwo tushemerire kushwijuma ebi bibuzo ebiri kugira ngu: Ahabw’enki hine obu Yehova ari kushaba abanyanyazi kwetwecerera aha mutwe? Obu benetata ari bo abari kutoranwa ngu babe abazehe n’abahereza, nikimanyisa ku buri mwenetata ari kuba ari omwebembezi wa buri munyanyazi omu kibina?
MBEHI BURI MWENETATA NI OMWEBEMBEZI WA BURI MUNYANYAZI?
8. Tukuratize ebiri omu Baefeso 5:23, mbehi buri mwenetata ni omwebembezi wa buri munyanyazi? Shoborora.
8 Ingaha! Omwebembezi witu twena ni Kristo. (Shoma omu Baefeso 5:23.) Omushija ayine obushoborozi aha mukazi weye omu ka. Mwenetata owabatizibwe ocari muto ti omwebembezi wa nyina. (Efe 6:1, 2) Kandi abazehe bine obushoborozi obwine obugarukiro ahari benetata na banyanyazi omu kibina. (1 Tes 5:12; Heb 13:17) Abanyanyazi abatakagire omu maka, konka bari kutura bonka nibagumizamu kuha abazire babo n’abazehe ekitinisa. Konka, nk’abashija omu kibina, na bo omwebembezi wabo ni Yesu.
Abatakagizire amaka kandi batacatura n’abazire babo, omwebembezi wabo ni Yesu (Reba paragurafu ya 8)
9. Ahabw’enki hine obu abanyanyazi bashemerire kwetwecerera aha mutwe?
9 Ni amazima, abashija ni bo abu Yehova yatorine ngu bebembere omu kwegesa n’omu kuramya omu kibina. (1 Tim 2:12) Ahabw’enki? Omurimo ogu bine ni nk’ogu Yesu ayine ni okugamba okutuma omu kibina habamu entebekanisa. Obwe rero, omunyanyazi yakora omurimo oguri kukorwa na mwenetata, Yehova namushaba ngu ayetwecerere ekitambara aha mutwe. * (1 Kor 11:4-7) Yehova tari kushaba abanyanyazi kukora eki ngu abamaremu ekitinisa, ahobwe nabaha omugisha g’okwereka ku nibaha ekitinisa obwebembezi obu yatireho. Hati reka tugarukemu ekibuzo ekiri kugira ngu: Abebembezi b’eka n’abazehe bine obushoborozi oburi kwingana ki?
EMIRIMO Y’ABEBEMBEZI B’AMAKA N’ABAZEHE
10. Ni enki ekiri kubasa kutuma omuzehe yagwa omu mutego g’okuteraho ab’omu kibina ebiragiro?
10 Abazehe nibakunda Kristo n’“entama” ezi Yehova na Yesu babahire ngu bazireberere. (Yoh 21:15-17) Omuzehe nabasa kutekataka ku ari nk’omwebembezi w’eka omu kibina. Nabasa kutekateka ngu na we nabasa kuteraho ab’omu kibina ebiragiro by’okubarinda nk’oku omwebembezi w’eka ari kubiteraho ab’omu ka yeye. Kandi benetata na banyanyazi nibabasa kutuma yatekateka basyoya ku bari kumushaba ngu abakorere ensharamu zimwe. Konka shi abazehe n’abebembezi b’amaka bona bine obushoborozi oburi kushushana?
Abazehe nibafa aha b’omu kibina omu by’omwika n’omu nyehurira. Yehova akabaha obushoborozi bw’okubinga omu kibina abasiisi abatari kwehana (Reba paragurafu ya 11-12)
11. Ni bata oku obujunanizibwa bw’abebembezi b’amaka n’obw’abazehe buri kushushana?
11 Entumwa Pawulo akereka ku obujunanizibwa bw’omwebembezi w’eka buri kushushana n’obw’omuzehe. (1 Tim 3:4, 5) Ecokureberaho: Yehova nayenda ngu ab’omu maka borobere omwebembezi w’eka. (Kol 3:20) Kandi nayenda ngu ab’omu kibina borobere abazehe. Yehova nashaba abebembezi b’amaka n’abazehe ngu barise abu bari kwebembera ebyokurya by’omwika. Nambwenu bona nibafa aha nyehurira z’abari ahaasi y’obushoborozi bwabo. Kandi nk’abebembezi b’amaka, abazehe na bo nibakwasa abu bari kwebembera bahikwaho ebihikirizi. (Yak 2:15-17) Nambwenu, Yehova nashaba abazehe n’abebembezi b’amaka kukwasa abandi korobera ebiragiro byeye n’‘okutarenga aha Byahandikirwe’ omuri Bibuli.— Kor 4:6.
Yehova akaha abebembezi b’amaka obushoborozi bw’okwebembera omu maka gabo. Omwebembezi w’eka oyine rukundo nabanza yaganira n’omukazi weye atakakozire ensharamu (Reba paragurafu ya 13)
12-13. Tukuratize ebiri omu Barooma 7:2, ni eha ntanisa eri ahagati y’obujunanizibwa bw’abebembezi b’amaka n’obw’abazehe?
12 Konka, hariho entanisa eri ahagati y’obujunanizibwa bw’omuzehe n’obw’omwebembezi w’eka. Ecokureberaho: Yehova akaha abazehe omurimo g’okucwa emanja, kandi akabaha obushoborozi bw’okubinga omu kibina abasiisi abatari kwehana.—1 Kor 5:11-13.
13 Konka nambwenu, Yehova akaha abebembezi b’amaka obushoborozi obu atarahire abazehe. Ecokureberaho: Akaha abebembezi b’amaka obushoborozi bw’okuteraho ab’omu maka gabo ebiragiro kandi bakakuratana oku bari kubita omu bikorwa. (Shoma omu Barooma 7:2.) Ecokureberaho: Omwebembezi w’eka ayine obugabe bw’okuteraho abana beye amashaha g’okutahiraho nyekiro. Nambwenu ayine obushoborozi bw’okuhana abana beye bagomera eco kiragiro. (Efe 6:1) Ni amazima, omwebembezi w’eka oyine rukundo nabanza yaganira n’omukazi weye atakatireho ebiragiro ahakuba bombi nibaba bari omuntu “omwe.” *—Mat 19:6.
HA EKITINISA KRISTO OMWEBEMBEZI W’EKIBINA
Yesu, ari ahaasi y’obwebembezi bwa Yehova, naha ekibina obuhabuzi (Reba paragurafu ya 14)
14. (a) Tukuratize ebiri omuri Mako 10:45, ahabw’enki cabire kihikire Yehova kutorana Yesu ngu abe ni we owaba omwebembezi w’ekibina? (b) Ni guha murimo gw’Akakiko k’Abarisa? (Reba akashanduku akari kugira ngu, “ Omurimo gw’Akakiko k’Abarisa.”)
14 Yehova, akoresize ekitambo, akacungura buri omwe omu kibina na bona abari kwikiriza eco kitambo. (Shoma omuri Mako 10:45; Byak 20:28; 1 Kor 15:21, 22) Obwe rero akaba ahikire kutorana Yesu, owayehireho kuba ekitambo, ngu abe ni we owaba omwebembezi w’ekibina. Ahabw’okuba Yesu ari we mwebebembezi witu, ayine obushoborozi bw’okuteraho ebiragiro buri omwe omuri itwe, ab’omu maka n’ab’omu kibina bona, kandi akuratana n’oku turi kubita omu bikorwa. (Gal 6:2) Konka Yesu nakora ekiri kukira aha kututeraho ebiragiro. Natukunda kandi atuha ebyokurya by’omwika.—Efe 5:29.
15-16. Ni enki eki wayegera aha bi munyanyazi Marley na mwenetata Benjamin bagambire?
15 Abanyanyazi nibereka ku nibaha Kristo ekitinisa bari korobera obuhabuzi obu bari kuhebwa n’abashija abu yatorine ngu babebembere. Abanyanyazi bingi nibikirizana n’omunyanyazi ori kwetwa Marley, otwire omuri Amerika owagizire ngu: “Mazima nindeba omurimo ogu nyine nk’omukazi n’omunyanyazi omu kibina nk’og’omuhendo. Ningumizamu kutamu amani ngu mpe ekitinisa obwebembezi obu Yehova yatireho. Konka omushija wange na benetata omu kibina bakatuma canyorobera, ahakuba nibampa ekitinisa kandi nibereka ku nibasima ebi ndi kukora.”
16 Benetata nibereka ku nibaha ekitinisa obwebembezi obu Yehova yatireho bari kuha abanyanyazi ekitinisa. Mwenetata ori kwetwa Benjamin, otwire omuri Bungereza, akagamba ati: “Nkegera byingi aha byokugarukamu bya banyanyazi omu nterane, oku bari kweyegesa n’oku bari kukora ge omurimo g’okuburira. Mazima omurimo ogu bari kukora ni og’omuhendo munonga.”
17. Ahabw’enki tushemerire kuha ekitinisa obwebembezi obu Yehova yatireho?
17 Bona ab’omu kibina, harimu abashija, abakazi, abebembezi b’amaka n’abazehe ku bari kuha ekitinisa obwebembezi obu Yehova yatireho, nihabamu obusinge. Kandi ekiri kukira byona, nituhimbisa Tata witu w’omu iguru ori kutukunda, Yehova.—Zab 150:6.
ECESHONGORO CA 123 Okworobera Entebeekanisa ya Yehova ey’Obwebembezi
^ par. 5 Ni guha murimo ogu abanyanyazi bine omu kibina? Mbehi buri mwenetata ni omwebembezi wa buri munyanyazi? Ni bata oku obujunanizibwa bw’abebembezi b’amaka n’obw’abazehe buri kushushana? Omuri eki kicweka, twaza kushwijuma ebyo bibuzo kandi turebe oku Bibuli eri kubigarukamu.
^ par. 5 Reba paragurafu ya 6 y’ekicweka ekiri kugira ngu, “Shagika abakazi b’Abakristo,” omu Munara g’Omurinzi g’Okwamwenda 2020.
^ par. 9 Reba akashanduku akari kugira ngu, “ Ni ryari obu omunyanyazi ashemerire kwetwecerera aha mutwe?”
^ par. 13 Waba ori kwenda kumanya oshemerire kusharamu ekibina eki eka eshemerire kuzamu, reba paragurafu ya 17-19 z’ekicweka ekiri kugira ngu, “Ha ekitinisa abandi abari omu kibina ca Yehova,” omu Munara g’Omurinzi g’Okwamunana 2020.
^ par. 59 Waba ori kwenda kumanya byingi ahari eri ishomo, reba omu kitabo, “Okukunda kwa Ruhanga,’ p. 209-212.
^ par. 64 Waba ori kwenda kumanya byingi aha murimo gw’Akakiko k’Abarisa, reba Omunara g’Omurinzi gw’aha kiro ca 15 Okwamushanju, 2013, p. 20-25.
