EKICWEKA C’OKWEGA 8
Oku ori kubasa kuguma oshemerirwe n’obu wakuba ori kuraba omu bigezo
‘[Benetata], ku muragume mwahikwaho okugezibwa kw’emiringo yona, mukutware nk’okushemererwa buzima.’—YAK 1:2.
ECESHONGORO CA 111 Ebirikutureetera Kushemererwa
EMPINYE *
1-2. Tukuratize ebiri omuri Matayo 5:11, ni bata oku tushemerire kureba ebigezo?
YESU akaraganisa abakurasi beye ku babire bari kubasa kutunga okushererwa okwa buzima. Nambwenu, akarabura ababire bari kumukunda ku babire barabugane ebigezo. Konka shi ni bata oku turi kubasa kwehurira ab’omu ka batuhakanisa, abebembezi ba gavumenti batuhiganisa, ninga shi abu turi kwega na bo ninga kukora na bo batugema kukora ebintu bibi? Mazima ebyo bintu nibibasa kutuma twayemereza omutima.
2 Abantu nibakira kutekateka ku okuhiigwa kitari kubasa kubaretera okushemererwa. Konka Ekigambo ca Ruhanga nikitushaba kuguma tushemerirwe. Yakobo akahandika ku omu mwanya g’okwemereza omutima ahabw’ebigezo ebi turi kubugana tushemerire kushemererwa. (Yak 1:2, 12) Kandi Yesu akagamba ku tushemerire kuguma tushemerirwe n’obu twakuba turi kuhiigwa. (Shoma omuri Matayo 5:11.) Ni bata oku turi kubasa kuguma tushemerirwe n’obu twakuba twine ebigezo? Nitubasa kwega byingi twashwijuma bumwe omu buhabuzi obu Yakobo yahandikire Abakristo b’omu kinyigana c’okubanza. Reka tubanze tushwijume ebigezo ebi Abakristo b’omu kinyigana c’okubanza babugine.
NI BIHA BIGEZO EBI ABAKRISTO B’OMU KINYIGANA C’OKUBANZA BABUGINE?
3. Ni enki ecabireho hahwireho obwire buce Yakobo abire omwegi wa Yesu?
3 Hahwireho obwire buce Yakobo murumuna wa Yesu abire omwegi weye, Abakristo b’omuri Yerusalemu bakatandika kuhiigwa. (Byak 1:14; 5:17, 18) Kandi omu bwire obu Sitefano yayitirwemu, abegi ba Yesu bakatatanira omu byanga bya Buyudaaya na Samariya kandi bwanyima bahika omuri Kupuro n’omuri Antiyokiya. (Byak 7:58–8:1; 11:19) Mazima abo begi bakabugana ebigezo, konka nabwo bakaguma bine amani omu kuburira obutumwa burungi ahu babire bari hona, kandi batandikisa ebibina ebitari bimwe omu bugabe bwa Roma. (1 Pet 1:1) Konka bwanyima bakabugana ebindi bigezo byingi.
4. Ni biha bindi bigezo ebi Abakristo b’omu kinyigana c’okubanza babugine?
4 Abakristo b’omu kinyigana c’okubanza bakehanganira ebigezo byingi. Ecokureberaho: Kwiha omu mwaka gwa 50 B.Y, omutegeki w’Abaroma owabire ari kweta Kalawudiyo akaragira Abayudaaya bona kuruga omuri Roma. Obwe rero, Abakristo b’Abayudaaya bona bakagemwa kusigaho amaka gabo bafurukira ahandi. (Byak 18:1-3) Kandi hihi omu mwaka 61 B.Y, entumwa Pawulo akahandika ku Abakristo bajumirwe, bakatebwa omu bihome kandi ebintu byabo bikanyagwa. (Heb 10:32-34) Kandi nk’abantu bona, Abakristo na bo bakabugana ekigezo c’obucene n’oburwire.—Rom 15:26; Fil 2:25-27.
5. Ni biha bibuzo ebi twaza kugarukamu?
5 Obu Yakobo yahandikire ebaruha yeye hihi omu mwaka gwa 62 B.Y, akaba namanya ge ebigezo ebi Abakristo bagenzi beye babugine. Yehova akahabura Yakobo ngu ahandikire abo Bakristo obuhabuzi obwabire burabakwase kuguma bashemerirwe n’obu babire bine ebigezo. Reka tushwijume obwo buhabuzi oburi omu baruha ya Yakobo, rero tugarukemu ebi bibuzo: Ni kuha kushemererwa oku Yakobo yabire ari kumanyisa? Ni enki ekiri kubasa kutuma Omukristo yabura oko kushemererwa? Kandi ni bata oku obwenge, okwikiriza n’obumanzi biri kubasa kutukwasa kuguma tushemerirwe n’obu twakuba turi kubugana ebigezo?
NI ENKI EKIRI KUTUMA OMUKRISTO YATUNGA OKUSHEMERERWA?
Nk’oku orumuri ruri kuguma ruri kwaka omu tara y’ekirahuri rwabugana omuyaga ninga enjura, ni ko n’okushemererwa oku Yehova ari kutuha kuri kugumaho n’obu twakugezibwa (Reba paragurafu ya 6)
6. Tukutatize ebiri omuri Luka 6:22, 23, ahabw’enki Omukristo ari kubasa kuguma ashemerirwe n’obu yakuba ari kubugana ebigezo?
6 Abantu nibabasa kutekateka ku kugira amagara marungi, esente nyingi n’okugira obusinge omu maka gabo ari byo byonka ebiri kubasa kutuma bashemererwa. Konka okushererwa oku Yakobo yabire ari kumanyisa ni kimwe omu byana by’omwika ebi omuntu atari kutunga ahabw’embera ezi arimu. (Gal 5:22) Omukristo natunga oko kushemererwa yamanya ku ari kukora ebi Yehova ari kwenda n’okukuratiza ecokureberaho ca Yesu. (Shoma omuri Luka 6:22, 23; Kol 1:10, 11) Oko kushemererwa ni nk’orumuri oruri kuba rurinzirwe omu tara y’ekirahuri, oruri kuguma nirwaka n’obu hakuba hariho omuyaga n’enjura. Tikuri kubasa kubura n’obu twakubugana ebizibu by’oburwire n’eby’akasente. Kandi tikuri kubura n’obu ab’omu maka gitu ninga abandi bakuba bari kutujuma ninga bari kutuhakanisa. Ahobwe nituguma tushemerirwe n’obu bakuba bari kutukorera ebintu ebiri kubasa kutuma twabura okushemererwa. Ebigezo ebi turi kubugana ahabw’okwikiriza kwitu ni ekihamya ekiri kwereka ku turi abegi ba Kristo ab’amazima. (Mat 10:22; 24:9; Yoh 15:20) Ni yo nshonga Yakobo yahandikire ati: ‘[Benetata], ku muragume mwahikwaho okugezibwa kw’emiringo etari emwe, mukutware nk’okushemererwa buzima.’—Yak 1:2.
Ahabw’enki turi kubasa kugeranisa ebigezo n’omuriro oguri kukoresibwa omu kuhesha ecoma? (Reba paragurafu ya 7) *
7-8. Ni enki ekiri kuhika aha kwikiriza kwitu kwagezibwa?
7 Yakobo akagamba aha ndijo nshonga Abakristo bari kubasa kuguma bashemerirwe n’obu bakuba bari kubugana ebigezo. Akagamba ati: ‘Ahakuba okugezibwa kwanyu kurugamu okuguma muhamire omu bigezo.’ (Yak 1:3) Ebigezo nibibasa kugeranisibwa n’omuriro oguri kukoresibwa omu kuhesha ecoma. Ku bari kosya eco coma kikahora ni bwo kiri kuguma. Ni co kimwe, twayehanganira ebigezo okwikiriza kwitu nikuguma. Ni yo nshonga Yakobo yahandikire ngu: ‘Kandi mureke okugumisiriza kuhisye omurimo gwako, n’imwe mubone kuba abahikire omuri byona mutine eki mubuzirweho.’ (Yak 1:4) Twamanya ku ebigezo biri kugumya okwikiriza kwitu, nikituma twaguma tushemerirwe n’obu twakuba turi kubibugana.
8 Omu baruha ya Yakobo, akagambamu ebizibu bimwe ebiri kubasa kutuma twabura okushemererwa. Ebyo bizibu ni biha, kandi shi nitubasa kubyehanganira tuta?
OKU TURI KUBASA KWEHANGANIRA EBIZIBU EBIRI KUBASA KUTUMA TWABURA OKUSHEMERERWA
9. Ahabw’enki turi kwetenga obwenge?
9 Ekizibu: Twaba tutari kumanya ec’okukora. Twabugana ekigezo, nituba turi kwenda ngu Yehova atukwase kukora ensharamu eziri kumuhimbisa, zikagasira benetata na banyanyazi kandi zikatukwasa kuguma turi abesigwa. (Yer 10:23) Nituba turi kwenda obwenge bw’okumanya eki tushemerire kukora n’eki tushemerire kugambira abari kutuhakanisa. Twaba tutari kumanya ec’okukora nitubasa kuhwamu amani kandi tubure okushemererwa.
10. Tukuratize ebiri omuri Yakobo 1:5, ni enki eki tushemerire kukora twaba turi kwenda obwenge?
10 Eki turi kubasa kukora: Shaba Yehova obwenge. Twaba turi kwenda ngu tugume tushemerirwe, tushemerire kushaba Yehova obwenge bw’okukora ensharamu ndungi. (Shoma omuri Yakobo 1:5.) Ni enki eki tushemerire kukora twareba Yehova atari kugarukamu eshara zitu ahonaho? Yakobo akagamba ngu tushemerire ‘kugumizamu kushaba’ Ruhanga. Yehova tari kwehurira kubi twagumizamu kumushaba obwenge. Tari kwitwa ekiniga aha bwitu. Tata witu w’omu iguru nagaba n’‘omutima ogutari kwima’ twamushaba obwenge bw’okwehanganira ebigezo. (Zab 25:12, 13) Nareba ebigezo ebi turi kurabamu, ayine embabazi kandi nayendera kimwe kutukwasa. Mazima, eco ni co ekiri kutuma twaguma tushemerirwe! Mbwenu shi, ni bata oku Yehova ari kutuha obwenge?
11. Ni enki ekindi eki tushemerire kukora twaba turi kwenda obwenge?
11 Yehova natuha obwenge akoresize Ekigambo ceye. (Enf 2:6) Twaba turi kwenda obwo bwenge, tushemerire kweyegesa Ekigambo ca Ruhanga n’ebitabo byitu ebiri kwegesa Bibuli. Konka tushemerire kukora ekiri kukira aha kweyegesa. Tushemerire kuta omu nkora ebi twayega. Yakobo akahandika ati: ‘Mube abari korobera Ekigambo, bitu ti kukihurira konka.’ (Yak 1:22) Twata omu nkora obuhabuzi bw’omu Kigambo ca Ruhanga, nitugira obusinge, tutwaze ge kandi tugire embabazi. (Yak 3:17) Eyo mitwarize netukwasa kwehanganira ebigezo twine okushemererwa.
12. Ni guha mugasho oguri omu kumanya Bibuli?
12 Ekigambo ca Ruhanga kiri nk’endebererwamu. Nikitukwasa kukora empinduka. (Yak 1:23-25) Ecokureberaho: Bwanyima y’okukishoma nitubasa kushanga tushemerire kurinda ekiniga. Ahabw’obuyambi bwa Yehova, nitubasa kwega kutwaza ge twabugana abantu ninga ebintu ebiri kubasa kutwisa ekiniga. Twatwaza ge nikitukwasa kwehanganira ebigezo byona ebi turi kubugana. Nikitukwasa kutekateka ge n’okukora ensharamu ndungi. (Yak 3:13) Mazima kumanya Bibuli nikitugasira munonga!
13. Ahabw’enki tushemerire kwegera aha cokureberaho c’abantu abari kugambwa omuri Bibuli?
13 Hine obu turi kwega kwerinda kukora ekibi twamara kukora enshobe. Konka obwo ni oburyo bubi bw’okwegamu. Oburyo burungi bw’okwegamu ni okwegera aha bintu birungi ebi abandi bahikireho n’aha nshobe zabo. Ni yo nshonga Yakobo yatugambire ngu tutoreze ecokureberaho c’abantu abari kugambwa omuri Bibuli, nka Aburahamu, Rahabu, Yobu, na Eliya. (Yak 2:21-26; 5:10, 11, 17, 18) Abo bahereza ba Yehova bakabasa kwehanganira ebigezo ebyabire biri kubasa kutuma babura okushemererwa. Eco nicereka ku n’itwe Yehova ari kubasa kutukwasa kwehanganira ebigezo ebi turi kubugana.
14-15. Ahabw’enki tushemerire kwerinda okubanganisa?
14 Ekizibu: Okubanganisa. Hine obu turi kubasa kugumirwa kushoborocerwa ebiri omu Kigambo ca Ruhanga. Ninga shi, Yehova nabasa kutagarukamu eshara zitu nk’oku twabire turi kutekateka. Ebyo nibibasa kutuma twatandika kubanganisa. Twayehuza oko kubanganisa, nikubasa kucendeza okwikiriza kwitu kandi kushisha obunywani bwitu na Yehova. (Yak 1:7, 8) Nambwenu nikubasa kutuma twabura amasiko g’amagara agatahwaho.
15 Entumwa Pawulo akageranisa amasiko gitu g’ebiro by’omu misho n’ekiri kusika obwato. (Heb 6:19) Ecoma ekiri kusika obwato nikituma bwaguma bwemerire hamwe omu bwire bw’omuyaga. Konka eco coma nikigira omugasho emigoyi ekikomire yaba etari kubasa kucweka. Nk’oku omucerenyo guri kubasa kushisha emigoyi y’eco coma ni ko n’okubanganisa kuri kubasa kushisha okwikiriza kwitu. Omuntu oyine okubanganisa yabugana ebigezo, nabasa kwebwa juba ebi Yehova ari kuturaganisa. Twaburi okwikiriza, nitubura amasiko. Nk’oku Yakobo yakigambire, omuntu ori kubanganisa ni nk’emiraba y’enyanja eri kutwarwa omuyaga oku n’oku.’ (Yak 1:6) Mazima ogo muntu tari kubasa kutunga okushemererwa na kuce!
16. Ni enki eki tushemerire kukora twaba twine okubanganisa?
16 Ec’okukora: Gumya okwikiriza kwawe. Gira eki wakora juba. Omu bwire bw’omuhanuzi Eliya, abahereza ba Yehova bakabanganisa aha kwikiriza kwabo. Eliya akabagambira ati: ‘Muryahisa hi n’okugira emitima ebiri? Yehova ku arabe ari Ruhanga, mumukuratire; nari Bayali ku arabe ari Ruhanga, mube ni we mwakuratira!’ (1 Bag 18:21) N’omuri obu bwire ni co eki tushemerire kukora. Tushemerire kucondoza kugira ngu twemanyire ku Yehova ari we Ruhanga, ku Bibuli eri Ekigambo ceye kandi ku Abahamya ba Yehova ari bo bahereza beye. (1 Tes 5:21) Twakikora basyoya, titurije kubanganisa kandi okwikiriza kwitu nikwija kuhama. Twaba turi kwenda kweyihamu okubanganisa, nitubasa kurondera obuyambi aha bazehe b’ekibina. Tushemerire kugira eki twakora juba twaba turi kwenda kukorera Yehova tushemerirwe!
17. Ni enki ekiri kubaho ku turi kuhwamu amani?
17 Ekizibu: Twaba tuhwiremu amani. Ekigambo ca Ruhanga nikigira kiti: ‘Ku ori kugwa enshazi ah’izoba ry’okuhikirirwa, buri amani gawe nigaba mace.’ (Enf 24:10) Ekigambo c’Oruheburaayo ekiri kuhindurwamu ngu “kugwa enshazi” nikimanyisa “kuhwamu amani.” Wahwamu amani, nohika ori kubura okushemererwa.
18. Okwehangana nikimanyisa ki?
18 Ec’okukora: Yesige ku Yehova ari kuha amani g’okwehangana. Nitwetenga amani g’okwehanganira ebigezo. (Yak 5:11) Ekigambo ‘okwehangana’ eki Yakobo yakoresize nikimanyisa okuguma ohamire omu mwanya gumwe otari kugurugamu. Nitubasa kutekataka aha musirikare ori kuguma ahamire aha mwanya gumwe, atiruke n’obu omwangi weye yakuba ari kumutinisa kumwita.
19. Ni enki eki turi kwegera aha cokureberaho eki entumwa Pawulo yatusigire?
19 Entumwa Pawulo akatusigira ecokureberaho kirungi c’okuba emanzi kandi tukehangana. Hine obu yabire nahurira ahwiremu amani. Konka akabasa kwehangana ahakuba akarondera amani ahari Yehova. (2 Kor 12:8-10; Fil 4:13) N’itwe nitubasa kutunga ago mani n’obumanzi twayecureza tukarondera obuyambi ahari Yehova.—Yak 4:10.
HIKA HIHI YA RUHANGA OGUME OSHEMERIRWE
20-21. Ni enki eki ori kubasa kwesiga otari kubanganisa?
20 Nitwesiga tutari kubanganisa ku Yehova atari we ori kutuhana akoresize ebigezo. Yakobo akatuhamiza ati: ‘Omuntu wena ku arayohibwe, areke kugira ati: “Nayohibwa Ruhanga.” Ahakuba Ruhanga tabasa kohibwa kibi, kandi na we tayosya muntu.’ (Yak 1:13) Twaba turi kumanya ngu ago ni amazima, nituhika hihi ya Tata w’omu iguru ori kutukunda.—Yak 4:8.
21 Yehova ‘tari kuhindahinduka.’ (Yak 1:17) Akakwasa Abakristo b’omu kinyigana c’okubanza kwehanganira ebigezo, kandi n’itwe nayija kutukwasa. Shaba Yehova kugira ngu ogire obwenge, okwikiriza, n’obumanzi. Nayija kuhurira eshara zawe. Ku orakore basyoya, noyija kwesiga otari kubanganisa ku arije kukukwasa kutunga okushemererwa n’obu wakuba ori kubugana ebigezo!
ECESHONGORO CA 128 Okugumisiriza Okuhitsya aha Muheru
^ par. 5 Ekitabo ca Yakobo kirimu obuhabuzi oburi kubasa kutukwasa kwehanganira ebigezo. Eki kicweka caza kutwereka bumwe omuri obwo buhabuzi bwa Yakobo. Obwo buhabuzi nibubasa kutukwasa kwehanganira ebigezo kandi tugumizamu kushemererwa turi kuhereza Yehova.
^ par. 59 EKISHUSHANI: Mwenetata yaza kusibwa. Omukazi weye na muhara weye bari kureba abapolisi bari kumutwara. Obu yaba ari omu kihome, benetata na banyanyazi bayekwatanisa n’eb’eka yeye omu kuramya kw’eka. Omuhara na nyina bagumizamu kushaba Yehova amani g’okwehanganira eco kigezo. Yehova yabakwasa kutuza n’okugira obumanzi. Eco catuma okwikiriza kwabo kwaguma, kandi batunga okushemererwa.
