EKICWEKA C’OKWEGA 6
‘Omutwe g’omukazi ni iba.’
‘Omutwe g’omukazi ni iba.’—1 KOR 11:3.
ECESHONGORO CA 13 Kristo Niwe Twine Kutooreza
EMPINYE *
1. Omunyanyazi yaba natekateka kutaha omu maka, ni biha bibuzo ebi ari kuba ashemerire kwebuza?
ABAKRISTO bona bari ahaasi y’obwebembezi bwa Yesu Kristo obuhikirire. Konka omukazi w’Omukristo ku ari kutaha omu maka naza ahaasi y’obwebembezi bw’omushija weye otahikirire. Eco ticorobi. Obwe rero yaba ari kuronda owu barije kutasana ashemerire kwebuza ngu: ‘Ni enki ekiri kwereka ku ogu mwenetata arije kuba omwebembezi w’eka murungi? Mbehi nata okukorera Yehova omu mwanya g’okubanza? Yaba kitari kisyoya ni enki ekiri kutuma natekateka ku arije kuba omwebembezi w’eka murungi ku turatasane?’ Ni eha mitwarize eyi nshemerire kwemanyiza hati kugira ngu nyije kurwombeka? Mbehi ninyehangana kandi nyereka obufura? Mbehi nyine obunywani buhamire na Yehova?’ (Mub 4:9, 12) Kugira ngu omukazi ayije kushemerererwa amaka nikija kurugirira n’ensharamu ezi arakore mbere y’okugatahamu.
2. Ni enki eki twaza kushwijuma omuri eki kicweka?
2 Abakazi bingi b’Abakristo ni ecokureberaho kirungi omu korobera abashija babo. Mazima ni ab’okusimwa! Nikitushemeza kuhereza turi hamwe n’abo bakazi ab’abesigwa! Omuri eki kicweka twaza kushwijuma ebyokugarukamu by’ebi bibuzo bishatu: (1) Ni biha bizibu bimwe ebi abakazi bari kukira kubugana? (2) Ahabw’enki omukazi ashemerire kuha ekitinisa omushija weye? (3) Ni enki eki abashija n’abakazi b’Abakristo bari kubasa kwegera aha cokureberaho ca Yesu, Abigayili, na Mariya nyina wa Yesu?
NI BIHA BIZIBU EBI ABAKAZI B’ABAKRISTO BARI KUBUGANA?
3. Ahabw’enki amaka mingi garimu ebizibu?
3 Obushwere ni ekiconco ekihikirire ekiri kuruga ahari Ruhanga, konka abantu bo tibahikirire. (1 Yoh 1:8) Ni yo nshonga Ekigambo ca Ruhanga kiri kuhabura abashija n’abakazi abatasine ku barije kubugana ebizibu, ni okugamba ‘obusaasi bw’omu mubiri.’ (1 Kor 7:28) Reba bimwe omu bizibu ebi omukazi ari kubasa kubugana.
4. Ahabw’enki omukazi ari kubasa kuhurira ku okuha ekitinisa omushija weye kiri kubasa kumugarura ahaasi?
4 Obumwe, embera ezi omukazi yakuriremu nizibasa kutuma yayehurira ku okuha omushija ekitinisa kiri kubasa kumugarura ahaasi. Marisol otwire omuri Amerika akagamba ati: “Ahu nakurire, abakazi bakagambirwa ku bashemerire kwingana n’abashija omuri byona. Nimanya ku Yehova yatireho obwebembezi bweye kandi ku yahire abakazi omurimo g’obucurezi kandi murungi. Konka kuguma ndi kuha ekitinisa obwebembezi obu yatireho nikigumizamu kungumira.”
5. Ni eha mitekatecere etari omu Byahandikirwe eyi bamwe bine aha bakazi?
5 Konka, omukazi nabasa kutasana n’omushija ori kureba abakazi nk’ab’ahaasi. Omunyanyazi ori kwetwa Ivon, otwire omuri Amarika y’Amashuma akagamba ati: “Omu kacweka kitu, abashija ni bo abari kubanza kurya abakazi bakakuratiraho. Abahara ni bo abari kuteka n’okukora obuyonjo, kandi abojo bo nibagambirwa ku bari nk’‘abagabe omu ka.’” Omunyanyazi omwe otwire omuri Asia, akagamba ati: “Omu rurimi rwitu harimu engambo eri kugamba ku abakazi batine obwenge kandi ku hatine eki bari kubasa kwekorera. Ni abakozi b’omu ka kusha, kandi tibari kwikirizibwa kugambira abashija babo ebi bari kutekateka.” Omushija owakuzire ayine eyo mitekatecere etari omu Byahandikirwe natuma omukazi weye yabaho atashemerirwe, aremwa kutoreza Yesu n’okuhimbisa Yehova.—Efe 5:28, 29; 1 Pet 3:7.
6. Ni enki eki abakazi bashemerire kukora kugira gu bagire obunywani burungi na Yehova?
6 Nk’oku twakirebire omu kicweka ecabandirize eki, Yehova nayenda ngu abashija b’Abakristo bafe aha bi amaka gabo gari kwetenga omu by’omwika, omu nyehurira, n’omu by’omubiri. (1 Tim 5:8) Konka, abanyanyazi bashemerire kweteraho obwire bw’okushoma Ekigambo ca Ruhanga, kukitekatekaho n’okuhika hihi ya Yehova omu kushaba. Konka eco nikibasa kuguma. Abakazi abingi nibaba bahugire, kituma babura obwire n’amani g’okukora ebyo bintu, konka bashemerire kubikora. Ahabw’enki? Ni ahabw’okuba Yehova nayenda ngu buri omwe omuri itwe agire obunywani burungi na we.—Byak 17:27.
7. Ni enki ekirije kutuma omukazi yayoroberwa n’okuha omushija weye ekitinisa?
7 Ni amazima, omukazi nayetenga amani mingi kugira ngu ahe omushija weye otahikirire ekitinisa. Konka, kuha ekitinisa omushija weye nikimworobera ku ari kushoborocerwa enshonga z’omu Byahandikirwe eziri kutuma ashemerire kukimuha kandi akazikiriza.
AHABW’ENKI OMUKAZI ASHEMERIRE KUHA EKITINISA OMUSHIJA WEYE?
8. Tukuratize ebiri omu Baefeso 5:22-24, ahabw’enki omukazi w’Omukristo ashemerire kuha ekitinisa omushija weye?
8 Omukazi w’Omukristo ashemerire kuha ekitinisa omushija weye ahabw’okuba ni co eki Yehova ari kumushaba. (Shoma omu Baefeso 5:22-24.) Nayesiga Tata witu ow’omu iguru, ayijuka ku ari kumukunda kandi ku ari kumushaba kukora ebiri kumugasira.—Bir 6:24; 1 Yoh 5:3.
9. Ni enki ekiri kubaho omunyanyazi yaha omushija weye ekitinisa?
9 Abantu b’omu nsi nibahiga abakazi kwehuza emisinge ya Yehova n’okureba obwebembezi nk’oburi kubagarura ahaasi. Abine eyo mitekatecere tibari kumanya Ruhanga kandi tibari kumukunda. Yehova akaba atari kubasa kuha abahara beye b’omuhendo ekiragiro ekiri kubagarura ahaasi. Omunyanyazi ori kutamu amani ngu akore ebi Yehova ari kumushaba natuma omu ka yeye habamu obusinge. (Zab 119:165) Nikimugasira, kigasira omushija weye kandi kigasira n’abana beye.
10. Ni enki eki turi kwegera aha bi Carol yagambire?
10 Omukazi ori kuha omushija weye ekitinisa n’obu atahikirire, naba ari kwereka ku nakunda Yehova, owatireho obwebembezi. Carol, otwire omuri Amerika y’Amashuma akagamba ati: “Nimanya ku omushija wange ari kukora enshobe. Kandi nimanya ku oku ndi kwetwara yankorera enshobe kiri kwereka oku ndi kureba obunywani bwange na Yehova. Eco nikituma nagezaho kugumizamu kumuha ekitinisa ahakuba ninyenda kushemeza Tata ow’omu iguru.”
11. Ni enki ekiri kukwasa omunyanyazi ori kwetwa Aneese kusaasira, kandi shi ni enki eki turi kwegera aha bi yagambire?
11 Nikibasa kugumira omukazi kuha omushija weye ekitinisa, ogo mushija yaba atari kufa aha nyehurira zeye. Konka reba oku omunyanyazi ori kwetwa Aneese yagambire. Akagira ati: “Ningezaho kwerinda kubika enzika. Ninyijuka ku twena turi kukora enshobe. Ninsaasira nka Yehova. Kandi ku ndi kusaasira, ningaruka ngira obusinge bw’omu mutima.” (Zab 86:5) Omukazi ori kusaasira, kuha ekitinisa omushija weye nikimworobera.
EKI TURI KWEGERA AHA BYOKUREBERAHO BY’OMURI BIBULI
12. Ni biha byokureberaho ebiri omuri Bibuli eby’abantu abahire abandi ekitinisa?
12 Abantu abamwe nibabasa kutekateka ku omuntu ori kuha abandi ekitinisa ari kuba ari ow’ahaasi. Konka eyo mitekatecere tehikire. Omuri Bibuli harimu ebyokureberaho by’abantu ababire bari kuha abandi ekitinisa kandi bari emanzi. Reba eki turi kwegera ahari Yesu, Abigayili na Mariya.
13. (a) Ahabw’enki Yesu ari kuha Yehova ekitinisa? (b) Ecokureberaho ca Yesu nicereka kita ku okuha abandi ekitinisa kitari kwereka ngu turi abanyabwoba?
13 Yesu naha Yehova ekitinisa, kandi tari kukimuha ngu ni ahabw’okuba atine bwenge n’obumanyi. Oku Yesu yayagesize abantu omu buryo bworobi kandi oburi kuhurirwa nicereka ku ayine obwenge. (Yoh 7:45, 46) Yehova akereka ku nayesiga Yesu ari kumuha omurimo g’okukora na we obu yabire ari kuhanga iguru n’ensi. (Enf 8:30; Heb 1:2-4) Kandi bwanyima y’okuzoka kwa Yesu, Yehova akamuha ‘obushoborozi bwona omu iguru n’omu nsi.’ (Mat 28:18) Konka, n’obu Yesu ayine obwenge bwingi nayorobera obuhabuzi bwa Yehova. Ahabw’enki? Ni ahabw’okuba ari kukunda Ishe.—Yoh 14:31.
14. Ni enki eki abashija bari kwegera (a) aha ku Yehova ari kureba abakazi (b) aha bigambo ebiri omu Nfumu 31?
14 Eki biri kwegesa abashija. Yehova tarahangire abakazi korobera abashija babo ngu ni ahabw’okuba bari ahaasi yabo. Yehova akacereka ari kutorana abakazi n’abashija ngu bije kutegeka na Yesu. (Gal 3:26-29) Yehova akereka ku nayesiga Omwana weye ari kumuha obushoborozi. Abashija na bo nibereka ku nibesiga abakazi babo bari kubaha obushoborozi obwine obugarukiro. Ekigambo ca Ruhanga nikishoborora ku omukazi w’omutima ari kureberera ab’omu ka yeye, aketegereza omusiri akagugura, kandi akakora n’ebindi ebiri kutuma eka yatunguka. (Shoma omu Nfumu 31:15, 16, 18.) Tari nk’omugaragwa otine obugabe bw’okugamba eki ari kutekateka. Ahobwe, omushija weye namwesiga kandi ahurikiza ebitekateko byeye. (Shoma omu Nfumu 31:11, 26, 27.) Omushija yatwariza omukazi weye basyoya, namuha ekitinisa.
Ni bata oku abakazi b’omutima bari kubasa kwegera aha ku Yesu yabire ari kuha Yehova ekitinisa? (Reba paragurafu ya 15)
15. Ni enki eki abakazi bari kwegera aha cokureberaho ca Yesu?
15 Eki biri kwegesa abakazi. N’obu Yesu yakozire ebintu byingi, tari kureba kuha Yehova ekitinisa nk’ekiri kumugarura ahaasi. (1 Kor 15:28; Fil 2:5, 6) N’omukazi ori kutoreza ecokureberaho ca Yesu tari kureba korobera omushija weye nk’ekiri kumugarura ahaasi. Nashagika omushija weye ahabwa rukundo eyi ari kumukunda n’eyi ari kukunda Yehova.
Bwanyima ya Abigayili koherereza Dawudi n’abashija beye ebyokurya, akababugana. Ku yamuhikire akafukama ahaasi, rero yamushaba ngu atetaho orubanja rw’eshagama, ari kwehorera (Reba paragurafu ya 16)
16. Tukuratize ebiri omuri 1 Samueli 25:2, 3, 23-28, ni biha bizibu ebi Abigayili yabugine? (Reba ekishushani c’aha kishembeso.)
16 Abigayili akaba ayine omushija owabire nayetwa Nabali. Akaba ari omushija ori kwekunda, ari kwetungura kandi ari entasima. Konka, Abigayili akaba atari kwenda ngu amaka geye gashenyuke. Kuri yabire ari kubyenda akaba arareke Dawudi ayita omushija weye. Omu mwanya gw’eco, akagira eki yakora kugira gu arinde Nabali n’abeka yeye. Tekateka aha bumanzi obu Abigayili yagizire kugira ngu ayemerere omu misho g’amahe 400 n’okuganira na Dawudi. Akaba ayetegwire n’okutebwaho orubanja ahabw’emitwarize y’omushija weye. (Shoma omuri 1 Samueli 25:3, 23-28.) Dawudi akahika ari kumanya ku Yehova ari we owakoresa omukazi kugira ngu amuhe obuhabuzi obwamurinzire kukora ekibi c’amani.
17. Ni enki eki abashija bari kwegera aha byahikire ahari Dawudi na Abigayili?
17 Eki biri kwegesa abashija. Abigayili akaba ari omukazi w’obwenge. Dawudi akahurikiza obuhabuzi bweye. Eco kikamurinda kukora ekintu ecabire kiratume yagibwaho orubanja rw’eshagama. N’omushija oyine obwenge, nabanza kuhurikiza eyetonzire ebitekateko by’omukazi weye atakakozire ensharamu y’amani. Ebyo bitekateko nibimurinda kukora ensharamu mbi.
18. Ni enki eki abakazi bari kwegera aha cokureberaho ca Abigayili?
18 Eki biri kwegesa abakazi. Omukazi ori kukunda Yehova kandi ari kumuha ekitinisa nagasira eb’eka yeye, n’obu omushija weye yakuba atari Omuhamya wa Yehova ninga atari kugendera aha misinge yeye. Tari kuronda omu Byahandikirwe orwekwaso rw’okushenya amaka. Ahobwe, ku ari kuha ekitinisa omushija weye, nikibasa kutuma ogo mushija yayega ebiri kukwata ahari Yehova. (1 Pet 3:1, 2) Konka n’obu omushija weye yakuba atatorize ecokureberaho ceye kirungi, Yehova nashemererwa ahabw’okuguma ari omwesigwa kandi ari kuha omushija weye ekitinisa.
19. Ni ryari obu omukazi ashemerire kwanga korobera omushija weye?
19 Konka, omukazi ori kuha omushija weye ekitinisa, tari kumwikiririza yamushaba ngu ashishe emisinge ya Bibuli. Ecokureberaho: Reka tugire ngu omushija otari kwikiriza yashaba omukazi weye w’Omukristokazi ngu abiihe, ayibe ninga shi ngu akore ebintu ebi Bibuli etari kwikiriza. Abakristo bona, harimu n’abanyanyazi abagizire amaka, niborobera Yehova omu mwanya g’okubanza. Obwe rero, omunyanyazi yashabwa kukora ebintu ebiri kushisha emisinge ya Bibuli, nayanga, kandi ashoborora omu bucurezi enshonga ahabw’enki atari kwikiriza kubikora.—Byak 5:29.
Reba paragurafu ya 20 *
20. Nitumanya tuta ku Mariya yabire ayine obunywani burungi na Yehova?
20 Mariya akaba ayine obunywani burungi na Yehova. Akaba namanya ge Ebyahandikirwe. Omu kiganiro eki yagizire na Elizabeti, nyina wa Yohaana omubatizi, akagambamu Ebyahandikirwe by’Oruheburaayo ebiri kurenga ahari 20. (Luk 1:46-55) Nambwenu tekateka ahari eki: N’obu Mariya yabire ari kwenda kukora obugenyi na Yosefu, marayika wa Yehova taragambire na Yesefu. Marayika akabanza yagamba na Mariya, yamugambira ku yabire arazare Omwana wa Ruhanga. (Luk 1:26-33) Yehova akaba namanya ge Mariya kandi akaba nayesiga ku yabire arakunde Omwana weye kandi akamufaho. Hatariho okubanganisa Mariya akaguma ayine obunywani burungi na Yehova n’obu Yesu yafire akaza omu iguru.—Byak 1:14.
21. Ni enki eki abashija bari kwegera aha nkuru ya Mariya?
21 Eki biri kwegesa abashija. Omushija w’obwenge nashemererwa omukazi weye yaba ari kumanya ge Ebyahandikirwe. Tari kwehurira kubi ari kutekateka ngu ni we orayebembere eka. Namanya ku omukazi ori kumanya ge Ebyahandikirwe n’emisinge ya Bibuli ari kugasira eka. Konka, n’obu omukazi yakuba ashomire munoga kukira omushija weye, omushija ni we oyine obujunanizibwa bw’okwebembera omu kuramya kw’eka n’omu bindi bikorwa by’omwika.—Efe 6:4.
Ni enki eki abakazi bari kwegera ahari Mariya nyina wa Yesu aha bikwatirine n’okweyegesa n’okutekateka aha bi bayega? (Reba paragurafu ya 22) *
22. Ni enki eki abakazi bari kwegera ahari Mariya?
22 Eki biri kwegesa abakazi. Omukazi ashemerire kuha ekitinisa omushija weye, konka nabwo ashemerire kwefaho omu by’omwika. (Gal 6:5) Eco nikimanyisa ku ashemerire kweteraho obwire bw’okweyegesa n’okutekateka aha bi yayega. Nikimukwasa kukunda Yehova n’okumuha ekitinisa kandi kituma yaha omushija weye ekitinisa.
23. Abakazi ku bari kuha ekitinisa obwebembezi obu Yehova yatireho, nikigira guha mugasho?
23 Abakazi abari kuha ekitinisa abashija babo ahabwa rukundo eyi bari kukunda Yehova, nibatunga okushemererwa n’okumarwa okukira abatari kuha ekitinisa obwebembezi obu Yehova yatireho. Nibateraho ecokureberaho kirungi benetata na banyanyazi abacari bato. Kandi nibatuma omu ka n’omu kibina habamu obusinge n’obumwe. (Tit 2:3-5) Omuri obu bwire, omu kibina harimu abakazi bingi abari kukorera Yehova omu bwesigwa. (Zab 68:11) Twena, abashija n’abakazi, nitubasa kutuma omu kibina habamu obusinge. Omu kicweka ekiri kukurataho nitwija kushwijuma eki turi kubasa kukora ngu omu kibina habemu obusinge.
ECESHONGORO CA 131 “Eki Ruhanga Yaateeraine Hamwe”
^ par. 5 Yehova akataho entebekanisa kugira ngu abakazi bahe ekitinisa abashija babo. Eco nikimanyisa ki? Abashija n’abakazi b’Abakristo nibabasa kwegera aha cokureberaho ca Yesu n’ebyokureberaho by’abakazi abari kugambwa omuri Bibuli.
