1. Ni enki eki Daudi yagambire aha bucurezi bwa Yehova?

MBEHI tituri kwikiriza ku Yehova ari omucurezi? Yego. Daudi akagamba ngu: ‘Ompire engabo y’okujuna kwawe, okutwaza ge kwawe kunkurize.’ (2 Sam 22:36; Zab 18:35) Nikibasika ku Daudi yabire ari kukira kutekateka aha izoba eri omuhanuzi Samueli yizire owabo kushuka amajuta aha wabire arije kuba omugabe wa Israeli. Daudi akaba ari we muto omu bojo munana; konka ni we Yehova yatorine ngu ayije kuza omu mwanya g’Omugabe Saulo.—1 Sam 16:1, 10-13.

2. Ni enki eki twaza kishwijuma omuri eki kicweka?

² Daudi akaba nayikiriza ebigambo by’omuhandiki wa Zaaburi ebi yagambire ahari Yehova ari kugira ngu: ‘Akecureza kureba ebiri omu iguru n’eby’omu nsi, atungura omworo namwiha omu mucucu. Ayimusya enshoberwa, ngu abashutamye n’abanyiginya.’ (Zab 113:6-8) Omuri eki kicweka twaza kushwijuma amashomo g’omugasho, aha bikwatirine n’oku Yehova ari kwereka ogu mutwarize g’obucurezi. Nambwenu twaza kushwijuma eki turi kwegera aha Mugabe Saulo, omuhanuzi Danieli na Yesu aha bikwatirine n’omutwarize g’obucurezi.

3. Ni bata oku Yehova ari kututwariza kandi shi ebyo nibitwereka ki?

³ Yehova nayereka ku ari omucurezi birabire aha ku ari kutwariza abari kumuramya abatahikirire. Ti ahabw’okugira ngu nayikiriza okuramya kwitu kusha ahobwe natureba  nka banywani beye. (Zab 25:14) Kugira ngu tubase kuba banywani beye, Yehova akahayo omwana weye nk’ekitambo ahabw’ebibi byitu. Mbehi eco tikiri kwereka ku Yehova ari kutwereka embabazi!

4. Ni enki eki Yehova yatuhire kandi shi ahabw’enki?

⁴ Nambwenu yetegereze ahandi ahu Yehova yayerekire obucurezi. Nk’Omuhangi, Yehova akaba ari kubasa kutuhanga tutine obushoborozi bw’okweshariramu oku turi kubasa kubaho. Konka tarakikozire. Akatuhanga omu kishushani ceye kandi yatuha obugabe bw’okukora eki turi kwenda. Nayenda ngu tumukorere tubyihire aha mutima ahabw’okuba turi kumukunda kandi tukaba turi kwenda kutunga emigisha eri kuruga omu kumworobera. (Bir 10:12; Isa 48:17, 18) Mbehi tikiri kutushemeza kumanya ku Yehova ari kutwereka obucurezi!

5. Ni bata oku Yehova ari kutwegesa kuba abacurezi? (Reba ekishushani c’aha kishembeso.)

⁵ Yehova natwegesa kuba abacurezi birabire aha ku ari kututwariza. Yehova ni we oyine obwenge oburi kukirayo omu iguru n’omu nsi. Nambwenu naba ayetegwire kwikiriza ebitekateko by’abandi. Ecokureberaho: Yehova akikiriza kukorana na Yesu omu kuhanga ebindi bintu byona. (Enf 8:27-30; Kol 1:15, 16) N’obu Yehova ari owobushoborozi bwona nashemerererwa kuha abandi emirimo. Ecokureberaho: Akatorana Yesu ngu abe Omugabe w’Obukama bwa bweye kandi akaha omugisha abantu 144,000 abarije kutegeka na Yesu. (Luk 12:32) Kandi Yehova akamanyiza Yesu kugira ngu abe Omugabe n’Omutambi Mukuru. (Heb 5:8, 9) Nambwenu akamanyiza abarije kutegeka na Yesu konka, taragerizeho kubagema oku bari kubasa kuhikiriza ogo murimo. Omu mwanya gw’eco akesiga  ku barije kukora ebi ari kukunda.—Kush 5:10.

6-7. Ni enki eki turi kubasa kwegera ahari Tata witu w’omu iguru aha bikwatirine n’okuha abandi emirimo?

⁶ Mbehi yaba Tata witu w’omu iguru otari kwetenga obuyambi bw’ondijo muntu ari kwikiriza kuha abandi emirimo, itwe titushemerire kukizaho kukikora! Mbehi ori omwebembezi w’eka, ninga ori omuzehe omu kibina? Toreza ecokureberaho ca Yehova ori kuha abandi emirimo kandi otarigezaho kubagema oku bashemerire kuyikora. Watoreza Yehova torije kureba oku omurimo gukozirwe kusha ahobwe nomanyiza abandi kandi nobesiga. (Isa 41:10) Ni bata oku abine obujunanizibwa bari kubasa kutoreza Yehova?

⁷ Bibuli negamba ku Yehova ari kwikiriza ebitekateko bya ba marayika. (1 Bag 22:19-22) Bazire mwe, ni bata oku muri kubasa kutoreza ecokureberaho ca Yehova? Caba kiri kwetengesa shaba omwana agambe oku ari kureba ensharamu eyaza kukorwa. Kandi wahurira kiri kirungi nobasa kwikiriza ekitekateko ceye.

8. Ni bata oku Yehova yayehanganire Abrahamu na Sara?

⁸ Nambwenu ekiri kwereka ku Yehova ari omucurezi ni oku ari kwehangana. Ecokureberaho: Yehova nayehangana ahurikiza ge abahereza beye baba bari kumushaba. Akahurikiza ayetonzire Abrahamu obu yabire ari kumubuza ebikwatirine n’ensharamu y’okucwecereza Sodoma na Gomora. (Kut 18:22-33) Nambwenu yijuka oku Yehova yatwarize Sara omukazi wa Abrahamu. Obu Sara yashekire aha bikwatirine n’endagano y’okuzara kandi akuzire, Yehova taramunyigiire. (Kut 18:10-14) Ahobwe akamwehanganira.

9. Ni bata oku abazire n’abazehe bari kubasa kutoreza ecokureberaho ca Yehova?

⁹ Imwe bazire n’abazehe, ni bata oku muri kubasa kutoreza ecokureberaho ca Yehova? Ni enki eki ori kukora omwana wawe ninga shi omuntu w’omu kibina yayanga kwikiriza ensharamu yawe. Mbehi eki ori kuhika ori kukora ni okumwereka ku atahikire? Ninga nogezaho kuhurikiza ebitekateko byeye? Abine obujunanizibwa ku bari kutoreza Yehova, ab’omu ka n’ab’omu kibina nibagasirwa. Hati twamara kureba oku turi kubasa kutoreza Yehova turi kwereka obucurezi. Mbwenu ho reka turebe oku turi kubasa kutoreza ebyokureberaho by’omuri Bibuli aha bikwatirine n’okwereka obucurezi.

10. Ni bata oku Yehova ari kukoresa ebyokureberaho by’abandi kugira ngu atwegese?

¹⁰ Yehova, nk’Omwegesa witu mukuru, akata ebyokureberaho omuri Bibuli kugira ngu atwegese. (Isa 30:20, 21) Ku turi kutekateka aha nkuru z’omuri Bibuli aha bikwatirine n’abo abayerekire emitwarize ya Yehova harimu nk’obucurezi nikituma twabatoreza. Nambwenu twashwijuma ezo nkuru nitureba eki turi kwegera aha byahikire aha baremirwe kwereka eyo mitwarize.—Zab 37:37; 1 Kor 10:11.

11. Ni enki eki turi kwegera aha cokureberaho kibi ca Saulo?

¹¹ Yetegereze ecahikire aha Mugabe Saulo. Omu kutandika akaba ari omucurezi. Akaba ari kumanya ahu obushoborozi bweye buri kugarukira nangwa n’okuhisya obwire obu yahirwe endijo mirimo. (1 Sam 9:21; 10:20-22) Konka ku hahwireho obwire akatandika kwetungura yakora n’emirimo eyi yabire atikirizibwe kukora. Bwanyima y’obwire buce amazire kuba omugabe akatandika kugira  emitwarize mibi. Izoba rimwe obu yabire ategerize omuhanuzi Samueli akaremwa kwehangana. Omu mwanya g’okugira ngu Saulo abe omucurezi kandi ayesige Yehova ari kukora ebi ari kwenda, akahayo ekitambo n’obu yabire atikirizibwe kukikora. Ecarugiremu, Yehova taragumizemu kumwikiriza kandi akaferwa obugabe. (1 Sam 13:8-14) Nituba twayereka obwenge yaba turi kwegera ahari eco cokureberaho turi kwerinda kwetungura.

12. Ni bata oku Danieli yayerekire obucurezi?

¹² Ekiri kutana n’ecokureberaho kibi ca Saulo, yetegereze ecokureberaho kirungi c’omuhanuzi Danieli. Danieli omu kubaho kweye kona akaguma ari omucurezi ahari Yehova ahakuba burijo akaba namushaba ngu amwebembere omu bi ari kukora byona. Ecokureberaho: Obu Yehova yamukoresize omu kushoborora ekiroto c’omugabe Nebukadeneeza, taragambire ku yakikora aha bweye. Omu mwanya gw’eco, akecureza yayereka ku ekitinisa cona n’okuhimbisibwa kona kuri okwa Yehova. (Dan 2:26-28) Ni enki eki turi kumwegeraho? Yaba benetata bashemererwa ahabwa toku yitu ninga shi hariho ebi tuhikireho omu murimo g’okuburira, tushemerire kwijuka ku okuhimbisibwa kona kuri okwa Yehova. Tushemerire kwijuka ku ebintu byona ebi turi kuhikaho ari ahabw’obuyambi bwa Yehova. (Fil 4:13) Twakikora tusyoya nambwenu nituba turi kutoreza Yesu. Tuta shi?

13. Tukuratize ebiri omuri Yohaana 5:19, 30, ni enki eki turi kwegera ahari Yesu aha bikwatirine n’obucurezi?

¹³ N’obu Yesu yabire ahikirire akaba nashaba Yehova omu bi yabire ari kukora byona. (Shoma omuri Yohaana 5:19, 30.) Taragerizeho kwereka ku ebi yabire ari kukora yabire ari kubikora ahabw’obushoborozi bweye. Omu Bafilipi 2:6 nihatugambira ku Yesu ‘ataratekatekire ku okwingana na Ruhanga kiri ekintu eki ashemerire kugumya.’ Ahobwe akaba namanya ge ahu obushoborozi bweye buri kugarukira kandi ayorobera ebiragiro by’Ishe owamutumire.

14. Yesu akatwaza ata obu bamushabire kukora eki atikirizibwe kukora?

¹⁴ Yetegereze oku Yesu yagarukiremu abegi beye, Yakobo na Yohaana, obu bizire kumureba bari na nyina bakamushaba  ekintu eki yabire atikirizibwe kubaha. Omu mwanya g’okubanyigira, Yesu akabereka ku Yehova wenka ari we ori kusharamu abarishitama aha rubaju rwa buryo ninga orwa bumosho omu Bukama. (Mat 20:20-23) Yesu akereka ku yabire namanya ahu obushoborozi bweye buri kugarukira. Buzima akaba ari omucurezi. Akaba nakora ebi Yehova yamwikirize kukora kusha. (Yah 12:49) Ni bata oku turi kubasa kutoreza Yesu?

15-16. Ni bata oku turi kubasa kuta omu nkora obuhabuzi oburi omu 1 Bakorinso 4:6?

¹⁵ Nitutoreza ecokureberaho ca Yesu c’obucurezi turi kuta omu nkora obuhabuzi oburi omu 1 Bakorinso 4:6. Aho nihatugambira ngu: ‘Tutarenga aha Byahandikirwe.’ Batushaba obuhabuzi nituba tutashemerire kwetungura ninga shi ngu tugambe ngu twabikora aha bwitu. Omu mwanya gw’eco nituronda obuhabuzi omuri Bibuli ninga shi omu bitabo byitu. Omu buryo nk’obwe, nituba twayikiriza ku obushoborozi bwitu bwine obugarukiro. Nitwecureza twikiriza ku obuhabuzi buhikire buri kuruga aha Wobushoborozi bwona.—Kush 15:3, 4.

¹⁶ Oyihireho kuhimbisa Yehova, twine ezindi nshonga ndungi eziri kutuma twayereka obucurezi. Reka turebe oku obucurezi buri kutuma twatunga okushemererwa kandi bukatukwasa kufa aha bandi.

17. Ahabw’enki abacurezi bari kushemererwa?

¹⁷ Nitukira kutunga okushemererwa twaba turi abacurezi. Ahabw’enki? Twaba turi kumanya ahu obushoborozi bwitu buri kugarukira nitushemerererwa obuyambi obu abandi bari kutuha. Ecokureberaho: Tekateka aha bwire obu Yesu yakirize ababembe ikumi. Omwe kusha omuri bo ni we wagarukire kusima Yesu ahabw’okukira eyo ndwara mbi munonga. Ogo mushija  w’omucurezi akasima ahabw’obuyambi obu yabire yahebwa kandi yahimbisa Ruhanga.—Luk 17:11-19.

18. Tukuratize ebiri omu Barooma 12:10, ni bata oku obucurezi buri kutuma twayeta aha by’abandi?

¹⁸ Abacurezi nibeta aha by’abandi kandi nibakira kugira abanywani. Ahabw’enki? Nibareba emitwarize mirungi y’abandi kandi babesiga. Abacurezi nibashemererwa abandi batunga obujunanizibwa bari kubashagika kandi bari kuborobera.—Shoma omu Barooma 12:10.

19. Ni ziha nshonga eziri kutuma twayerinda kwetungura?

¹⁹ Ekiri kutana n’eco abari kwetungura nikibagumira kushagika abandi ahakuba nibaba bari kweyendera ekitinisa. Nibakira kwegeranisa n’abandi kandi nibagezaho kwegira barungi kukira abandi. Omu mwanya g’okumanyiza abandi n’okubaha emirimo, nibagamba ngu ebintu bishemerire kuba nk’oku bari kubyenda, ahakuba omu mitekatecere yabo nibaba bari kutekateka ku abandi batari kubasa kubikora ge. Kandi omuntu ori kwetungura nayehurira ku ari kukira abandi kandi natura ayine ihari. (Gal 5:26) Ogo muntu tari kugira abanywani ngu bamarane obwire. Twahurira twatangira kugira akantu k’okwetungura, tushemerire kuhika turi kushaba Yehova obuyambi kugira ngu tuhindure eyo mitekatecere mibi.—Rom 12:2.

20. Ahabw’enki tushemerire kuba abacurezi?

²⁰ Mbehi tikiri kutushemeza kumanya ku Yehova yatuhire ecokureberaho kirungi! Nitumanya ku ari omucurezi twareba oku ari kutwariza abahereza beye kandi nitwenda kumutoreza. Nambwenu nitwenda kutoreza ebyokureberaho birungi ebiri omuri Bibuli eby’abantu b’abacurezi abagenzire na Ruhanga. Mbehi titushemerire kuha Yehova ekitinisa burijo kandi tukamuhimbisa! (Kush 4:11) Ku turakikore tusyoya nitwija kuba banywani ba Ruhanga ebiro byona.