1. Ni ryari obu entumwa Paulo yayerekire obwenge?

ENTUMWA Paulo akereka obwenge omu bwire obu yabire ari kuhurira ahwire amani. Akagamba ku n’obu omubiri gweye guri kuhwa amani ari kurwana orutaro kugira ngu akore ebihikire, kandi ku burijo Yehova atari kugarukamu eshara zeye nk’oku ari kubyenda. (2 Kor 4:16; 12:7-9; Rom 7:21-23) Nambwenu Paulo akereka ku ababire bari kumurwanisa babire bari kumureba nk’ohwire amani. * Konka tarikirize ngu okutwarizibwa kubi ninga shi obweremwa bweye bitume yahurira ku atine mugasho.—2 Kor 10:10-12, 17, 18.

2. Tukuratize ebiri omu 2 Bakorinso 12:9, 10, ni riha shomo ry’omugasho eri Paulo yayegire?

² Paulo akega ishomo ry’omugasho munonga, ahakuba akerebera ku omuntu ari kubasa kuguma ahamire n’obu yakuhurira ahwire amani. (Shoma omu 2 Bakorinso 12:9, 10.) Yehova akagambira Paulo ngu: ‘Amani geye gahikirizibwa omu bweremwa;’ eco nikimanyisa ku Yehova yabire arahe Paulo amani agu ari kwetenga. Ec’okubanza; twaza kushwijuma enshonga ahabw’enki tutashemerire kuhwa amani abari kuturwanisa batutwariza kubi.

3. Ahabw’enki turi kushemererwa twajumwa?

³ Ha muntu n’omwe ori kukunda kujumwa. Konka abangi bitu batujuma tukata omutima ahari ebyo bigambo bibi nitubasa  kuhwa amani. (Enf 24:10) Mbwenu shi ni bata oku tushemerire kutwaza batujuma? Nk’oku Paulo yakikozire nitubasa ‘kushemererwa omu kujumwa.’ (2 Kor 12:10) Ahabw’enki? Ahakuba ku bari kutujuma kandi bakatuhiganisa, nicoreka ku turi abegi ba Yesu b’amazima. (1 Pet 4:14) Yesu akagamba ku abakurasi beye barihiganisibwa. (Yoh 15:18-20) Eco ni co cahikire ah’Abakristo b’omu kinyigana c’okubanza. Tugarukire enyima eco kikakwata munonga ah’Abakristo b’omuri Buguriika ababire bari kurebeka nk’abatashomire kandi abatine mani. Kandi n’omu Bayudaaya, Abakristo otwariremu nk’entumwa Petero na Yohaana bakaba nibarebwa nk’abantu abataregire. (Byak 4:13) Abakristo nibarebwa nk’abatine mani; ahabw’okuba tibine amahe agari kubarwanirira, kandi tibine abari kubemererera omu bitongore by’ensi.

4. Ni enki eki Abakristo b’omu kinyigana c’okubanza bakozire obu batwarizibwe kubi?

⁴ Mbehi Abakristo b’omu kinyigana c’okubanza bakikiriza ngu okutwarizibwa kubi kutume batahereza Yehova? Ingaha. Ecokureberaho: Entumwa Petero na Yohaana, bakaba nibareba ku ni ec’omuhendo kuhiganisibwa bari kuturwa kukuratira Yesu n’okwegesa abandi ebiri kumukwataho. (Byak 4:18-21; 5:27-29, 40-42) Abegi ba Yesu tibarikirize ekintu cona kubisa enshoni. Abo Bakristo b’omu kinyigana c’okubanza bakakorera abantu ebintu birungi n’obu babire bari kubajoga. Ecokureberaho: Ebitabo ebi ezo ntumwa zahandikire nibikwasa abantu bingi munonga, kandi bituma bagira amasiko. Obukama obu baburire oburi kutegekera omu iguru hati, juba aha nibwija kutegeka abantu bona omu nsi. (Mat 24:14) Obutegeki bw’abantu obwagenzire buri kubonabonesa Abakristo bukagenda nibushenyuka, konka abo Bakristo b’abesigwa hati ni abagabe omu iguru. Ababire bari kubahiganisa bakafa; kandi ku barizoka baryaba omu Bukama obu babire bari kuhiganisa.—Kush 5:10.

5. Tukuratize ebiri omuri Yohaana 15:19, ahabw’enki abahereza ba Yehova bari kurebwa nk’abantu aba ahasi?

⁵ Ni co kimwe n’omuri obu bwire, abantu bingi nibareba Abahamya ba Yehova nk’abataregire kandi abatine mani. Ahabw’enki? Ahakuba titwine emitwarize nk’ey’abantu abatwetorwire. Nitugezaho kuba abacurezi kandi twehangana. Kandi eyi nsi nehiga abantu kwetungura n’okuba abagomi. Nambwenu, tituri kwejwanga omu by’obutegeki kandi tituri kushagika abasirikare b’ihanga eri ariryo ryona. Ahabw’okuba turi kutana n’abantu abo omuri eyi nsi, nibareba ku turi aba ahasi munonga.—Shoma omuri Yohaana 15:19; Rom 12:2.

6. Ni guha murimo ogu Yehova ari kutuma abahereza beye bakora?

⁶ N’obu abantu b’omu nsi bari kutureba nk’abatine mani, Yehova natuma twakora ebintu byine omugasho munonga. Natuma twahikiriza omurimo g’okuburira abantu omu nsi yona. Omuri obu bwire abahereza beye nibahindura ebitabo byingi na za magazini kandi nibakoresa Bibuli bari kuburira abantu bingi kituma bagira amagara marungi. Yehova natuma ebyo byona byabasika ari kukoresa abantu abu ensi eri kureba nk’abatine mani. Konka shi natureba ata buri omwe? Mbehi Yehova natukwasa omu bi turi kukora byona? Yaba kiri kisyoya, ni enki eki turi kukora kugira ngu atuyambe? Reka tushwijume ebintu bishatu by’omugasho ebi turi kwegera aha cokureberaho c’entumwa Paulo.

7. Ni riha shomo eri turi kwegera aha cokureberaho ca Paulo?

⁷ Ishomo eri turi kwegera aha cokureberaho ca Paulo niryo eri: Otariyesiga amani ga we ninga shi obushoborozi bwa we waba ori kuhereza Yehova. Kwihirira aha mitekatecere y’abantu, Paulo akaba ayine enshonga z’okutuma yayetungura ninga shi yayeyesiga. Akakurira omuri Taruso etawuni y’omuri Rooma. Taruso gukaba guri omwanya gurimu abantu abashomire munonga kandi hakaba hariyo yunivasiti. Paulo akaba ashomire munonga, ahakuba akegesibwa n’omwebembezi w’Omuyudaaya owabire ari kuhebwa ekitinisa munonga ori kwetwa Gamalieli. (Byak 5:34; 22:3) Kandi Paulo akaba nahebwa ekitinisa nk’Abayudaaya bagenzi beye. Akagamba ngu: Nkatunguuka munonga ‘omu dini y’Abayudaaya, n’okukira nakira bingi abu nanyesire na bo omu ihanga ryange.’ (Gal 1:13, 14; Byak 26:4) Konka Paulo tarayesigire obwenge bweye.

8. Tukuratize ebiri omu Bafilipi 3:8, Paulo akaba nareba ata ebintu ebyabire biri kubasa kumumara amani, kandi shi ahabw’enki yabire ari ‘kushemererwa omu bweremwa’ bweye?

⁸ Paulo akareka ebintu byona ebyabire biri kutuma yarebeka nk’omuntu oshambire omu nsi. Ebyo byona ebi yabire yahikireho, akaba ari kubasa kubireba nk’eby’omugasho konka akaba nabireba nk’ebisingwe. (Shoma omu Bafilipi 3:8.) Paulo ku yaherize kuba omukurasi wa Kristo akabonabonesibwa munonga. Omu ihanga ryeye bakaba nibamwanga. (Byak 23:12-14) Kandi Abarooma n’abatahi bakamutera banamuta omu kihome. (Byak 16:19-24, 37) Nambwenu Paulo akaba namanya ku atahikirire kandi ku kiri kubasa kumugumira kukora ebihikire. (Rom 7:21-25) Konka n’obu yabire ari kubugana ebyo bizibu tibiramuzibire kugumizamu kukuratira Yesu, ahobwe akaba ‘nashemererwa omu bweremwa’ bweye. Ahabw’enki? Ahabw’okuba akerebera oku Ruhanga yabire namuha amani omu kubaho kweye.—2 Kor 4:7; 12:10.

9. Ni bata oku tushemerire kureba ebiri kubasa kutumara amani?

 ⁹ Twaba turi kwenda ngu Ruhanga atuhe obuyambi obu turi kwetenga, titushemerire kureba obushoborozi bwitu, amashomero agu twayegire, embera ezi twakuriremu, ninga shi obugiga obu twine nk’obw’omuhendo munonga ahari itwe. Ebyo byona tibiri kutuma twarebeka ge omu misho ga Yehova. Mazima abahereza ba Ruhanga ‘abine obwenge bw’ensi ti bingi, n’obu bakuba abakama, n’obu bakuba ab’ekitinisa.’ Kureka Yehova ‘akatorana abatine mani’ omu nsi ngu abe ni bo yakoresa. (1 Kor 1:26, 27) Nyabura we otariyikiriza oburemezi bwona kukuzibira kuhereza Yehova. Ahobwe oburebe nk’omugisha oguri kutuma wamanya oku Yehova ari kukora. Ecokureberaho: Wayehurira kubi ahabw’abari kubasa kutuma wabanganisa ebi ori kwikiriza, shaba Yehova akuhe obumanzi kugira ngu obase kurwanirira okwikiriza kwa we. (Efe 6:19, 20) Waba ori kubugana ebizibu byingi ebiri kutuma wayemereza omutima, shaba Yehova akuhe amani kugira ngu ogume ohugire omu murimo gwe ye. Burizoba wareba ku Yehova ari kukuyamba, okwikiriza kwa we nikukizaho kuhama.

10. Ahabw’enki tushemerire kushwijuma ebyokureberaho by’Abakristo ba kare b’abesigwa, nk’abari kugambwa omu Baheburaayo 11:32-34?

¹⁰ Paulo ni omwegi wa Bibuli owabireho kare. Akega amazima kandi nambwenu akegera aha by’okurebaraho by’abantu ababire bari kugambwa omu Kigambo ca Ruhanga. Obu yahandikire Abakristo b’Abaheburaayo akabashaba kutekateka aha by’okureberaho ebi baterirweho n’abahereza ba Yehova b’abesigwa. (Shoma omu Baheburaayo 11:32-34.) Tekateka ahari omwe omuri abo bahereza; Omugabe Daudi. Akehanganira ababire bari kumuhiganisa batari abangi beye kusha, ahobwe n’abanywani beye. Twatekateka aha cokureberaho ca Daudi, nitwerebera oku Paulo cabire kiri kumugaruramu amani kandi tureba oku turi kubasa kutoreza Paulo.

11. Ahabw’enki Daudi yabire narebeka nk’otine mani? (Reba ekishushani c’aha kishembeso.)

¹¹ Obu Daudi yabire narwana na Goliasi akaba narebeka nk’otine mani. Goliasi ku yarebire Daudi ‘akamugaya.’ Ekiri kukira ahari ebyo Goliasi akaba ari muhango, ayine ebikoreso by’okurwanisa kandi amanyirire eby’entaro. Konka Daudi we akaba ari omusigazi muto, otamanyirire eby’entaro, kandi atine ebikoreso by’okurwanisa. Konka eco tikiratumire Daudi yahwa amani. Akesiga amani ga Yehova rero yasingura omwangi.—1 Sam 17:41-45, 50.

12. Ni kiha kizibu kindi eki Daudi yabire ashemerire kwehanganira?

¹² Daudi akaba ashemerire kwehanganira ekindi kizibu ecabire kiri kubasa kutuma yahurira atine mani. Daudi akahereza omu bwesigwa owu Yehova yabire yagizire omugabe wa Israeli, ni okugamba Saulo. Omu kubanza, Omugabe Saulo akaba naha ekitinisa Daudi. Bwanyima okwetungura kukatuma Saulo yagirira Daudi ihari. Saulo akatwariza kubi Daudi nangwa yagezaho n’okumwita.—1 Sam 18:6-9, 29; 19:9-11.

13. Ni enki eki Daudi yakozire obu Omugabe Saulo yamutwarize kubi?

¹³ Omu mwanya g’okufa aha ku Omugabe Saulo yabire ari kumutwariza kubi, Daudi akagumizamu kuha ekitinisa owu Yehova yatorine. (1 Sam 24:6) Daudi taratire omushango ahari Yehova ahabw’ebi Saulo yabire ari kumukorera. Ahobwe, Daudi akaguma kushaba Yehova ngu amuhe amani g’okwehanganira eco kigezo.

14. Ni ziha mbera ezahikire aha ntumwa Paulo eziri nk’ezahikire ahari Daudi?

 ¹⁴ Entumwa Paulo na we akahikwaho embera nk’ezahikire ahari Daudi. Abangi ba Paulo bakaba bine amani mingi kumukiza. Abategeki bingi bakaba nibamwanga. Bakamutera kandi bamuta omu nkomo. Nk’oku byahikire ahari Daudi, Paulo banywani beye bakamutwariza kubi. Abakristo bamwe b’omu kibina bakamwehaguraho. (2 Kor 12:11; Fil 3:18) Konka Paulo akasingura ababire bari kumurwanisa. Ata shi? Akagumizamu ari kuburira. Akagumizamu kwesiga benetata na banyanyazi nangwa n’ababire batari kumwikiriza. Kandi akaguma ari omwesigwa ahari Yehova okuhisya aha kufa. (2 Tim 4:8) Ahabw’okuba yabire ari kwesigira kimwe Yehova akabasa kukora ebyo byona.

15. Ni eha ntego yitu, kandi shi ni bata oku turi kugihikaho?

¹⁵ Mbehi n’iwe warajumirweho ninga okatwarizibwa kubi n’abu muri kwegana, abu muri kukora hamwe, ninga shi abanyabuzare bawe abatari Abahamya ba Yehova? Mbehi waratwarizibwe kubi n’omuntu ow’omukibina ca we? Yaba kiri kisyoya, yijuka ecokureberaho ca Daudi n’eca Paulo. Nobasa ‘kusingura ekibi okisinguza ekirungi.’ (Rom 12:21) Entego ya we ti nk’eya Daudi y’okutera omuntu ibare omu busyo, ahobwe ni ey’okwegesa abantu Bibuli. Eco nobasa kukihikaho wakoresa Bibuli ori kugarukamu abu ori kwegesa, ori kuha ekitinisa abari kukutwariza kubi, kandi ori kukorera ebirungi abantu bona nangwa n’abangi ba we.—Mat 5:44; 1 Pet 3:15-17.

16-17. Ni enki eki Paulo yabire atari kubasa kwebwa?

¹⁶ Entumwa Paulo atakabire omwegi wa Kristo akaba najoga abakurasi ba Yesu kandi abahiganisa. (Byak 7:58; 1 Tim 1:13) Yesu ni we wayemerize Paulo, owabire ari kwetwa Saulo ngu areke kuhiganisa ekibina c’Abakristo. Yesu akagamba na Paulo ari omu iguru kandi yamugira empumi. Kugira ngu Paulo ashube arebe, abantu abu yabire ari kuhiganisa ni bo bamukwasize. Kugira ngu arebe, akikiriza obuyambi obu omwegi  ori kwetwa Anania yamuhire.—Byak 9:3-9, 17, 18.

¹⁷ Bwanyima Paulo akaba Omukristo, kandi akaba atari kubasa kwebwa ishomo eri Yesu yamwegesize aha ruguto oruri kuza Damasiko. Paulo akaguma ari omucurezi, kandi akaba natura ayetegwire kwikiriza obuyambi bwa benetata na banyanyazi. Akagamba ku babire bari kumugaruramu amani.—Kol 4:10, 11.

18. Ahabw’enki tushemerire kwikiriza obuyambi obu twahebwa burijo?

¹⁸ Ni enki eki turi kwegera ahari Paulo? Twatandika kwekwatanisa n’abahereza ba Yehova, nituba tushemerire kwikiriza obuyambi obu abandi bari kutuha, turi kwijuka ku hariho byingi ebi turi kubasa kubegeraho. (1 Kor 3:1, 2) Konka shi hati biri bata? Twaba tumazire emyaka myingi turi kuhereza Yehova nihaba hariho ebintu byingi ebi turi kumanya, konka nituba tushemerire kwikiriza obuyambi obu turi kuhebwa n’obu twakubuhebwa n’omuntu otari omu mazima caba kiri kwetengesa. Konka munonga Yehova nakoresa benetata na banyanyazi kugira ngu batugumye. (Rom 1:11, 12) Kugira ngu Yehova atuhe amani agu turi kwetenga tushemerire kwikiriza obwo buyambi.

19. Ahabw’enki Paulo yabire ari kuhika ahari byingi?

¹⁹ Paulo ku yaherize kuba Omukristo akakora byingi. Ahabw’enki? Ahakuba akega ku ebi ari kuhikaho atari ahabw’amani geye, amashomero agu yayegire, embera ezi yakuriremo, ninga obugiga, ahobwe ku ni ahabw’obucurezi n’okwesiga Yehova. Twena nitubasa kutoreza Paulo (1) turi kwesiga Yehova, (2) turi kushwijuma ebyokureberaho by’omuri Bibuli, kandi (3) turi kwikiriza obuyambi obu twahebwa. Obwe rero n’obu twine obweremwa, Yehova naba ayetegwire kutuha amani agu turi kwetenga.