1-2. Ni enki eki oshemerire kugumizamu kukora na bwanyima y’okubatizibwa? Shoborora.

 NOKUNDA kuyonja eka yawe ryari? Nobasa kuba wayibonize wamara kugitahamu aha murundi g’okubanza. Konka shi ku wakugehuza bwanyima? Nk’oku ori kukimanya, neyijura omucucu n’oburofa. Obwe rero kugira ngu eka yawe erebeke ge, oshemerire kugiboneza burijo.

² Ni co eki turi kukorera emitecerereze yitu n’emicwe yitu. Ni amazima, obu wabire otakabatizibwe okataho amani wakora empinduka omu kubaho kwawe kugira ngu “oyeyozyeho oburofa bwona obw’aha mubiri n’obw’omu mwika.” (2 Kor 7:1) Konka hati, nobasa oshemerire korobera obuhabuzi bw’entumwa Pawulo ori ‘kugumizamu kuhindurwa musya.’ (Efe 4:23) Ahabw’enki oshemerire kugumizamu kutaho amani? Ni ahabw’okuba omucucu n’oburofa by’egi nsi nibibasa kuhika biri kukushisha. Kugira ngu obyerinde kandi ogume ori oshemire omu misho ga Yehova, oshemerire kushwijuma emitecerereze, emicwe n’ebyetengo byawe burijo.

3. Ni enki eki ‘okuhindurwa basya omu mitecerereze’ kiri kumanyisa? (Abaroma 12:2)

³ Ni enki eki oshemerire kukora kugira ngu ohindurwe musya omu mitecerereze? (Shoma omu Baroma 12:2.) Ekigambo c’Orugurika ekiri kuhindurwamu ngu “muhindurwe  basya omu mitecerereze” nikibasa kuhindurwamu ngu “muboneze emitecerereze yanyu.” Obwe rero, titushemere kukora ebirungi kusha, ahobwe tushemerire n’okushwijuma abu turi bo omu nda kandi tukore empinduka eziri kwetengesa kugira ngu tubeho turi kubuganisa n’emisinge ya Yehova. Eco tushemerire kukikora burijo.

4. Ni enki eki turi kubasa kukora kugira ngu ensi etahindura emitecerereze yitu?

⁴ Ku turiba abahikirire, nitwija kushemeza Yehova omuri buri kintu eki turikora. Konka obwo bwire butakahikire, tushemerire kukora n’amani kugira ngu tumushemeze. Reba oku Pawulo yageranisize okuhindurwa basya omu mitecerereze n’okumanya ebi Ruhanga ari kwenda, nk’oku biri kugambwa omu Baroma 12:2. Omu mwanya g’okwikiririza egi nsi kutuhindura, tushemerire kumaririra kwikiriza ngu emitecerereze ya Ruhanga ehindure entego zitu n’ensharamu zitu.

5. Ni bata oku ori kubasa kushwijuma emitecerereze yawe kugira ngu orebe yaba ori kukora eby’okurahusya ekiro ca Yehova? (Reba ekishushani.)

⁵ Reba ecokureberaho. Yehova nayenda ngu ‘tukore eby’okurahusya ekiro’ ceye. (2 Pet 3:12) Yebuze ngu: ‘Mbehi oku ndi kubaho nikwereka ku ndi kumanya ngu emperu eri hihi? Mbehi ensharamu ezi ndi kukora aha bikwatirine n’amashomero, n’emirimo nibyereka ku ndi kuta okukorera Yehova omu mwanya g’okubanza? Mbehi ninyikiriza ku Yehova arije kutureberera nyowe n’ab’eka yange, ninga nintura ntire omutima aha butungi?’ Tecereza oku Yehova ari kwehurira yareba turi kubaho turi kubuganisa n’ebi ari kukunda.​—Mat 6:25-27, 33; Fil 4:12, 13.

6. Ni enki eki tushemerire kugumizamu kukora?

⁶ Tushemerire kushwijuma emitecerereze yitu kandi tukakora empinduka eziri kwetengesa. Pawulo akagambira Abakorinto ati: “Mweshwijume, murebe ku murabe muri  omu kwikiriza; kandi mwegeze mwenka.” (2 Kor 13:5) Okuba “omu kwikiriza” nikitwariramu ekiri kugira aha kuza omu nterane n’omu murimo g’okuburira. Nambwenu nikitwariramu emitecerereze yitu, ebyetengo byitu n’entego zitu. Obwe rero, tushemerire kugumizamu kuhindurwa basya omu mitecerereze turi kweshomesa Ekigambo ca Ruhanga, turi kwega kutecereza nka we kandi turi kukora cona ekiri kwetengesa kugira ngu tubeho turi kubuganisa n’ebi Yehova ari kukunda.​—1 Kor 2:14-16.

7. Tukuratize ebiri omu Befeso 4:31, 32, ni kiha kindi kintu eki tushemerire kukora kandi shi ahabw’enki kiri kubasa kutugumira?

⁷ Shoma omu Befeso 4:31, 32. Orekire kuhindurwa basya omu mitecerereze, tushemerire n’‘okujwara omuntu omusya.’ (Efe 4:24) Eco nikitushaba kugira eki twakora. Bimwe omuri ebyo bintu ebi tushemerire kutaho amani ngu tweyiheho harimu ebigambo bibi, okugubwa kubi n’ekiniga. Ahabw’enki kubyeyihaho kiri kubasa kutugumira? Ni ahabw’okuba zimwe omu ngesho mbi niziba zasingire emizi omuri itwe. Ecokureberaho: Bibuli negamba ku abamwe bari “abanyakiniga” kandi ku bari ‘kurahuka kugubwa kubi.’ (Emi 29:22) Okwerinda kugira ezo ngesho ezasingire emizi nicetenga amani na bwanyima y’okubatizibwa, nk’oku twaza kubireba omu cokureberaho.

8-9. Ni bata oku ebyahikire ahari Stephen byakwereka ku tushemerire kugumizamu kujura omuntu owa kare?

⁸ Mwenetata ori kwetwa Stephen akaba nakunda kugira ekiniga. Akagamba ati: “Na bwanyima y’okubatizibwa, nkaba nshemerire kugumizamu kutegeka ekiniga cange. Ecokureberaho: Izoba rimwe ku nabire naza kuburira, nkiruka aha mushuma owabire yayiba rediyo omu motoka yange. Ku namuhikire hihi, akaginaga yagumizamu. Ku nagambire abandi oku nacungwire rediyo yange, omuzehe w’omu mutwe gwange g’okuburiramu akambuza ngu, ‘Stephen, kuri wamukwasire, okaba oramukorere enki?’ Eco kibuzo kikatuma natecereza kandi catuma nataho amani kugira ngu mbane obusinge n’abandi.” b

⁹ Nk’oku byahikire ahari Stephen, engesho mbi nebasa kwereta tutari kukimanya, na twaba twatireho amani tukagisingura. Eco cabaho, otacweka entege kandi otatecereza ku otacari Omukristo. Nangwa n’entumwa Pawulo akegambaho ati: “Nyowe ku mba ninyenda kukora ekirungi, ekibi kimba hihi.” (Rom 7:21-23) Ahakuba Abakristo bona batahikirire, nibagumizamu kurwanisa engesho mbi eziri kugaruka nk’omucucu n’oburofa oburi kugaruka omunju yawe. Tushemerire kutaho amani kugira ngu tugume turi abashemire. Ni bata oku turi kubasa kukikora?

10. Ni enki eki ori kubasa kukora ngu osingure engesho mbi? (1 Yohana 5:14, 15)

¹⁰ Shaba Yehova omugambire engesho eyi oyine, kandi oyesige ku arije kukuhurira kandi akakukwasa kugisingura. (Shoma omuri 1 Yohana 5:14, 15.) Ni amazima, Yehova tarije kukora ecokutangaza ngu akwiheho eyo ngesho, konka nakuha amani g’okwerinda kukora ebiri kubugana na yo. (1 Pet 5:10) Obwe rero, kora ebiri kubugana n’eshara yawe, otari kukora ebiri kubasa kutuma washuba kujwara omuntu owa kare. Ecokureberaho: Oshemerire kwerinda kureba za vidiyo, tivi, n’okushoma ebitabo ebiri kugamba  aha ngesho ezi ori kugezaho kweyihaho. Kandi otayikiriza ngu ogume otire omutima aha byetengo bibi.​—Fil 4:8; Kol 3:2.

11. Ni ziha ntembwe ezi turi kubasa kukora zikatukwasa kugumizamu kujwara omuntu omusya?

¹¹ N’obu wajurire omuntu owa kare, ni ec’omugasho wajwara omusya. Ni bata oku ori kubasa kumujwara? Yetereho entego y’okutoreza Yehova ori kwega emitwarize yeye. (Efe 5:1, 2) Ecokureberaho: Washoma enkuru y’omuri Bibuli eri kugamba oku Yehova yasaasire, yebuze ngu: ‘Mbehi ninsaasira abandi?’ Washoma oku Yehova yagirire esaasi ababire bari kuraba omu mbera zigumire, yebuze ngu: ‘Mbehi nanye ninfa aha Bakristo bagenzi bange abine ebi baceniire, kandi mbayamba?’ Gumizamu kuhindurwa musya omu mitecerereze yawe ori kujwara omuntu musya, kandi byaba bikugumire, otacweka entege.

12. Ni bata oku Stephen yayerebire ku Ekigambo ca Ruhanga kine amani g’okuhindura amagara g’abantu?

¹² Stephen owu tugambireho, aketegereza yashanga ari kujwara omuntu omusya mporampora. Akagamba ati: “Kwiha nabatizibwa, nkaguma ndi kubugana ebintu ebiri kutuma nagira ekiniga. Nkega kuhunga abantu abari kugezaho kungwisa kubi ninga shi abari kutuma nayitwa ekiniga omu bundi buryo. Abantu bingi harimu n’omukazi wange, bakansima ahabw’oku nagenzire ndi kwetwara omuri ezo mbera. Nanye bikantangaza! Ezo mpinduka ezi nakozire tindazikozire ahabw’amani gange. Ahobwe, nkazikora ahabw’amani g’Ekigambo ca Ruhanga.”

13. Ni enki ekirije kutukwasa kugira ebyetengo birungi? (Abagalatiya 5:16)

¹³ Shoma omu Bagalatiya 5:16. Yehova natuha omwika gweye oguri kwera kugira ngu atukwase kukora ebihikire. Ku turi kweyegesa Ekigambo ca Ruhanga, nikituma omwika oguri kwera gwatukwasa. Nambwenu nitutunga omwika oguri kwera twayekwatanisa omu nterane. Omuri ezo nterane, nitumara obwire na benetata na banyanyazi abari kutaho amani ngu bakore ebihikire nk’itwe kandi nikitugaruramu amani. (Heb 10:24, 25; 13:7) Kandi ku turi kuhika hihi ya Yehova omu kushaba kandi tukamushaba ngu atukwase kusingura obweremwa obu twine, natuha omwika gweye oguri kwera, gutuha amani g’okugumizamu turi kurwana. N’obu ebyo bikorwa bitari kutuma ebyetengo bibi byagenda, nibitukwasa kwerinda kukora ebiri kubugana n’ebyo byetengo. Omu Bagalatiya 5:16 nihagamba ku abari kugendera omu mwika ‘batarihikiriza eby’okwetenga k’omubiri.’

14. Ahabw’enki kiri ec’omugasho kugumizamu kweyihamu ebyetengo bibi, tukagira ebyetengo birungi?

¹⁴ Twaba twagizire entebekanisa ndungi y’eby’omwika, tushemerire kuguma tugine kandi tukagumizamu kugira ebyetengo birungi. Ahabw’enki? Ahabw’okuba omwangi witu tanyami. Ogo mwangi ni ekigezo c’okukora ebibi. N’obu twakuba twamazire kubatizibwa, noshanga turi kugezibwa kukora ebintu ebi tushemerire kwerinda, harimu okuzana wakareba, okunywa amarwa mingi, n’okureba ponogurafi. (Efe 5:3, 4) Mwenetata ocari muto akagamba ati: “Kimwe omu bintu ebyangumire munonga ni okurarikira abu turi kushushanisa ekisina. Nkatecereza ngu ezo nyehurira ni ez’akire kace, konka nahati ncarwana na zo.” Mbwenu shi nobasa kukora ki, waba oyine ebyetengo bibi kandi byine amani?

15. Ahabw’enki kiri kutuhumuriza twamanya ku abantu bona bari kubasa kugira ebyetengo bibi? (Reba ekishushani.)

 ¹⁵ Waba oyine ebyetengo bibi kandi okahurira byine amani otari kubasa kubisingura, ogume oyijuke ku otari wenka. Bibuli negamba eti: “Tihariho kigezo ekirababireho ekitari ca bantu bona.” (1 Kor 10:13a) Pawulo akaba ari kugambira abashija n’abakazi b’omuri Korinto ebyo bigambo. Bamwe omuri bo bakaba babire bari abashambani, abatingwa, n’abasinzi. (1 Kor 6:9-11) Mbwenu shi notecereza ku bwanyima y’okubatizibwa, batarashubire kugira ebyetengo bibi? Ingaha mazima. N’obu bona babire bari Abakristo abashukirweho omwika, bakaba bacari abantu abatahikirire. Obwe rero hine obu babire nibagira ebyetengo bibi. Eco nikitugaruramu amani. Ahabw’enki? Ahabw’okuba nicereka ku ecetengo kibi eki wakuba oyine, hine mwenetata ninga omunyanyazi owarwanire na co kandi akakisingura. Obwe rero, gumizamu ‘kuhamira omu kwikiriza’ ahakuba nomanya ngu ‘benetata abari omu nsi yona na bo nibahikwaho obusaasi nk’obwawe.’​—1 Pet 5:9.

16. Ni guha mutego ogu tushemerire kwerinda, kandi ahabw’enki?

¹⁶ Otarigwa omu mutego g’okutecereza ku hatine omuntu n’omwe ori kubasa kushoborocerwa ekigezo eki ori kurabamu. Watecereza baso, nobasa kweheba, otecereze ku hatine eki ori kubasa kukora ngu osingure ebyetengo bibi ebyine amani. Konka ti ko kiri. Bibuli negira eti: “Ruhanga n’ow’okwesigwa; taribikiriza kugezibwa kigezo eki mutari kubasa; kureka omu kigezo eco aryabateraho oburyo bw’okuhunga, ngu mubase kukigumisiririza.” (1 Kor 10:13b) Obwe rero, n’obu ebyetengo bibi byakuba byine amani, nitubasa kubirwanisa, tugume turi abesigwa ahari Yehova. Yehova nayija kutukwasa tubisingure.

17. Ni enki eki turi kubasa kukora n’obu tutari kubasa kwerindira kimwe ebyetengo bibi?

 ¹⁷ Ogume oyijuke ku tutari kubasa kwerindira kimwe ebyetengo bibi ahakuba tutahikirire. Konka byatwijamu, nitubasa kuhika turi kubyeyihamu nk’oku Yesefu yakikozire obu yahikire ari kuhunga omukazi wa Potifari. (Kut 39:12) Otariyikiriza kusingurwa n’ebyetengo byawe ngu okore ebibi!

18-19. Ni biha bibuzo ebi turi kubasa kwebuza kugira ngu tumanye yaba turi kugumizamu kuhindura emitecerereze yitu?

¹⁸ Okuhindurwa basya omu mitecerereze nikishaba kuguma turi kutaho amani kugira ngu tubuganise emitecerereze yitu n’ebikorwa byitu n’ebi Yehova ari kwenda. Obwe rero, ogume oyeshwijume rero oyebuze ngu: ‘Mbehi ebi ndi kukora nibyereka ku ndi kumanya ahu twahika omu bwire bw’emperu? Mbehi ndi kutaho amani kugira ngu njware omuntu omusya? Mbehi ndimu kwikiriza ngu omwika gwa Yehova gumpabure kugira ngu ntakora ebi omubiri guri kwetenga?’

¹⁹ Waba ori kweshwijuma ogume oyesimire ebirungi ebi ori kuhikaho, omu mwanya g’okutecereza ngu noyija kukora ebintu nk’omuntu ohikirire. Wareba ahu oshemerire kukora empinduka, otacweka entege. Okuratize obuhabuzi oburi omu Bafilipi 3:16 oburi kugira ngu: “Amazima agu tuhikiremu, tube ni go twagenderamu.” Ku orakore nk’oku ori kubasa ngu ohindurwe musya omu mitecerereze yawe, oyesige ku Yehova arije kukuha emigisha.