EKICWEKA C’OKWEGA 7
ECESHONGORO CA 51 Twehaireyo Ahari Ruhanga!
Amashomo agu turi kwegera aha Banaziri
‘Ebiro byona ebi arimara omu bunaziri aryaba oyerezibwe Yehova.’—KUB 6:8.
ENTEGO
Oku ecokureberaho c’Abanaziri kiri kubasa kutukwasa kuhereza Yehova twine omwika g’okwehayo n’obumanzi.
1. Ni eha mitwarize mirungi eyi abahereza ba Yehova bagenzire bari kwereka omu kubaho kwabo?
MBEHI noreba obunywani obu oyine na Yehova nk’obw’omuhendo? Hatariho okubanganisa ni ko oku ori kubureba! Kandi ti iwe wenka. Kwiha omu bwire bwa kare abantu bingi bakaba bari kwehurira nk’oku ori kwehurira. (Zab 104:33, 34) Abingi bakagira ebi bayeferereza kugira ngu baramye Yehova. Eco ni co eki Abanaziri b’omu bwire bwa Isirayeli bakozire. Mbwenu shi bakaba bari baha, kandi shi ni enki eki turi kubasa kwegera aha cokureberaho cabo?
2. (a) Abanaziri bakaba bari bantu ki? (Kubara 6:1, 2) (b) Ahabw’enki bamwe omu Bisirayeli babire bari kusharamu kuba Abanaziri?
2 Ekigambo “Omunaziri” ekiri kuruga omu Ruheburayo nikimanyisa “owayetenisize n’abandi,” ninga “owayehire Yehova.” Eco kigambo kikaba nikimanyisa Abisirayeli ababire nibakora n’amani kandi ababire bagizire ebi bayeferereza kugira ngu bahereze Yehova omu buryo bw’omutano. Ebiragiro bya Musa bikaba nibyikiririza omushija ninga omukazi, kukora endagano y’omutano y’okuhereza Yehova ari Omunaziri omu bwire obu yayeteraho. a (Shoma omu Kubara 6:1, 2.) Eyo ndagano eyi babire nibakora, ekaba netwariramu kukora ebintu ebi abandi Bisirayeli babire batari kukora. Mbwenu shi, ni enki ecabire nikituma Omwisirayeli yasharamu kukora eyo ndagano y’okuba Omunaziri? Rukundo nyingi eyi Omwisirayeri yabire nakunda Yehova n’ahabw’emigisha eyi yabire naba ayine ni byo ebyabire biri kutuma yakora eyo ndagano.—Bir 6:5; 16:17.
3. Ni bata oku abahereza ba Ruhanga b’omuri obu bwire bari kushushana n’abanaziri?
3 Obu ‘ebiragiro bya Kristo’ byatirweho ngu bize omu mwanya gw’ebiragiro bya Musa, abahereza ba Ruhanga bakaba batacashabwa kuba Abanaziri. (Gal 6:2; Rom 10:4) Konka nk’oku byabire biri aha Banaziri, abahereza ba Yehova b’omuri obu bwire nibagumizamu kwereka ku bine ecetengo c’okumuhereza n’omutima gwabo gona, amagara gabo gona, obwenge bwabo bwona n’amani gabo gona. (Mar 12:30) Nitukora endagano y’okweha Yehova tubyihire aha mutima. Kugira ngu tubeho tubuganisize n’eyo ndagano, tushemerire kubaho turi kukora ebi Yehova ari kwenda kandi tugira ebi twayeferereza kugira ngu tumuhereze. Ku turashwijume oku Abanaziri babire bari kubaho babuganisize n’endagano yabo, nikija kutukwasa kumanya amashomo agu turi kubasa kubegeraho omu kubaho kwitu. b (Mat 16:24) Nimureke tushwijume ebyokureberaho bimwe.
GUMA OYEFEREREZE
4. Tukuratize ebiri omu Kubara 6:3, 4, ni bata oku abanaziri babire bari kushabwa kugira ebi bayeferereza?
4 Shoma omu Kubara 6:3, 4. Abanaziri bakaba bashemerire kwerinda amarwa gona kandi berinda n’ebyokurya byona ebiri kuruga omu mizabibu. Konka abantu ababire batwire na bo bakaba nibarya ebyo byokurya ahakuba bikaba bitine nshonga ahari bo. Bibuli negamba ku ‘vinyo eri kugwisa ge emitima y’abantu’ kandi ku kiri ekiconco ekiri kuruga ahari Ruhanga. (Zab 104:14, 15) N’obu ebyo byokurya byabire binuzire, Abanaziri bo bakaba bashemerire kubyeferereza. c
Mbehi niwe oyetegwire kugira ebi wayeferereza kugira ngu obe nk’Abanaziriri? (Reba paragurafu ya 4-6)
5. Madián na Marcela bakasharamu kweferereza ki, kandi shi ahabw’enki?
5 Kimwe n’Abanaziri n’itwe nitugira ebi twayeferereza kugira ngu tukorere Yehova byingi. Reba ecokureberaho ca Madián na Marcela. d Ogo mushija n’omukazi bakaba babireho ge kandi bari abagiga. Madián akaba ayine omurimo murungi ogwabire guri kutuma babasa kutura omu nju ndungi. Konka bakaba bari kwenda kukora byingi omu murirmo gwa Yehova. Kugira ngu bahike ahari eyo ntego bakaba bashemerire kugira ebi bahindura kugira ngu borobye embera. Bakagamba ngu: “Tukacendeza esente ezi twabire turi kukuresa, twafurukira omu kaju kace kandi twaguza emotoka yitu.” Madián na Marcela bakaba batashemerire kweferereza basoya. Konka eco bakakikora ahabw’okuba bakaba bari kwenda kukora byingi omu murimo gwa Yehova. Nibahurira bamazirwe kandi bashemerirwe ahabw’eyo nsharamu yabo.
6. Ahabw’enki Abakristo b’omuri obu bwire bari kushabwa kugira ebi bayeferereza? (Nambwenu reba ekishushani.)
6 Abakristo b’omuri obu bwire nibatunga okushemererwa bayeferereza kugira ngu babone obwire oburi kumara g’okukora byingi omu murimo gwa Yehova. (1 Kor 9:3-6) Yehova tiwe ori kutushaba kweferereza ebyo bintu; kandi twabikora nikiba kitari kibi. Ecokureberaho: Abamwe nibeferereza emirimo yabo mirungi, amaka gabo n’ebindi. Abingi nibasharamu kuguma bari bonka batatahe omu maka ninga basharamu kumara emyaka myingi batakazire abana. Abandi bakasharamu kuza kukorera omurimo ahari kwetegwa ababurizi kukira ahandi n’obu kiri kubashaba kusiga abantu babo abu barikukunda. Abingi omuri itwe nitukora ezo nsharamu ahabw’okuba turi kuba turi kwenda kuha Yehova ebirungi kukira ebindi. Guma oyesige ku Yehova ari kuha omugasho ebyo bintu by’omuhendo ninga shi bice ebi ori kweferereza kugira ngu omukorere.—Heb 6:10.
GUMA OYINE ENTANISA AHAGATI YAWE N’ABANDI
7. Ni biha bizibu ebi Abanaziri babire bari kubasa kubugana ahabw’omuhigo gwabo? (Kubara 6:5) (Nambwenu reba ekishushani.)
7 Shoma omu Kubara 6:5. Abanaziri bakaba nibahiga omuhigo g’okutashara ishoki ryabo ry’aha mutwe. Obwo bukaba buri oburyo bw’okwereka ku bari korobera Yehova omu bwijwire. Omunaziri ku yabire namara obwire buringwa ari kukora ogo murimo, ishoki ryeye rikaba niriba riringwa n’abandi Bisirayeli babireba. Abandi ku babire nibamuha ekitinisa kandi bakamuhiga kugumizamu kubaho akuratize omuhigo gweye, kikaba nikimworobera kugumizamu kuba omuntu oyine entanisa n’abandi. Konka ekiri kushasha, ni oku hariho obwire obu Abisirayeli babire batari kusima Abanaziri n’okubashagika. Ecokureberaho: Omu bwire bw’omuhanuzi Amosi abahakani b’omuri Isirayeli bakaba ‘nibanywisa Abanaziri vinyo’ bine entego y’okutuma barenga aha ndagano yabo y’okutanywa vinyo. (Amos 2:12) Obumwe kikaba nikishaba Omunaziri kugira obumanzi kugira ngu agumizemu kuhamira aha muhigo gweye g’okubaho ayine entanisa n’abandi.
Omunaziri owabire ahamire aha muhigo gweye, akaba nabasa kugumizamu kwetanisa n’abandi bantu (Reba paragurafu ya 7)
8. Ni bata oku ebyahikire ahari Benjamin byakugaruramu amani?
8 Ahabw’obuyambi bwa Yehova n’itwe nitubasa kugira obumanzi tugumizamu kubaho twine entanisa n’abandi n’obu twakuba turi kukunda kugira enshoni n’obwoba. Reba ecokureberaho ca Benjamin Omuhamya oyine emyaka ikumi, w’omuri Noruweyi. Ahabw’orutaro orwabireho omuri Ukraine ishomero ryabo rikataho entebekanisa y’okushagika abantu b’omuri Ukraine. Abana bakashabwa kweshongora eceshongoro n’okujwara ebijwaro bikozire omu ibara ry’ebendera ry’ihanga. Benjamin aketeraho entebekanisa y’okwerinda kwekwatanisa omuri ebyo bikorwa n’okugumizamu kuba omwesigwa yayemerera hare y’ahu byabire biri kubera. Konka omwegesa weye akamubona rero yamweta n’iraka rihango ngu: “Oshemerire kwija hanu oyekwatanisa nitwe. Twena tukutegerize!” Benjamin akereka obumanzi yahika hihi omwegesa weye rero yamugambira ati: “Nyowe tindi kugwera orubaju kandi tindi kwejwanga omu by’obutegeki. Abahamya ba Yehova bingi bari omu bihome ahabw’okuba bayangire kwekwatanisa omu rutaro.” Ogo mwegesa akikiriza ebi Benjamin yamugambire kandi yamugambira ku kitine enshonga yareka kwekwatanisa omuri eco kikorwa. Konka abu bari kwegana bakatandika kumubuza enshonga atayekwatanisa na bo. Benjamin akahurira yagira obwoba kandi yayenda kurira; konka akagira obumanzi yagambira abu bari kwegana ebi yabire agambire omwegesa weye. Bwanyima, Benjamin akagambira abazire beye oku yayehurire Yehova ku yamukwasize kurwanirira okwikiriza kweye.
9. Ni bata oku turi kubasa kushemeza omutima gwa Yehova?
9 Ahabw’okuba twashaziremu kugumizamu kukora ebi Yehova ari kwenda, nitugumizamu kwetanisa n’abantu abatwehinguririze. Nitwetenga obumanzi kugira ngu tugambe ku turi Abahamya ba Yehova aha murimo ninga ah’ishomero. Kandi ahabw’okuba emitwarize n’emicwe by’omuri eyi nsi biri kukizaho kuba bibi munonga, nikikizaho kutugumira n’itwe kubaho turi kukuratiza emisinge ya Bibuli n’okugambira abandi obutumwa burungi. (2 Tim 1:8; 3:13) Burijo guma oyijuke ku turi kutuma ‘omutima gwa Yehova gwashemererwa’ twagira obumanzi, tukagumizamu kwetanisa n’abantu abatari kumuhereza.—Emi 27:11; Mal 3:18.
GUMIZAMU KUTA YEHOVA OMU MWANYA G’OKUBANZA OMU KUBAHO KWAWE
10. Ni bata oku okukuratiza ebiri omu Kubara 6:6, 7 byabire biri kubasa kuba ekigezo aha Banaziri?
10 Shoma omu Kubara 6:6, 7. Abanaziri bakaba batari kubasa kuhika hihi y’omuntu ofire. Nitubasa kutecereza ku eco cabire kitari kubashaba kweferereza munonga. Konka omu bwire bwa Bibuli, Omunaziri akaba ari kubasa kureba ku okorobera eco kiragiro bigumure omu bwire obu yafisa omunyabuzare weye. Emigenzo y’okuzika y’omuri obwo bwire ekaba netwariramu kuhika hihi y’omubiri g’omuntu ofire. (Yoh 19:39, 40; Byak 9:36-40) Omuhigo g’Omunaziri gukaba nigumuzibira kukuratiza eyo migenzo. Kandi n’obu abagizire eka babire bari kushabwa kwereka ku bashasha ahabw’ogo muntu owafire, Abanaziri bo bakaba nibereka okwikiriza kugumire bahamira aha muhigo gwabo. Mazima Yehova akaba nakwasa abo bahereza beye b’abesigwa kwehangarira ebyo bizibu.
11. Ni enki eki Omukristo ashemerire kumaririra kukora yaba ari kukora ensharamu ezikwatirine n’ebizibu by’omu ka? (Nambwenu reba ekishushani.)
11 Nk’itwe Abakristo nitureba omuhigo g’okweha Yehova nk’ogo muhendo munonga. Ebyo nibigira engaruka aha nsharamu ezi turi kukora n’ebikorwa ebi turi kukora aha bikwatirine n’ebizibu by’amaka gitu. Nitutaho amani kugira ngu tufe aha bi ab’omu maka gitu bari kwetenga by’omuburi, konka nambwenu tituri kuta ebyetengo byabo omu mwanya g’okubanza kukira ebi Yehova ari kwenda ngu tukore. (Mat 10:35-37; 1 Tim 5:8) Obumwe nitubasa kukora ensharamu eziri kubasa kushasha ab’omu maka gitu kugira ngu tushemeze Yehova.
Mbehi niwe oyetegwire kuta ebi Yehova ari kwenda omu mwanya g’okubanza n’omu bwire obugumire? (Reba paragurafu ya 11) e
12. Ni enki eki Alexandru yakozire obu yabire ari kuraba omu mbera zigumire omu ka yeye, kandi shi ni enki eki atarakozire?
12 Reba ecokureberaho ca Alexandru n’omukazi weye Dorina. Ogo mushija n’omukazi weye ku bamazire omwaka bari kwega Bibuli, Dorina akasharamu kwemereza kuyega kandi yayenda ngu na Alexandru abyemereze. Konka akamugambira aturize kandi omu muringo murungi ku ari gumizamu kuyega. Ebyo tibirashemize Dorina kandi bikatuma yataho amani kugira ngu amuzibire kugumizamu kwega. Alexandru akagamba ku yagerizeho kwehanganira Dorina n’obu cabire kitamworobire. Obumwe Dorina ku yabire namunegura kandi akamugambira kubi kikaba nikituma yahurira yayenda kwemereza kwega Bibuli. Konka, Alexandru akagumizamu kuta Yehova omu mwanya g’okubanza kandi yagumizamu kukunda munonga n’okuha ekitinisa omukazi weye. Ebyo bikatuma Dorina yashuba kwega Bibuli kandi yabatizibwa.—Reba ahari jw.org vidiyo eyine omutwe oguri kugira ngu Alexandru na Dorina Văcar: “Rukundo egumisiriza kandi egira embabazi” ahari kugira ngu “Bibuli nehindura amagara g’abantu.”
13. Ni bata oku turi kubasa kwereka ku nitukunda Yehova n’ab’omu maka gitu?
13 Yehova ni we owatandikisize eka kandi nayenda ngu tutungiremu okushemererwa. (Efe 3:14, 15) Twaba turi kwenda kugira okushemererwa okwa buzima tushemerire kukora ebintu ebi Yehova ari kwenda ngu tukore. Hatariho okubanganisa Yehova nafa aha kweferereza n’amani agu’ori kutaho kugira ngu omuhereze ori n’okufa aha b’omu ka yawe kandi obereke rukundo n’ekitinisa.—Rom 12:10.
GUMA OHIGE ABANDI KUBA NK’ABANAZIRI
14. Ni baha abu turi kubasa kugumya tukoresize ebigambo byitu?
14 Abantu bona abari kusharamu kuhereza Yehova omuri obu bwire, nibaba bashemerire kugira ebi bayeferereza ahabw’okuba bari kumukunda. Obumwe okukora eco nibiba bitorobi. Ni bata oku turi kubasa kukwasa abandi kugira ebi bayeferereza? Nitubasa kubagumya tukoresize ebigambo. (Yob 16:5) Mbehi omu kibina cawe harimu abayorobize embera kugira ngu babase kukora byingi omu murimo gwa Yehova? Mbehi hariho abacari bato abu ori kumanya, abari kugumizamu kwetanisa n’abandi bana ah’ishomero n’obu kiri kuba kibagumire kukikora? Mbwenu shi hariho abegi ba Bibuli ninga Abakristo bagenzi bawe abari kugumizamu kuba abesigwa n’obu bari kuhiganisibwa n’ab’omu maka gabo? Nimureke tugumizemu kukoresa oburyo bwona obu twatunga kugira ngu tugaruremu abo bantu amani, kandi tubasime ahabw’okweferereza oku bari kukora n’obumanzi obu bari kwereka.—Film 4, 5, 7.
15. Ni bata oku abamwe bakwasize abari omu murimo g’obwire bwona?
15 Obumwe nituba tushemerire kugira eki twakwasa Abakristo bagenzi bitu abari omu murimo g’obwire bwona. (Emi 19:17; Heb 13:16) Omunyanyazi okuzire w’omuri Siri Lanka, na we akaba ayine ecetengo nk’eco c’okukwasa abari omu murimo g’obwire bwona. Ku batandikire kumuha esente eziri kuhebwa abahikire omu zabukuru, akenda kuzikoresa omu kuyamba abanyanyazi babiri b’abapayoniya kugira ngu bagumizemu kukora ogo murimo omu bwire obu babire bine ebizibu by’eby’akasente. Obwe rero akakora entebekanisa y’oku yabire aragume kubaha esente buri kwezi z’okukoresa omu kweta abantu aha simu omu murimo buri kwezi. Mazima ogo munyanyazi akereka omutima murungi!
16. Ni enki eki turi kubasa kwegera aha ntebekanisa y’Abanaziri b’omu bwire bwa kare?
16 Nitubasa kugira byingi ebi twayegera aha cokureberaho c’Abanaziri! Konka mbwenu eyo ntebekanisa y’Abanaziri eyine ekindi kintu eki eri kwereka ahari Tata w’omu iguru Yehova. Nayesiga ku twine ecetengo c’okumushemeza kandi ku turi kugira byingi ebi twayeferereza kugira ngu tubase kubaho tubuganisize n’omuhigo g’okumweha. Natwereka ku ari kutuha ekitinisa n’itwe ari kutuha omugisha g’okweshariramu okwereka ku turi kumukunda. (Emi 23:15, 16; Mar 10:28-30; 1 Yoh 4:19) Entebekanisa y’Abanaziri neyereka ku Yehova ari kureba kandi ku ari kuha omuhendo ebi turi kweferereza kugira ngu tumuhereze. Nimureke tugumizemu kuhereza Yehova turi kwehayo twekundire kugira ngu tumuhe ebirungi kukira ebindi.
NOBASA KUGARUKAMU OTA?
-
Ni bata oku kuba Omunaziri byabire nibishaba kugira ebi wayeferereza n’okugira obumanzi?
-
Ni bata oku turi kubasa kuhiga abandi kuba nk’Abanaziri omuri obu bwire?
-
Ni bata oku entebekanisa y’Abanaziri eri kwereka ku Yehova ari kwesiga abahereza beye?
ECESHONGORO CA 124 Tugume Tuhamiire Ahari Yehova
a N’obu Yehova yabire ari kutorana bamwe omu bantu beye ngu babe Abanaziri, bamwe omu Bisirayeli bakaba nibehayo bekundire bakora ebi bari kubasa.—Reba akashanduku akari kugira ngu “ Abanaziri ababire nibatoranwa na Yehova.”
b Obumwe ebitabo byitu nibigeranisa Abanaziri n’abantu abari omu murimo g’obwire bwona. Konka omuri eki kicweka twaza kushwijuma oku abahereza ba Yehova bona abamwehire bari kubasa kumuhereza nk’Abanaziri.
c Obushangirwe nikirebeka ku Omunaziri yabire atari kushabwa kukora omurimo nanka kugira nguahigure omuhigo gweye.
d Reba ahari jw.org ekicweka ekiri kugira ngu “Tukasharamu korobya embera zitu” ahari kugira ngu “Ebyahikire aha Bahamya ba Yehova.”
e EKISHUSHANI: Omunaziri ari ah’iguru y’enju ari kureba abandi bari kuza kuzika omwe omubagizire eka yeye. Kugira ngu agumizemu kuhamira aha muhigo ogu yahigire Yehova tari kubasa kwekwatanisa omuri eyo migenzo.
