1-2. Ni enki eki omuntu ashemerire kukora mbere y’okubatizibwa?

 OMU bwire bw’emyaka etano ehwire, abantu abari kurenga miliyoni bakabatizibwa baba Abahamya ba Yehova. Abingi omuri bo bari nk’omwegi w’omu kinyigana c’okubanza ori kwetwa Timoteyo owayegesibwe amazima kwiha ‘acari muto.’(2 Tim 3:14, 15) Abandi bakega ebiri kukwata ahari Yehova bakuzire kandi abandi babyega bahikire omu myaka ya za bukuru. Juba aha hine omukazi owabire ori kwega Bibuli n’Abahamya ba Yehova owabatizibwe ayine emyaka 97!

² Mbehi yaba ori omwegi wa Bibuli ninga wakurire omu ka y’Abahamya ba Yehova, notecereza aha by’okwija kubatizibwa? Eyo ni entego ndungi munonga! Konka mbere y’okubatizibwa oshemerire kubanza wayeha Yehova. Eki kicweka nikija kushoborora eki kweha Ruhanga kiri kumanyisa. Nambwenu nikija kutukwasa kumanya enshonga tutashemerire kutina kweha Yehova n’okubatizibwa twaba twijwize ebiri kushabwa.

AHABW’ENKI TUSHEMERIRE KWEHA RUHANGA?

3. Gamba ebyokureberaho by’omuri Bibuli by’abantu abayehire Yehova.

³ Omuri Bibuli, nihereka ku abantu ababire nibeha Yehova bababire nibamuhereza omu buryo bw’omutano. Abisirayeli bakaba bari ihanga eryayehire Ruhanga. Konka hine abantu b’omuri eryo hanga abamwehire kugira ngu bamuhereze omu buryo bw’omutano. Ecokureberaho: Aroni akaba ayine akamanyiso k’oku yayehire Yehova, ni okugamba ekipande ca zahabu eki yabire najwara omu buso bweye. Eco kipande ca zahabu kikaba nicereka ku yabire yatirweho ngu ahereze Yehova omu buryo bw’omutano, ari omutambi mukuru wa Isirayeli.  (Lev 8:9) Abanaziri na bo bakaba bayehire Yehova omu buryo bw’omutano. Ekigambo “omunaziri,” ekiri kuruga omu kigambo c’Oruheburayo ekiri kwetwa nazirʹ, nikimanyisa “owayetanisize n’abandi,” ninga “owayehire Ruhanga.” Abanaziri bakaba nibabaho bari kukuratiza ebiragiro bya Musa omu buryo bw’omutano.—Kub 6:2-8.

4. (a) Ni bata oku abayehire Yehova bari kumuhereza omu buryo bw’omutano? (b) ‘Okweyanga’ nikimanyisa ki? (Nambwenu reba ekishushani.)

⁴ Wayeha Yehova, noba washaramu kuba omwegi wa Yesu, kandi ota okukora ebi Ruhanga ari kwenda omu mwanya g’okubanza omu kubaho kwawe. Mbwenu shi okweha Yehova nikitwariramu enki? Yesu akagamba ati: ‘Omuntu wena ku arayende kunkuratira, ayeyange.’ (Mat 16:24) Ekigambo c’Orugirika ekiri kuhindurwamu ngu “okweyanga” nikibasa kumanyisa ngu “kwezibira ebintu ebimwe na bimwe.” Kandi wayeha Yehova, noyija kushabwa kwangira kimwe ebintu byona ebitabugine n’ebi ari kwenda. (2 Kor 5:14, 15) Ebyo nibitwariramu kwangira kimwe ‘emirimo y’obuzarwa bw’omubiri,’ harimu nk’ebikorwa by’obushambani. (Gal 5:19-21; 1 Kor 6:18) Mbehi okukora ezo mpinduka nikija kukubera omutwaro? Yaba ori kukunda Yehova kandi ori kwikiriza ku ebiragiro biri kukugasira, tibirije kukugumira. (Zab 119:97; Isa 48:17, 18) Mwenetata ori kwetwa Nicholas akagamba ati: “Nobasa kureba emisinge ya Yehova nk’enyigi z’aha kihome eziri kukuzibira kukora ebi ori kwenda, ninga oyireba nk’enyigi z’ahantu ahari yo entare, eziri kutuma otahikwaho n’akabi.”

5. (a) Ni bata oku ori kubasa kweha Yehova? (b) Ni eha ntanisa eri ahagati y’okweha Yehova n’okubatizibwa? (Nambwenu reba ekishushani.)

⁵ Ni bata oku ori kubasa kweha Yehova? Nomuraganisa birabire omu kushaba ku orije kumuramya wenka kandi okata okukora  ebi ari kwenda omu mwanya g’okubanza. Nomuraganisa ku orije kugumizamu kumukunda ‘n’omutima gwawe gona, n’amagara gawe gona, n’obwenge bwawe bwona, kandi n’amani gawe gona.’ (Mar 12:30) Endagano yawe y’okweha Yehova noyikora ori wenka, ahagati yawe na Yehova. Ekiri kutana n’eco, okubatizibwa nibikorerwa omu misho ga bona, byereka abantu bona ku wayehire Yehova. Endagano y’okweha Yehova ni ey’omutano. Oshemerire kweteraho entego y’okuhikiriza eyo ndagano kandi Yehova naba ari kwenda ngu obeho obuganisize na yo.—Mub 5:4, 5.

AHAMBW’ENKI OSHEMERIRE KWEHA YEHOVA?

6. Ni enki ekishemerire kutuma omuntu yayeha Yehova?

⁶ Enshonga nkuru eshemerire kutuma wayeha Yehova ni oku ori kumukunda. Rukundo eyo ori kumukunda, teshemerire kuba eyegamire aha nyehurira kusha. Ahobwe, eshemerire kuba eyegamire aha ‘bumanyi’ n’aha ‘bwenge bw’omwika’ ni okugamba ebintu ebi wamanyire ahari Yehova bikatuma rukundo eyi ori kumukunda yakizaho kweyongera. (Kol 1:9) Okweyegesa Ebyahandikirwe bikatuma wayikiriza ku (1) Yehova ari owa buzima, (2) ku Bibuli yahandikisibwe na Ruhanga, kandi (3) ku ari kukoresa ekitongore ceye omu kuhikiriza ari kwenda.

7. Ni enki eki tushemerire kukora mbere y’okweha Yehova?

⁷ Abantu abari kweha Yehova nibaba bashemerire kumanya enyegesa z’okubanza z’omu Kigambo ca Ruhanga kandi bari korobera emisinge erimu. Nibagambira abandi ebikwatirine n’okwikiriza kwabo bakuratize oku embera ziri kubikiririza. (Mat 28:19, 20)  Rukundo eyi bari kumukunda negenda eri kweyongera, bahurira bari kwenda kumuhereza we wenka. Mbehi n’iwe ni ko ori kwehurira? Okugira eyo rukundo nibyija kutuma otareba okweha Yehova n’okubatizibwa nk’ekintu eki oshemerire kukora kugira ngu oshemeze abazire bawe, ninga banywani bawe.

8. Ni bata oku okwereka ku nosima biri kubasa kukukwasa kweha Yehova? (Zaburi 116:12-14)

⁸ Watecereza aha bi Yehova yakukorire, ni co conka ekiri kutuma wakwata ensharamu y’okumweha, obyihire aha mutima. (Shoma omuri Zaburi ya 116:12-14.) Bibuli netugambira ku Yehova ari we ori kutuha ‘engabirano yona endungi n’ekiconco cona ekihikire.’ (Yak 1:17) Ekiconco kirungi kukira ebindi ni ekitambo c’Omwana weye Yesu. N’iwe kitecerezeho! Ekitambo nikituma twabasa kugirana obunywani na Yehova. Kandi nikituma twagira amasiko g’okwija kubaho ebiro byona. (1 Yoh 4:9, 10, 19) Okweha Yehova ni oburyo burungi bw’okwereka ku nitumusima ahabwa rukundo nyingi eyi yatwerekire, n’emigisha eyi yatuhire. (Bir 16:17; 2 Kor 5:15) Oko kwereka ku nitusima nibigambwaho munonga omu ishomo rya 46 akacweka ka 4, omu kitabo Shemerererwa amagara ebiro byona! aharimu na vidiyo eyine omutwe oguri kugira ngu, Ha Ruhanga ebiconco byawe.

MBEHI OYETEGWIRE KWEHA YEHOVA N’OKUBATIZIBWA?

9. Ahabw’enki omuntu atashemerire kugemwa kweha Yehova?

⁹ Nobasa kwehurira ku otaketegwire kweha Yehova n’okubatizibwa. Nambwenu nobasa kushanga hariho empinduka ezi oshemerire kukora kugira ngu obuganise n’emisinge ya Yehova, ninga oshanga ocayetenga kugumya okwikiriza kwawe. (Kol 2:6, 7) Abegi ba Bibuli bona tibari kugirira entunguka obwire bumwe kandi n’abana abakurire omu mazima tibari kubatizibwa bine emyaka eri kwingana. Obwe rero, gezaho kushwijuma entunguka ezawe aha bwawe kandi otagezaho kwegereranisa n’ondijo muntu wena.—Gal 6:4, 5.

10. Ni enki eki ori kubasa kukora washanga otaketegwire kweha Yehova n’okubatizibwa? (Nambwenu reba akashanduku akari kugira ngu: “Abantu abakurire omu mazima.”)

¹⁰ Washanga otaketegwire kweha Yehova, gumizamu kutaho amani kugira ngu ohike ahari eyo ntego. Shaba Yehova kugira ngu akuhe emigisha ahabw’amani agu ori kutaho, kugira ngu okore empinduka eziri kwetengwa. (Fil 2:13; 3:16) Nobasa kwesiga otari kubanganisa ku arije kugarukamu eyo shara.—1 Yoh 5:14.

ENSHONGA EZIRI KUTUMA ABAMWE BATINA KWEHA YEHOVA N’OKUBATIZIBWA

11. Ni bata oku Yehova arije kutukwasa kugumizamu kuba abesigwa ahari we?

¹¹ Abamwe nibaba betegwire kweha Yehova n’okubatizibwa konka batina kukikora. Nibabasa kwebuza ngu: ‘Nibyija kugenda bata nakora ekibi c’amani, kikatuma nabigwa omu kibina?’ Yaba n’iwe ari co eki ori kutina, yesige ku Yehova arije kukuha buri kintu cona eki ori kwetenga kugira ngu ‘ogende nk’oku [abeye] bashemerire, ori kumushemeza omuri byona.’ (Kol 1:10) Nambwenu nayija kukuha amani g’okukora ebihikire. Akakuhamiza ku arije kukikora ari kukwereka abandi bingi abu yakikorire. (1 Kor 10:13) Eyo ni yo nshonga abantu bace kusha ari bo abari kubingwa omu kibina. Yehova nakwasa abaherez abeye kugumizamu kuba abesigwa.

12. Ni bata oku turi kubasa kwerinda kukora ekibi c’amani?

¹² Buri muntu wena otahikirire nagezibwa kukora ebibi. (Yak 1:14) Konka, oku ori  kutwaza wahika omu bigezo ni byo ebiri kwereka ensharamu zawe. Ni iwe oshemerire kutegeka oku orije kubaho. Abantu abamwe nibagamba ku tutari kubasa kutegeka ebyetengo byitu. Konka eco ni ekishuba. Nobasa kwemanyisa kutegeka ebitecerezo byawe. Obwe rero wahika omu kigezo, nobasa kutasharamu kukora ebibi. Hariho ebintu ebiri kubasa kukukwasa kwerinda kukora ekibi c’amani. Ecokureberaho: Guma oshabe burijo. Gumizamu kugira entebekanisa ndungi y’okweyegesa Ekigambo ca Ruhanga. Guma oze omu nterane burijo. Nambwenu ogume ogambire abandi ebikwatirine n’okwikiriza kwawe. Okugumizamu kukora ebyo bintu nibyija kukukwasa kugumizamu kubaho okuratize endagano yawe y’okweha Yehova. Kandi otaguma kwebwa ku Yehova arije kukukwasa kukikora.—Gal 5:16.

13. Ni kiha cokureberaho kirungi eki Yosefu yatuterireho?

¹³ Nikija kukorobera kubaho okuratize endagano y’okweha Yehova washaramu bucari kare ebi orije kukora wahika omu kigezo. Bibuli netugambira abantu bingi abakozire eco n’obu babire batahikirire. Ecokureberaho: Muka Potifari akagezaho emirundi myingi kugwisa Yosefu omu kibi. Konka Yosefu tarabaganisize aha ki yabire ashemerire kukora. Bibuli negamba ‘ku yabyangire,’ kandi akamugira ati: ‘Nimbasa nta kukora ekibi ekiri kwingana kisyo, n’okucumura ahari Ruhanga?’ (Kut 39:8-10) Mazima, Yosefu akaba ari kumanya eki yabire ashemerire kukora nangwa n’omu bwire obu ogo mukazi yabire atakamugerize. Eco kikatuma camworobera obu yahikire omuri eco kigezo.

14. Ni bata oku turi kubasa kwangira kukora ebibi?

¹⁴ Ni bata oku ori kubasa kutwaza nka Yosefu? Nobasa kukikora ori kusharamu hati eki orije kukora wahika omu kigezo. Guma oyemanyize kuhika ori kwangira kimwe ebi Yehova ari kwanga, nangwa oyerinde n’okubitecerezaho. (Zab 97:10; 119:165) Eco nikija kutuma otasingwa n’ekigezo wagezibwa. Noyija kuba ori kumanya oku oshemerire kutwaza. Kandi mazima noyija kuba oyetegwire ge kukisingura.

15. Ni bata oku omuntu ari kubasa kwereka ku narondesa Yehova abitireho omutima? (Abaheburayo 11:6)

¹⁵ Obumwe nobasa kushanga ori kwikiriza otari kubanganisa ku wabwine amazima kandi oshanga oyine ecetengo c’okuhereza Yehova n’omutima gwawe gona, konka oshanga ocatinire  kweha Yehova n’okubatizibwa. Nobasa kutecereza aha cokureberaho c’Omugabe Dawudi. Akeshengereza Yehova ati: ‘Oncake, ayi Ruhanga, omanye omutima gwange; ongeze, omanye ebitekatekateko byange; orebe omurinye ku harabe harimu emitwarize yona emibi, haza onyebembere omu muhanda ogw’ebiro n’ebiro.’ (Zab 139:​23, 24) Yehova naha emigisha abari ‘kumurondesa babitireho omutima.’ Entego eyi oyine y’okweha Yehova n’okubatizibwa neyereka ku ori kumurondesa.—Shoma omu Baheburayo 11:6.

GUMIZAMU KUHIKA HIHI YA YEHOVA

16-17. Ni bata oku abantu abakurire omu mazima Yehova ari kubeyiriza hihi? (Yohana 6:44)

¹⁶ Yesu akagambira abegi beye ku Yehova ari we owabeyirize hihi. (Shoma omuri Yohana 6:44.) Yetegereze oku ebyo byahikirire n’ahari iwe. Yehova akareba ekintu kirungi ahari buri muntu owu yayehirize hihi. Nareba buri muntu ‘nk’omutungo gweye g’omutano,’ kandi amureba ‘nk’ow’omuhendo munonga.’ (Bir 7:6.) Kandi n’iwe ni ko ari kukureba.

¹⁷ Nobasa kuba ocari muto kandi wakurire omu mazima. Nobasa kutecereza ku ori kuhereza Yehova ahabw’okuba abazire bawe bari kumuhereza atari ahabw’okuba Yehova yakweyirize hihi. Konka, Bibuli negamba ngu: ‘Muhike hihi Ruhanga na we abone kubahika hihi.’ (Yak 4:8; 1 Bus 28:9) Wakwata ey’okubanza okahika hihi ya Yehova, na we nayija kukuhika hihi. Yehova tari kukureba nk’omuntu owakuratire abandi omu kumuhereza. Ahobwe akeyiriza hihi buri omwe omuri itwe, harimu n’abantu abakurire omu mazima. Omuntu yakwata ey’okubanza akahika hihi ya Yehova, namugarukamu nk’oku twabireba omuri Yakobo 4:8.—Geranisa na 2 Abatesalonika 2:13.

18. Ni enki eki turije kushwijuma omu kicweka ekirikutaho? (Zaburi 40:8)

¹⁸ Wayeha Yehova kandi okabatizibwa, n’oba watoreza emitwarize ya Yesu. Yesu akaba ayetegwire kukora ebi Ishe yabire ari kumushaba byona. (Shoma omuri Zaburi ya 40:8; Heb 10:7) Omu kicweka ekiri kukurataho, nitwija kushwijuma ekirije kutukwasa kugumizamu kuhereza Yehova twamara kubatizibwa.