1. Ni riha ishomo eriri kuhumuriza eri Yehova yayegesize Aburahamu?

 HINE ekiganiro eki Aburahamu atariyebwa. Birabire ahari marayika, Ruhanga akagambira Aburahamu ku yabire yaza kucwecereza etawuni ya Sodoma na Gomora. Ebyo bikashobera ogo mushija owabire ayine okwikiriza. Akamubuza ngu: ‘Buzimazima noyija kucwekereza abahikirire hamwe n’ababi? . . . Omucwi w’emanja z’ensi yona tarikora ebihikire?’ Yehova akecureza yagambira ogo munywani weye ishomo eriri kubasa kutushemeza kandi rikatuhumuriza, ni okugamba ku atari kubasa kucwerecereza abantu abahikirire.—Kut 18:23-33.

2. Ni enki ekiri kutuhamiza ku emanja za Yehova ziri kuba zihikirire kandi ku ari kwereka embabazi?

² Ahabw’enki turi kubasa kwesiga tutari kubanganisa ku oburyo obu Yehova ari kucwamu emanja buri kuba buhikirire kandi buri kwereka embabazi? Ni ahabw’okuba turi kumanya ku ‘Yehova ari kureba omu mitima’ y’abantu. (1 Sam 16:7) Mazima namanya ‘emitima y’abantu bona.’ (1 Bag 8:39; 1 Bus 28:9) Ago ni amazima agari kutangaza. Oburyo obu Yehova ari kucwamu emanja nibutana n’oku turi kutecereza. Ni yo nshonga entumwa Pawulo yagambire ahari Yehova Ruhanga ari kugira ati: ‘Oku ari kucwa emanja tibiri kubasa kumanywa!’—Rom 11:33.

3-4. Ni enki eki turi kwebuza obumwe na bumwe kandi shi ni enki eki twaza kwega omuri eki kicweka? (Yohana 5:28, 29)

³ Konka, hine obu turi kubasa kwebuza ebibuzo ebiri kushushana n’ebi Aburahamu yayeburize. Nitubasa kwebuza ngu: ‘Mbehi nitubasa kwesiga ku abantu abu Yehova yacwerize barije kushuba kubaho, ecokureberaho nk’aba Sodoma na Gomora? Mbehi hine bamwe omuri abo abarije kuzoka omu ‘kuzoka kw’abatahikirire’?—Byak 24:15.

 ⁴ Reka tushwijume eki turi kumanya aha bikwatirine n’okuzoka. Omu bwire buce obuhwire, tukakizaho kushoborocerwa ebikwatirine n’‘okuzocera kutunga amagara’ n’‘okuzocera kucwerwa orubanja.’ a (Shoma omuri Yohana 5:28, 29.) Nambwenu eyo nyegesa nsya ekatuma twagira ebi twahindura nk’oku twaza kubishwijuma omuri eki kucweka n’ekirikurataho. Reka tutandike turi kushwijuma ebi turi kumanya n’ebi tutari kumanya.

EBI TUTARI KUMANYA

5. Ni enki eki ebitabo byitu byabire biri kugamba omu bwire bwa kare aha bikwatirine n’abantu ba Sodoma na Gomora abacwekerezibwe?

⁵ Omu bwire bwa kare, ebitabo byitu bikaba nibigamba aha birije kuhika aha bantu abu Yehova ari kureba nk’abatahikirire. Tukaba nitumanya ku abantu nk’ab’omuri Sodoma na Gomora, batine amasiko g’okwija kuzoka. Konka ku twashabire kandi tukakizaho kweyegesa, bikatuma twayebuza ngu: ‘Konka shi eco nitukihamya tutari kubanganisa?’

6. Ni biha byokureberaho ebiri kwereka oku Yehova yacwerire emanja abantu abatahikirire kandi shi ni enki eki tutari kumanya?

⁶ Reka tushwijume enkuru ezikwatirine n’eco kibuzo. Omuri Bibuli harimu enkuru nyingi eziri kugamba aha ku Yehova yacwecerize abantu abatahikirire harimu abantu bingi abayisirwe n’omwijuro, amahanga mushanju agabire gari omu ihanga eryaraganisibwe agu Yehova yagambire ngu abantu beye bagacwekereze ninga shi abasirikare b’Abasiriya 185,000 abu marayika wa Yehova omwe yayisire omu kiro kimwe. (Kut 7:23; Bir 1-3; Isa 37:36, 37) Mbehi Bibuli netuha amakuru gona kugira ngu tumanye ku Yehova yacwecererize kimwe abo bantu kandi ku batine amasiko g’okwija kuzoka? Ingaha mazima. Ahabw’enki twagamba tusyo?

7. Ni enki eki tutari kumanya aha bikwatirine n’abantu abacwekerezibwe ahabw’omwijuro ninga shi aha bantu abacwekerezibwe n’Abisirayeli obu babire bari kukwata ihanga rya Kanani? (Reba ekishushani c’aha kishembeso.)

⁷ Tituri kumanya oku Yehova yacwerire orubanja buri omwe omuri bo, kandi tituri kumanya yaba buri omwe omuri bo yatungire oburyo bw’okwega ebiri kukwata ahari Yehova ngu ayehane. Bibuli negamba aha bwire bw’omwijuro eri kugamba ku Nowa ‘yabire ari omuburizi w’okuhikirira.’ (2 Pet 2:5) Konka teri kutugambira yaba Nowa yaburire buri muntu wena owabire atwire omu nsi kugira ngu atayija kucwecerezibwa n’omwijuro. Ni co kimwe tituri kumanya yaba abantu bamwe ababire batwire omu mahanga g’omuri Kanani batungire oburyo bw’okwega ebiri kukwata ahari Yehova rero ngu bahindure emitwarize yabo behane.

8. Ni enki eki tutari kumanya aha bikwatirine n’abantu b’omuri Sodoma na Gomora?

⁸ Kandi shi tukagamba ki aha bantu b’omuri Sodoma na Gomora abacwecerezibwe? Omushija owabire ahikirire ori kwetwa Loti akaba atwire na bo. Konka shi nitumanya yaba bona Loti yababurire? Ingaha mazima. Ni amazima n’obu babire bari abantu babi, tituri kumanya yaba babire bari kumanya ekirungi n’ekibi. Yijuka ku omutwe gw’abashija b’omuri eyo tawuni babire bari kwenda kuhamba ninga kukwata aha kafuba abagenyi ba Loti. Bibuli negamba ku omuri abo bashija habire harimu ‘abato n’abakuru.’ (Kut 19:4; 2 Pet 2:7) Konka shi Yehova Ruhanga w’embabazi akakwata ensharamu y’oku abo bantu bona batarije kuzoka? Yehova akahamiza Aburahamu ku omuri eyo tawuni habire hatarimu n’abashija ikumi abahikirire. (Kut 18:32)  Obwe rero bakaba batahikirire kandi Yehova akabacwekereza ahabw’ebikorwa byabo bibi. Mbwenu shi tukagamba ku hatariho n’omwe orije kuzoka omu ‘kuzoka kw’abatahikirire’? Ingaha eco tituri kukihamya!

9. Ni enki eki tutari kumanya ahari Solomoni?

⁹ Nambwenu nitushoma omuri Bibuli abantu ababire bahikirire konka bwanyima bakija kuba abatahikirire. Omwe omuri bo ni Omugabe Solomoni. Akegesibwa emihanda ya Ruhanga kandi Yehova yamuha emigisha; konka bwanyima akatandika kuramya ba ruhanga b’ebishuba. Ebyo bikagwisa kubi Yehova catuma Abisirayeli bamara emyaka myingi bari kubonabona. Ni amazima Ebyahandikirwe nibigamba ku Solomoni ‘yagwejegire akashanga bishenkuru’ harimu abashija b’abesigwa harimu n’omugabe Dawudi. (1 Bag 11:5-9, 43; 2 Bag 23:13) Mbwenu shi oburyo obu Solomoni yazikirwemu nibwereka ku arije kuzoka? Eco Bibuli teri kukigamba. Abamwe nibabasa kugamba ku ‘omuntu yafa ari kuba yayihwaho ekibi.’ (Rom 6:7) Eco ni amazima, konka tikiri kumanyisa ku abantu bona barije kuzoka nk’abatungire obugabe bw’okuzoka ahabw’okufa kwabo. Okuzoka ni ekiconco eki Ruhanga oyine rukundo yatuhire. Eco kiconco nakiha abantu abu ari kwenda kuha omugisha g’okumuhereza ebiro byona. (Yob 14:13, 14; Yoh 6:44) Mbwenu shi Salomoni nayija kutunga eco kiconco? Yehova ni we ori kukimanya. Konka nitumanya ku Yehova arije kukora ekihikire.

EKI TURI KUMANYA

10. Yehova nayehurira ata aha bikwatirine n’okucwecereza abantu? (Ezekiyeli 33:11) (Nambwenu reba ekishushani.)

¹⁰ Shoma omuri Ezekiyeli 33:11. Yehova natugambira oku ari kwehurira aha bikwatirine n’okucwera abantu emanja. Entumwa Petero akahumecerwa yagamba ebigambo ebi Ezekiyeli yahandikire ebiri kugamba ku ‘Yehova. . . atari kwenda ngu omuntu wena acwecerere.’ (2 Pet 3:9) Ebyo bigambo nibituma twamanya ku Yehova atari kuhika nacwecereza abantu. Ni Ruhanga w’embabazi kandi nazereka ahu kiri kubasika.

11. Ni baha abatarizoka kandi shi eco nitukimanya tuta?

¹¹ Ni enki eki turi kumanya aha bantu abatarizoka? Bibuli netugambira ebyokureberaho bice. b Yesu akagamba ku Yuda Isikariyota atarije kuzoka. (Mar 14:21; nambwenu reba Yohana 17:12.) Yuda akakora ebiri kuhakanisa Yehova Ruhanga n’Omwana weye kandi yabikora ari kubimanya kandi abyeyendire. (Reba Mariko 3:29.) Nambwenu Yesu akagamba ku bamwe omu bebembezi b’amadini abamuhakanisize babire barije kufa kandi batine amasiko g’okwija kuzoka. (Mat 23:33; reba Yohana 19:11) Kandi entumwa Pawulo akagamba ku abahakani abatari kwehana batarije kuzoka.—Heb 6:4-8; 10:29.

12. Ni enki eki turi kumanya aha bikwatirine n’embabazi za Yehova? Gamba ecokureberaho.

¹² Konka shi, ni enki eki turi kumanya aha bikwatirine n’embabazi za Yehova? Ni bata oku yayerekire ku atari kwenda ngu ‘omuntu wena ahwerecerere’? Reka tushwijume oku yayerekire embabazi abantu abakozire enshobe z’amani. Omugabe Dawudi akakora enshobe z’amani harimu obushambani n’obwisi. Konka Dawudi akehana kandi Yehova yamusaasira. (2 Sam 12:1-13) Omugabe Manase akakora ebintu bibi byingi omu kubaho kweye. Konka Yehova akagarukamu eshara y’ogo mushija owayehanire, yamugirira  embabazi kandi yamusaasira. (2 Bus 33:9-16) Ebyo byokureberaho nibitwereka ku Yehova ari kutanga embabazi yareba bishemerire. Nayija kuzora bantu nk’abo ahabw’okuba bamanyire ku bakozire ebyo bibi kandi bakehana.

13. (a) Ahabw’enki Yehova yayerekire embabazi abantu b’omuri Nineve? (b) Ni enki eki Yesu yagambire aha bwikwatirine n’abantu b’omuri Nineve?

¹³ Nambwenu nitumanya ku Yehova ari omunyambabazi twashwijuma oku yatwarize abantu b’omuri Nineve. Ruhanga akagambira Yona ngu: ‘Obubi bwabo buhikire omu misho gange.’ Konka ku bayehanire, Yehova akegarukaho rero yabasaasira. Akaba ayine embabazi nyingi kukiza Yona. Ruhanga akijusa omuhanuzi weye owabire ayine ekiniga ku abantu b’omuri Nineve babire ‘batari kubasa kutanisa ndyo na mosho’ (Yon 1:1, 2; 3:10; 4:9-11) Bwanyima Yesu akakoresa eco c’okureberaho ari kwegesa aha bikwatirine n’oburinganiza bwa Yehova hamwe n’embabazi zeye. Akagamba ku abantu b’omuri Nineve bayehanire kandi ku babire barije kuzoka aha ‘kiro c’orubanja.’—Mat 12:41.

14. ‘Okuzocera kucwerwa orubanja’ nibyija kugasira bita abantu b’omuri Nineve?

¹⁴ Mbwenu shi ni ruha ‘rubanja’ oru abantu b’omuri Nineve abarije kuzoka barije kucwerwa? Yesu akagamba ku harije kubaho okuzocera ‘kucwerwa orubanja.’ (Yoh 5:29) Akaba ari kugamba ku omu butegeki bweye bw’emyaka rukumi ari bwo obu ‘abahikirire n’abatahikirire’ barije kuzoka. (Byak 24:15) Abatahikirire nibija kuzocera ‘kucwerwa orubanja.’ Eco nikimanyisa ku abo bantu barimara kuzoka, Yehova hamwe na Yesu barije kureba oku baritwaza bwanyima y’okwega ebiri kukwata ahari Ruhanga. Omuntu wa Nineve ku arizoka akanga kwikiriza okuramya kw’amazima nayija kucwecerezibwa. (Isa 65:20) Konka abantu bona abarije kusharamu kuramya Yehova omu bwesigwa, nibija kuhebwa omugisha g’okutunga amagara agatahwaho!—Dan 12:2.

15. a) Ahabw’enki tushemerire kwerinda kugamba ku hatine omuntu owacwecerezibwe omuri Sodoma na Gomora orije kuzoka? (b) Ni bata oku turi kubasa kushoborocerwa ebiri omuri Yuda 7? (Reba akashanduku akari kugira ngu, “ Ni enki eki Yuda yabire ari kwenda kumanyisa?”)

¹⁵ Yesu akagamba ku abantu ba Sodoma na  Gomora babire barije kusaasirwa wabagereranisa n’abamuhakanisize kandi bakanga kwikiriza enyegesa zeye. (Mat 10:14, 15; 11:23, 24; Luk 10:12) Ni enki eki yabire ari kwenda kumanyisa? Mbwenu shi nitubasa kugamba ku ebi Yesu yagambire byabire biri kumanyisa ku abantu b’omu bwire bweye, babire bari babi munonga kukira ab’omuri Sodoma na Gomora? Twijuke ku obu Yesu yagambire ku abantu ba Nineve babire barije kuzoka ah’izoba ry’orubanja, hatine ekindi eki byabire biri kumanyisa. Obwe rero ebintu ebi Yesu yagambire aha bantu ba Sodoma na Gomora, tihine ekindi eki byabire biri kumanyisa. ‘Ekiro c’okucwa orubanja’ ekiri kugambwa omuri ezo nkuru zombi, ni kimwe. Abantu b’omuri Nineve na bo bakakora ebibi nk’ebi ab’omuri Sodoma na Gomora bakozire. Konka ab’omuri Nineve bo bakehana. Nambwenu yijuka aha bikwatirine n’eki Yesu yagambire aha bantu abarije kuzocera ‘kucwerwa orubanja.’ Abo bantu nibija kuba ‘bakozire ebibi.’ (Yoh 5:29) Obwe rero oku kiri kurebeka, hine abantu bamwe b’omuri Sodoma na Gomora abarije kuzoka. Abo bantu nibija kuzoka rero tutunge oburyo bw’okubegesa ebiri kukwata ahari Yehova na Yesu Kristo.

16. Ni enki eki turi kumanya aha bikwatirine n’abu Yehova arije kuzora? (Yeremiya 17:10)

¹⁶ Shoma omuri Yeremiya 17:10. Eki cahandikirwe nikigamba omu bigambo bice eki turi kumanya: Yehova burijo ‘nacaka ebitecerezo kandi ageza omutima.’ Yehova ku arije kusharamu abu arije kuzora nayija ‘kuhemba buri omwe akuratize emitwarize yeye.’ Yehova nayija kuguma ahamire aha nsharamu yeye konka nambwenu nayija kwereka embabazi ahu kiri kwetenga. Obwe rero titushemerire kugamba ku omuntu atine amasiko g’okwija kuzoka twaba tutine ekihamya ekiri kubishoborora!

‘OMUCWI W’EMANJA Z’ENSI YONA’ NAYIJA KUKORA EBIHIKIRE

17. Ni enki ekirije kuhika aha bantu abafire?

¹⁷ Kwiha Adamu na Eva bari kukwatanisa na Sitane omu kugomera Ruhanga, abantu bingi munonga bakafa. ‘Omwangi ari we rufu’ akita abantu bingi munonga! (1 Kor 15:26) Ni enki ekirije kuhika ahari abo bantu bona? Abantu bace 144,000 nibija kuruga omu bakurasi ba Yesu b’abesigwa bazocere kutunga amagara  agatari kufa omu iguru. (Kush 14:1) Abantu bingi munonga b’abesigwa harimu abashija n’abakazi abari kukunda Yehova nibija kuzoka omu ‘kuzoka kw’abahikirire’ kandi nibija kuba omu nsi ebiro byona bagumizemu kuba abahikirire omu butegeki bwa Kristo bw’emyaka rukumi n’omu bwire bw’aha kigezo c’aha muheru. (Dan 12:13; Heb. 12:1) Nambwenu omu bwire bw’emyaka rukumi ni bwo ‘abatahikirire’, harimu abatarakorire Yehova n’‘abakozire ebibi’ barihebwa omugisha g’okuhindura emitwarize yabo, rero bakaba abahereza ba Yehova b’abesigwa. (Luk 23:42, 43) Konka hine abakozire ebibi munonga, abashaziremu kukora ebi Yehova ari kwanga kandi bahakanisa ekigendererwa ceye, catuma yasharamu kutari bazora.—Luk 12:4, 5.

18-19. (a) Ahabw’enki tutashemerire kubanganisa aha manja ezi Yehova arije kucwera abantu abafire? (Isaya 55:8, 9) (b) Ni enki eki turije kushwijuma omu kicweka ekiri kurataho?

¹⁸ Mbehi titwine enshonga ezishemerire kutuma twayikiriza tutari kubanganisa ku oburyo bwona obu Yehova ari kucwamu emanja buhikire? Yego! Nk’oku Aburahamu yabire nakimanya, Yehova ni ‘omucwi w’emanja z’ensi yona’, ohikirire, oyine obwenge kandi w’omunyambabazi. Akamanyiza Omwana weye kucwa emanja kandi ogo murimo yagumurecera. (Yoh 5:22) Bombi nibabasa kushoma ebiri omu mutima gwa buri muntu. (Mat 9:4) Obwe rero ku barije kucwa emanja nibija ‘kukora ebihikire’!

¹⁹ Nimureke tumaririre kwesiga ku Yehova burijo ari kumanya ebirungi kukira ebindi. Nitumanya ku ari we wenka oyine omurimo g’okucwa emanja! (Shoma omuri Isaya 55:8, 9.) Obwe rero emanja zona nituzimurecera we n’Omwana weye, Omugabe ori kutoreza Ishe omu bwijwire omu kwereka oburinganiza n’embabazi. (Isa 11:​3, 4) Mbwenu shi ni enki eki turi kubasa kugamba aha bikwatirine n’emanja ezi Yehova na Yesu barije kucwa omu bwire bw’okubonabona kwingi? Ni enki eki turi kumanya? Kandi shi ni enki eki tutari kumanya? Ekicweka ekiri kurataho nikija kugarukamu ebyo bibuzo.