1. Ni enki ekiri kubasa kutukwasa kushemerererwa kweyegesa obuhanuzi bw’omuri Bibuli?

 MWENETATA ocari muto ori kwetwa Ben akagamba ati: “Nkunda kweyegesa obuhanuzi bw’omuri Bibuli.” Mbehi n’iwe ni ko ori kwehurira? Ninga nohurira bugumire kubushoborocerwa. Nobasa kuhurira ku okweyegesa aha buhanuzi bw’omuri Bibuli kiri kurusya. Konka oku origenda ori kumanya byingi aha bikwatirine na Yehova, ni ko orikizaho kumanya enshonga ahabw’enki yabuhandikisize omuri Bibuli. Kandi eco nikija kuhindura emitecerereze yawe.

2. Ni enki eki twaza kushwijuma omuri eki kicweka?

² Omuri eki kicweka, twaza kushwijuma enshonga ahabw’enki tushemerire kwega obuhanuzi bw’omuri Bibuli n’oku turi kubasa kubweyegesa. Bwanyima nitwija kureba oku kushoborocerwa obuhanuzi bubiri oburi omu kitabo ca Daniyeli biri kutukwasa omuri obu bwire.

3. Ni enki eki tushemerire kukora twaba turi kwenda kushoborocerwa obuhanuzi bw’omuri Bibuli?

³ Tushemerire kushaba obuyambi twaba turi kwenda kushoborocerwa obuhanuzi bw’omuri Bibuli. Reka tukwate ecokureberaho. Tecereza ogire kutayayira ahantu ahu otari kumanya, konka ori hamwe na munywani wawe omanyirire ako kacweka. Namanya ahu mwahika kandi n’otuhanda twona oturimu namanya ahu turi kutora. Hatariho okubanganisa, noyija kushemererwa ahabw’okuba ogo munywani wawe yayikiriza ngu mugendane! Omu buryo nk’obwe, Yehova namanya obwire obu turimu n’ebirije kutuhikaho omu biro by’omu misho. Obwe rero kugira ngu tushoborocerwe obuhanuzi bw’omu Bibuli, tushemerire kushaba Yehova obuyambi.​—Dan 2:28; 2 Pet 1:19, 20.

4. Ahabw’enki Yehova yahandikisize obuhanuzi omu Kigambo ceye? (Yeremiya 29:11) (Nambwenu reba ekishushani.)

⁴ Kimwe n’omuzire murungi, Yehova na we nayenda ngu abana  beye bashemererwe omu biro by’omu misho. (Shoma omuri Yeremiya 29:11.) Konka we natana n’abazire b’abantu, ahakuba nabasa kugamba ebintu ebiribaho omu biro by’omu misho kandi biba nk’oku yabigambire. Ni yo nshonga yahandikisize obuhanuzi omuri Bibuli, kugira ngu tumanye ebintu ebiri kwenda kubaho. (Isa 46:10) Obwe rero obuhanuzi oburi omuri Bibuli ni ekiconco ekiri kuruga omu iguru. Konka shi ni enki ekiri kubasa kukuhamiza ku ebi Bibuli eri kugamba birije kuhikirira?

5. Ni bata oku abacari bato bari kubasa kwegera aha cokureberaho ca Max?

⁵ Aha mashomero, abacari bato bitu nibaba betorwirwe n’abantu abari kumanya ebintu bice ninga abatine eki bari kumanya ahari Bibuli. Ebitecerezo byabo n’emicwe yabo, nibibasa kutuma abacari bato b’Abahamya babanganisa ahari Bibuli. Reba ebyahikire ahari mwenetata ori kwetwa Max. Akagamba ati: “Obu nabire ncari omu myaka y’obunyeto nkatandika kubanganisa aha bi abazire bange babire bari kunyegesa aha bikwatirine n’edini y’amazima kandi natandika kubanganisa yaba Ruhanga ari we owahandikisize Bibuli.” Ni enki eki abazire beye bakozire? Akagamba ati: “Bakagumizamu kutuza n’obu ebi nabire ndi kugamba byabire biri kutuma bayemereza omutima.” Abazire ba Max bakagarukamu ebibuzo ebi yabire ari kwebuza bakoresize Bibuli. Konka na Max hine eki yakozire. Akagamba ati: “Nkeyegesa obuhanuzi bw’omuri Bibuli kandi nabuganiraho n’ab’orwingano rwange.” Ni enki ecarugiremu? Max akagamba ati: “Bwanyima nkikiriza ntari kubanganisa ku Bibuli yahandikisibwe na Ruhanga!”

6. Ni enki eki oshemerire kukora wahurira watandika kubanganisa kandi ahabw’enki?

⁶ Kimwe na Max, wahurira watandika kubanganisa aha mazima g’omuri Bibuli, otacweka entege. Konka hine eki oshemerire kukora. Okubanganisa ni nk’omucerenyo ninga omugesi. Wakwehuza, mporampora nikubasa kushisha ebintu by’omugasho. Kugira ngu oyeyihemu okubanganisa okuri kubasa kushisha okwikiriza kwawe, oshemerire kwebuza ngu: ‘Mbehi ninyikiriza ebi Bibuli eri kugamba aha biro by’omu misho?’ Yaba otari kubyikiriza, noba oshemerire kweyegesa aha buhanuzi bw’omuri Bibuli namunonga obwahikirire. Eco nobasa kukikora ota?

7. Ni kiha cokureberaho eki Daniyeli yatuterireho aha bikwatirine n’okweyegesa obuhanuzi bw’omuri Bibuli? (Daniyeli 12:10) (Nambwenu reba ekishushani.)

⁷ Daniyeli akatuteraho ecokureberaho kirungi aha bikwatirine n’oku turi kubasa kweyegesa obuhanuzi. Akaba nayeyegesa obuhanuzi ayine entego ndungi y’okumanya amazima. Nambwenu Daniyeli akaba ari omucurezi, kandi akaba ari kumanya ku Yehova yabire arije kumukwasa kushoborocerwa obuhanuzi yagumizamu kuba omwesigwa kandi akamworobera. (Dan 2:27, 28; shoma omuri Daniyeli 12:10.) Daniyeli akereka ku ari omucurezi ari kwesiga Yehova kugira ngu amukwase. (Dan 2:18) Daniyeli akaba nayeyegesa ayetonzire. Akacondoza aha Byahandikirwe ebyabire biriho omu bwire bweye. (Yer 25:11, 12; Dan 9:2) Ni bata oku ori kubasa kutoreza Daniyeli?

8. Ahabw’enki abamwe bari kwanga kwikiriza ku obuhanuzi bw’omuri Bibuli burije kuhikirira, konka shi ni enki eki itwe tushemerire kukora?

⁸ Shwijuma enshonga eziri kutuma wayega  obuhanuzi bw’omuri Bibuli. Mbehi noyeyegesa obuhanuzi bw’omuri Bibuli oyine entego y’okumanya amazima? Yaba ni ko kiri, Yehova nayija kukukwasa. (Yoh 4:23, 24; 14:16, 17) Ni ziha zindi ntego eziri kubasa kutuma omuntu yayega obuhanuzi bw’omu Bibuli? Abamwe nibabasa kweyegesa obuhanuzi bari kwenda ngu bahakanise ku Bibuli yahandikisibwe na Ruhanga. Nibaba bari kwenda ngu bashanga etarahandikisibwe na Ruhanga kirije kutuma baguma kukora ebi bari kwenda. Konka tushemerire kweyegesa twine entego ndungi. Obwe rero, hariho omutwarize ogu turi kwetenga kugira ngu tubase kushoborocerwa obuhanuzi bw’omuri Bibuli.

9. Ni guha mutwarize ogu turi kwetenga kugira ngu tushoborocerwe obuhanuzi bw’omuri Bibuli? Shoborora.

⁹ Ba omucurezi. Yehova naraganisa ku ari kukwasa abacurezi. (Yak 4:6) Obwe rero tushemerire kumushaba kutukwasa kushoborocerwa obuhanuzi bw’omuri Bibuli. Yaba turi abacurezi, nitwija n’okwikiriza obuhabuzi obu turi kuhebwa n’Omwambari w’omwesigwa kandi w’omunyabwenge ahakuba ni we owu Yehova ari kukoresa omu kutuha ebyokurya by’omwika omu bwire obuhikire. (Luk 12:42) Yehova ni Ruhanga w’entebekanisa, obwe rero kihikire kwikiriza ku ari kukoresa oburyo bumwe omu kutukwasa kushoborocerwa amazima agari omu Kigambo ceye.​—1 Kor 14:33; Efe 4:4-6.

10. Ni enki eki turi kwegera aha cokureberaho ca Esther?

¹⁰ Guma ocondoze. Guma oyeyegese aha buhanuzi obu ori kukunda kandi obucondozeho. Eco ni co eki munyanyazi ori kwetwa Esther yakozire. Akaba ari kukunda obuhanuzi oburi kugamba aha kwija kwa Mesiya. Akagamba ati: “Obu nabire nyine emyaka 15, nkatandika kucondoza kugira ngu mbone ebihamya ebiri kwereka ku obwo buhanuzi bwahandikirwe mbere ya Yesu.” Ebi yayeyegesize aha bikwatirine n’emizingo eyataburwirwe omu matongo bikamuha ebyo bihamya. Akagamba ati: “Bimwe omuri ebyo bihandiko bikahandikwa mbere ya Yesu, obwe rero obwo buhanuzi nibwereka ku ebirimu byarugire ahari Ruhanga.” Esther akongeraho ati: “Bikanshaba kubishoma emirundi myingi kugira ngu mbase kubishoborocerwa.” Konka ayine okushemererwa ahabw’amani agu yatireho. Bwanyima y’okweyegesa aha buhanuzi bw’omuri Bibuli bwingi obutari kushushana, akagamba ati: “Nkabasa kwerebera ku ebi Bibuli eri kugamba biri amazima!”

11. Ni bata oku turi kugasirwa twayerondera ebihamya ebiri kwereka ku ebi Bibuli eri kugamba biri amazima?

¹¹ Ku turi kwerebera oku obuhanuzi bw’omu Kigambo ca Ruhanga bwahikirire, nitukizaho kwesiga Yehova kandi twikiriza ngu atuhabure omuri byona. Nambwenu obuhanuzi bw’omuri Bibuli nibutukwasa kuhamya amasiko gitu g’omu biro by’omu misho, n’obu twakuba twine ebizibu byingi omuri obu bwire. Reka tushwijume obuhanuzi bubiri oburi omu kitabo ca Daniyeli oburi kuhikirira omuri obu bwire. Okubushoborocerwa nibyija kutukwasa kukora ensharamu ndungi.

12. Ebigere ‘by’ecoma ekijwangire n’ibumba nibimanyisa ki?’ (Daniyeli 2:41-43)

¹² Shoma omuri Daniyeli 2:41-43. Omu kiroto eki Daniyeli yashobororire omugabe Nebukadineza, ebigeri by’ekishushani eki omugabe yarebire bikaba bikozirwe omu ‘coma ekijwangire  n’ibumba.’ Ku turi kugereranisa obuhanuzi buri omu kitabo Daniyeli n’ec’Okushururwa, nituhamya ku ebigeri biri kugereranisa obutegeki bwa Nyinensi bwa Bungereza na Amerika, oburi kutegeka ensi omuri obu bwire. Aha bikwatirine n’obwo butegeki bwa Nyinensi, Daniyeli akagamba ku ‘obwo bugabe ekicweka cabwo kiriba kigumire ekindi kiri kwatwa busha.’ Ahabw’enki ekicweka kimwe cabire kirabe kiri kwatwa busha? N’ahabw’okuba abantu ba rubanda abari kugeranisa n’ibumba nibakora ebintu ebiri kutuma batagira amani nk’ag’ecoma. b

13. Ni gaha mazima g’omugasho agu turi kumanya ku turi kushoborocerwa obu buhanuzi?

¹³ Nitumanya amazima g’omugasho munonga ku turi kushoborocerwa ebi Daniyeli yashoborwire aha bigere by’ekishushani. Ecokubanza, obutegeki bwa Nyinensi bwa Bungereza na Amerika bukereka ku bwine amani omu buryo bwingi. Ecokureberaho: Bukereka ku bwine amani buri kusinga orutaro rw’okubanza n’orwa kabiri z’ensi yona. Konka, obwo butegeki bukereka ku buri kugenda nibucweka entege kandi ebyo nibirebecera aha ku buri kugirana ebizibu n’abaturage babwo. Ecakabiri, obu butegeki ni bwo oburitegeka ensi kuhisa aha muheru, obu Obukama bwa Ruhanga burimaraho obutegeki bwona bw’abantu. N’obu hariho amahanga agari kubasa kwereka ku gine amani kukira obutegeki bwa Nyinensi bwa Bungereza na Amerika, tihine ihanga eririje kubusimbura. Eco nitukimanya, ahabw’okuba ‘ibare’ ni okugamba Obukama bwa Ruhanga niryija kwata ebigere, ni okugamba obutegeki bwa Bungereza na Amerika.​—Dan 2:34, 35, 44, 45.

14. Ni bata oku kushoborocerwa obuhanuzi oburi kugamba aha bigeri by’ecoma ekijwangire n’ibumba biri kutuwasa kukora esharamu ndungi?

¹⁴ Mbehi noyikiriza otari kubanganisa ku obuhanuzi bwa Daniyeli oburi kugamba aha bigeri by’ecoma n’ibumba buri amazima? Caba ni ko kiri, nikija kugira eki cahindura aha magara gawe. Torije kurondera oburinzi omuri butungi bw’omuri egi nsi eri hihi kucwerezibwa. (Luk 12:16-21; 1 Yoh 2:15-17) Nambwenu okushoborocerwa obwo buhanuzi nibyija kukukwasa kufa aha bintu by’omugasho, ni okugamba omurimo g’okuburira n’okwegesa. (Mat 6:33; 28:18-20) Mbehi wamara kweyegesa ahari obwo buhanuzi, tori kubasa kwebuza ngu: ‘Mehi ensharamu zange nizereka ku ndi kwikiriza ntari kubanganisa ku Obukama bwa Ruhanga burije kucwecereza obutegeki bwona bw’abantu?’

15. Ni oha mugabe w’‘omu matemba’ n’‘ow’omu mashuma’ omuri obu bwire? (Daniyeli 11:40)

¹⁵ Shoma omuri Daniyeli 11:40. Omuri Daniyeli ekicweka ca 11 nihagambwamu abagabe babiri ninga obutegeki bubiri oburi kutura niburwana kugira ngu hagire owasingura ondijo. Ku turi kugereranisa obwo buhanuzi n’obundi oburi omuri Bibuli, nikituma twamanya ku omugabe w’omu matemba ari Burusiya n’amahanga agari kuyishagika kandi ku omugabe w’omu mashuma ari obutegeki bwa nyinensi bwa Bungereza na Amerika. c

16. Ni biha bizibu ebi abatwire omu butegeki bw’‘omugabe w’omu matemba’ bari kubugana?

¹⁶ Abahereza ba Ruhanga abatwire omu ihanga ry’omugabe w’omu matemba, nibahiganisibwa n’ogo mugabe. Abahamya bamwe nibaterwa enkoni kandi batebwa omu bihome ahabw’okwikiriza kwabo. Konka okutinatinisibwa n’omugabe w’omu matemba tibiri kucwa entege abo benetata ahobwe nibigumya okwikiriza kwabo. Ahabw’enki? Ni ahabw’okuba abo benetata bari kumanya ku okuhiganisa abahereza ba Ruhanga  biri kuhikiriza obuhanuzi bw’omuri Daniyeli. d (Dan 11:41) Okumanya eco nibibasa kutuma twagira amasiko gahamire kandi tugumizamu kuba abesigwa.

17. Ni biha bizibu ebi abahereza ba Ruhanga abatwire omu ihanga ry’omugabe w’omu mashuma bari kubugana?

¹⁷ Omu bwire bwa kare, ‘omugabe w’omu mashuma’ akaba nahiganisa abahereza ba Yehova omu buryo oburi kurebeka. Omu ntandikiro z’ekinyingana ca 20 benetata bingi bakatebwa omu bihome ahabw’okuba babire batari kugwera orubaju, kandi abana bamwe b’Abahamya na bo bakabingwa ah’ishomero ahabw’eyo nshonga. Konka omu myaka ya juba aha abahereza ba Yehova abatwire omuri eryo hanga, bakagezibwa omu bundi buryo. Ecokureberaho: Omu bwire bw’amatora, Abakristo nibabasa kuhurira babugana ekizibu c’okushabwa kushagika ekibina c’eby’obutegeki ninga omuntu ori kweyamamaza. Omukristo nabasa kutaza kutora, konka omu mutima gweye agira orubaju oru yagweraho. Mazima, ni ecomugasho munonga kugumizamu  kwerinda kugwera orubaju omu by’obutegeki, omu bikorwa byitu, omu bitecerezo byitu n’enyehurira zitu.​—Yoh 15:18, 19; 18:36.

18. Ni bata oku turi kubasa kwehurira twareba okutikirizingana okuri ahagati y’omugabe w’omu matemba n’abari kumushagika? (Nambwenu reba ekishushani.)

¹⁸ Abantu abatari kwikiriza obuhanuzi bw’omuri Bibuli ku bari kureba okutikirizingana okuri ahagari y’‘omugabe w’omu mashuma’ n’‘omugabe w’omu matemba’ nibemereza omutima (Dan 11:40.) Abo bagabe bombi, bine ebisasu ebiri kubasa kucwecereza ensi yona. Konka nitumanya ku Yehova atarije kwikiriza ngu eco kibeho. (Isa 45:18) Obwe rero, omu mwanya g’okwemereza omutima ahabw’okutikirizingana okuri ahagati y’‘omugabe w’omu matemba’ n’‘omugabe w’omu mashuma,’ tushemerire kugumya okwikiriza kwitu. Eco nikihamya ku twahika aha muheru gw’egi nsi mbi.

19. Ni enki eki tushemerire kumanya aha bikwatirine n’obuhanuzi bw’omuri Bibuli?

¹⁹ Tituri kumanya oku bumwe omu buhanuzi bw’omuri Bibuli burije kuhikirira. Nangwa n’omuhanuzi Daniyeli akaba atari kubasa kushoborocerwa ebintu byona ebi yahandikire. (Dan 12:8, 9) Konka okuba tutari kumanya oku obuhanuzi burije kuhikirira tikiri kumanyisa ngu tiburije kuhikirira. Hatariho okubanganisa, nitwesiga tutari kubanganisa ku Yehova arije kutushururira ebi tushemerire kumanya, omu bwire obuhikire nk’oku yagenzire ari kukikora kwiha omu bwire bwa kare.​—Amos 3:7.

20. Ni buha buhanuzi bw’omuri Bibuli oburije kuhikirira juba aha kandi shi ni enki eki tushemerire kugumizamu kukora?

²⁰ Nihija kubaho okutangaza ku ‘hariho obusinge n’oburinzi.’ (1 Tes 5:3) Bwanyima ni bwo obutegeki bw’omu nsi burirwanisa amadini g’ebishuba kandi bukagacwecereza. (Kush 17:16, 17) Nibija kukuratizaho kurwanisa abahereza ba Ruhanga. (Ezek 38:18, 19) Ebyo bintu ni byo ebirije kutuma habaho orutaro rwa Haramagedoni. (Kush 16:14, 16) Nitubasa kwesiga tutari kubanganisa ku ebyo bintu biri hihi kuhikirira. Konka ebyo bintu bitakabireho, nimureke tugumizemu kwereka Tata w’omu iguru ku nitumusima turi kwetondera obuhanuzi bw’omuri Bibuli kandi turi kukwasa n’abandi kumumanya.