EKICWEKA C’OKWEGA 9
Toreza Yesu ori kukwasa abandi
“Okugaba nikuhisa omugisha okukira okuhebwa”—BYAK 20:35.
ECESHONGORO CA 17 “Niinyenda”
EMPINYE *
1. Ni guha mwika murungi ogu turi kureba omu bahereza ba Yehova?
BIBULI ekaba yahanwire ku abantu ba Ruhanga babire barije kwehayo bekundire omu murimo gwa Yehova bebembirwe n’Omwana weye. (Zab 110:3) Obwo buhanuzi burimu kuhikirira omuri obu bwire. Buri mwaka, abahereza ba Yehova nibamara amashaha mingi bari kukora omurimo g’okuburira. Eco nibakikora bari kwehayo kandi ahabwa busha. Nambwenu nibakwata obwire bwabo bakwasa Abakristo bagenzi babo omu by’omubiri, eby’enyehurira n’eby’omwika. Abazehe n’abahereza b’ekibina nibamara amashaha mingi bari kutebekanisa enterane kandi bari kufa aha Bakristo bagenzi babo. Ni enki ekiri kubahiga kukora ebyo byona? Ni rukundo eyi bari kukunda Yehova n’abatahi.—Mat 22:37-39.
2. Nk’oku biri kugambwa omu Baroma 15:1-3, ni kiha cokureberaho eki Yesu yatuterireho?
2 Yesu akatuteraho ecokureberaho kirungi aha kuta eby’abandi omu mwanya g’okubanza. Nitukora cona eki turi kubasa kugira ngu tumutoreze. (Shoma omu Baroma 15:1-3.) Abari kumutoreza nibatunga emigisha myingi. Yesu akagamba ati: ‘Okugaba kuhisa omugisha okukira okuhebwa.’—Byak 20:35.
3. Ni enki eki twaza kushwijuma omuri eki kicweka?
3 Omuri eki kicweka, twaza kureba ebintu ebi Yesu yabire nakora kugira ngu ahereze abandi kandi tushwijume n’oku turi kubasa kumutoreza. Nambwenu twaza kureba ebi turi kubasa kukora kugira ngu tukizeho kugira ecetengo c’okukwasa abandi.
TOREZA ECOKUREBERAHO CA YESU
N’obu Yesu yabire aruhire, ni enki eki yakozire abantu bingi ku bamushangire ahu yabire ari? (Reba paragurafu ya 4)
4. Ni bata oku Yesu yayerekire ku nata ebi abandi bari kwenda omu mwanya g’okubanza?
4 Yesu akaba nayehayo n’obu yabire ari kuba aruhire. Tekateka oku Yesu yayehurire obu abantu bingi bamubugine aha rushozi hihi ya Kaperenawumu. Yesu akaba yamazire ekiro cona ari kushaba. Ashemerire kuba yabire aruhire, konka ku yarebire omutwe gw’abantu bingi yareba harimu abacene n’abarwire, yabagirira esaasi. Akabakiza kandi yabaha toku eyabagarwiremu amani, ni okugamba toku y’aha rushozi.—Luk 6:12-20.
Ni bata oku turi kubasa kutoreza ecokureberaho ca Yesu c’okukwasa abandi? (Reba paragurafu ya 5)
5. Ni bata oku abebembezi b’eka bari kubasa kutoreza ecokureberaho ca Yesu c’okweferereza n’obu bakuba baruhire?
5 Oku abebembezi b’amaka bari kubasa kutoreza Yesu. Tekateka ahari eki: Reka tugire ngu omushija yasiba aha murimo, rero yataha aruhire munonga. Nabasa kuhurira ari kubasa kureka okuramya kw’eka okwaba kuri kwenda kubaho omuri ogo mwebazo, konka yashaba Yehova ngu amuhe amani g’okukwebembera. Yehova yagarukamu eshara yeye, rero bagira okuramya kw’eka nka burijo. Omuri ogo mwebazo, abana bayega ku bashemerire kuta eby’omwika omu mwanya g’okubanza kukira ekindi kintu cona.
6. Gamba ecokureberaho ekiri kwereka ku Yesu yabire nakoresa obwire bweye omu kukwasa abandi.
6 Yesu akaba ari efura omu kukoresa obwire bweye. Tekateka oku Yesu yayehurire ku yahurire ngu munywani weye Yohana omubatizi ayisirwe? Nikibasa kuba camushashire munonga. Bibuli negamba ngu: ‘Yesu ku [yahurire ngu Yohana afire], yarugayo, yegendera omu bwato, yaza omu butayo kweherera.’ (Mat 14:10-13) Ebyo nibituma twayehuriza enshonga eyatumire Yesu yayenda kuba ari wenka. Abingi omuri itwe nituba turi kwenda ngu tube turi twenka twaba turi kuganya. Konka Yesu we ti ko oku yabire ari. Omutwe gw’abantu bingi gukamushanga ahu yabire ari. Akatwaza ata? Akatekateka aha bi abo bantu babire bari kwetenga kandi ‘yabagirira esaasi.’ Akaba nareba ku nibetenga ow’okubahumuriza kandi akahika ari kubaha ebi babire bari kwetenga. ‘Akatandika kubegesa ebintu byingi.’—Mak 6:31-34; Luk 9:10, 11.
7-8. Gamba ecokureberaho ekiri kwereka oku abazehe bari kutoreza Yesu bari kuta eby’abandi omu mwanya g’okubanza.
7 Oku abazehe bari kubasa kutoreza Yesu. Mazima nitusima abazehe aha bwa amani agu bari kutaho ngu beheyo aha bwitu! Emirimo myingi eyi bari kukora ab’omu kibina tibari kugireba. Ecokureberaho: Hagira Omukristo mugenzi witu owarwara, benetata abari kukora omuri Komiti eri kukwasa abarwire nibahika bari kumuyamba. Obwire obwingi ezo mbera nizibaho buri nyekiro! Ahabw’okugirira esaasi benetata na banyanyazi ababugana oburwire, abo bazehe n’ab’omu maka gabo nibata eby’Abakristo bagenzi babo bari kwetenga omu mwanya g’okubanza.
8 Nambwenu abazehe nibehayo omu kombeka Amaju g’Obukama n’omu kuyamba abahikirweho ebihikirizi. Kandi nitumanya ku bari kumara amashaha mingi bari kutwegesa, bari kutugumya kandi bari kutukwasa omu bi turi kwetenga. Mazima tushemerire kusima abo benetata bona n’ab’omu maka gabo. Nitushaba ngu Yehova ahe emigisha byona ebi bari kukora! Konka abazehe na bo bashemerire kuringaniza. Tibashemerire kumara obwire bwingi omu mirimo y’ekitongore ngu bebwe ab’omu maka gabo.
OKU TURI KUBASA KUKIZAHO KUGIRA OMUTWARIZE G’OKWEHAYO
9. Tukuratize ebiri omu Bafilipi 2:4, 5, ni guha mutwarize ogu buri Mukristo ashemerire kugira?
9 Shoma omu Bafilipi 2:4, 5. Twena tituri abazehe konka twena nitubasa kutoreza Yesu turi kuta eby’abandi omu mwanya g’okubanza. Bibuli negamba ngu, ‘akahinduka nk’omugaragwa.’ (Fil 2:7) Tekateka aha ki ebyo bigambo biri kumanyisa. Omugaragwa ninga shi omukozi murungi nakora cona eki ari kubasa ngu ashemeze mukama weye. Obwe rero, obu ori omugaragwa wa Yehova kandi ori omuhereza w’Abakristo bagenzi bawe, nohurira ori kwenda kukizaho kubashemeza. Eco nobasa kukikora ori kukora ebi bintu ebiri kukurataho.
10. Ni biha bibuzo ebi tushemerire kwebuza?
10 Guma oyeshwijume. Yebuze ebi bibuzo: ‘Mbehi nimba nyetegwire kugira ebi nayeferereza ngu nkwase abandi? Ecokureberaho: Mbehi nintwaza nta banshaba kutayayira mwenetata okuzire ninga shi kutwara omunyanyazi okuzire omu nterane? Mbehi nimba nyetegwire kuyamba omu kuboneza aha nju y’ebiterane ninga shi omu Nju y’Obukama?’ Yehova nashemererwa twakoresa obwire bwitu n’ebi twine turi kukwasa abandi. Mbwenu shi ni enki eki tushemerire kukora twareba hine eki tushemerire kuhindura?
11. Ni bata oku eshara eri kubasa kutukwasa kukizaho kugira ecetengo c’okukwasa abandi?
11 Shaba Yehova obyihire aha mutima. Reka tugire ngu noyenda kukora empinduka, konka nohurira otine amani g’okuzikora. Caba niko kiri, bigambire Yehova omu shara. Mugambire byona otari kumushereka. Mugambire oku ori kwehurira kandi omushabe ngu akuhe ‘ecetengo n’amani g’okukora’ ebi ari kukunda.—Fil 2:13.
12. Ni kiha cetengo eki mwenetata ocari muto owabatizibwe ari kubasa kugira?
12 Waba ori mwenetata owabatizibwe, shaba Yehova ngu akukwase kugira ecetengo c’okukora byingi omu kibina. Omu mahanga agamwe noshanga abazehe bari bingi kukira abahereza kandi abo bahereza noshanga bakuzire. Ahakuba ekitongore kiri kweyongera, nitwetenga benetata bingi abacari bato kugira ngu bakwase abazehe omu kufa aha bahereza ba Yehova. Ku orabe oyetegwire kuza kuyamba ahari kwetenga obuyambi, noza kutunga okushemererwa. Ahabw’enki? Ni ahabw’okuba noyija kushemeza Yehova, ogire izina rirungi kandi omarwe ahabw’okukwasa abandi.
Abakristo b’omuri Buyudaya bari kuhunga bari kwambuka omugera gwa Yorudani bari kuza omu tawuni ya Pela. Abahikireyo mbere bari kuha Abakristo bagenzi babo ebyokurya (Reba paragurafu ya 13)
13-14. Ni biha bintu ebi turi kubasa kukora kugira ngu tukwase benetata na banyanyazi? (Reba ekishushani c’aha kishembeso.)
13 Guma ofe aha bi abandi bari kwetenga. Entumwa Pawulo akagambira Abaheburayo ngu: “Mutarireka kukorera abantu ebirungi n’okukwatanisa omu bi mwine, ahakuba ebitambo nk’ebyo ni byo ebishemeza Ruhanga.” (Heb 13:16) Obwo buhabuzi buzima buhikire! Abakristo b’omuri Buyudaya ku bamazire obwire buce babwine eyo baruha, bakasigaho amaka gabo, obushubuzi bwabo n’abanyabuzare babo ababire batari Abakristo, ‘bahungira aha nshozi.’ (Mat 24:16) Hatariho okubanganisa, bakaba betegwire kuyambayambana. Kuri mbere y’ebyo babire bamanyirire korobera obuhabuzi bwa Pawulo bw’okuyambayambana omu bi bine, kikaba kirije kuborobera kumanyira embera nsya eyi babire bazamu.
14 Hine obu benetata na banyanyazi batari kutugambira ebi bari kwetenga. Ecokureberaho: Reka tugire ngu mwenetata yafisa omukazi weye. Mbwenu shi ogo mwenetata tari kuba neyetenga obuyambi nk’okumutecera, kumuvuga, n’okumuyamba omu mirimo y’omu ka? Nabasa kutina kutushaba obuyambi ngu ataturusya. Konka nabasa kushemererwa twabumuha atakabutushabire. Titushemerire kutekateka ngu abandi nibija kumuha ebi ari kwetenga ninga shi ngu burijo nayija kubitushaba rero tubone kubimuha. Yebuze ngu, ‘kuri yaba ari inye, ni buha buyambi obu naba ndayetenge?’
15. Ni enki eki tushemerire kukora twaba turi kwenda kukwasa abandi?
15 Guma obe omuntu owu abandi bari kwehisya. Nobasa kuba ori kumanya benetata na banyanyazi b’omu kibina cawe abari kuba betegwire kukwasa abandi. Tihine eki bari kukora ngu kitume twahurira ku turi kubarusya. Nitumanya ku burijo bari kuba betegwire kutukwasa kandi nitwenda kubatoreza! Omuzehe w’ekibina ori kwetwa Alan oyine emyaka 45, nayenda kuba omuntu owu abandi bari kwehisya. Alan akatekateka aha cokureberaho ca Yesu, rero yagamba ati: “Yesu akaba ayine byingi by’okukora, konka abantu b’emyaka etari kushushana bakaba nibamwehisya, bamushaba obuyambi. Bakaba nibareba ku nabafaho. Nanye ninyenda kutoreza Yesu, manywe nk’omuntu owu abandi bari kwehisya kandi ori kubafaho.”
16. Ni bata oku kuta omu nkora ebiri omuri Zaburi ya 119:59, 60 kiri kutukwasa kutoreza ecokureberaho ca Yesu?
16 Titushemerire kuhwa amani twaremwa kutoreza Yesu omu bwijwire. (Yak 3:2) Omwegi tari kubasa kutoreza omwegesa weye omu bwijwire. Konka omwegi ku ari kubasa kwegera aha nshobe zeye kandi akagezaho kutoreza omwegesa weye nk’oku ari kubasa, naguma ari kutunguka. Ni co kimwe, twaguma kuta omu nkora ebi turi kwega omu kweyegesa Bibuli, kandi tukatereza enshobe ezi turi kuba tukozire, nitutoreza ecokureberaho eki Yesu yatusigire.—Shoma omuri Zaburi ya 119:59, 60.
EMIGISHA EYI TURI KUTUNGA AHABW’OKUKWASA ABANDI
Abazehe ku bari kutoreza ecokureberaho ca Yesu c’okukwasa abandi, nibateraho abacari bato ecokureberaho kirungi (Reba paragurafu ya 17) *
17-18. Nitwija kugasirwa tuta twatoreza oburyo obu Yesu yabire nakwasamu abantu?
17 Ku turi kukwasa abandi, na bo nibatutoreza. Omuzehe w’ekibina ori kwetwa Tim akagamba ati: “Twine benetata bingi abatungukire bakaba abahereza b’ekibina. Abamwe bacari bato, konka bakatoreza ecokureberaho c’abandi abari kweferereza. Amani agu bari kutaho nigakwasa ekibina kandi gatuma bashagika abazehe.”
18 Tutwire omu nsi eyijwiremu abantu abari kwekunda. Konka abahereza ba Yehova bo ti ko bari kutwaza. Oburyo obu Yesu yabire nayerekamu rukundo etarimu okwekunda bukatuhika aha mutima kandi tukamaririra kumutoreza. Tituri kubasa kumutoreza omu bwijwire, konka nitubasa kutora omuhanda ogu yarabiremu (1 Pet 2:21) Ku turatemu amani ngu tutoreze Yesu, nitwija kutunga okushemererwa okuri kuruga omu kumanya ku Yesu ari kutwikiriza.
ECESHONGORO CA 13 Kristo Niwe Twine Kutooreza
^ par. 5 Burijo Yesu akaba nata eby’abandi omu mwanya g’okubanza. Omuri eki kicweka, twaza kushwijuma oburyo obu turi kubasa kutorezamu ecokureberaho ceye. Nambwenu, nitwija kureba oku twatoreza okweferereza kwa Yesu turije kutunga emigisha ey’ebiro byona.
^ par. 57 EKISHUSHANI: Mwenetata ocari muto ori kwetwa Dan ari kwetegereza abazehe babiri abatayayira ishe ori omu irwariro. Ecokureberaho eki abazehe bateraho Dan camuhika aha mutima. Camuhiga kuronda oburyo bw’okukwasamu abandi omu kibina. Ondijo mwenetata ocari muto ori kwetwa Ben yayetegereza oku Dan ari kufa aha b’omu kibina. Ecokureberaho ca Dan cahiga Ben kuyamba omu kuboneza Enju y’Obukama.
