1. Ni biha birungi ebi abacari bato bamazire kuhikaho?

 BURI mwaka, Abakristo abacari bato abari kubarirwa omu nkumi nibabatizibwa. Mbehi okatera eyo ntambwe? Caba ni ko kiri, benetata na banyanyazi nibakushemerererwa kandi na Yehova ni ko okwe! (Emi 27:11) Tecereza kace aha bi wamazire kuhikaho. Okega Bibuli oyetonzire, nangwa wamara emyaka myingi ori kugega. Ebi wayegire bikakuhamiza ku Bibuli eri Ekigambo ca Ruhanga. Konka ekiri kukira eco, okamanya Omuhandiki w’eco kitabo ekiri kwera, kandi wamukunda. Rukundo eyi ori kukunda Yehova ekeyongera, catuma wamweha kandi wabatizibwa. Mazima eco nikishemeza munonga!

2. Ni enki eki twaza kushwijuma omuri eki kicweka?

 ² Hatariho okubanganisa okwikiriza kwawe kukagezibwa omu buryo obutari bumwe omu bwire obu wabire ori kutunguka kuhika aha kubatizibwa. Konka oku orikizaho kukura, noyija kubugana ebindi bigezo. Sitane nayija kugezaho kushisha rukundo eyi ori kukunda Yehova kandi agezeho kukuremesa kumukorera. (Efe 4:14) Otayikiriza ngu eco kibeho. Ni enki ekiri kubasa kukukwasa kuguma ohamire ahari Yehova kandi ori kuhikiriza ebi wamuraganisize ori kumweha? Oshemerire kugumizamu kukura omu by’omwika. (Heb 6:1) Konka shi, ni bata oku ori kubasa kukikora?

3. Ni eha ntunguka eyi Omukristo ashemerire kukora bwanyima y’okubatizibwa?

³ Bwanyima y’okubatizibwa, twena tushemerire korobera obuhabuzi obu entumwa Pawulo yahire Abakristo bagenzi  beye b’omuri Efeso. Akabahiga ngu babe Abakristo abakuzire omu by’omwika. (Efe 4:13) Obwo ni obundi buryo bw’okubagambira ngu bagumizemu kutunguka omu by’omwika. Nitubasa kushoborocerwa eki Pawulo yabire ari kwenda kugamba obu yageranisize okukura omu by’omwika n’okukura k’omwana. Omwana ku ari kuzarwa, nikishemeza abazire beye. Konka tari kuguma ari omwana. Obwire ku buri kugenda nibuhwaho, natandika “kureka eby’obuto.” (1 Kor 13:11) Ni co kimwe n’Abakristo. Bwanyima y’okubatizibwa, tushemerire kugumizamu nitugira entunguka. Reka tushwijume obuhabuzi oburije kutukwasa kubihikaho.

4. Ni guha mutwarize oguri kubasa kukukwasa kukura omu by’omwika? Shoborora. (Abafilipi 1:9)

⁴ Yongera rukundo eyi ori kukunda Yehova. Okamara kukunda Yehova munonga. Konka rukundo eyi ori kumukunda nebasa kweyongera. Bata shi? Entumwa Pawulo akakigambaho omu Bafilipi 1:9. (Hashome.) Pawulo akashabira Abafilipi ngu rukundo yabo egume eyeyongere kukanya. Obwe rero nitubasa kongera rukundo yitu. Nitubasa kukikora turi kongera ‘obumanyi bwitu n’okwetegereza.’ Oku turi kukizaho kumanya Yehova, ni ko turi kukizaho kumukunda n’okusiima oburyo obu ari kukoramu ebintu. Nikituma twayendera kimwe kukora ebiri kumushemeza, tukerinda kukora ekintu cona ekiri kumushasha. Nitutamu amani ngu tumanye ebi ari kwenda n’oku turi kubasa kubikora.

5-6. Nitubasa kukora ki ngu twongere rukundo eyi turi kukunda Yehova? Shoborora.

⁵ Nitubasa kukizaho kukunda Yehova turi kumanya Omwana weye owayerekire emicwe y’Ishe omu bwijwire. (Heb 1:3) Oburyo burungi bw’okumanyamu Yesu ni okwega ebitabo bina by’Engiri. Mbehi yaba otaketerireho entego y’okushoma Bibuli, tori kubasa kugeteraho hati? Yaba ori kushoma enkuru z’ebyahikire ahari Yesu, gezaho kuta omutima aha mitwarize yeye. Akaba ari kwehisya abantu; akereka abana bato rukundo kandi yabaterura. (Mar 10:13-16) Akaba natuma abegi beye batuza, rero bamweshanjuraho, bamugambira ebibari aha mutima. (Mat 16:22) Oko ni ko Yesu yabire natoreza Ishe ow’omu iguru. Yehova na we nayehisya abantu. Nitubasa kumuhika hihi omu kushaba. Twaba turi kumushaba, nitumugambira ebituri aha mutima byona. Nituba twine obwesige ku atarije kutugarura enyima. Natukunda kandi natufaho.​—1 Pet 5:7.

⁶ Yesu akaba nagirira abantu esaasi. Entumwa Matayo akagira ati: “Ku yarebire emitwe y’abantu, yabagirira esaasi, ahakuba bakaba baburaburirwe, bashobirwe nk’entama ezitine murisa.” (Mat 9:36) Kandi shi Yehova we nareba ata abantu? Yesu akagira ati: “Ni ko na Tata ori omu iguru atari kwenda omwe ahari aba abato kucwecerera.” (Mat 18:14) Mazima eco ku nikituhumuriza! Oku turi kukizaho kumanya Yesu, ni ko rukundo eyi turi kukunda Yehova eri kukizaho kweyongera.

7. Ni bata oku kumarana obwire n’Abakristo abakuzire omu by’omwika kiri kubasa kukukwasa?

⁷ Nambwenu nobasa kukizaho kugira rukundo n’okukura omu by’omwika ori kukizaho kugira obunywani na benetata na banyanyazi b’omu kibina cawe. Ogume oyetegereze oku bashemerirwe. Tibari kwefuza ahabw’ensharamu eyi bakozire ey’okukorera Yehova. Ogume obabuze bakugambire ebyababireho omu murimo gwa Yehova. Yaba oyine ensharamu eyi ori kwenda kukora, bashabe obuhabuzi. Kandi ni amazima, Bibuli negamba ku “ahu abahi b’obwenge bari hari kubaho obusinge.”​—Emi 11:14.

8. Ni enki eki ori kubasa kukora waba ori kubanganisa aha bi Bibuli eri kwegesa?

 ⁸ Singura okubanganisa. Nk’oku twakireba omu  paragurafu ya 2, Sitane nayenda kukuremesa kukura omu by’omwika. Oburyo bumwe obu ari kukikoramu, ni okutuma wabanganisa aha nyegesa zimwe z’omuri Bibuli. Ecokureberaho: Eshaha yona noyija kubugana enyegesa eri kujumisa Ruhanga y’obwehindurize. Nobasa kuba wabire otakatecerezaga ahari eyo nyegesa obu wabire ocari muto, konka hati noshanga ari byo muri kwega ah’ishomero. Ebi abegesa bawe bari kukwegesa ah’ishomero ahabwehindurize nibibasa kurebeka nk’ebihikire. Konka nibabasa kuba batakarondaga ebihamya ebiri kwereka ku hariho Omuhangi. Oyijuke amazima g’omu Migani 18:17 ahari kugira hati: “Omu rubanja obanza kutongana oshusha ngu ebye ni byo ebihikire, konka kitabarizibwa ku ayija amwomesereza.” Omu mwanya g’okwikiriza ebintu byona ebi wayega ah’ishomero, ogume oyetonde obanze washwijuma amazima g’omu Kigambo ca Ruhanga, Bibuli. Guma ocondoze omu bitabo byitu. Guma obuze benetata na banyanyazi ababire bari kwikiriza enyegesa y’obwehindurize omu bwire bwa kare. Babuze ecabahamize ku hariho Omuhangi ori kutukunda. Ebiganiro nk’ebyo nibibasa kukukwasa kweshwijumira ebihamya.

9. Ni enki eki wayegera aha byahikire ahari Melissa?

⁹ Omunyanyazi ori kwetwa Melissa akagasirwa n’okucondoza oku yakozire aha bikwatirine n’okuhangwa. b Akagira ngu: “Ah’ishomero, abashomesa nibashoborora eby’obwehindurize omu buryo oburi kubirebecesa nk’eby’amazima. Omu kubanza nkaba ntari kwenda kucondoza. Nkaba nintina ku nacondoza nabire ndije kumanya ku enyegesa y’obwehindurize ehikire. Konka nkamanya ngu Yehova tari kwenda ngu tumukorere nk’empumi. Obwe rero nkatandika kucondoza. Nkashoma ekitabo ekiri kugira ngu Mbehi hariho Omuhangi ori kukufaho? n’akatabo akari kugira ngu Mbehi amagara gakahangwa? na Obukomoko bw’amagara —Ebibuzo bitano ebiri kubuzibwa. Ebi nashomiremu ni byo nabire ncenire. Nangwa shi kuri nabire mbishomire kare.”

10-11. Ni enki ekiri kubasa kukukwasa kuguma ori kwera omu by’emicwe? (1 Abatesalonika 4:3, 4)

 ¹⁰ Yetantare engesho mbi. Omu myaka y’obunyeto, enyehurira z’okukora eby’omubonano niziba ziri nyingi kandi abandi nibabasa kukugema kukora ebikorwa by’obushambani. Sitane nayenda ngu ezo nyehurira zikutegeke. Ni enki ekiri kubasa kukukwasa kuguma ori ori kwera omu by’emicwe? (Shoma omu 1 Batesalonika 4:3, 4.) Omu kushaba kwawe, ogume ogambire Yehova enyehurira zawe. Ogume omugambire oku ori kwehurira kandi omushabe amani. (Mat 6:13) Ogume oyijuke ku Yehova atari kwenda kukucwera orubanja, ahobwe ku ari kwenda kukukwasa. (Zab 103:13, 14) Nambwenu ogume orondere obuyambi omu Kigambo ca Ruhanga. Melissa, owu tugambireho akaba narwana n’ebitecerezo by’obushambani. Akagamba ati: “Okushoma Bibuli burizoba kikankwasa kutacweka entege. Kikaba nikinyijusa ku ndi owa Yehova kandi ku muceniire omu kubaho kwange.”​—Zab 119:9.

¹¹ Otagezaho kwemarira ebizibu wenka. Gambira abazire bawe ebi ori kurabamu. Nikiba kigumire kugambira ondijo muntu ebintu byawe by’amabanga, konka kukikora nikikugasira. Melissa akagamba ati: “Nkashaba Yehova obumanzi, rero nagambira tata ebizibu ebi nabire ndi kurabamu. Ku namazire kubimugambira, nkahurira naruhuka. Nkamanya ku nashemeza Yehova.”

12. Ni enki ekiri kubasa kukukwasa kukora ensharamu ndungi?

¹² Guma oyebemberwe n’emisinge ya Bibuli. Mporampora noyija kugira obugabe bw’okwekorera ensharamu. Konka hariho ebintu byingi ebi otari kumanya. Mbwenu shi ni bata oku ori kubasa kwerinda kukora ensharamu eri kubasa kushisha obunywani bwawe na Yehova? (Emi 22:3) Omunyanyazi ori kwetwa Kari akashoborora ecamukwasize kukora ensharamu ndungi. Akamanya ku Abakristo abakuzire omu by’omwika batari kwetenga ekiragiro c’okubahabura ahari buri kintu cona. Akagira ngu: “Nkaba nshemerire kushoborocerwa emisinge ya Bibuli bitari ebiragiro kusha.” Waba ori kushoma Bibuli, yebuze ngu: ‘Ebi nashoma nibinyegesa ki aha mitekatecere ya Yehova? Mbehi harimu emisinge eri kubasa kunkwasa kuhabura emitwarize yange? Caba kiri kisyoya, ni bata oku ndije kugasirwa nagita omu bikorwa?’ (Zab 19:7; Isa 48:17, 18) Washoma Bibuli kandi okatekateka aha misinge erimu, nikija kukorobera kukora ensharamu eziri kushemeza Yehova. Wagumizamu kukura omu by’omwika, noyija kureba ku otari kwetenga ekiragiro ahari buri kintu, ahakuba oryashoborocerwa oku Yehova ari kubitekatekaho.

13. Ni bata oku abanywani abu ori kutorana bari kukukwataho? (Emigani 13:20)

¹³ Guma otorane abanywani abari kukunda Yehova. Nk’oku twakireba, abanywani abu ori kusharamu nibabasa kukwata aha ku ori kukura omu by’omwika. (Shoma omu Migani 13:20.) Omunyanyazi orikwetwa Sara akabura amashemererwa. Konka hine ecabireho catuma yashuba kushemererwa. Sara akagira ngu: “Nkatunga abanywani barungi omu bwire obu nabire ndi kubetenga. Omunyanyazi ocari muto akaba nayija buri sande rero twegera hamwe Omunara g’Omurinzi. Ondijo munywani wange akankwasa kumanya oku ndi kubasa kutanga ebitekateko omu nterane. Ahabw’obuyambi bw’abanywani bange, nkatandika kweyegesa Bibuli kandi nakizaho kushaba. Nkatandika kugira obunywani buhamire na Yehova kandi nakizaho kushemererwa.”

14. Ni bata oku Julien yagizire abanywani barungi?

 ¹⁴ Ni bata oku ori kubasa kutorana abanywani abari kubasa kukugiraho engaruka ndungi? Omuzehe w’ekibina ori kwetwa Julien, akagamba ati: “Obu nabire ncari muto, nkatorana abanywani barungi ndi kwekwatanisa omu murimo g’okuburira. Abo banywani bakaba nibakora omurimo n’amani kandi bakankwasa kureba okushemererwa okuri omu murimo g’okuburira. Nkatandika kweteraho entego y’okukora omurimo g’obwire bwona. Nambwenu nkareba ku nabire mferirwe abanywani barungi kandi abari kumfaho ahab’okunywana n’abu turi kwingana kusha. Nambwenu nkagira abanywani ahari Beteli. Ecokureberaho cabo kikankwasa kumanya kutorana eby’okweshemeza kandi nakizaho kugira obunywani burungi na Yehova.”

15. Ni kuha kurabura oku Pawulo yahire Timoteyo? (2 Timoteyo 2:20-22)

¹⁵ Mbwenu shi okakora ki obwine omuntu omu kibina otari kubasa kuba omunywani murungi? Pawulo akaba namanya ku Abakristo bamwe b’omu kinyigana c’okubanza babire batakuzire omu by’omwika, obwe rero akarabura Timoteyo ngu aberinde. (Shoma omuri 2 Timoteyo 2:20-22.) Obunywani obu twine na Yehova ni obw’omuhendo. Titushemerire kwikiriza omuntu wena ngu ashishe obwo bunywani obu twakozire n’amani ngu tugire na Tata witu ow’omu iguru.​—Zab 26:4.

16. Ni buha bwoko bw’entego ezi ori kubasa kweteraho?

¹⁶ Yetereho entego ezine omugasho. Yetereho entego ezirije kugumya okwikiriza kwawe kandi zikatuma wajwara omuntu omusya. (Efe 3:16) Ecokureberaho: Nobasa kugira eki wahindura omu ntebekanisa yawe y’okushoma Bibuli n’okugeyegesa. (Zab 1:2, 3) Ninga shi nobasa kugira eki wahindura omu bwire obu ori kumara ori kushaba Yehova ninga shi omu shara zawe. Nobasa n’okukizaho kwekwata omu ku ori kutorana eby’okweshemeza n’omu ku ori kukoresa obwire. (Efe 5:15, 16) Yehova ku ararebe ori kutaho amani ngu otunguke omu by’omwika, nikija kumushemeza.

17. Ni bata oku kukwasa abandi kiri kubasa kukugasira?

 ¹⁷ Wakwasa abandi nikituma watunguka omu by’omwika. Yesu akagira ngu: “Okugaba nikuhisa omugisha okukira okuhebwa.” (Byak 20:35) Ku orakorese obwire bwawe n’amani gawe g’obunyeto ori kukwasa abandi, nikija kukugasira. Ecokureberaho: Nobasa kweteraho entego y’okukwasa abakuzire n’abamugire b’omu kibina canyu. Nobasa kubakwasa hagira ahu bakutuma, ninga shi obakwasa kukoresa ebikoreso byabo by’obwenge. Waba ori mwenetata, nobasa kweteraho entego y’okuba omuhereza w’ekibina kugira ngu okwase beneteta na banyanyazi. (Fil 2:4) Nambwenu noyereka abari aheru y’ekibina rukundo ori kubaburira obutumwa burungi bw’Obukama. (Mat 9:36, 37) Caba kiri kukubasikira, yetereho entego y’okukora omurimo g’obwire bwona.

18. Ni bata oku kukora omurimo g’obwire bwona kiri kubasa kukukwasa kutunguka omu by’omwika?

¹⁸ Omurimo g’obwire bwona nigubasa kukuha oburyo bwingi bw’okutunguka omu by’omwika. Waba omupayoniya, notunga omugisha g’okwega Ishomero ry’ababurizi b’Obukama. Nikibasa kutuma wakora ahari Beteli ninga shi omu kombeka amaju g’Obukama. Omunyanyazi muto w’omupayoniya ori kwetwa Kaitlyn akagamba ati: “Okumara obwire ndi kuburira na benetata na banyanyazi abamanyirire kikankwasa kukura omu by’omwika bwanyima y’okubatizibwa. Ecokureberaho cabo kikatuma nakizaho kumanya byingi omuri Bibuli kandi nakizaho kwegesa ge.”

19. Ni eha migisha eyi orije kutunga ku origumizamu kutunguka omu by’omwika?

¹⁹ Ku oragumizemu kukura omu by’omwika, noyija kutunga emigisha myingi. Nikija kukurinda kushisha obunyeto bwawe ori kwirukanga aha bintu ebitine mugasho. (1 Yoh 2:17) Nikija kukurinda obusaasi bw’okukora ensharamu mbi. Omu mwanya gw’eco, noyija kutunga okumarwa n’okushemererwa. (Emi 16:3) Ecokureberaho cawe kirungi nikija kukwasa Abakristo bagenzi bawe, abato n’abakuru. (1 Tim 4:12) Kandi ekiri kukira byona noyija kugira obusinge n’okumarwa ahabw’okuba ori kushemeza Yehova n’ahabw’okugira obunywani burungi na we.​—Emi 23:15, 16.