A FEN fis ngonuk eú osukosuk nge ese wor emén a álisuk? Sia nóm lón ei “fansoun mi áweires me efeiengaw” mi efisi ach sipwe meefi lichippúng me tipitipingaw pokiten ese wor ién sia tongeni fós ngeni. (2 Tim. 3:1) Iwe nge, atun a wor ach osukosuk a wor chókkewe iir mi tongeni álisikich. Ewe Paipel a menlapei aúchean an epwe wor chiechiach mi tongekich lón “fansoun riaföü.”—SalF. 17:17.

Ewe aposel Paul a kúna álilliséchún an wor chiechian kewe mi fiti lón an sái lón an angangen misineri. (Kol. 4:​7-11) Atun Paul a kalapus lón Rom, chienan kewe ra féri ekkewe angang i ese tongeni pwisin féri. Áwewe chék, Epafrotitus a atoura ngeni Paul ekkewe mettóch ekkewe Chón Kraist lón Filipai ra tiinaato. (Fil. 4:18) Tikikos a atoura néún Paul kewe taropwe ngeni ekkewe mwichefel. (Kol. 4:7) Ren álillisin chienen Paul kewe, a apwénúetá an angangen afalafal pwal mwo nge atun a ares lón imwan we are nóm lón kalapus. Ifa ussun ka tongeni emén chiechi mi enlet lón ei fansoun?

A wor chómmóng pwóróus mi pwáári aúchean ach sipwe emén chiechi mi enlet. Áwewe chék ren pwóróusen emén Chón Kraist fefin mi pwáári pwe i emén chiechi mi enlet ngeni emén regular pioneer lón Spain itan Elisabet. Atun a úri inen Elisabet we kanser, chienach na fefin a tiin ngeni Elisabet chómmóng text seni Paipel mi apéchékkúla. Iei alon Elisabet. “Ekkena text ra apéchékkúlaei ái úpwe féri met mi lamot úpwe féri iteiten rán me silei pwe a wor emén mi ekiekiei, nge úse áláeménúló.”—SalF. 18:24.

Sia tongeni apéchékkúla ach riri ngeni chienach kewe Chón Kraist atun sia álisiir wóón waach lón ewe angangen afalafal are ngeni ekkewe mwiich. Áwewe chék, ka tongeni ereni emén chienach chinnap pwe ka tongeni uwei ngeni mwiich are lón ewe angangen afalafal? Iká ka féri ena, ese mwáál kopwe pwapwaiti ámi apéchékkúlafengenikemi. (Rom 1:12) Iwe nge, ekkóch Chón Kraist ra chék mwenilóng lón imwer kewe. Iwe, ifa ussun sia tongeni emén chiechier mi enlet?

Ekkóch chienach kewe a wor ar semmwen are a wor ekkóch popun rese tongeni fiti mwiich lón ewe leenien mwiich. Áwewe chék ren David, emén mi úri kanser. Ren lap seni wonu maram, a nóm wóón chemotherapy. Lón unusen ena atun, iir me pwúlúwan we itan Lidia, ra fiti mwiich wóón Internet.

 Ifa ussun chón ewe mwichefel ra apéchékkúler? Iteiten sárin mwiich, ekkóch chókkewe mi fiti mwiich lón ewe Leenien Mwiich ra achocho le fós ngeni David me Lidia wóón ewe video. Pwal och, atun David me Lidia ra memmeef, chienach kana ra tiin ngeniir text mwirin mwiich me ereniir pwe ra aúcheani meefier kana. Iwe, met mwirilóón? David me Lidia rese kon chúen meefi pwe ra chék rúúeménúló.

Eli sia tongeni akkóta ach sipwe mwin le afalafal me emén mi mwenilóng lón imw. Sia tongeni féri ekkóch siwil pwe ousipwe tongeni mwin. Ach féri ena, a pwáári pwe sise ménúkiireló. (SalF. 3:27) Eli oua tongeni afalafal ren ámi mak taropwe are kékké wóón phone. Eli chókkewe mi mwenilóng lón imwer ra tongeni fiti ewe mwichen afalafal wóón Internet. David me Lidia ra aúcheani ena kókkót. David a erá, “Ám ekis fiti ám we kúmiin afalafal le chék mwichfengen me iótek, a fókkun apéchékkúlakem.” Pwal och, eli ka tongeni eisini ewe mi mwenilóng lón imwan iká ka tongeni uweato emén chón káé lón imwan na pwe epwe fituk le káé ngeni.

Atun sia mwin me chienach kewe mi mwenilóng lón imw, sia sissilereló me kúna napanaper kewe mi múrinné, me sia ririéch ngeniir. Áwewe chék, atun oua mwin le afalafal, me atun ka kúna lipwákéchún le néúnéún án Kot we Kapas le achchúngú letipen emén, iwe a lapóló óm ingeiti. Atun ka álisi chienom kewe chón lúkú le fiti mwiich me afalafal, epwe chómmóngoló chiechiom kewe.—2 Kor. 6:13.

Paul a kúna oururun letipan ren án Taitos nóm ren. (2 Kor. 7:​5-7) Ena pwóróus a áchchema ngenikich pwe sia tongeni oururu chókkewe mi osupwang esap chék ren ach kapas, nge pwal ren ach nóm rer me féri met sia tongeni féri pwe sipwe álisiir.—1 Jon 3:18.

Chienach kewe lón Russia ra isettiw leenien áppirú mi múrinné ren ar álillisfengen lefiler. Áwewe chék ren pwóróusen Sergey me pwúlúwan we itan Tatyana. Mwirin án ekkewe polis tolong lón imwer we me chúp lón, ra uweiireló pwe repwe etittin. Tatyana a akkomw musowu me liwiniti imwer we. Sergey a apasa: “Mwirin chék án [Tatyana] wareiti imwem we, emén Chón Kraist fefin mi pwora a etto ren. A pwal wor fitemén ra war me álisikem le atotoraéchú lón imwem we.”

Sergey a pwal apasa: “Úa kan sani Än Salomon Fos 17:​17, ewe mi erá: ‘Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.’ A fen kon lapóló weweéchún ena wokisin ngeniei lón ei fansoun riáfféúmwáál atun úse tufichin likiitú wóón pwisin ái tongeni. Jiowa a awora chiechiei kewe mi pwora iir mi álisiei.” a

A lamot álillisin chienach kewe lón ei atun a fen wekkeiresiló manawach. Epwe fen kon lapóló ach lúkúlúkú ar álillis atun ewe riáfféú mi lapalap. Ina pwata sipwe achocho le apéchékkúla me álisi chienach kewe lón ei fansoun!—1 Pit. 4:​7, 8.