IFA ewe mettóch úkúkún choun ina epwe chék úlúngát paun nge me ren emén sou tipachem “a kon mesemesekkis seni mettóch meinisin sia kúna lón unuselapen fénúfan me fán láng”? Ina, tupwuen aramas. A fókkun amwarar. Ach alapaaló le káé usun, pwal ina lapólóón ach aúcheani férien Jiowa kewe mi “amwarar.” (Kölf. 139:14) Ekieki mwo eú chék me lein tufichin tupwuach we, ina ach tufichin anchang.

Ifa usun sia tongeni áeá ach tufichin anchang? Sia tongeni áeá le ekiekietá sasingin och mettóch mi minefé me apwapwa, are mettóch sisaamwo pwisin kúna are féri. Iwe met, kese pwal tipeeú pwe ka kan áeá ena tufich iteitan? Áwewe chék, ka fen álleani are rongorong usun eú leeni kesaamwo ló ngeni? Ka tongeni kachitoni ena leeni lón ekiekum? Pwúngún, iteiten ach ekieki mettóch sise tongeni kúna, rongorong, neni, attapa, are fáreni, sia anganga ach tufichin anchang.

Paipel a áiti ngenikich pwe aramas ra ffér lón napanapen Kot. (Ken. 1:26, 27) Iwe, esap pwe a pwal nóm ren Jiowa ena esin tufich le anchangei mettóch? Pokiten a filatá le ngenikich ei tufich, iwe a mochen sipwe alamota lón ach achocho le weweiti met letipan. (SalAf. 3:11) Ifa usun sia tongeni áeáfichi ach tufichin anchang le féri ena, me ifa usun sisap áeámwáálli ena tufich?

(1) Ach anchangei mettóch mi mwáál are anchang lón fansoun ese fich.

Saminne a mwáál ach sipwe anchangei mettóch sia sani are áneánei. A pwal mwo nge wor pisekin ánnet mi ánnetatá feiéchún ach féri ena. Iwe nge, ren án Paipel apasa pwe “mettoch meinisin a wor ar fansoun,” a ffat pwe mi wor fansoun ese fich ach sipwe féri ekkóch mettóch. (SalAf. 3:1) Áwewe chék, ika sia mut ngenikich ach sipwe anchangei sókkópaten mettóch atun ach fiti mwich are féri ach pwisin káéén Paipel, ach na anchang epwe eú minen álillis are minen eppet? Jesus a ngenikich kapasen éúréúr usun ach sisap mut ngeni ach sipwe ekkekieki minne mi mwáál, áwewe chék ren féffér mi limengaw. (Mat. 5:28) A wor ekkewe mettóch sia tongeni anchangei nge epwe fókkun eletipengawa Jiowa. Ika sia anchangei ach féri minne mi ngaw, epwe tongeni emmwen ngenikich ach sipwe féri minne sia anchangei. Kopwe tipeppós pwe kosap fókkun mut ngeni óm tufichin anchang an epwe atowauakoló seni Jiowa!

(2) Ach ekieki pwe moni me pisek ra tongeni anúkúnúkéchú manawach.

Moni me pisek ra lamot me álilliséch. Iwe nge, ika sia poputá le ekieki pwe ra tongeni awora ngenikich enletin pwapwa me núkúnúkéch, sipwe chék lichippúng. Ewe mwán mi  tipachem itan Salomon a makkeei: “Ekewe chon pisekisek ra ekieki pwe wöür a tümwünüür seni feiengau, usun chök eu tit mi tekia o pöchökül a epeti eu telinimw seni feiengau.” (SalF. 18:11) Áwewe chék, ekieki met a fis lupwen a púngúchou rán me pwu watteen konik lón ewe telinimw Manila, lón Philippines, lón ewe September 2009. Met, ekkewe aramas mi wéúéch ra túmún seni ena pwu? Emén mwán mi wéúéch mi péút seni chómmóng pisekin lón ena atun, a erá, “Ewe pwu a áweiresi me eriáfféwú ekkewe mi wéúngaw pwal ekkewe mi wéúéch.” Neman a mecheres án emén epwe anchangei pwe pisek a tongeni enletin túmúnúkich me anúkúnúkéchú manawach. Nge ren enletin, ese tongeni.

(3) Ach kon aúreki mettóch neman resap fis.

Jesus a pesekich ach sisap kon “öürek.” (Mat. 6:34) Emén mi kan aúrek fansoun meinisin a kan akkanchangei mettóch mi alólilen. A mecheres ach sipwe asolapaaló watteen péchékkúlach ika sia aúreki ekkewe osukosuk mi nóm lón ach anchang, weween ekkewe esin resaamwo fen fis me neman resap fókkun fis. Ewe Paipel a pwáraatá pwe ena sókkun aúrek a tongeni emmwen ngeni lichippúng, pwal mwo nge semwenin letipechou. (SalF. 12:25) A ifa me lamoten ach sipwe apwénúetá án Jesus we fén ach sisap kon aúrek, nge sipwap ataweei osukosuken manawach lón eú me eú rán lupwen a fis!

(1) Ekieki met mi efeiengaw, me ttii sonuk.

Ewe Paipel a pesekich ach sipwe tipachem me ekieki usun fansoun mwach. (SalF. 22:3) Ika sia anganga ach tufichin anchang, sia tongeni ekieki met mwirilóón ekkewe kefil sipwe féri me mwen ach sipwe filatá. Áwewe chék, ika emén a etiwok ngeni eú kunoufengen, ifa usun óm anchangei ena mettóch epwe álisuk le kefiléch ika kopwe fiti are kosap? Akkomw, kopwe ekieki usun ié kewe ra pwal ketiw, fitemén repwe fiti, ineet me ia epwe fis ie. Mwirin kopwe pwal ekieki: ‘Met a tongeni fis ikena ie?’ Lón óm sótun anchangei met epwe wesewesen fis, ka kúna ika epwe eú kunoufengen mi apéchékkúl me tipeeú ngeni án Paipel kewe kapasen emmwen? Ekkena sókkun kapas eis ra tongeni álisuk le anchangei ewe kunoufengen. Óm anganga óm tufichin anchang epwe álisuk le kefiléch me ttii sonuk mettóch mi tongeni efeiengawok lón pekin lúkú.

(2) Anchangei ifa usun kopwe ataweei osukosuk.

Eú dictionary a erá pwe ach tufichin anchang a pwal weneiti ewe “tufichin mirititi me ataweei osukosuk.” Áwewe chék, sipwe erá pwe a wor wewengawfengen lefilemi me emén lón ewe mwichefel. Epwe ifa usun napanapen óm ló fós ngeni ena emén pwe oupwe  kinamwefengensefál? A wor chómmóng mettóch kopwe ekieki. Met sókkun napanapen pwóppwóróusfengen a kan sani? Ineet epwe fich óm kopwe fós ngeni usun ámi osukosuk? Ikkefa ekkewe kapas epwe éch kopwe néúnéú me epwe ifa ngingiin óm kapas? Lón óm anchang, ka tongeni féri asóssót lón ekiekum lón sókkópaten napanap ren ifa usun kopwe ataweei ena osukosuk me filatá ewe ka meefi pwe epwe kon sópwéch me ketiw me ren ena emén. (SalF. 15:28) Óm ekiekifichi alen óm kopwe ataweei ena mettóch mi áweires epwe álisatá kinamween ewe mwichefel. Pwúngún, óm féri ena, ka áeáfichi óm tufichin anchang.

(3) Ámúrinnééló óm álleani Paipel me pwisin káé.

A fókkun lamot sipwe álleani Paipel iteiten rán. Iwe nge, ese naf ach sipwe chék álleani chómmóng pekin taropween. A lamot sipwe mirititi ifa usun minne sia álleani lón Paipel a weneiti manawach me achocho le apwénúetá ekkewe lesen sia káé seni. A lamot pwe ach álleani Paipel epwe alapaaló ach weweiti me aúcheani án Jiowa kewe féffér. Ach áeá ach tufichin anchang a tongeni álisikich le féri ena. Ifa usun? Ekieki ekkewe lesen itelaper “Áppirú Ar Lúkú” mi nóm lón Ewe Leenien Mas. Ach álleani ekkena lesen a tongeni álisikich le anchangei me kachitoni lón ekiekich nónnómun ewe emén sia álleani pwóróusan. A álisikich le kúna me rongorong met a fis, fáreni pwonnen ekkewe mettóch, me mirititi meefien ekkewe aramas. Ika sia féri ena, sia tongeni mirititi ekkewe lesen mi amwarar me apéchékkúl seni ekkewe kinikin lón Paipel neman sia fen meefi pwe sia sileéchúúr. Ika a iei usun napanapen ach anganga ach tufichin anchang, iwe epwe fókkun múrinnéló ach álleani Paipel me pwisin káé.

(4) Meefieni meefien ekkewe ekkóch.

Eú napanap mi fókkun múrinné, ina ach tufichin meefi metekin letipen emén lón pwisin letipach. Jiowa me Jesus ra eáni ena napanap, iwe, sipwe pwal áppirúúr. (Eks. 3:7; Kölf. 72:13) Ifa usun sia tongeni ámááraatá ena napanap? Eú mettóch epwe fókkun álisikich le féri ena, ina ach tufichin anchang. Neman sise fen kúna lón manawach eú osukosuk emén pwiich Chón Kraist a kúkkúna. Iwe nge, ka tongeni pwisin eisinuk: ‘Ika pwe ngang ei e fis ngeniei ei mettóch, met upwe meefi? Met epwe lamot ngeniei?’ Ach áeá ach tufichin anchang le pélúweni ekkena kapas eis epwe álisikich le meefieni meefier. Pwúngún, meinisin kinikinin manawach manawen Chón Kraist, kapachelong ach angangen afalafal me ach riri ngeni pwiich kewe, epwe échúló ika sia meefieni meefien ekkewe ekkóch.

(5) Anchangei napanapen manawach lón ewe ótót sefé.

Ewe Paipel a ur ren pwóróus mi tichik usun manawen aramas lón ewe ótót sefé Kot a pwonei. (Ais. 35:5-7; 65:21-25; Pwär. 21:3, 4) Lón néúch kewe puk, a wor chómmóng sasing mi lingéch mi lóngólóng wóón ekkena pwóróus. Pwata? Pún ra tongeni álisikich le anchangei me kachitoni lón ekiekich ach pwapwaiti pwénútáán ekkena feiéch mi pwonetiw. Jiowa, ewe Chón Fératá ach tufich le anchang, a silei lap seni aramas meinisin usun manamanen ei tufich. Lupwen sia áeá le ekilonei an kewe pwon, sipwe fókkun lúkúlúk pwe repwe pwénútá me epwe álisikich le akkamwéchú ach tuppwél inaamwo ika sia kúna osukosuk lón manawach.

Fán tong, Jiowa a ngenikich ei liffang mi amwarar, ewe tufichin anchang. A fókkun tongeni álisikich le angang ngeni i lón manawach rán me rán. Amwo sipwe pwári ach kilisou ngeni ewe Chón Awora ei liffang mi amwarar ren ach sipwe áeáfichi iteitan.