1, 2. Met a fis ngeni Paulus me Silas lón Filipi? (Ppii ewe sasing lepoputáán ei lesen.)

 ANCHANGEI ei pwóróus. Eli a lukenipwin, rúúemén misineri Paulus me Silas, ra nóm lón eú leeni mi fókkun kiroch me alóllóól lón eú imwen fétek lón ewe telinimwen Filipi. Rese tongeni mwékútúkút pún a núkúlóng pecher kewe lefilen eché paap, me sékúrúúr a fókkun metek mwirin án aramas awatangawer. (Föf. 16:23, 24) Lón chék ena rán, eú mwichemmongun aramas ra átekinawu Paulus me Silas ren ewe leenien amémé. Me ikena ie, ra mwittir apwúngúúr. Ra kamwei seniir úfer kewe me awatangawer. (Föf. 16:16-22) A ifa me pwúngúngawen ena! Paulus i pwúkútáán emén chón Rom, me ese fichiiti ena sókkun kapwúng. *

² Atun Paulus a nóm lón kalapus, eli a ekieki met a fis lón ena rán me ekieki usun ekkewe aramas lón Filipi. Ese mwo  nge wor ar sinakok lón leenier na, esap usun ekkewe ekkóch leeni Paulus a fen tori. Ina minne, a lamot ngeni ekkewe chón Jus ar repwe feiló lúkún ewe telinimw arap ngeni eú chénúpupu pwe repwe féri ar fel. (Föf. 16:13, 14) Itá a fis ena pokiten ese mwo tori engol re Jus mi nónnóm lón ewe telinimw? Mi lamot ena chóchóón aramas ren an epwe tongeni wor ar sinakok. Ekkewe aramas mi nónnóm lón Filipi ra fókkun esika pwe iir chón Rom. (Föf. 16:21) Neman ina ewe popun rese ekieki pwe Paulus me Silas, iir chón Jus, nge iir pwal chón Rom. Ese ffat ngenikich, nge sia chék silei pwe Paulus me Silas ra kúna pwúngúngaw ren ar kóturulong lón kalapus.

3. Eli epwe met popun Paulus a osukosuk atun a katolong lón kalapus, nge met an ekiek usun met a fis ngeni?

³ Neman Paulus a pwal ekieki ifa usun a tori Filipi. Fitu maram me mwan, Paulus a nóm epekin ewe Setin Aegean lón Asia Minor. Atun a nóm ikena, ewe manaman mi fel a akaúlóói fán chómmóng pwe esap feiló ngeni ekkóch leeni an epwe afalafal. Usun itá ewe manaman mi fel a emmwenaaló ekis. (Föf. 16:6, 7) Ia? Atun Paulus a nóm Troas, a kúna eú lángipwi, mi erá: “Feito Masetonia.” A ffat minne Jiowa a tipeni! Ina minne Paulus a mwittir feiló Masetonia. (Álleani Föför 16:8-10.) Nge met a fis mwirin? Mwirin chék an tori Masetonia, a katolong lón kalapus! Pwata Jiowa a mut ngeni an epwe fis ngeni Paulus ena mettóch? Ifa úkúkún ttaman an epwe kalapus? Ikaamwo Paulus a ekieki ekkena mettóch, nge an lúkú a chék péchékkúl me a akkamwéchú an pwapwa. Iir me Silas ra poputá le “iotek o köl kölün mwareiti Kot.” (Föf. 16:25) Ewe kinamwe seni Kot a ekinamwei letiper me ekiekiir.

4, 5. (a) Ifa usun nónnómuch a usun nónnómun Paulus? (b) Ifa usun nónnómun Paulus a mwittir siwil?

⁴ Ka fen meefi meefien Paulus? Eli a wor atun lón manawom ka tingorei Kot an epwe álisuk le féri kefil me ka meefi pwe ka fiti emmwenien ewe manaman mi fel. Nge mwirin chék, ka kúna chómmóng osukosuk are a lamot óm kopwe féri wakkatteen siwil lón manawom. (SalAf. 9:11) Nge iei, atun ka ekieki minne a fis, eli ka ekieki met popun Jiowa a mut ngeni ekkena mettóch ar repwe fis. Met a tongeni álisuk le sópweló le likiitú me unusen lúkúlúk wóón Jiowa? Sia tongeni silei pélúwan lón minne a fis ngeni Paulus me Silas.

⁵ Atun Paulus me Silas ra kél, chómmóng mettóch mi weiweitá a poputá le fis. Akkomw, a fis eú chechchechin fénú mi fókkun watte. Ekkewe asamalap meinisin ra suukuló, me ekkewe selimechá mi féfé ngeni ekkewe chón fétek ra pichiló. Mwirin, Paulus a eppeti án ewe chón masen imwen fétek pwisin nieló, me ena chón mmas me unusen an we famili ra papatais. Lesossorusichin sorotáán ewe rán, ekkewe néúwisin sóópw ra tiinaaló ekkewe polis pwe repwe omusaawú Paulus me Silas me ereniir pwe repwe ló seni ewe telinimw fán kinamwe. Atun ekkewe néúwis ra kerán silei pwe Paulus me Silas iir pwúkútáán chón Rom, iwe ra mirititi pwe ra féri  eú mettóch mi fókkun mwáál ngeni Paulus me Silas, me iir pwisin ra paniirewu. Nge me mwen án Paulus me Silas feiló seni ewe telinimw, ra péchéú le mochen ar repwe kapongen emwirimwir ngeni Litia, ewe mi kerán papatais. Me ra áeá ena fansoun le apéchékkúla chiechier kewe ekkóch lón Filipi. (Föf. 16:26-40) A ifa me mwittirin siwilin nónnómur!

6. Met sipwele pwóróusfengen me enniwili iei?

⁶ Met sia tongeni káé seni minne a fis? Jiowa a tongeni féri met sise fókkun tepereni, ina minne sisap aúrek atun sia nóm lón weires. Ena mettóch a fókkun achchúngú letipen me ekiekin Paulus. Sia silei ena ren met a makke ngeni ekkewe Chón Kraist lón Filipi usun ewe mettóch aúrek me kinamwe seni Kot. Lón ei lesen sipwe pwóróusfengen alon Paulus we lón Filipi 4:6, 7. (Álleani.) Mwirin, sipwe enniwili ekkóch pwóróus lón Paipel usun án Jiowa féri met mi ámáirú. Sáingoon, sipwe pwóróus wóón ifa usun “än Kot kinamwe” a tongeni álisikich le likiitú fán weires ren unusen ach lúkúlúk wóón Jiowa.

7. Ifa ewe lesen Paulus a áiti ngeni ekkewe Chón Kraist lón Filipi atun a makke ngeniir, me met sia tongeni káé seni?

⁷ Lupwen ekkewe Chón Kraist lón Filipi ra álleani néún Paulus we taropwe, met meefier usun? Neman lape ngeniir ra chechchemeni minne a fen fis ngeni Paulus me Silas me ekkewe mettóch Jiowa a fen féri fán iter nge rese tepereni. Ifa ewe lesen Paulus a áiti ngeniir lón néún we taropwe? Iei ewe lesen: Kosap lólilen. Iótek, iwe mwirin kopwe angei “än Kot kinamwe mi tekia seni ach tongeni weweiti.” Met weween ena itiitin kapas? Iei afféún me ren ekkóch Paipel “luló seni met sia áneánei” are “luló seni minne aramas ra ekiekietá.” Ina minne Paulus a apasa pwe “än Kot kinamwe” a fókkun amwarar seni minne sia tongeni ekieki. Fán ekkóch sise silei ifa usun epwe pwák ach kewe osukosuk nge Jiowa a silei me a tongeni féri met sise tepereni.​—Álleani 2 Petrus 2:9.

8, 9. (a) Inaamwo ika Paulus a kúna pwúngúngaw lón Filipi, nge ifa ewe mettóch mi múrinné a fis seni ena? (b) Pwata ekkewe Chón Kraist lón Filipi ra unusen lúkúlúkú alon Paulus kewe?

⁸ Neman néún Paulus we taropwe a fókkun apéchékkúla ekkewe Chón Kraist lón Filipi lupwen ra ekieki usun met Jiowa a fen féri fán iter lón ekkewe engol ier ra ló. Inaamwo ika Jiowa a mut ngeni Paulus me Silas ar repwe kúna pwúngúngaw, nge minne a fis me mwan a atufichi án ewe kapas allim epwe leteló me núkúcharoló lón kapwúng. (Fil. 1:7) Ekkewe néúwisin sóópw lón Filipi rese pwal mwo nge ekiekin eriáfféwú ewe mineféén mwichefelin Chón Kraist. Eli pokiten Paulus a erá pwe  i pwúkútáán chón Rom, ina popun ewe chón káé Lukas a tongeni nómwotiw lón Filipi mwirin án Paulus me Silas ló. Iwe, Lukas a tongeni awora álillis ngeni ekkewe mineféén Chón Kraist lón Filipi.

⁹ Lupwen ekkewe Chón Kraist lón Filipi ra álleani néún Paulus we taropwe, ra silei pwe minne a makkeei esap chék pwisin ina meefian. A fen fis ngeni riáfféú mi fókkun watte. Ikaamwo a kalapus lón imwan we lón Rom nge a chúen makke ngeni ekkena Chón Kraist me a chúen pwári pwe a nóm ren “än Kot kinamwe.”​—Fil. 1:12-14; 4:7, 11, 22.

10, 11. Ifa ewe mettóch mi lamot sipwe féri ika sia lólileniesini och mettóch, me met sia tongeni ésúkúsúkú?

¹⁰ Met a tongeni álisikich pwe sisap “lolilenäsini och mettoch” nge sipwe eáni “än Kot kinamwe”? Alon Paulus we ngeni ekkewe chón Filipi a pwári pwe iótek ina sáfeien ach lólilen. Ina popun lupwen sia lólilen ren och mettóch, a lamot sipwe iótek. (Álleani 1 Petrus 5:6, 7.) Atun kopwe iótek ngeni Jiowa, kopwe fókkun lúkúlúk pwe a chúnguk. Fansoun meinisin kopwe kilisou ngeni ren ekkewe feiéch ka angei. Me kosap ménúki pwe Jiowa a tongeni féri minne mi ‘selüküló me somwosomwoló seni meinisin öükükün minne ka tungór.’​—Ef. 3:20, Agapé.

¹¹ Eli sipwe pwal máirú usun chék Paulus me Silas ren met Jiowa epwe féri pwe epwe álisikich. Eli ese kon pwal amwarar nge fansoun meinisin epwe ngenikich met sia osupwangan. (1 Kor. 10:13) Nge esap weween pwe sisap pwal féri och mettóch, me sipwele chék witiwiti án Jiowa epwe áwena are pwákini ewe osukosuk fán itach. A lamot ach sipwe anganga met sia ióteki. (Rom 12:11) Minne sia féri epwe ánnetatá pwe sia letipwenechar me sia féri met Jiowa epwe efeiéchúkich ren. Sisap ménúki pwe Jiowa a tongeni féri met mi lap seni minne sia tingor are ekieki pwe epwe féri. Fán ekkóch a kan ámáirú ngenikich an féri och mettóch sise tepereni. Iwe, sipwele káé ekkóch pwóróus mi apéchékkúla ach lúkúlúk wóón án Jiowa tufichin féri ekkewe mettóch fán itach sise tepereni.

12. (a) Met King Hiskia a féri lupwen King Sanherip a ammésékú? (b) Met sia káé seni án Jiowa pwákini ewe osukosuk?

¹² Lón ewe Paipel, sia káé chómmóng pwóróus usun án Jiowa féri ekkewe mettóch sise tepereni. Áwewe chék, lupwen Hiskia a king lón Juta, Sanherip ewe kingen Asiria a tééki Juta me liapeni meinisin telinimwen lón, chilóón chék Jerusalem. (2 King 18:1-3, 13) Mwirin, Sanherip a ló pwe epwe maunei Jerusalem. Met King Hiskia a féri? Akkomw, a iótek ngeni Jiowa ren álillis me a tingorei Aisea, néún Jiowa we soufós pwe epwe éúréúra. (2 King 19:5, 15-20) Mwirin, Hiskia a pwári an tipemirit ren an ngeni Sanherip ewe liiwin a allúkú ngeni. (2 King 18:14, 15) Sáingolóón, Hiskia a anúkúnúkú ewe telinimw pún chón oputer repwele rongeereló ren langattam fansoun. (2 Kron. 32:2-4 ) Iwe, met a fis mwirin? Jiowa a tiinaato emén chónláng an epwe nieló 185,000 néún Sanherip kewe soufiu lón eú chék pwiin. Hiskia ese pwal mwo nge ekieki pwe epwe fis ena!—2 King 19:35.

13. (a) Met sia káé seni minne a fis ngeni Josef? (b) Met sókkun mettóch mi amwarar a fis ngeni Sara?

¹³ Ekieki minne a fis ngeni ewe alúwél Josef. Atun Josef a mómmóót lón ewe imwen kalapus me Isip ese fókkun ekieki pwe epwe wiliti ewe arúúeménún aramas mi wor manan lón Isip are ese pwal ekieki pwe Jiowa epwe néúnéú i le seláni an we famili seni ewe lengita. (Ken. 40:15; 41:39-43; 50:20) Ese mwáál met Jiowa a féri a lululó seni minne Josef a ekieki pwe epwe féri. Pwal ekieki usun Sara, inen semen semen Josef we. Itá ena chinnap fefin Sara a ekieki pwe Jiowa epwe mut ngeni an epwe pwisin néúni emén át, nge esap chék angei seni néún we chón angang fefin néún we? Án Isaak uputiw a lululó seni met Sara a ekieki.​—Ken. 21:1-3, 6, 7.

14. Met sókkun lúkúlúk sipwe eáni lón Jiowa?

¹⁴ Sia silei pwe Jiowa esap féri manaman le amóeló meinisin ach kewe osukosuk me mwen ewe ótót sefé. Sise pwal ereni an  epwe féri met mi amwarar fán itach. Nge sia silei pwe Jiowa a álisi néún kewe chón angang mi tuppwél me lóóm lón ekkewe napanap mi amwarar. I ese siwil. (Álleani Aisea 43:10-13.) Ena mettóch a atoto ach lúkúlúk wóón i. Sia tongeni lúkúlúk pwe epwe ngenikich ach péchékkúl pwe sipwe féri letipan. (2 Kor. 4:7-9) Met sia káé seni pwóróusen Hiskia, Josef, me Sara? Ika sia amwéchú ach tuppwél ngeni Jiowa, iwe a tongeni álisikich pwal mwo nge atun fansoun mi fókkun áweires.

15. Met a tongeni álisikich pwe epwe nóm rech “än Kot kinamwe” pwal mwo nge atun osukosuk? Áweweei.

¹⁵ Ifa usun epwe nóm rech “än Kot kinamwe” pwal mwo nge atun osukosuk? A lamot sipwe apéchékkúla ach riri ngeni Jiowa. Ena sókkun riri a tongeni chék tufich ren án Kraist Jesus méén kepich. Ewe méén kepich ina eú me lein ekkewe mettóch mi fókkun amwarar Jiowa a féri. Ren ewe méén kepich, Jiowa a tongeni omusaaló ach tipis, sia tongeni eáni eú mwelien letip mi liméch me arap ngeni.​—Joh. 14:6; Jas. 4:8; 1 Pet. 3:21.

16. Met epwe fis ika a nóm rech “än Kot kinamwe”? Áweweei.

¹⁶ Met epwe fis atun sia angei “än Kot kinamwe mi tekia seni ach tongeni weweiti”? Ewe Paipel a erá pwe epwe “tümwünü” lelukach me ekiekich. (Fil. 4:7) Ewe popun kapas fán iten “tümwünü” ina eú kapas ekkewe soufiu ra néúnéú fán iten eú kúmiin soufiu mi wisen túmúnú eú leeni. Ekkewe aramas lón Filipi ra kúna túmún seni ekkena sókkun kúmi. Ra tongeni annut fán kinamwe lepwin pwe ra silei pwe a túmún leenier we. Pwal ina usun, atun a nóm rech “än Kot kinamwe,” sise lólilen, me a kinamwe letipach me ekiekich. Sia silei pwe Jiowa a tongekich me a mochen sipwe sópwéch. (1 Pet. 5:10) Iwe, ina met a túmúnúkich seni ach kokotiw fán aúrek are lichippúng.

17. Met epwe álisikich le lúkúlúk wóón Jiowa atun ewe riáfféú mi lapalap?

¹⁷ Ekiseló chék aramas repwele kúna warotoon ewe riáfféú mi lapalap. (Mat. 24:21, 22) Sise silei tichikin met epwe fis ngeni pwisin kich. Iwe nge, sisap kon aúrek. Inaamwo ika sisap silei meinisin met Jiowa epwe féri, nge sia fókkun silei ach Kot. Sia silei met a fen féri fán iten néún kewe chón angang mi tuppwél me lóóm. Sia fen káé pwe ese lifilifil met epwe fis, nge Jiowa epwe féri met mi lamot pwe letipan epwe pwénútá. A tongeni féri ena lón eú napanap sise tepereni! Ina minne, iteitan Jiowa a féri och mettóch fán itach, sia kúna eú sókkun “kinamwe mi tekia seni ach tongeni weweiti” mi weneiti ach we osukosuk.