1. Met sia silei seni ewe 2023 mwiich mi kkóló aúchean mi kan fiffis iteiten ier?

 LÓN ewe 2023 mwiich mi kkóló aúchean mi kan fiffis iteiten ier, a a katowu ekkóch pwóróus mi affataéchú ekkóch ach kewe lúkú, me sia rong ekkóch pwóróus esilesil mi apwapwa ussun ach we angangen afalafal. Áwewe chék, sia silei pwe eli epwe suuk ngeni ekkóch ar repwe pachelong lein néún Jiowa kewe aramas pwal mwo nge mwirin talóón Papilon mi lapalap. Sia pwal silei pwe seni lepoputáán ewe November 2023, ese pwal chúen lamot ngeni chón afalafal ar repwe repotei meinisin met ra féri lón ewe angangen afalafal. Nge itá ekkena siwil a wewe ngeni pwe a lamotkisikis ach we angangen afalafal? Aapw, esap ina!

2. Pwata a lallapoló atapwalapwalen ach we angangen afalafal atun a feffeiló eú me eú rán? (Mark 13:10)

² Iteiten rán a lallapoló atapwalapwalen ach we angangen afalafal. Pwata? Pokiten a chék ekis lusun ewe fansoun mwen warotoon ewe sópwólóón. Nengeni met Jises a oesini ussun ewe angangen afalafal lón ekkeei ránin lesópwólóón. (Álleani Mark 13:10.) Me ren ewe puken Mattu, Jises a erá pwe ewe kapas allim epwe afalafalfeil wóón unusen fénúfan me mwen warotoon “ewe sópwólóón.” (Mat. 24:14) Ena itiitin kapas, a  weneiti unusen sópwólóón án Setan ei ótót mi ngaw. Jiowa a fen filieló ewe “rán me kulók” epwele fis ekkena mettóch lón. (Mat. 24:36; 25:13; Féf. 1:7) Feilóón eú me eú rán, a akkanakich ngeni ena fansoun. (Rom 13:11) Nge ren mwo iei, a lamot ach sipwe sópweeló le afalafal tori warotoon ena rán.

3. Met a amwékútúkich le afalafal?

³ Iei eú kapas eis mi aúchea kich meinisin sia mochen ekieki ussun: Pwata sia afalafala ewe kapas allim? Sia afalafal pokiten tong. Minne sia féri lón ewe angangen afalafal a pwáári ach aúcheani ewe kapas allim me ach tongei aramas, nge lap seni meinisin a pwáári ach tongei Jiowa me itan we. Iei sipwele káé eú me eú ekkena mettóch.

SIA AFALAFAL POKITEN SIA AÚCHEANI EWE KAPAS ALLIM

4. Met meefiom atun a toruk eú pwóróus mi apwapwa?

⁴ Ekieki meefiom atun a toruk ekkóch pwóróus mi apwapwa. Eli emén lón óm we famili a néúnéú, are emén a álisuk le kúna eú angang ka mochen eáni. Ese mwáál, ka fókkun pwapwa pwe ka apwóróusa ngeni chón óm famili me chienom kewe. A pwal fis ngonuk ena esin atun ka rong pwóróusen án Kot we Mwú, ewe pwóróus mi fókkun apwapwa seni meinisin?

5. Met ka meefi atun ka kerán káé ussun ewe enlet seni án Kot we Kapas? (Pwal ppii ekkewe sasing.)

⁵ Ekieki met ka meefi atun ka kerán káé ussun ewe enlet seni án Kot we Kapas. Ka káé pwe Semom we lón láng a tongeek me a mochen óm kopwe kapachelong lón an we famili, iir chón fel ngeni, ka pwal káé pwe a pwonei pwe epwe asopwaló metek me riáfféú, me ka pwal káé pwe a wor óm ápilúkúlúkún kúnasefáli attongeom kewe atun repwe manawsefál lón ewe ótót séfé, me pwal chómmóng mettóch. (Mark 10:​29, 30; Jon 5:​28, 29; Rom 8:​38, 39; Pwár. 21:​3, 4) Minne ka káé a atoto ngonuk watteen pwapwa. (Luk 24:32) Ka aúcheani met ka káé, me ka mochen ereni meinisin ussun!—Apépé ngeni Jeremaia 20:9.

6. Met ka káé seni pwóróusen Ernest me Rose?

 ⁶ Ekieki ei pwóróus. Emén Chón Kraist mwán itan, Ernest b ina epwe engol ierin atun seman we a máló. Iei met a erá: “Úa kan ekieki: ‘A fen ló láng? Are epwele chék máffócholó?’ Úa kan lólówóiti ekkewe semirit a chúen wor semer.” Ernest a kan ló ren ekkewe peiás, fótopwúkútiw ren peiásen seman we, me iótek: “Kot, kese mochen, úa mochen silei ia semei we a nóm ie.” Ina epwe 17 ier mwirin málóón semen Ernest we, emén a ereni an epwe káé ngeni ewe Paipel, me a fókkun mochen káé. A fókkun pwapwa atun a silei pwe ekkewe mi máló rese chúen silei och mettóch, ussun nge ra chék annutochou, me a pwal silei pwe ewe Paipel a pwonei ussun eú manawsefál lón mwachkkan. (SalAf. 9:​5, 10; Féf. 24:15) A kúna pélúwen ekkewe kapas eis a kan aosukosuka ren fansoun langattam! Ernest a fókkun pwapwa ren ekkewe pwóróus mi enlet seni Paipel a káé. Pwúlúwan we itan Rose, a fiti le káé me a pwal sani met a káé. Lón ewe ier 1978 ra papatais. Ra tinikken le afalafal ngeni chón ar kewe famili, chiener kewe, me ekkewe ekkóch ussun ekkewe pwóróus mi enlet ra káé. Mwirilóón, Ernest me Rose ra álisi lap seni 70 le silei Jiowa me papatais.

7. Met a fis atun sia aúcheani met sia káé seni ewe Paipel? (Luk 6:45)

⁷ A ffat pwe atun sia aúcheani met sia káé seni ewe Paipel, sia meefi pwe a lamot ach sipwe ereni aramas meinisin ussun. (Álleani Luk 6:45.) Sia meefi meefien néún Jises kewe chón káé atun ra erá: “Áúsapw tongeni úkútiw le kapas ussun ekkewe mettóch áúa kúna me rong.” (Féf. 4:20) Sia fókkun aúcheani ewe enlet, iwe sia mochen ereni chómmóng aramas úkúúkún ach tufich.

SIA AFALAFAL POKITEN SIA TONGEI ARAMAS

8. Met a amwékútúkich le ereni aramas ewe kapas allim? (Ppii ewe pwóór “ Love People—Make Disciples.”) (Pwal ppii ewe sasing.)

⁸ Sia ussun Jiowa me Néún we le tongei aramas. (SalF. 8:31; Jon 3:16) Sia fókkun tongeei chókkewe rese “silei Kot” me ‘ese wor ar ápilúkúlúk.’ (Efi. 2:12) Eli repwe meefi pwe ra nóm lón eú pwaang mi alóllóól pokiten ar kewe osukosuk. Nge a wor rech efóch sáál mi tongeni efiirewu me lón ena pwaang, ina ewe kapas allim ussun Mwúún Kot we. Ach tongei me chúngú chókkana, a amwékútúkich le achocho le esile ngeniir ewe kapas allim. Atun ra rong ena pwóróus, a tongeni awora ngeniir ápilúkúlúk, álisiir le pwapwa pwal mwo nge lón ei fansoun, me a atufichiir le  eáni ewe “manaw mi enlet,” ina ewe manaw esemuch lón án Kot we ótót séfé.—1 Tim. 6:19.

9. Ifa ewe éúréúr sia ereni aramas ussun fansoun mwach, me pwata? (Isikiel 33:​7, 8)

⁹ Ach tongei aramas a pwal amwékútúkich ach sipwe éúréúrer ussun warotoon sópwólóón ei ótót mi ngaw. (Álleani Isikiel 33:​7, 8.) Sia tongei chón óruch kewe me chón ach kewe famili rese angang ngeni Jiowa. Chómmóng aramas ra chék akkomwa angangen manawer iteiten rán, nge rese silei pwe epwe wor eú “riáfféú mi lapalap ussun an ese mwo fis seni lepoputáán fénúfan tori ikenái, me esap pwal fissefál.” (Mat. 24:21) Sia mochen repwe silei met epwe fis atun ena fansoun kapwúng. Akkomw, lamalam chofona repwe kataló, mwirin unusen ei ótót mi ngaw epwe rosoló atun ewe Armaketon. (Pwár. 16:​14, 16; 17:​16, 17; 19:​11, 19, 20) Sia iótek pwe chómmóng repwe aúseling met sia ereniir me filaatá le fitikich le angang ngeni Jiowa iei. Nge ifa ussun ren chókkewe rese aúseling ngenikich lón ei fansoun, kapachelong chón ach kewe famili mi áchengicheng?

10. Pwata a aúchea ach sipwe sópweeló le éúréúra aramas ussun met epwele fis ekiseló chék?

¹⁰ Ussun met sia káé lón ewe lesen mwen ei, pwe eli letipen Jiowa an epwe amanawa ekkewe aramas mi ekkesiwil letiper atun repwe kúna talóón Papilon mi Lapalap. Iká ina, iwe a fen kon lapóló aúchean ach esile ngeni aramas ussun talóón Papilon mi Lapalap. Ekieki ei: Minne sia ereniir lón ei fansoun, eli epwe eú minen áchchem ngeniir lón ena atun. (Apépé ngeni Isikiel 33:33.) Eli repwe chemeni ewe éúréúr ra rong senikich me repwe mwékút le fitikich lón ewe fel mi limeliméch mwen an epwe serlupwan. A siwil letipen emén chón mmasen kalapus lón Filipai mwirin chék fisin “eú watteen chechchechin fénú.” Iwe eli epwe pwal ina ussun ren ekkóch chókkewe rese mochen aúseling iei, epwe siwil letiper mwirin ar kúna ámáirúún katalóón Papilon mi Lapalap.—Féf. 16:​25-34.

SIA AFALAFAL POKITEN SIA TONGEI JIOWA ME ITAN WE

11. Ifa ussun sia ngeni Jiowa ling, súfél, me manaman? (Pwáraatá 4:11) (Pwal ppii ekkewe sasing.)

¹¹ Ewe akkaúchean popun ach afalafala ewe kapas allim, pokiten sia tongei Jiowa Kot me itan we mi pin. Me rech, ach we angangen afalafal ina alen ach mwareiti ewe Kot sia tongei. (Álleani Pwáraatá 4:11.) Sia unusen tipeeú pwe a fich ngeni Jiowa Kot, an epwe angei ling, súfél, me manaman. Sia ngeni i ling me súfél atun sia ereni aramas ussun ekkewe pisekin pwáraatá pwe i a “féraatá mettóch meinisin,” me iká esap pwúlún, sisap manaw.  Sia ngeni i manaman, weween ach péchékkúl, atun sia áeá ach fansoun, péchékkúlach, me wéúch lón ewe angangen afalafal ren úkúúkún ach tufich. (Mat. 6:33; Luk 13:24; Kol. 3:23) A fókkun ffat pwe sia aúcheani ach fóffós ussun ewe Kot sia tongei. Sia pwal mwékút le ereni aramas ussun itan we me i met sókkun Kot. Pwata?

12. Ifa ussun sia elingaaló iten Jiowa lón ach we angangen afalafal?

¹² Ach tongei Jiowa a amwékútúkich le elingaaló itan we. (Mat. 6:9) Weween, sia mochen ereni aramas pwe ekkewe mettóch mi fókkun ngaw Setan a erá ussun Jiowa, rese pwúng. (Ken. 3:​1-5; Hiop 2:4; Jon 8:44) Atun sia afalafal, sia fókkun mochen ereni chókkewe mi aúseling ngenikich ié Jiowa, me i met sókkun Kot. Sia mochen án meinisin repwe silei pwe tong ina napanapan we mi lapalap seni meinisin, me an nemenem a pwúng, me ekiseló chék an we Mwú epwe aúkatiw riáfféú meinisin me atoto kinamwe me pwapwa ngeni chón fénúfan. (Kölf. 37:​10, 11, 29; 1 Jon 4:8) Atun sia ereni aramas ekkena mettóch ussun Jiowa, sia elingaaló itan we. Sia pwal pwapwa pokiten sia féri met úrúrún wisach, Chón Pwáraatá Jiowa. Ifa ussun?

13. Pwata sia feiéch ren ach iteni Chón Pwáraatá Jiowa? (Aisea 43:​10-12)

¹³ Jiowa a filikichetá pwe sipwe néún “chon pwärätä.” (Álleani Aisea 43:​10-12.) Lón ekkewe ier, a wor eché taropwe seni ewe Mwichen Soupwúngúpwúng mi erá: “Ewe feiéch mi lap seni meinisin emén a tongeni eáni, ina an iteni emén Chón Pwáraatá Jiowa.” c Pwata? Iei eú kapas áwewe. Iká a lamot ngonuk emén chón pwáraatá lón imwen kapwúng, kopwe fili emén ka sissilei me lúkúlúkú, emén mi tikiéch me ekkewe  ekkóch repwe lúkú an kapas. Án Jiowa filikich ach sipwe néún Chón Pwáraatá, a pwáári pwe a fókkun silefichiikich me a lúkúlúkúkich ach sipwe wisen ereni aramas pwe i chék ewe Kot mi enlet. Sia fókkun feiéch ren ach néún Chón Pwáraatá me sia kútta alen ach sipwe kan esilei itan me ánneta mwáállin ekkewe chómmóng kapas chofona mi iti ngeni. Ach féri ena, a pwáári weween itach we, Chón Pwáraatá Jiowa!—Kölf. 83:18; Rom 10:​13-15.

SIPWE SÓPWEELÓ LE AFALAFAL TORI SÓPWÓLÓÓN

14. Ikkefa ekkewe mettóch mi apwapwa repwele fis ekiseló chék?

¹⁴ A ifa me apwapwaan ach kúna met epwele fis ekiseló chék! Ren án Jiowa feiéch, sia lúkúlúk pwe sipwe kúna chómmóng repwe etiwa ewe enlet me mwen poputáán ewe riáfféú mi lapalap. Sia pwal fókkun pwapwa pwe pwal mwo nge atun ewe riáfféú mi lapalap, ewe fansoun mi fókkun áweires seni meinisin, eli epwe wor chómmóng repwe towu seni án Setan ei ótót me fitikich le mwareiti Jiowa.—Féf. 13:48.

15-16. Met sipwe sópweeló le féri, me tori ineet?

¹⁵ Nge ren mwo iei, a wor eú angang mi aúchea sia féri, ewe angang sisap pwal féri sefálli. Sia feiéch ren ach afalafala kapas allimen án Kot we Mwú wóón unusen fénúfan. Me atun sia féri ena, a lamot sipwe sópweeló le éúréúra aramas ussun met epwele fis ekiseló chék. A lamot án aramas repwe silei pwe sópwólóón ei ótót mi ngaw a chék arapoto. Iwe, atun ewe fansoun kapwúng epwe waroto, repwe silei pwe ewe pwóróus sia afalafala a feito seni Jiowa Kot.—Is. 38:23.

¹⁶ Iwe, met sipwe úppós le féri? Ach tongei aramas, aúcheani ewe kapas allim, nge lap seni meinisin ach tongei Jiowa Kot me itan we, epwe amwékútúkich le sópweeló le afalafal fán pwapwa, atapwalapwal, me fán tinikken tori án Jiowa epwe apasa, “A naf!”