1. Ifa usun sia kan ámááraatá ach ririéch ngeni emén?

REN óm kopwe wiliti chiechien emén, a lamot óm kopwe lóóm awora fansoun le chiechi ngeni. Atun oua fóffósfengen, me pwóppwóróusfengen usun ámi ekiek me memmeef, iwe a péchékkúleló ámi ririin chiechi. Iwe nge, mi weires ach sipwe chiechiéchfengen me Jesus. Pwata?

2. Ifa ewe áeúin popun a áweires ach sipwe chiechi ngeni Jesus?

² Ewe áeúin popun a áweires ach sipwe chiechi ngeni Jesus, pokiten sise mwo nge kúna Jesus fán eú lón féúféún aramas. Pwal ina met a áweiresi chómmóng Chón Kraist lón fansoun ekkewe aposel. Ikaamwo a ina usun, nge aposel Petrus a erá: “Ämi oua echeni Jesus, inamwo ika ousap fen küna i, oua lükü i, inamwo ika ousap küna i iei.” (1 Pet. 1:8) Ina minne, a tufich ach sipwe wiliti chiechien Jesus inaamwo ika sise mwo nge kúna fán eú lón féúféún aramas.

3. Ifa ewe oruuen popun a áweires ach sipwe chiechi ngeni Jesus?

³ Oruuen popun, pokiten sise tongeni fós ngeni Jesus. Lupwen sia iótek, sia uwawu meefiach ngeni Jiowa. Pwúngún, sia kan iótek lón iten Jesus, nge sise kan fós ngeni Jesus. Ren enletin, Jesus ese mochen ach sipwe iótek ngeni. Pwata? Pokiten iótek ina eú alen ach fel ngeni Kot, iwe itá sipwe fel ngeni Jiowa chék. (Mat. 4:10) Nge sia chúen tongeni pwári ach tongei Jesus.

4. Ifa ewe aúlúngátin popun a áweires ach sipwe chiechi ngeni Jesus, me met sipwe pwóróus wóón lón ei lesen?

 ⁴ Aúlúngátin popun, pokiten Jesus a nóm láng, iwe ese tufich ach sipwe nóm ren me chiechi ngeni. Nge sia chúen tongeni silefichi Jesus inaamwo ika sise wesewesen nóm ren. Sipwe pwóróus wóón rúáánú mettóch sia tongeni féri pwe sipwe apéchékkúla ach ririin chiechi ngeni. Nge akkomw, sipwe etittina popun a lamot ach sipwe apéchékkúla ach chiechiéch ngeni Kraist.

5. Pwata a lamot ach sipwe chiechi ngeni Jesus? (Pwal ppii ekkewe pwóór itelaper “ Chiechiéch Ngeni Jesus A Emmwen Ngeni Chiechiéch Ngeni Jiowa” me “ Ekiek mi Pwúng Usun Wisen Jesus.”)

⁵ Ren ach sipwe ririéch ngeni Jiowa, mi lamot ach sipwe chiechi ngeni Jesus. Pwata? Ekieki ekkeei ruu popun. Áeúin, Jesus a ereni néún kewe chón káé: “Semei a püsin echenikemi. A echenikemi, pun ämi oua echeniei.” (Joh. 16:27) A pwal apasa: “Esap wor eman epwe tongeni feila ren Semei me lüki.” (Joh. 14:6) Lón kapas áwewe, ika sia achocho le chiechi ngeni Jiowa nge sise pwal chiechi ngeni Jesus, iwe usun nge sia chék tolong lón eú imw nge sise pwer lón asaman we. Jesus a áeá pwal ena esin kapas áwewe lupwen a apasa pwe i “ewe asam fän iten ekewe sip.” (Joh. 10:7) Ewe oruuen popun, pokiten Jesus a unusen áppirúfichi napanapen Seman we. A ereni néún kewe chón káé: “Iö a künaei, a küna Semei.” (Joh. 14:9) Ina popun, ach káé pwóróusen manawen Jesus, ina eú al mi lamot ren ach sipwe silei Jiowa. Lapólóón ach silei Jesus, epwe pwal ina lapólóón ach tongei. Iwe, lapólóón ach tongei Jesus, epwe pwal ina lapólóón ach tongei Seman we.

6. Ifa pwal eú popun mi lamot ach sipwe ririéch ngeni Jesus? Áweweei.

 ⁶ Ren án Kot epwe pélúweni ach kewe iótek, mi lamot ach sipwe ririéch ngeni Jesus. Ese chék wewe ngeni ach sipwe apasa “lón iten Jesus” lesópwólóón ach kewe iótek. Nge mi lamot sipwe mirititi ifa usun Jiowa a néúnéú Jesus le pélúweni ach kewe iótek. Jesus a ereni néún kewe aposel: “Meinisin mine oupwe tüngor fän itei üpwe apwönüetä.” (Joh. 14:13) Inaamwo ika Jiowa a wisen aúseling me pélúweni ach kewe iótek, nge a ewisa ngeni Jesus an epwe wisen féri minne I a tipeni. (Mat. 28:18) Iwe, mwen án Kot pélúweni ach kewe iótek, a lóóm ppii ika sia fen apwénúetá án Jesus kapasen fén. Áwewe chék, Jesus a apasa: “Are oupwe amusala än aramas tipis, Sememi mi nom läng epwe pwal amusala ämi tipis. Nge are ousap amusala än ekewe aramas tipis, Sememi mi nom läng esap pwal amusala ämi tipis.” (Mat. 6:14, 15) Ina minne, a fókkun lamot ach sipwe kirekiréch ngeni ekkewe ekkóch usun chék án Jiowa me Jesus kirekiréch ngenikich!

7. Ié kewe repwe kúna feiéch seni án Jesus we asorun méén kepich?

⁷ Chókkewe chék mi ririéch ngeni Jesus ra tongeni kúna feiéch seni an we asorun méén kepich. Pwata sia silei? Jesus a apasa pwe epwe “pölükü manauan fän iten chiechian kana.” (Joh. 15:13) Chókkewe mi tuppwél ngeni Jiowa, iir mi manaw mwen án Jesus feitiw fénúfan, mi lamot ar repwe káé usun Jesus me tongei i. Áwewe chék ren Apraham, Sara, Moses, me Rahap, iir repwe manawsefál, nge mi lamot ngeni pwal mwo nge chókkana mi angang ngeni Jiowa, ar repwe chiechiéch ngeni Jesus ren ar repwe kúna manaw esemuch.​—Joh. 17:3; Föf. 24:15; Ipru 11:8-12, 24-26, 31.

8-9. Me ren Johannes 15:4, 5, met ach ririéch ngeni Jesus a atufichikich le féri, me pwata a lamot ach sipwe ririéch ngeni Jesus?

⁸ Sia pwapwa ren ach angangfengen me Jesus lón ewe angangen afalafal me asukula aramas usun kapas allimen ewe Mwúún Kot. Lupwen Jesus a nóm fénúfan, i emén sense. Me seni ewe atun Jesus a liwintá láng, a ekkemmweni ewe angangen afalafal me asukula aramas lón wisan mékúren ewe mwichefel. A kúna me aúcheani óm achocho úkúkún óm tufich le álisi aramas le silei i me Seman we. Ren enletin, ei angang a chék tongeni sópwéch ren álillisin Jiowa me Jesus.​—Álleani Johannes 15:4, 5.

⁹ Án Kot we Kapas a affata pwe mi lamot ach sipwe tongei Jesus me akkapéchékkúla ach tongei ren ach sipwe apwapwaai Jiowa. Ina minne, sipwe pwóróus wóón rúáánú mettóch sia tongeni féri ren ach sipwe wiliti chiechien Jesus.

10. Ifa ewe áeúin mettóch sipwe féri ren ach sipwe chiechi ngeni Jesus?

¹⁰ (1) Sissilei Jesus. Sia tongeni féri ena ren ach ákkálleani puken Mateus, Markus, Lukas, me Johannes. Atun sia ekilonei pwóróusen manawen Jesus lón ewe Paipel. epwe lapóló ach tongei me súféliti ren an kirekiréch ngeni aramas. Áwewe chék, inaamwo ika i néún néún kewe chón káé Masta, nge ese ekieki pwe néún kana chón káé iir néún chón angang. Nge a fen pwár ngeniir an ekiek me memmeef. (Joh. 15:15) Lupwen ra letipechou, Jesus a pwal letipechou me fitiir le kechiw. (Joh. 11:32-36) Pwal mwo nge ekkewe chón oputa Jesus, ra kúna pwe chókkewe mi etiwa an pwóróus, ra wiliti chiechian. (Mat. 11:19) Lupwen sia áppirú  Jesus ren féfférún ngeni néún kewe chón káé, epwe échúló ach riri lefilach me ekkewe ekkóch, epwe lapóló ach pwapwa, me watteeló ach tongei me súféliti Kraist.

11. Ifa ewe oruuen mettóch sipwe féri ren ach sipwe wiliti chiechien Jesus, me pwata a lamot ena?

¹¹ (2) Eáni án Jesus ekiek me féffér. Ika sia alapaaló ach sissilei Jesus me achocho le eáni an ekiek, epwe péchékkúleló ach ririin chiechi ngeni. (1 Kor. 2:16) Ifa usun sipwe áppirú Jesus? Ekieki usun ei pwóróus. Jesus a kon ekieki an epwe álisi ekkewe ekkóch lap seni met epwe apwapwaai pwisin i. (Mat. 20:28; Rom 15:1-3) Pokiten a ina usun an ekiek, a kan pennúkú pwisin an mochen fán iten ekkewe ekkóch me a tipemecheres le omusaaló tipisiir. Ese mwittir song ren met aramas ra apasa usun. (Joh. 1:46, 47) Ese pwal akkamwéchú lón ekiekin féfférmwáálin aramas me lóóm. (1 Tim. 1:12-14) Jesus a apasa: “Are oupwe echenifengenikemi, aramas meinisin repwe silei, pwe ämi nei chon kaiö.” (Joh. 13:35) Pwata kese pwisin eisinuk, “Ua ákkáppirú Jesus ren ai achocho úkúkún ai tufich an epwe chék wokkor kinamwe lefilem me pwii kewe Chón Kraist?”

12. Ifa ewe aúlúngátin mettóch sia tongeni féri pwe sipwe wiliti chiechien Jesus, me ifa usun sipwe féri ena?

¹² (3) Álisi pwiin Kraist kewe. Me ren Jesus, ach álisatá pwiin kewe mi kepit, usun nge sia fen álisi pwisin i. (Mat. 25:34-40) Ewe ákkáeúin alen ach álisatá ekkewe mi kepit, ina ren ach unusen fiti ewe angangen afalafal usun ewe Mwú me asukula aramas, usun chék met Jesus a allúkú ngenikich ach sipwe féri. (Mat. 28:19, 20; Föf. 10:42) Ren chék álillisin ekkewe ‘ekoch sip,’ pwiin Kraist kewe ra tongeni féri ei angangen afalafal mi fiffis wóón unusen fénúfan iei. (Joh. 10:16) Ika en emén lein ekkewe ekkóch siip, iwe iteiten ka fiti ena angang, ka pwári óm tong esap chék ngeni pwiin Kraist kewe mi kepit, nge pwal ngeni pwisin Jesus.

13. Ifa usun sipwe tongeni apwénúetá án Jesus we kapasen fén mi mak lón Lukas 16:9?

¹³ Sia pwal tongeni chiechi ngeni Jiowa me Jesus ren ach áeá wéúch le álillis lón ewe angang ra ekkemmweni. (Álleani Lukas 16:9.) Áwewe chék, sia tongeni awora monien álillis fán iten ewe angang wóón unusen fénúfan, me ena álillis a álisatá ewe angangen afalafala ewe kapas allim lón ekkewe fénú towau, kaútáán me túmúnún ekkewe imw me leenien mwich fán iten fel mi enlet, me a awora álillis atun fisin taifun, chechchechin fénú me metakkan. Sia pwal tongeni awora monien álillis lón pwisin ach we mwichefel me ngeni chókkewe mi osupwang sia sissileer. (SalF. 19:17) Ikkena alen ach sipwe tongeni álisi pwiin Kraist kewe.

14. Me ren Efisos 4:15, 16, ifa ewe arúáánún mettóch sia tongeni féri pwe sipwe wiliti chiechien Jesus?

¹⁴ (4) Álisatá kókkótun ewe mwichefelin Chón Kraist. Sia apéchékkúla ach ririéch ngeni Jesus, ewe mékúren mwichefel lupwen sia álleasochisi ekkewe mi fen kefilitá ar repwe túmúnúkich. (Álleani Efisos 4:15, 16.) Áwewe chék, iei sia achocho le áeáéchú meinisin ach kewe Leenien Mwich. Ina popun ekkewe ekkóch mwichefel ra kochufengen me a siwil kiánin ekkewe leenien afalafal. Ar féri ena kókkót a atufichi án ach we mwicheich epwe néúnéúéchú ekkewe monien asor. Iwe nge pokiten ena kókkót, a lamot án ekkóch chón afalafal repwe féri ekkóch ekkesiwil ren nónnómur. Neman ekkóch chón afalafal mi tuppwél ra fen nónnóm lón eú mwichefel ren fite fite ier, iwe ra  fókkun pacheéchfengen me chón ena mwichefel. Nge iei, ekkewe mwán mi ásimaw ra peseer ar repwe fiti pwal eú mwichefel. A ifa me pwapwaan Jesus le kúna án chókkana mi tuppwél álleasochisi ena kókkót!

15. Ifa usun ach chiechi ngeni Jesus epwe péchékkúleló lón mwachkkan?

¹⁵ Chókkewe mi kepit ren án Kot we ngún mi fel, ra eáni ewe ápilúkúlúk ar repwe nóm ren Jesus tori feilfeiló me fiti i lón an nemenem lón án Kot we Mwú. Repwe wesewesen nóm ren Jesus. Repwe kúna Jesus, fós ngeni, me chichchiechi ngeni. (Joh. 14:2, 3) Chókkewe mi ápilúkúlúkún manaw wóón fénúfan repwe pwal meefi án Jesus tong me túmún. Inaamwo ika resap tongeni kúna Jesus, nge lón ena fansoun repwe pwapwaiti ewe manaw Jiowa me Jesus ra awora ngeniir, iwe epwe pwal péchékkúleló ar riri ngeniir.​—Ais. 9:6, 7.

16. Ikkefa ekkewe feiéch sia kúna seni ach chiechiéch ngeni Jesus?

¹⁶ Lupwen sia etiwa án Jesus etiwetiw le wiliti chiechian, sia kúna chómmóng feiéch. Áwewe chék, sia feiéch seni an tong me álillis iei. A suuk ngenikich ach sipwe kúna manaw esemuch. Lap seni meinisin, ach chiechiéch ngeni Jesus epwe atufichikich le eáni ewe esin chiechi mi aúchea seni meinisin ina ach chiechiéch ngeni Seman we, Jiowa. A ifa me watteen feiéchúch ren ach iteni chiechien Jesus!