AÚREK a fókkun tongeni áweiresi letipach. (SalF. 12:25) Ka fen piin weires ren memmeefin aúrek? Ka fen meefi pwe kese chúen tongeni likiitú fan? Ika ina, iwe esap chék en ka meefi ena. Chómmóng me leich sa fen meefi pekkus, aúrek, me letipechou ren sókkopaten popun. Áwewe chék, ekkóch me leich sia kan túmúnú chón ach famili mi samau, a má senikich attongeach, me sa riáfféú pokiten fisin feiengaw watte. Nge met a tongeni álisikich le likiitú ngeni ach kewe aúrek? *

Sa tongeni káé chómmóng mettóch seni pwóróusen King Tafit ren ifa usun sipwe likiitú ngeni ach aúrek. A chómmóng met mi áweires mi fis lón manawan, me fán ekkóch chippú epwe pwal mwo nge máló. (1 Sam. 17:34, 35; 18:10, 11) Met a álisi Tafit le likiitú atun a nóm fán aúrek? Ifa usun sia tongeni áppirú?

A chék fisippék án Tafit kewe osukosuk. Áwewe chék, ekieki met a fis ngeni atun a sú seni King Saul, ewe mi mochen nieló. Atun Tafit me chienan kewe mwán ra liwin seni ar ló maun, ra máirú atun ra silei pwe chón oputer kewe ra solááni pisekiir kewe, kenaló imwer kewe, me sú fán chón ar kewe famili. Met Tafit a féri? “Tafit me chokewe mi nom ren ra kechü, tori resap chüen pöchökül le kechü.” Nge, a fen lallapóló án Tafit aúrek pokiten ekkewe mwán i a lúkúlúk wóór “ra ekiekin monei ngeni fau.” (1 Sam. 30:1-6) Iei Tafit a nóm fán úlúngát watteen osukosuk mi chék fisippék: Chón an we famili ra nóm lón osukosuk, chienan kewe mwán ra mochen nieló, me King Saul a chúen chefetálei. Ina popun, Tafit a fókkun aúrek!

Met Tafit a féri mwirin ena? A mwittir “pöchökülsefäl ren ewe Samol mi Lapalap an we Kot.” Ifa usun Tafit a féri ena? Sia silei pwe i a kan iótek ngeni Jiowa an epwe álisi me ekieki usun an ákkálisi lón ekkewe fansoun. (1 Sam. 17:37; Kölf. 18:2, 6) Tafit a kúna lamoten an epwe kútta emmwen seni Jiowa, ina popun a angei éúréúr seni Jiowa ren met epwe féri. Mwirin án Tafit silei met Jiowa a mochen epwe féri, a mwittir apwénúetá. Mwirilóón, Jiowa a efeiéchúúr me chienan kewe mwán, me ra angeisefáli chón ar kewe famili me pisekiir kewe. (1 Sam. 30:7-9, 18, 19) Ka kúna ekkeei úlúngát mettóch Tafit a féri? I a iótek ngeni Jiowa an epwe álisi, a ekieki usun met Jiowa a fen féri ngeni lón ekkewe fansoun, me a apwénúetá met Jiowa a mochen an epwe féri. Ifa usun sia tongeni áppirú Tafit? Sipwe ppii ekkeei úlúngát mettóch.

1. Iótek. Atun sia poputá le meefi aúrek, sa tongeni iótek ngeni Jiowa an epwe álisikich me fang ngenikich tipachem. A tongeni kinamweeló letipach lupwen sia ereni Jiowa meinisin met mi efisi ach aúrek. Are sia tongeni eáni eú mwochomwochen iótek lón letipach ika a weires ach sipwe iótekittam lón ena atun. Iteiten ach seppiti Jiowa an epwe álisikich, sia pwári pwe sia lúkúlúk wóón i usun chék Tafit, ewe a apasa: “Ewe Samol mi Lapalap ai achau, i imwei imwen maun, pwal i chon angasaei, ai Kot, ai achau ewe ia üa op ie.” (Kölf. 18:2) Mi wor lamoten iótek? Emén pioneer itan Kahlia a apasa: “Mwirin ai iótek, a kinamwe letipei. Iótek a álisiei ai upwe etipeeúfengeni ekieki ngeni ekiekin Jiowa,  me a alapaaló ai lúkúlúk wóón i.” Ewer, iótek ina ewe liffang me ren Jiowa mi fókkun álilliséch mi tongeni álisikich le likiitú ngeni ach aúrek.

2. Ekieki ifa usun Jiowa a fen álisuk. Atun ka nesékúriti minne a fis lón manawom, ka tongeni ekieki óm kewe osukosuk ka tufichin likiitú faar pokiten chék án Jiowa álillis? Atun sia ekieki ifa usun Jiowa a álisikich me pwal néún kewe chón angang lóóm, epwe lapóló kinamween letipach me ach lúkúlúk wóón i. (Kölf. 18:17-19) Emén mwán mi ásimaw itan Joshua a apasa: “Ua makkeetiw ai kewe iótek ra pélú. Ina met a álisiei le chemeni ekkewe atun ua tichiki ngeni Jiowa och mettóch lón ai iótek me a awora met ewe ua osupwangan.” Ewer, lupwen sia ekieki ifa usun Jiowa a álisikich lón ekkewe fansoun, sia meefi ewe péchékkúl mi lamot ngenikich ach sipwe úkkú ngeni ach aúrek.

3. Apwénúetá. Me mwen sipwe féri eú kefil, sia tongeni kútta emmwen mi álilliséch seni án Kot Kapas. (Kölf. 19:7, 11) Chómmóng ra kúna pwe ar research wóón eú wokisin lón Paipel, a alapaaló ar weweiti ifa usun repwe apwénúetá ena wokisin lón manawer. Emén mwán mi ásimaw itan Jarrod a erá: “Ai research wóón eú wokisin a alapaaló ai weweiti, me ua pwal weweiti met Jiowa a ereniei. Ena mettóch a álisiei le wesewesen lúkú met ua álleani pwe upwe tongeni apwénúetá an emmwen.” Lupwen sia kútta án Jiowa emmwen seni ewe Paipel me apwénúetá, epwe mecheresiló ach sipwe meefi kinamwe me pwapwa lupwen sia aúrek.

Tafit a silei pwe a lamot ngeni án Jiowa álillis pwe epwe tongeni likiitú ngeni an aúrek. A fókkun kilisou ngeni Jiowa ren an álisi, ina popun a erá: “Ren en ai Kot üa tongeni mwet won eu tit. I ewe Kot mi apöchökülaei.” (Kölf. 18:29, 32) Neman sipwe meefi pwe ach kewe osukosuk ra kon áweires usun áweiresin eú ttit sise tongeni tó wóón. Nge ren án Jiowa álillis, sia tongeni likiitú fán ese lifilifil osukosuk mi usun eú ttit! Ewer, lupwen sia iótek ngeni Jiowa ren an álillis, ekieki meinisin met a fen féri fán itach, me apwénúetá an emmwen, sia tongeni lúkúlúk pwe i epwe ngenikich ewe péchékkúl me ewe tipachem mi lamot ngenikich pwe sipwe tongeni likiitú ngeni ach aúrek!