1, 2. Pwata a lamot sipwe ákkáiti ekkewe ekkóch pwe repwe feffeitá lón ar angang ngeni Kot me epwe tongeni suuk ngeniir ekkóch angang?

 JESUS a angang weires le afalafal ngeni aramas usun ewe Mwúún Kot. A pwal awora watteen fansoun le ákkáiti néún kewe chón káé. A áiti ngeniir ifa usun repwe asukula me túmúnú néún Kot kewe aramas. Ekkewe chón káé ra káé pwe repwe usun ekkewe chón masen siip mi túmúnú néúr siip. (Mat. 10:5-7) Filip a fókkun angang weires lón ewe angangen afalafal, nge a pwal awora fansoun le ákkáiti néún kewe fépwúl ar repwe féri ena angang. (Föf. 21:8, 9) Lón ei fansoun a pwal lamot sipwe ákkáiti ekkewe ekkóch. Pwata?

² Lón ekkewe mwichefel wóón unusen fénúfan, mi wor chómmóng minefé chón káé resaamwo papatais. A lamot ngeniir ar repwe angei káit. Mi lamot sipwe álisiir le weweiti lamoten ar repwe pwisin álleani me káé ewe Paipel. Mi pwal lamot ach sipwe áiti ngeniir ifa usun repwe afalafal me asukula aramas usun ewe kapas allim. A lamot ngeni Chón Kraist mwán mi kerán papatais ar repwe angei káit pwe mwirin och fansoun repwe tongeni eáni ewe wis chónálillisin mwichefel me ewe wis mwán mi ásimaw. Meinisin  chón ewe mwichefel ra tongeni álillis le ákkáiti ekkewe minefé.​—SalF. 4:2.

3, 4. (a) Ifa usun Paulus a pwáraatá ririin án emén káé Paipel ngeni uwaéchún an angangen afalafal? (b) Me mwen ach sipwe apéchékkúla ngeni néúch chón káé ar repwe pwisin káé Paipel, met itá sipwe pwal féri?

³ Mi lamot ngeni emén me emén néún Jiowa chón angang an epwe álleani me káé Paipel pwe epwe silei letipen Kot. Aposel Paulus a áwewe ngeni chón ewe mwichefelin Kolose usun ei mettóch lupwen a apasa: “Aisap ükütiu le iotek fän itemi. Aia tüngor ngeni Kot pwe epwe aurakemi ren tufichin silei letipan.” Pwata a kon lamot ngeniir ar repwe álleani me káé ewe Paipel? Pokiten ina met epwe etipachemer me álisiir le weweiti ifa usun repwe ‘manaueni eu manau mi fich ngeni ach Samol o repwe föri mine epwe pwapwa ren.’ Epwe pwal álisiir le féri “sokopaten föför mürina,” ekkewe Jiowa a mochen ar repwe féri, ákkáeúin ewe angangen afalafala ewe kapas allim. (Kol. 1:9, 10) Ina minne, ika sia káé ngeni emén, mi lamot sipwe álisi le weweiti pwe an álleani me káé ewe Paipel iteitan epwe álisi i lón an angang ngeni Jiowa.

⁴ Sise tongeni álisi néúch kewe chón káé le weweiti lamoten ar repwe pwisin káé Paipel ika pwe kich pwisin sise káé Paipel. Ika sia álleani ewe Paipel iteitan me ekilonei minne sia álleani, epwe álisikich lón manawach me ach angangen afalafal. Áwewe chék, lupwen sia afalafal, nge emén a eáni eú kapas eis mi weires, iwe sia tongeni néúnéú ewe Paipel le pélúweni ena kapas eis. Are ach álleani usun án Jesus, Paulus, me pwal ekkóch rese fangetá lón ar angang, epwe apéchékkúlakich ach sipwe akkachocho le afalafal pwal mwo nge fán weires. Pwal och, ach apwóróusa ngeni ekkewe ekkóch ekkewe lesen sia káé me ifa usun ra álisikich, epwe tongeni apéchékkúla ar repwe alapaaló ar kákkáé Paipel pwe repwe pwal kúna ekkena esin feiéch.

5. Ifa usun kopwe álisi ekkewe minefé ar repwe eérenaaló le pwisin káé ewe Paipel?

⁵ Ka tongeni pwisin eisinuk, ‘Ifa usun upwe áiti ngeni nei chón káé an epwe káé ewe Paipel iteitan?’ Neman ka tongeni áiti ngeni ifa usun ka ammólnatá ewe lesen oupwe káéfengen. Ka tongeni pesei an epwe álleani ewe pwóróus mi weneiti met oua káé, ewe lón ewe kinikin “Pwal Ekkóch Áwewe” lón ewe puk Met ewe Paipel A Wesewesen Apasa? Me pesei an epwe pwal kútta lón Paipel masouen ekkewe wokisin mi makketiw. Mwirin, ka tongeni áiti ngeni ifa usun epwe ammólnatá fán iten ekkewe mwich pwe epwe tongeni uwawu meefian. Pesei an epwe álleani ekkewe Leenien Mas lupwen ra katowu. Ka pwal tongeni áiti ngeni ifa usun epwe kútta pélúwen kapas eis usun Paipel ren an áeá ewe Watchtower Library are ewe Watchtower ONLINE LIBRARY. Lupwen a achocho le féri ekkeei sókkopaten mettóch lón an pwisin káé Paipel, ese mwáál epwe lapóló an pwapwaiti me an mochen káé.

6. (a) Ifa usun kopwe álisi noum chón káé le ámááraatá an aúcheani ewe Paipel? (b) Lupwen a mááritá án emén chón káé enletin aúcheani ewe Paipel, met a tongeni féri?

 ⁶ Lupwen sia káé ngeni emén, sia mochen álisi an epwe mirititi aúchean ewe Paipel pún epwe álisi le silefichi Jiowa. Mi fen éch ach sipwe áiti ngeni ifa usun epwe pwapwaiti an káé Paipel lap seni ach sipwe eriáni le káé. Lapólóón an sile lón Paipel, pwal ina lapólóón an epwe meefieni meefien ewe soumakken kélfel, ewe a kélú: “Me rei, a mürina pwe üpwe kan ngeni Kot. Üa filätä Kot ewe Samol mi Lapalap pwe epwe ai lenien op.” (Kölf. 73:28) Án Jiowa we manaman mi fel epwe fókkun álisi emén mi mochen arap ngeni.

7. Ifa usun Jesus a áiti ekkewe chón afalafala ewe kapas allim? (Ppii ewe sasing lepoputáán ei lesen.)

⁷ Sia tongeni káé chómmóng mettóch seni napanapen án Jesus ákkáiti néún kewe aposel. Jesus a uweir lupwen a ló afalafal, me ra kúna ifa usun a asukula aramas. A pwal ngeniir kapasen éúréúr mi tichik ren ifa usun repwe afalafal. (Mat., sópwun 10) ^[1] Lón chék ekis fansoun, ekkewe aposel ra káé seni Jesus napanapen an asukula aramas usun ewe enlet. (Mat. 11:1) Sipwe ppii ruu mettóch sia tongeni áiti ngeni ekkewe minefé ar repwe féri lupwen ra afalafal.

8, 9. (a) Ifa usun Jesus a fós ngeni ekkewe aramas a afalafaler? (b) Ifa usun sia tongeni álisi ekkewe mineféén chón afalafal ar repwe fós ngeni aramas usun chék met Jesus a féri?

⁸ Fósfengen me aramas. Jesus ese chék fós ngeni pwiin aramas fansoun meinisin. Fán chómmóng a pwal fós ngeni emén aramas, nge fán chiechiéch. Áwewe chék, a fós ngeni emén fefin mi úfúf konik lón ewe ito mi kkan ngeni ewe telinimwen Sikar. (Joh. 4:5-30) Jesus a pwal fós ngeni Mateus, pwal itan Lefi, emén chón angei takises, me a etiwa an epwe néún chón káé. Mateus a etiwa ena wis, mwirin a tingorei Jesus me pwal ekkóch ar repwe mwéngé lón imwan we. Iwe, me ikena ie Jesus a fós ngeni chómmóng aramas.​—Mat. 9:9; Luk. 5:27-39.

⁹ Jesus a pwal fós ngeni Nataniel lón napanap mi chiechiéch inaamwo ika Nataniel a apasa mettóch ese éch fán iten ekkewe chón Nasaret. Pokiten án Jesus chiechiéch le fós ngeni, a siwil meefien Nataniel usun Jesus, ewe re Nasaret. Nataniel a pwal mochen káé ekkóch pwóróus seni Jesus. (Joh. 1:46-51) Seni án Jesus leenien áppirú, sia káé pwe lupwen sia fós ngeni aramas fán kirekiréch me lón napanapen chiechiéch, ese mwáál repwe mochen aúseling ngenikich. ^[2] Lupwen sia áiti ngeni ekkewe minefé ar repwe fós ngeni aramas lón ena esin napanap, repwe fókkun pwapwaiti ar angangen afalafal.

10-12. (a) Ifa usun Jesus a sópweló le álisi chókkewe mi pwáraatá ar pwapwaiti ewe kapas allim? (b) Ifa usun sipwe álisi ekkewe minefé ar repwe lipwákéchúló lón ar asukula aramas ewe pwóróus mi enlet lón Paipel?

¹⁰ Asukula chókkewe mi mochen aúseling. A chómmóng án Jesus angang. Nge a awora watteen fansoun ngeni aramas mi mochen aúseling ngeni me asukuler chómmóng mettóch. Áwewe chék, eú rán, eú pwiin aramas ra chufengen leppi pwe repwe aúseling ngeni Jesus. I a tétá wóón efóch waa ren Petrus, iwe a afalafal ngeni aramas me ikena ie. Mwirin ena, Jesus a pwal mochen áiti ngeni Petrus eú lesen. Iwe, Jesus a féri eú manaman pwe Petrus epwe liapeni chómmóng iik. Iwe mwirin, a ereni Petrus: “Seni ikenai kopwe eman chon attaua aramas.” Mwittir chék, Petrus me chienan kewe ra “ürätä waar kewe le pi, ra likitala meinisin o tapwela mürin Jesus.”​—Luk. 5:1-11.

¹¹ Nikotemus pwal i emén mi mochen káé ekkóch pwóróus seni Jesus. Nge pokiten Nikotemus chón ewe mwichen án chón Jus soukapwúng mi tekia, i a niwokkus ren met aramas repwe apasa ika ra kúna an fós ngeni Jesus. Iwe, a ló chuuri Jesus lepwin. Jesus ese asúoló, nge a fen etiwa i me a awora fansoun le áweweei ngeni ekkewe pwóróus mi  enlet. (Joh. 3:1, 2) Fansoun meinisin Jesus a tipemecheres le áeá an fansoun le asukula aramas ewe enlet me apéchékkúla ar lúkú. Sipwe pwal ina usun, mi lamot sipwe tipemecheres le chuuri aramas lón ewe fansoun mi fich ngeniir, me a lamot sipwe awora fansoun le álisiir le weweiti ewe Paipel.

¹² Lupwen sia mwin me ekkewe mineféén chón afalafal, sia tongeni áiti ngeniir ar repwe liwiniti chókkewe ra mochen pwe repwe sópweló ar pwóróusfengen. Sia pwal tongeni etiwa ekkewe minefé ar repwe fitikich le chuuri néúch kewe chón káé me lupwen sia chuursefáli aramas. Ika ina, repwe kúna ifa usun sia asukula aramas me meefi pwapwaan ach álisi chókkana le silei ewe enlet usun Jiowa. Iwe, ekkena minefé repwe mwasangasang le chuursefáli aramas me káé ewe Paipel ngeniir. Repwe pwal káé ar repwe mosonottam me ar resap mwittir fangetá ika rese kúnasefáli ekkewe aramas lón imwer.​—Kal. 5:22; ppii ewe pwóór itelapan “ Ese Fangetá.”

13, 14. (a) Met óm ekiek usun pwóróusen chókkewe lón Paipel mi pennúkúóló chómmóng mettóch fán iten ekkewe ekkóch? (b) Ifa usun sia tongeni áiti ngeni ekkewe minefé me alúwél me fépwúl ar repwe pwáraatá ar tong ngeni pwiich kewe Chón Kraist?

¹³ Jiowa a mochen néún kewe chón angang repwe tongfengen usun chék eú famili, me repwe angang fán iten emén me emén leir. (Álleani Lukas 22:24-27; 1 Petrus 1:22.) Ewe Paipel a áiti ngenikich pwe Jesus a fangóló mettóch meinisin, kapachelong pwisin manawan, pwe epwe álisi aramas. (Mat. 20:28) Torkas “a fang an fansoun meinisin le föri föför mürina o alisi chon wöüngau.” (Föf. 9:36, 39) Maria a “angang weires” fán iten pwiin kewe chón lúkú lón Rom. (Rom 16:6) Ifa usun sipwe tongeni álisi ekkewe minefé le weweiti watteen lamoten ar repwe féffér múrinné ngeni pwiir kewe chón lúkú?

¹⁴ Sia tongeni etiwa ekkewe minefé ar repwe fitikich le chuuri ekkewe chinnap are chón semmwen. Lupwen ekkewe sam me in ra ló chuuri chókkana, ra tongeni uwei néúr kewe ika mi fich. Ekkewe mwán mi ásimaw ra tongeni etiwa ekkewe alúwél me fépwúl are minefé ar repwe fitiir atun a lamot repwe awora mwéngé ngeni ekkewe chinnap are féri mettóch mi ta lón imwer. Lupwen ekkena alúwél me fépwúl are minefé ra kúna án ewe mwichefel túmúnúfengeniir, iwe repwe pwal áppirúúr. Áwewe chék, atun án emén mwán mi ásimaw ló afalafal lón eú leeni mi towau seni telinimw a pwal chuuri pwiin kewe chón lúkú lón ena leeni me ppii ika ifa usur. Emén alúwél a kan sou fiti ena mwán mi ásimaw, iwe a káé seni an epwe pwal ekieki met a tongeni féri pwe epwe álisi pwiin kewe Chón Kraist.​—Rom 12:10.

15. Pwata a lamot án ekkewe mwán mi ásimaw repwe ekieki feffeitáán ekkewe mwán lón ewe mwichefel?

¹⁵ Jiowa a ewisa ngeni ekkewe mwán ewe wis le asukula ewe mwichefel án Kot we Kapas. Ina popun a lamot ngeni Chón Kraist mwán ar repwe silei ifa usun repwe lipwákéch lón ar asukula ewe mwichefel lupwen ra eáni afalafal. Ika en emén mwán mi ásimaw, neman ka tongeni aúseling ngeni emén chónálillisin mwichefel atun a praktis an afalafal me álisi an epwe lipwákéchúló.​—Ne. 8:8. ^[3]

16, 17. (a) Ifa usun Paulus a túmúnú feffeitáán Timoty lón an angang? (b) Ifa usun ekkewe mwán mi ásimaw repwe áiti ekkewe Chón Kraist mwán mi tongeni wiliti chón masen ewe mwichefel?

¹⁶ Mi wor watteen lamoten án chómmóng Chón Kraist mwán repwe angei káit pwe repwe tufichin wiliti chón masen ewe mwichefel. Paulus a áiti Timoty me a pesei an epwe pwal áiti ekkewe ekkóch. Paulus a erá: “Kopwe pöchökül ren ewe ümöümöch mi nom lon Kraist Jesus. Met ka rongorong seniei pwe üa afalafala me mwen chomong chon pwärätä, kopwe lükü ngeni ätekewe mi allükülük o tufichin asukula pwal ekewe ekoch souläng.” (2 Tim. 2:1, 2) Timoty a káé chómmóng mettóch  seni Paulus, emén aposel me i emén mwán mi ásimaw. Áwewe chék, a káé ifa usun epwe lipwákéchúló lón an angangen afalafal me ifa usun epwe álisi chón ewe mwichefel.​—2 Tim. 3:10-12.

¹⁷ Paulus a awora watteen fansoun le áiti Timoty pún a mochen epwe fókkun lipwákéch. (Föf. 16:1-5) Ekkewe mwán mi ásimaw ra tongeni áppirú Paulus ren ar repwe uwei ekkóch chónálillisin mwichefel lupwen ra ló chuuri ekkóch chón mwichefel pwe repwe apéchékkúler. Ika ina, ekkewe chónálillisin mwichefel repwe káé seni ekkewe mwán mi ásimaw ifa usun repwe asukula ekkewe ekkóch, ifa usun repwe mosonottam me pwáraatá tong, me ifa usun repwe lúkúlúk wóón Jiowa lón ar túmúnú néún kewe siip.​—1 Pet. 5:2.

18. Pwata sia mochen alamota ewe angangen ákkáiti aramas lón án Jiowa angang?

¹⁸ Lón ei fansoun sópwólóón, mi lamot ngeni chómmóng minefé ar repwe angei káit pwe repwe lipwákéchúló lón ar angangen afalafal. A pwal lamot ngeni ekkewe Chón Kraist mwán ar repwe káé ifa usun repwe túmúnú ewe mwichefel. Jiowa a mochen meinisin néún chón angang repwe angei káit mi elipwákéchúúr, me a pwal ewisa ngenikich ach sipwe álisi ekkewe minefé. Ina popun, a lamot sipwe achocho le ákkáiti ekkewe ekkóch, usun met Jesus me Paulus ra féri. Mi lamot sipwe achocho le ákkáiti chómmóng aramas pokiten a chúen watte ewe angang lón ewe angangen afalafal me mwen warotoon ewe sópwólóón.

19. Pwata sia fókkun lúkú pwe epwe sópwéch ach tinikken le ákkáiti ekkewe ekkóch lón án Jiowa angang?

¹⁹ A lamot fansoun me angang weires fán iten ei angangen ákkáiti ekkewe minefé. Nge sia tongeni lúkúlúk pwe Jiowa me Jesus repwe álisikich le silei ifa usun sipwe áiti ekkewe ekkóch lón ewe napanap mi múrinné seni meinisin. Sipwe pwapwa lón ach kúna án chókkewe mi fen angei káit “achocho le angang weires” lón ewe mwichefel me lón ewe angangen afalafal. (1 Tim. 4:10) Nge a pwal lamot pwisin kich sipwe akkachocho le feffeitá, ámúrinnééló napanapach kewe napanapen Chón Kraist, me akkarap ngeni Jiowa.