Ka fen álleaniéchú meinisin ekkewe Leenien Mas lón ei ier? Ika ewer, ppii ika ka tongeni pélúweni ekkeei kapas eis:

Itá epwe ifa féfférúch ngeni ekkewe Chón Kraist mi kepit?

Sia aúcheani ar lúkú, nge sise átekiaretá pwe usun itá ra aúchea lap seni ekkewe ekkóch. Sia túmúnúkich seni ach kon eingaatá aramas. (Jut. 16) Sise pwal eisiniir ekkewe esin kapas eis mi weneiti manawer usun ar ápilúkúlúk.​—w20.01, p. 29.

Met a ánneta ngonuk pwe Jiowa a áfánnuk?

Paipel a áiti ngenikich pwe Jiowa a áfánnuk me mwen óm kesaamwo uputiw. Me a aúselinga óm kewe iótek. A silei masouen letipom me met ka ekieki, me minne ka féri a kkúú letipan. (1 Kron. 28:9; SalF. 27:11) A paanukoto ngeni i.​—w20.02, p. 12.

Ineet atun sipwe fós me ineet atun sipwe fanafaneló?

Sia kan pwapwa le fós usun Jiowa. Sia fósetá lupwen sia kúna án emén epwele turulong lón feiengaw. Ekkewe mwán mi ásimaw ra fósetá atun mi lamot ar repwe awora ngeni emén kapasen apwúng. Sise kan fós usun are kapas eis usun pwóróusen ach angang lón ekkewe leeni mi pinepin ie. Sise kan pwári pwóróus mi monomon.​—w20.03, p. 20-21.

Ifa usun ekkewe lifichifichimas lón Sowel sópwun 2 ra sókko seni ekkewe lón Pwärätä sópwun 9?

Sowel 2:20-29 a apasa pwe Kot epwe asúoló ekkewe lifichifichimas me a pwonei pwe epwe awora siwilin met ewe feiengaw mi fis seni minne ekkewe lifichifichimas ra atai. Mwirin ena, Kot a tiinaato wóór an we ngún mi fel. Ekkena mettóch ra pwénúetá atun ekkewe chón Papilon ra maunei Israel me mwirin. Pwärätä 9:1-11 a áweweei usun ekkewe mi kepit lón ach ei fansoun, iir mi usun ekkewe lifichifichimas lón ar esilefeili án Kot kapasen kapwúng lón ei ótót mi ngaw, iwe ena mettóch a eú minen áweires ngeni chókkewe iir mi pekini ei ótót mi ngaw.​—w20.04, p. 3-6.

Ié ewe kingen efeng lón ei fansoun?

Ewe mwúún Russia me chienan kewe. Ra maunei néún Kot kewe aramas ren ar allúkú an epwe pinepin ewe angangen afalafal, me ra pwáraatá pwe ra oput néún Jiowa kewe aramas. Ewe kingen efeng a okkuffengen me ewe kingen éér.​—w20.05, p. 13.

Itá “uwaan ewe ngún mi fel” a chék wewe ngeni ekkewe tiu napanap mi mak lón Kalatia 5:22, 23, NW?

Aapw. Ewe ngún mi fel a álisikich le napanapeni pwal ekkóch napanap mi múrinné, áwewe chék ren ewe napanap pwúng. (Ef. 5:8, 9)—w20.06, p. 17.

Ifa efeiengawen óm post pwóróus usum online?

Minne ka post online, eli epwe ámmeef ngeni aramas pwe ka sikesik, nge kese tipetekison.​—w20.07, p. 6-7.

Met ekkewe chón afalafal Chón Kraist ra tongeni káé seni ekkewe chón attaw mi lipwákéch?

Ra attaw ikewe me lón ewe atun a ngir. Ra káé le néúnéú ewe pisekin attaw mi pwúng. Ra pwora le angang fán sissiwilin mwékútúkútún ásepwál. Sia pwal tongeni ina usun lón ach angangen afalafal.​—w20.09, p. 5.

Ifa usun sia tongeni alapaaló án néúch kewe chón káé tongei Jiowa?

Sia tongeni peseer le álleani ewe Paipel iteiten rán me ekilonei minne ra álleani. Me sia tongeni áiti ngeniir ifa usun repwe iótek.​—w20.11, p. 4.

Itá án Paulus apasa pwe “meinisin repwe manausefäl lon Kraist,” a weneiti aramas “meinisin”?​—1 Kor. 15:22.

Ewe aposel Paulus ese erá pwe aramas meinisin repwe manawsefál. Nge a fós usun ekkewe Chón Kraist iir mi kepit, chókkewe ra “küna pin lon Kraist Jesus.” (1 Kor. 1:2; 15:18, Testament mi Fö)​—w20.12, p. 5-6.

Met ekkewe mi kepit repwe féri mwirin ar “wilila lon eu chök morupun mas” atun “ewe amüchülan rappwa epwe tik”?​—1 Kor. 15:51-53.

Repwe tapweló mwirin Jesus le nemeni ekkewe mwúún aramas ren efóch wok mi ffér seni mechá. (Pwär. 2:26, 27)​—w20.12, p. 12-13.